Matiyu 2

Aza e kuyeve a̱ ta̱wa̱i kene Yesu

1Ayin a na Hiridu#2:1 Mogono ma nam pa Hiridu a̱yi ɗa Hiridu Vuzagbayin.† wi o tsugono a ɗaɗa a matsai Yesu a̱ likuci i Batalami vu uɓon u Yahuda. Megeshe ma yaꞋin kenu, ɗa uma o yoku aza e kuyeve a azangata a̱ uta̱i a kasana ɗa a yawai a Urishelima.†

2Ɗa e ecei, “Te ɗai maku ma na a matsai va vuza na wi mogono ma Ayahuda?† Ce ene ta̱ kazangata ka̱ ni a kasana ɗa ta na tsu ta̱wa̱i adama a na ci cikpa yi.”

3Ana Hiridu Mogono u panai nahannai, ɗa u voɗotsoi, koɓolo n uma a̱ ni ra̱ka̱ a Urishelima. 4U ɗekei anan ganu vu gbagbaꞋin† ra̱ka̱ nu nlum n Wila̱,† ɗa we ecei le, “Te ɗai a kumatsa Kirisiti Kishi va?”

5Ɗa a̱ ushuki, “A̱ likuci i Batalami i Yahuda. Keneki Mika ka ɗana ta̱ ili i nam pa a Katagarda ka Ciɗa:†

6‘Amma avu likuci i Batalami, punu a uɓon u Yahuda,

likuci i gbayin i ɗa a̱ ka̱tsuma̱ ka̱ likuci i Yahuda ra̱ka̱.

Mogono mi ta̱ a̱ kuta̱ wa̱ nu,

vuza na u kokpo an maguɓi ma uma a̱ va̱ Israila.’ ”#Mik. 5:2.

7Ɗa Hiridu u ɗekei omoci a na a̱ uta̱i a kasana ka, adama a na u yaꞋan oɓolo n ele a usokongi, ɗaɗa omoci a a danai ni ayin a na kazangata ka ku uta̱i derere. 8Ɗa u danai le, “Ɗenga̱i ka̱ta̱ i bana a Batalami ka̱ta̱ i la̱nsa̱ maku ma mayin. Ayin a na baci ye enei ni, ka̱ta̱ i bono i dana mu adama a na mpa feu m bana n cikpa yi.”

9Aza e kuyeve a a panai ili i na mogono ma ma danai, ɗa a̱ uta̱i a lyaꞋi kelime. Ɗa kazangata ka ka lazai kelime ke le, ali ɗa ka shamgbai a̱ ubuta̱ u na maku ma mi. 10Ana e enei kaꞋa, ɗa ma̱za̱nga̱ ma shanai a̱ɗu e le ka̱u! 11Ana a uwai a kpaꞋa ka, ɗa e enei maku ma m Meri† a̱na̱ku a̱ ni, ɗa a̱ kuɗa̱ngi ɗa a cikpai maꞋa. Ɗa a̱ uta̱ka̱i kuneꞋe ku le ka azanariya n ili i ma̱gula̱ni† i re,#2:11 La̱na̱ udani “Furankinsen” ko “Mur” a̱ Ubuta̱ wi ili i Kuyeve. ɗa e nekei maku ma. 12Amma ɗa Ka̱shile ka kushei aza e kuyeve a̱ ubuta̱ wa alatani, ka̱ta̱ o bono n u Hiridu ba. Ɗa o bonoi a iɗika i le n uye u yoku kau.

A sumakai n Yesu a kubana Masar

13Ana aza e kuyeve a a lazai, ɗa kalingata ka̱ Ka̱shile† ka banai u Isuhu tsa alatani ɗa u danai, “Ɗenga̱! YaꞋan gogoꞋo ka̱ta̱ vi ɗika maku ma n a̱na̱ku a̱ ni vu suma a kubana Masar! Vi shamgba ɗe ali ayin a na n danai nu vu bono, adama a na Hiridu wi ta̱ a̱ kula̱nsa̱ maku ma wa kuna.” 14Ɗa u ɗenga̱i, u ɗikai maku ma n a̱na̱ku a̱ ni Meri ɗa u lazai a kubana Masar n kayin. 15Ɗa a̱ da̱sa̱ngi ɗe Masar ali ukpa̱ u Hiridu. Ili i nam pa i yaꞋan ta̱ nahannai adama a na a shatangu ili i na Ka̱shile ka danai a̱ ubuta̱ u keneki Hosiya: “N ɗeke ta̱ maku ma̱ va̱ mu uta̱ a iɗika i Masar.” #Hos. 1:1.

Hiridu wu unai muku mo olobo

16A ayin a nan lo ra̱ka̱, ana Hiridu we enei aza e kuyeve a kparasa yi ta̱ ɗe, ɗa u yaꞋin wupa ka̱u. Ɗa u nekei kadanshi n utsura a una muku mo olobo ra̱ka̱ n na mi a Batalami n uka̱ra̱Ꞌi u ni, aza a na a yawai a̱ya̱ e re a kubana ɗaka.#2:16 “A̱ya̱ e re” punu na i ta̱ a kadanshi ka̱ a̱ya̱ e re n wotoi u na wi kelime dem a kubana ɗevu n a̱ya̱ a tatsu. U zagba ta̱ a̱ya̱ a nan lo adama a na aza e kuyeve a a dana yi ta̱ ayin a na a matsai maku ma. 17Ɗa ili i na Ka̱shile ka dansai a̱ ubuta̱ u keneki Irimiya† yo okpoi mayun:

18“A panai ka̱la̱ka̱tsu ɗe a Rama,

vuza yoku a̱ ma̱shi ka̱u adama a una̱mgbuka̱tsuma̱.

Rahila† a̱ ma̱shi adama a̱ muku n ni.

U fuɗa u reme ka̱ɗu ka̱ ni ba,

adama a na a̱ kuwa̱ ta̱.”#Ir. 31:15.

O bonoi a Nazara

19Wanai ɗai Hiridu u kuwa̱, ɗa kalingata ka̱ Ka̱shile ka̱ ta̱wa̱i u Isuhu tsa alatani kpamu a̱yi ɗe biꞋi Masar. 20Ɗa kalingata ka ka danai ni, “Ɗenga̱, vi ɗika maku ma n a̱na̱ku a̱ ni, ka̱ta̱ vu bono a iɗika yi Israila,† adama a na aza a na i a kuciga kuna maku ma a̱ kuwa̱ ta̱.”

21Ɗa Isuhu u ɗenga̱i, ɗa u ɗikai maku ma n a̱na̱ku a̱ ni, ɗa u bonoi a iɗika ya aza a Israila. 22Amma ana u panai Akiliyu#2:22 Herod Akiliyu Mogono maꞋa ma gbani-gbani ɗa a takpai ni gaɗi vu kakuba ko tsu gono. Ɗa mokoshi ma̱ ni Hiridu Antiba wo okpoi mogono. maku ma Hiridu a̱yi ɗa mogono, ɗa u panai wovon. Ɗa a̱ ubuta̱ wa alatani u yoku, Ka̱shile ka danai ni u bana a uɓon u Ga̱lili. 23Ɗaɗa u banai u yongoi a̱ likuci i na e ci ɗeke Nazara. Ɗa ta na ili i na Ka̱shile ka danai a̱ ubuta̱ u eneki i shanai: “I ta̱ e kuɗeke yi vuma vu Nazara.”

Tällä hetkellä valittuna:

Matiyu 2: asgNT

Korostus

Jaa

Kopioi