Amainhama 3
3
Omuntu adheemera Katonda
1Omusota gwali gwa lugezigezi okusinga ensolo edh'omu nsiko edhindi dhoonadhoona Musengwa Katonda dhe yakola. Agho gwabuuza omukazi guti: “Obwo bwenebwene Katonda yakoba ati mutalyanga kibala kya ku muti gwa mu nimiro waire omulala guti?”#Kwol 12:9; 20:2 2Omukazi yairamu ati: “Tuli ba idembe okulya ebibala eby'oku miti gyonagyona 3okutoolaku ebyo eby'oku muti oguli ghagati mu nimiro. Katonda yatukoba obutalyanga kibala kya ku muti ogwo, oba waire okugugemaku; ati lwe tulikiryaku lwe tulifa.”
4Aye omusota gwakoba guti: “Busa naire! Timwidha kufa.#2 Kor 11:3 5Katonda yakoba atyo kuba aidhi nga bwemulirya ku muti ogwo, amaiso gaimwe galizibuka, mwaba ng'oti ni mwene, mwamanha obulungi n'obubi.” 6Omukazi yaabona ng'omuti gusanhusa amaiso era nga mulungi okulyaku, era yaagwegomba olw'amagezi ge gwali guja okubaleetera. Agho yaanoga ku bibala byagwo yaalya, era yaagha ni ku musaadha we, yeena yaalya. 7Olwo amaiso gaibwe bombi gaazibuka, baategeera nga bali madu. Kale baatunga amakaba ag'omuti omutiini, baagakolamu ebivaalo beeghemba.
8Agho baawulira Musengwa Katonda ng'ali kutambula mu nimiro eigulo nga kuwoze era beegisa mu miti egy'omu nimiro nga tibenda ababone. 9Aye Musengwa Katonda yaayeta omusaadha yaamubuuza ati: “Oli gha?” 10Yaamwiramu ati: “Nkuwuliire ng'oli mu nimiro, naatya, kuba mbaire madu kye nviire ni neegisa.” 11Katonda yaamubuuza ati: “Naani akukobeire ati oli madu? Oliire ku kibala eky'oku muti gwe nakukoba obutalyangaku?” 12Omusaadha yairamu ati: “Omukazi ye wampa okubanga ninze n'ampaire ekibala ekyo zeena naalyaku.” 13Musengwa Katonda yaabuuza omukazi ati: “Kiki kino ky'okoze?” Omukazi yairamu ati: “Omusota n'ogunkemenkereiza naalya.” #2 Kor 11:3
Katonda asala omusango
14Musengwa Katonda yaakoba omusota ati:
“Olw'okuba okoze ekyo,
okolimiirwa okusinga ensolo dhoonadhoona enfuge
n'edh'omu nsiko.
Okuva n'olwaleero oidha kutambulanga nga weekululira ku nda yo,
era olyenga enkungu enaku dhoonadhoona edh'obulamu bwo.#Kwol 12:9; 20:2
15Ndidha kutaagho enzigu ghagati wo n'omukazi,
ni ghagati gh'eizaire lyo n'eizaire ery'omukazi.
Eizaire ery'omukazi eryo liidha kukubanga omutwe ligutentene,
era weena oidha kulimoodhanga ebigere.”
16Yaakoba omukazi ati:
“Ndidha kwongeranga obulumi bungi mu biseera byo ng'oli nda;
mu bulumi mw'onaazaaliranga abaana.
Ate nga oidha kwendanga inho okuba aghali balo,
era aidhanga kukufuga.”
17Yaakoba omusaadha ati:
“Olw'okuba wawulirisa mukazi wo bye yakukoba,
waalya ku kibala eky'omuti
gwe nabalobera okulyaku,
eitaka likolimiirwa.
Mu kufaabiikana mw'onaatoolanga eky'okulya, enaku dhoonadhoona
edh'obulamu bwo.#Heb 6:8
18Eitaka eryo liidha kumerangaku amawa n'ebindi ebikufumita;
era oidha kulyanga ebimera eby'omu nsiko.
19Oidha kufaabiikananga era ogezimulenga,
memale ofunenga eky'okulya,
okutuusa lw'oliirayo mu itaka
mwe wakolebwa.
Mu itaka mwe wava,
era mu itaka mw'oliira.”
20Omusaadha yaatuuma mukazi we eriina Eva, kuba n'eyali inhina w'abalamu boonaboona. 21Musengwa Katonda yaakolera Adamu ni mukazi we ebivaalo eby'amawu, yaabavaaza.
Adamu ni Eva babingibwa mu Edeni
22Agho Musengwa Katonda yaakoba ati: “Bona, omuntu afuuse ng'oti niife, okumanhanga obulungi n'obubi. Tutamuganha kunoga kibala ku muti ogw'obulamu, na kukirya, n'aghangaala byanda na byanda.”#Kwol 2:7; 22:2, 14, 19 23Kale Musengwa Katonda yaamutoola mu nimiro ey'e Edeni, alimenga eitaka mwe yakolebwa, 24yaamubingira kuliya. Ku luuyi olw'enimiro olw'e buvandhuba yataayo ebitonde ebiri n'amaghagha ebyetebwa kerubi, era n'empiima eyaka, era ng'ekyukira ku ndhuyi dhoonadhoona okukuumanga engira eja ku muti ogw'obulamu.
Tällä hetkellä valittuna:
Amainhama 3: Sog
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Baibuli Ekibono kya Katonda © The Bible Society of Uganda, 2014