Matyu 4
4
Towa fale lempesesi Jisas
1Leye lo Riri Teingi lite Ma Ili lunkuwo Jisas le le kesi Jisas lila le tef oli era re telmane ye yawi piti ma towa lempesesi, luluwo wai piti Jisas singe lo olo. 2Jisas laplei oweli kolo, lato yawi le epli re mulpou wurutei (40) re fei, le nimpi nalei. 3Leye lo towa le falowo Jisas le le lirpeiye, “Wuso ye ninge lite Ma Ili, ye irpepe era fei pepei, le pe ma weitei pire luom.”
4Jisas namti lirpeiye, “Olo sungoi pe paptei il pite Ma Ili pirpei polpepei, luom yawi miso kanio metine kolo, olo. Wolo le ma lingiepe il piti fale nemi lite Ma Ili, le le soma ratei.”
5Leye lo, towa kesi Jisas lila le uf ili Jerusalem le le laltei lile tupe lite winem lite Ma Ili. 6Towa lirpowo Jisas-ye, “Wuso ye ninge lite Ma Ili, ye iri yotei ualo, wusoli il pite Ma Ili paptei pirpei polpepei, ‘Ma Ili ma lirpepe ririm pele lireye ye, le pe ma pire esi pelpe pesiye peilaiye soma ye eplangu ire peiye asi era kolo’.”
7Jisas namti lirpowoye, “Il pite Ma Ili re, pe paptei pirpei polpepei, ‘Le metine minele le ma lempesesi Ma Ili piti kosawo singe pele kolo, olo le Ma Ili leise.”
8Fei towa nou kesi Jisas lila le tumun yuweitei le le kusawo lire uf walem lipi lipi pinge tef pire oweli yini men nange teingipitei pelpe. 9Le le lirpowo Jisas-ye, “Fei pepei yeflipiye, ki ma waiye wuso ye ma aute oru le ye rautuki.”
10Jisas lirpowoye, “Towa, ye e taniki. Il pite Ma Ili paptei pirpei polpepei, ‘Ye ma rautuwo Ili, le Ma Ili leiye le ye ma esio towa lele loteteiye’.”
11Leye lo towa lepe lusa Jisas-ye le ririm pite Ma Ili paule kanio Jisas.
Jisas linu lesio towa lele ratei Galili
12Wem Jisas lingitei lolpepei Jon olo paltei lifei winem oliye, Jisas nou le tef Galili. 13Jisas lusa Nasaret le le le ratei Kaperneam lato malfem lire tuluple lite Galili, tef lite alpe lite Sebulun re Naptali. 14Jisas le ratei Kaperneam piti ma il wuso metine nimou Aisaia sungoitei liye lirpei pepe ma fale punkom, 15“Tef lite Sebulun le tef lite Naptali, tisi liti le peryai, lingio wof Jodan, Galili lite mete nemple, pe pite Israel kolo, olo. 16Mete fei pepe wuso pratei munkunum pire il olpe ma puluwo weli ili lite Ma Ili luwalipe mete wuso pratei tef liti pire nemple olpe. Singe lite Ma Ili ma weisipe il olpe pelpe.”
17Wem fei lepe, le le le Jisas leptalo il lirpeiye, “Yusape il olpe peise wusoli wem liti Ma Ili ma luntolise olo lau lire malfemye.”
Jisas linu linape pupam twinges te twinges
18Jisas wala le linge lunko liti tuluple ili lite Galili le le luluwo Saimon (pinawo Pita) lire winke Andru. Te rounge tireri taimere leingalo tuluple wusoli te tesio towa lelnge piti tengleipe ningu. 19Jisas lirpengeye, “Rounge yau yulteiki le ki ma keitaloise rounge piti yengleipe mete.” 20Saimon lire winke Andru frou tusape taimere pelnge pato, le te rounge tulsi Jisas.
21Jisas wala lilele le le le luluwo line nele lire winke lele. Le luluwo Jems lire winke Jon, yaitei lelnge Sebedi. Te rounge tire yaitei Sebedi pepi pifei nimpe teingo lelpe le pe poporipe taimere pelpe. Jisas linange, 22le te rounge frou tusa nimpe teingo lire yaitei lelnge le te rounge tulsi Jisas.
Jisas leptalo il le le kapi kainu taniepe mete
23Jisas lingio tef lite Galili le laltuye le le le angli pal pelpe le le leptalo mete lire il pite Ma Ili ma lailelepe re luntoluwepe, le le kapi kainu olpe polomen polomen re le kapi taniepe. 24Il rofro pe tef lite Siria yefliye, le mete pilape wuru pelpe wuso kainu polomen polomen re, pilape pe Jisas. Pe wuso kainu pire flis lipitei, towa punkuwepe re wumun weisesipe re ire esi pa re, le Jisas kapi taniepe oloye. 25Mete wurutei pite Galili, Dekapolis, Jerusalem, Juda le pite wof Jodan plen liti epli fale, pe pulsi Jisas.
Tällä hetkellä valittuna:
Matyu 4: ongNT
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 1997, Wycliffe Bible Translators, Inc. All rights reserved.
