Gen 48
48
Manase da Eperaim.
1Ke mara gurina ma wawaya inae Josepa kurina, ivi akovi da ina mamai Jeikap na igubaga. Tuna kubiine natunatuna ruwa Manase da Eperaim irutinisi da yavata inae. 2Ma Jeikap sisiya iviiya da Josepa ipisi da ita kitai na ere nununa ivomiiri da ivi kiimakiiyei.
3Ma natuna Josepa kurina ivona bo, “Mara sago God Rewapana Kirakiina irumatara kuriku Lus kwanatunai, tuna na Keinan dobuna kamonai. Ivi biibiiniku 4ma ivona bo, ‘Ana berai da kuni tuwa kirakai da am koroto ina rakata, tupurereghim ina rakata da dam ma dam ina tupuwa. Ma weni dobuna na tupurereghim ana veresi da ini rapena tuwanonowi.’ ”
5Ma ina sisiya ikwapanatini ivona bo, “Josepa, natunatum Eperaim da Manase namada itupuwa weni dobuna Egypt kamonai ma nani murinai apisi da yavata tamakamakai. Ma wekarakava ivi ruwa aviiviinisi da ti na natunatuku vaghata nakanani ma Ruben da Simiyon. 6Ma weni ededisi murisiyai kuna vivituwa na tam kava rapemuwai. Ma tano buderina kona rerereghi na murimurisi i tano na Eperaim da Manase gwabisiyai ina viiya. 7Rorova kava Padan dobunai kabababa da keta borinai am maduwa Risera irabobo. Tuna na Keinan dobuna kamonai ma ke ita rabaraba da ku Eperati da weni nuwapoyina apanani. Ma vaghina, ere matadogaku na Eperati ketana baranai adogoi.”
8Jeikap, Josepa natunatuna ikitisi na ivi tarakiiyana bo, “Weni ededisi na iyavo?”
9Ma Josepa ina mamai ivonapotei bo, “Weni ededisi na taku natunatuku. Egypt dobunai amakamakai na God ivereku.”
“Kerutinapiyesi kuriku da ani biibiinisi.”
10Ma Jeikap na imagura kirakai da matana isowai da ke ruvaruvana ita kita bubuna. Vaghina ma Josepa natunatuna irutinapiyesi i doboro kurina da itaraghavusi ma iyonisi.
11Ma Jeikap ivona bo, “Ke ata notai da maghighim ata kita meyei ma wekarakava na God ivi vaghinei da tam, natunatum yavata akitakitimi.”
12Muriyai Josepa natunatuna Jeikap dogarinai itinavivirisi ma ina mamai maghinonai irunoma da maghighina ku tano. 13Ma natunatuna iviinisi da Jeikap ku maghinona iteresi da imiimiiri. Eperaim na murimurina tuna kubiine iviiya da Jeikap ku dugena iterei ma Manase na iyarakona tuna kubiine ku katagheyana iterei. 14Ma kegha, Jeikap imana ivi kiivonei da katagheyanai ivororona da Eperaim ku gayamina iterei, namanaki da tuna murimurina, ma dugenai ivororona da Manase ku gayamina iterei, namanaki da tuna iyarokona.
15-19Ma Josepa na ke iti nuwabiibai, ikitai da ina mamai katagheyana Eperaim ku gayamina tepana iterei. Tuna kubiine ina mamai imana ivotani ma ina kayowana da Eperaim gayaminai ita votawei da Manase ku gayamina ita terei. Ma Josepa ina mamai ivonei bo, “Kegha mamai, ke nakanani, weni tuna na iyarokona katagheyam ku gayamina keterei.”
Ma kegha, ina mamai ke iti vaghinei ma ivona bo, “Akovi, natuku, akovi. Ma tuna bade tupurereghina ina rakata kirakai. Ma kegha da tina kikei ina rewapana ina rakata kirakai ke iyarokona nakanani. Ma tupurereghina ina rakata da kamosiyai dam ma dam ina tupuwa.”
Nani murinai na Josepa natunatuna yavata ivi biibiinisi ivona bo,
“Ainowi da God ini biibiinimi.
Aku doboro Abraham da aku mamai Aisiki na God ivokavakavari ma i yawasa kamonai ivotekatekei.
Ma bade God na taku kaku koyakoyagha, aku yawasa karenai da weni ku marana ivi noweku.
Ma ina aneya ivivi tarapaparaneku da berona ke ata panana tovoni.
Ainowi da weni ededisi ini biibiinisi!
Ainowi da ti na kaku vava ma Abraham da Aisiki kii vava ina voviteteyanei.
Ma ainowi da dobuwai i koroto ina rakata kirakai.”
20Vaghina ma Jeikap ivi ruwa ivi biibiinisi, ivona bo,
“Ma Israel damsi vibiibiina ina beraberai na tami avamiyai.”
Ina vona bo, “Ainowi da God ina berim da Eperaim da Manase nakanani.”
Weni sisiyisi kubiine Jeikap tupuna Eperaim iviiya da ivi nao, Manase maghinonai iterei.
21Nani murinai Jeikap natuna Josepa ivonei bo, “Taku gisina kava ma ana rabobo ma God na gwabimuwai ma mara sago tupurereghim yavata ina rutinimi kona vovira ita mami mau i ku dobu, ku Keinan. 22Ma tam na Sekem dobuna avereverem ma varevaresim na kegha. Tuna dobuna kubiine na aku seri ma dosiyowai avi tona da Amo damsi gwabisiyai aviiya. Ma dobuna na tano mumurina.”
Tällä hetkellä valittuna:
Gen 48: pwgB
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2009, Wycliffe Bible Translators, Inc. All rights reserved.