Mpiin 32
32
Jakob aah gor ke u ni Esɔ ki kpaan tɔb chee pu na aabɔr
1Jakob mu nan cha, le Uwumbɔr aatuuntiib tooh u nsan ni. 2Buyoonn u kan bi na, le u bui ke, “Uwumbɔr aatuuntiib sɔ,” nima le u nan yin nima chee ke Mahanaim.#32.2: Mahanaim aatataa le ye ke “ŋiker ŋilee.”
3Le Jakob tun bitutum bi loln u pu nsan ki buen ukpel Esɔ chee, Edom aatiŋ ni. 4U nan bui bi ke bi ti bui Esɔ ke, “Min Jakob, saanaagbiija na, le ban m tuk maaninkpel Esɔ ke m buen Labann do ni yunn sakpen a, le dandana wee m ban ke m gir kun ni. 5M kpa inaa, ni ibon, ni ipiih, ni iŋoob, ni binaagbiib pam. Maaninkpel, nima pu le m tun ni ke bi nan tuk si, aa tii mi nsan m gir kun ni.”
6Buyoonn bitutum ngbaan gir ni Jakob chee na, bi nan bui u ke, “Ti buen aakpel Esɔ do, le u gor ki choo ke ni nan tooh tɔb nsan ni. U choo ki joo ni bijab ikui inaa la.” 7Ijawaan nan chuu Jakob, le ni muk u. U nan chuu yakr binib bi bi u chee na nfum mulee, ki yakr waapiih, ni iŋoob, ni inaa, ni laakumii tiib mu kina. 8U nan dak ke, “Esɔ yaa ban ke u tak bi kan, u ga pii njan aanib la, lelee yaab na ga ŋmaa san ŋmar.”
9Le Jakob mee Uwumbɔr ke, “N‑yaaja Abraham, ni nte Aisak Aawumbɔr, ŋun maameel. Uwumbɔr, sin le bui mi ke m gir kun maatiŋ, ni ndo yaab chee, ke aa ga li kii ki ter mi tiwan mɔmɔk ni. 10Lik saah ŋa mi, saanaagbiija, tiŋann, ni saah kii mi ki joo mi pu na; maa ba ŋeer aa ŋa mi kina. Maah nyan ni nte do ki puur Jɔɔdann aamɔɔl na, m nan joo kijaangbeek baanja la, le dandana wee, sin pu, m kpa ŋiniker ŋilee, ni tiwakor ŋiker ŋilee ŋimina. 11M mee si ke aa gaa mi nkpel Esɔ chee lii. M san ijawaan ke nibaakan u ni waanib choo bi nan ku ti mɔmɔk, hali ki ku bipiib ni mbim mu la. 12Teer ke aa nan puu tipuur tii mi ke aa ga li kii ki ter mi tiwan mɔmɔk ni, ki ga cha m maa pɔr, le n‑yaabitiib ga li wiir ke litambol li dɔ limɔɔl aagbaan na, le ubaa aan ŋmaa kahn bi.”
13-15Jakob aah nan doon kinyeek ki woln na, le u nan nyan waawakor ponn ni tibaa, u di tii ukpel Esɔ ipiin. U nan nyan iŋoninkpel ikui ilee, ni iŋoja moninko, ni ipihninkpel ikui ilee, ni ipihja moninko, ni laakumii tiib bi joo mbim na piitaa, ni inaaninkpel imonko ilee, ni inaaja kipiik, ni iboninkpel moninko, ni ibonja kipiik. 16U nan faa yakr ni ŋiker ŋiker, le ki cha waanaagbiib kpaa ŋiker ŋiker ngbaan nibaabaa. U nan bui bi ke, “Ni loln m pu nsan, aan ki li paa tɔb pu, ki li daa tɔb siib.” 17U nan bui usaloln ke, “Nkpel Esɔ yaa ton si ki baa ke, ‘Saaninkpel ye ŋma? Aa cha la? Ŋma yeh tiwakor ngbaan?’ kan, 18aa bui u ke, ‘Saanaagbiija Jakob le yeh ti, le ki bui ke m di ti tii si, waaninkpel Esɔ. Jakob mu bi tipuwɔb ki choo dandana wee.’” 19Jakob nan ki bui waanaagbiib bi paa nlee, ni ntaa, ni bimɔk gur na kina la: “Ni mɔmɔk bui Esɔ njan yoo aah ga bui u pu na. 20See ni mɔmɔk bui u ke, ‘Een, saanaagbiija Jakob le bi kɔnkɔni do ki choo na.’” Jakob nan dakl ke, “Nibaakan Esɔ yaa kan ipiin ngbaan kan, u ga li gee mi, aan ti yaa kan tɔb kan, u ga di cha pinn mi.” 21U nan ki doon kinyeek ngbaan, waah yakr tiwakor nin chee na, le ki cha bi di ipiin ngbaan loln nsan buen Esɔ chee.
Jakob ni Uwumbɔr aatuun aah nan mɔn Peniel aatiŋ ni pu na
22Kinyeek ngbaan le Jakob nan fii, ki yoor upuutiib bilee, ni baanaagbiipiib bilee, ni waabim kipiik ni ubaa na, le ki di puur Jabok aamɔɔl. 23Waah nan di bi puur doo na, le u ki di waawangol mɔmɔk mu di puur, 24le u nan labr ti doon ubaa, lipepel liken na wɔb. Nima chee le Uwumbɔr aatuun dan kinyeek ngbaan, le bi nan mɔn kitaak ti ban ki woln. 25Uwumbɔr aatuun ngbaan aah kan ke waa ŋmaa nyaŋ u na, le u nyii Jakob aakpiik, le ki kper. 26Le ntuun ngbaan bui u ke, “Ni ban ni woln la, di mi lii, aan m li cha.”
Le Jakob bui u ke, “Maan cha aa buen, see aa ŋa tinyoor ŋa m pu.”
27Ntuun ngbaan nan baa u ke, “Bi yin si ke ba?”
Le u bui ke, “Jakob.”
28Le ntuun ngbaan bui ke, “Saah mɔn ki nyaŋ Uwumbɔr ni unibɔn na, nima pu na, bi ga li gur yin si ke Israel la, baan ki yin si ke Jakob.”#32.28: Israel aatataa le ye ke “u ni Uwumbɔr mɔn.”
29Le Jakob bui ke, “Aa mu tuk mi saayimbil.”
Le u nan baa u ke, “Ba ŋa aa ban ke aa bee maayimbil?” Le u ŋa tinyoor ŋa Jakob pu.
30Jakob nan bui ke, “M kan Uwumbɔr aanimbil wɔb le ki laa beenin fu.” Nima pu le u nan yin nima chee ke Peniel.#32.30: Peniel aatataa le ye ke “Uwumbɔr aanimbil wɔb.” 31Le nwiin aah puu buyoonn na Jakob nyan Peniel ki cha, le ki nan deeni ukpiik pu. 32Hali, ki yoor ni Jakob aayoonn na ki nan saa din, Israel yaab aa ji kikpiik pu aanann; ba pu? Jakob aakpiik pu le Uwumbɔr aatuun ngbaan nan nyii.
Tällä hetkellä valittuna:
Mpiin 32: xonB
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
©1998, 2014 Wycliffe Bible Translators, Inc. All rights reserved.