Zlr 35
35
Nzata Yakubu ma tumpul ma Betel
1Ka Lazglafta nda Yakubu mantsa: « Sliʼaf sliʼa gha ka ŋla ka da Betel, ka nzata ka hada, ka bafta ka ta gwir ma tsa vli marava yu da kagha ma hwayafta gha da zwaŋama gha Ghesav ya. » 2Ka Yakubu nda la ga taŋ, nda ya nda inda gwal kawadaga nda tsi mantsa: « Hliŋwa hla ta inda lazglaftaha ka mayəm mataba ghuni. Ka hliŋta kuni ta skwi ta tsaɗ lu ta kaghuni, ka mbəɗapta kuni ta lgutha ghuni, 3ka sliʼafta mu ka dzaʼa mu da Betel. Hada dzaʼa banafta yu ta gwir ta Lazglafta ya ta katihata ma gruɗta ghuya ɗaŋwa, ka nzata tsi kawadaga nda iʼi ma inda vli ya lab yu ya, » kaʼa. 4Ka hlanaktá həŋ ta Yakubu ta inda lazglaftaha ka mayəm da həŋ, nda yeriha ma sləməŋa taŋ. Ka lamtá Yakubu mista sana halalaya fu dagala ndusa nda Səkem.
5Ka sliʼaftá həŋ ka laghu, ka vlaŋtá Lazglafta ta zləŋ ta inda mnduha ma luwaha ta wanaftá həŋ, kəl mnduha kul liŋtá zwana Yakubu. 6Ka ɓhadaghatá i Yakubu da Luz ta nzakway ka Betel ma haɗika Kanʼana, tsatsi nda inda gwal kawadaga nda tsi tani. 7Ka baftá tsi ta gwir, ka hgə tsi ta tsa vli ya ka « El Betel#35:7 El Betel nda gwaɗa Hebru ná, tsaya Lazglafta Betel., » kabga hada maravata Lazglafta da tsi ma hwayafta ni da zwaŋama ni.
8Ma tsa vli ya mtuta Debura, mataghəŋa Rebeka. Ka lamtá lu ndusa nda Betel mista sana fu dagala. Diga baɗu tsa, ka hgə lu ta tsa fu ya ka « Halalaya fu ta taw. »
9Ka marglavatá Lazglafta da Yakubu, manda vragapta ni ma Padaŋ Aram, ka tfanaghatá tsi ta wi. 10Ka Lazglafta nda tsi mantsa: « Yakubu hga gha, ama haɗ lu dzaʼa hgəgəltá kagha ka Yakubu wa, Israʼila dzaʼa hga lu ta kagha, » kaʼa. Mantsa tama, ka hgə tsi ka Israʼila. 11Ka Lazglafta nda tsi mantsa: « Iʼi Lazglafta ta Mbruta, ga ta mndu, ka yafta ka tusak. Ma kagha dzaʼa saba ndəghata mndəra mnduha, nda guyatá ghəŋa mndəra mnduha. Ma kagha dzaʼa saba mghamha guli. 12Tsa haɗik vlaŋ yu ta i Abraham nda Izak ya ná, dzaʼa vlagha vla yu, dzaʼa vlaŋ vla yu ta zivira gha guli, » kaʼa. 13Ka sliʼaftá Lazglafta ma tsa vli si ta gwaɗ tsi ta gwaɗa nda Yakubu ya, ka laghwi. 14Ka dzugwatá Yakubu ta pala ma tsa vli gwaɗgana tsi ya, ka slraftá tsi ta ima inabi tida pghafha ta rɗi tida. 15Ka hgə Yakubu ta tsa vli gwaɗgana Lazglafta ya, ka Betel.
Yatá Biŋyamiŋ, ta mtaghutá ma ni Rasel
16Ka sliʼaftá həŋ ma Betel. Taghwaŋ a həŋ ka ɓhadaghata da Ifrata wu, ka dgatá Rasel. Zlah zlah kəʼa dgata. 17Ma tsa fitika dgakwa ni nda ɗaŋwa ya, ka tsa marakw ta ya mndu ya mantsa: « Ma zləŋ ka, zwaŋa zgun ya mutsəglaf ka, » kaʼa. 18Ta klə tsi ta hafu ma mtakwa ni, ka hgə tsi ka Benʼuni#35:18 Benʼuni nda gwaɗa Hebru ná, tsaya zwaŋa ghuya ɗaŋwa ɗa.. Ama ka hgə da ni ka Biŋyamiŋ.#35:18 Biŋyamiŋ nda gwaɗa Hebru ná, tsaya zwaŋa dzva zeghwi. 19Ka mtuta Rasel, ka lamtá lu ta wa tva dzaʼa da Ifrata ta hgə lu ndanana ka Betʼlehem ya. 20Ka dzugwafta Yakubu ta pala ta tsa kulu ya. Tsaya palaka kula Rasel. Ta tekeʼa ha gitana. 21Ka sliʼaftá Israʼila ka laghu dzagwatá tumpula ni, ka zluŋtá Migdal Ider. 22Ma nzakwa Israʼila ma tsa haɗik ya, ka lagha Rubeŋ hanata nda Bilha markwa sanagha ga da ni. Ka snaŋtá Israʼila.
Ghwaŋpəɗ his zwana zgwana Yakubu.
23Wya hguha zwani yaya lu nda Leʼa: Rubeŋ zumala Yakubu, nda Simghuŋ, nda Levi, nda Yuda, nda Yisakar, nda Zəvuluŋ.
24Wya zwani yaya lu nda Rasel: Yusufu nda Biŋyamiŋ.
25Wya zwani yaya lu nda Bilha ta nzakway ka kurɗa Rasel: Daŋ nda Naftali.
26Wya zwani yaya lu nda Zilpa ta nzakway ka kurɗa Leʼa: Gat nda Aser.
Tsaha ya zwana Yakubu yayana lu ma Padaŋ Aram.
Mtakwa Izak
27Ka sliʼaftá Yakubu ka lagha da Izak ta nzakway ka da ni, ma Mamre ndusa da Kiriyatʼarba ta hgə lu gitana ka Hevruŋ. Si nza nza i Abraham nda Izak hada. 28Dərmək nda tghas mbsak ima Izak. 29Ka mtutá Izak ma halata ni katakata, ka laghu tsi da la taŋ. Ka paɗamtá zwana ni i Ghesav nda Yakubu.
Tällä hetkellä valittuna:
Zlr 35: xed
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© Wycliffe Bible Translators, Inc. All rights reserved.