Suosittuja jakeita Raamatun kirjasta ފެށުން 18

Jaa

އެ ހިނދު މާތްރަސްކަލާނގެ އިބްރާހީމްގެފާނަށް ވަޙީކުރެއްވިއެވެ. ”⁠ސާރާ އެބަ ހޭ، ’⁠ތިމަން މުސްކުޅިވީ ދުވަހު ތިމަންނައަށް ދަރިޔަކު ލިބިދާނެހޭ⁠‘ މިހެން ހިތަށް އަރާފައި. ބަލަ މާތްރަސްކަލާނގެއަށް އުނދަގޫ ކަމެއް އޮވޭތަ؟ އަންނަ އަހަރު މިހާތާނގައި އަހަރެން މިތަނަށް އެނބުރި އަންނާނަން. އޭރުން ސާރާއަށް ފިރިހެން ދަރިއަކު ލިބޭނެ.⁠“

އެވަގުތު މިދެކެވުނު ވާހަކަތައް އިވިވަޑައިގެން އެކަމަނާއަށް ހިތާހިތުން ހިނިފުޅުވެޑުވި މިހެން ވިދާޅުވެވުނެވެ. ”⁠މިހާރު އަހަރެން މިވަނީ މުސްކުޅިވެ، އިއްދައިން ކެނޑިފަ. ވީއިރު، އަހަންނަށް އަނބިވަންތަ ގުޅުމެއް ފުރިހަމައަށް ހިންގިދާނެތަ؟ ހަމަ މިފަދައިން އަހަރެންގެ ފިރިމީހާއަކީ މަށަށް ވުރެން ވެސް މާ މުސްކުޅި މީހެއް.⁠“

އޭނާގެ ދަރިކޮޅު ފެތުރި ގިނަ މީސްތަކުންވާ މަތިވެރި ޤައުމެއް ކަމުގައިވާނެ. އަދި އޭނާ މެދުވެރިކޮށް ތިމަންކަލާނގެ ދުނިޔޭގެ ހުރިހާ ޤައުމަކަށް ރަޙުމަތް ލައްވާ ހުށީން.

ދެން އިބްރާހީމްގެފާނު މާތްރަސްކަލާނގެއާ ކައިރިއަށް ޖެހިވަޑައިގެން ދެންނެވިއެވެ. ”⁠އިނބަރަސްކަލާނގެ ގަސްތުކުރައްވަނީ އެރަށުގެ ނުބައި މީހުންނާއި އެކު އެރަށުގައިވާ ރަނގަޅު މީހުން ވެސް ނައްތަވާލައްވަންތޯ؟ ފަހަރެއްގައި އެރަށުގައި ފަންސާސް ރަނގަޅު މީހުން ތިބެދާނެ. އެހެންވެއްޖެ ނަމަ ހަމަ ޔަޤީނުން ވެސް އެމީހުންގެ ޙައްޤުގައި އިނބަރަސްކަލާނގެ އެރަށް ނައްތައެއް ނުލައްވާނެ.

މާތްރަސްކަލާނގެ ވަޙީކުރެއްވިއެވެ. ”⁠އެރަށުގައި ރަނގަޅު ފަންސާސް މީހުން ތިއްބަސް ތިމަންކަލާނގެ އެމީހުންނަށްޓަކައި އެރަށް ނެތިކޮށެއް ނުލައްވާނަން.⁠“