Suosittuja jakeita Raamatun kirjasta wandījo 17

Jaa

Ū Abulamu aho washisha myaka makūmi kenda na kenda (99), ū SEEBA akang'wilongela ūng'wīla gīkī, “Ū Nene nalī Mulungu wa būdūla bose, shimīzaga mu kūniigwa nene, hangī ūbize ūtī na shilingo.

Nīyo ūtitanwa Abulamu hangī; ī lina lyako lyabizaga Abulahamu, nguno naakwītaga kūbiza ise wa mahanga mingī.

Nakūlīguzuhya ī lilagane lyane, lībize ilagane lya welelo na welelo ū kūlī bebe, nū būbyīle wako shibyalīlwe na shibyalīlwe īsho shikwiza ha numa yako; ū nene nabize Mulungu wako, na Mulungu wa būbyīle wako ūbo būkwiza ha numa yako.

“Ī lilagane lyane ū kūlī bebe līlī gīkī, Ūkūbiza ise wa mahanga mingī.

Ū Mulungu ūhaya, “Ūlītūngīlīja; alīyo ū nke wako gete ū Saala, h'ūyo akūkūbyalīla ng'wana ngosha, nang'ho ūkūng'wilīka ī lina lyakwe Isaka. Ū ng'wenūyo h'ūyo nakūbeeja nang'hwe ī lilagane lyane, lībize ilagane lya welelo na welelo, kūlwa nguno ya būbyīle wakwe ūbo būkwiza ha numa yakwe.

Ī sī ya Kanaani īyo ūkwikalaga mo gītī nobeji, pyī ī yose nakūkwinha bebe hamò na būbyīle wako ūbo būkwiza ha numa yako. Īkūbiza yako ya wikomangīle, shikū jose ja welelo na welelo; na nakūbiza Mulungu wabo.”

Ū Abulahamu ūgwa matuja nzwi, achimīgije; hūna ūseka kūnū aliwīla gīkī, “Ū munhū wa myaka igana nang'hwe adūgije kūbyalīlwa ng'wana gete? Ū Saala na būgikūlū bokwe wenūbo ūbyala ng'wana!”

Hūna ū Mulungu ūng'wīla ū Abulahamu na gīkī, “Ū nke wako ū Salai, oyaga ū kūng'witana Salai; ī lina lyakwe lyabizaga Saala.

Hūna lūūlū mukūyūsaalwa; ū būsaalwa wenūbo hū lūkūbiza lūmeng'ho lw'ilagane a ha gatī yane nū bing'we.

Alīyo ī lilagane lyane nakūlībeeja na Isaka, ūyo Saala akūkūbyalīla ha ng'waka makanza gīt'aya.”

Ū mu shibyalīlwe shing'we ī shose īsho shiliza, būlī ng'wana ngosha ū mu bing'we ūlū ūshisha shikū inaane asaalwe; abize wa kūbyalīlwa ha kaya, nūūlū wa kūgūlwa na hela kūfuma kū babisa, ūyo atī wa kūfuma mulī bebe. Būlī ng'wene ū wa kūbyalīlwa ha kaya yako shiigelile asaalwe, pyī nūūlū wa kūgūlwa bo hela jako. Ī lilagane lyane līkūbiza mu mīlī gwing'we; līl'ilagane lya welelo na welelo.