If you have would like a copy of this version please contact info@davarpartners.org

Arabic Chadian - 2019 Edition (OT) Non Drama

La Bible en arabe tchadien © Alliance biblique du Tchad, 2019

دَاهُو ذُرِّيَّةْ سَامْ وَ حَامْ وَ يَافَثْ أَوْلَادْ نُوحْ، هُمَّنْ وَ أَوْلَادْهُمْ الْوِلْدَوْهُمْ بَعَدْ الْغَرَقْ.

أَوْلَادْ يَافَثْ هُمَّنْ قُومَرْ وَ مَاجُوجْ وَ مَادَايْ وَ يَوَانْ وَ تُوبَلْ وَ مَاشَكْ وَ تِرَاسْ. وَ أَوْلَادْ قُومَرْ هُمَّنْ أَشْكَنَازْ وَ رِفَاثْ وَ تُقَرْمَا. وَ أَوْلَادْ يَوَانْ هُمَّنْ أَلِيشَى وَ تَرْشِيشْ وَ كِتِّيمْ وَ رُدَانِيمْ. وَ مِنْهُمْ هُمَّنْ بَسْ مَرَقَوْا النَّاسْ السَّاكْنِينْ فِي خَشُمْ الْبُحُورْ.
وَ هُمَّنْ شَتَّتَوْا فِي بُلْدَانْهُمْ عَلَيْ حَسَبْ لُغَّاتْهُمْ وَ قَبَايِلْهُمْ وَ أُمَمْهُمْ.

أَوْلَادْ حَامْ هُمَّنْ كُوشْ وَ مِصْرَايِمْ وَ فُوطْ وَ كَنْعَانْ. وَ أَوْلَادْ كُوشْ هُمَّنْ سَبَا وَ حَوِيلَةْ وَ سَبْتَا وَ رَعْمَا وَ سَبْتَكَا. وَ أَوْلَادْ رَعْمَا هُمَّنْ شَبَا وَ دَدَانْ.
وَ كُوشْ وِلِدْ نِمْرُودْ. وَ نِمْرُودْ هُو أَوَّلْ رَاجِلْ فَارِسْ فِي الْأَرْض. وَ هُو بِقِي قَنَّاصِي شَدِيدْ قِدَّامْ اللّٰهْ. وَ فِي شَانْ دَا بَسْ، النَّاسْ يُقُولُوا: «فِلَانْ مِثِلْ نِمْرُودْ الْقَنَّاصِي الشَّدِيدْ قِدَّامْ اللّٰهْ.» وَ هُو بَدَا يَمْلُكْ مِنْ مَدِينَةْ بَابِلْ وَ أَرَكْ وَ أَكَّدْ وَ كَلْنَةْ فِي تُرَابْ شِنْعَارْ. وَ مَرَقْ مِنْ الْبُلْدَانْ دَوْل وَ مَشَى أَشُورْ وَ بَنَى مَدِينَةْ نِينَوَى وَ رَحُبُوتْ عِيْر وَ كَالَحْ وَ رَسَنْ الْحِلَّةْ الْقَاعِدَةْ أَمْبَيْن نِينَوَى وَ كَالَحْ الْحِلَّةْ الْكَبِيرَةْ.
وَ مِصْرَايِمْ جَابْ قَبَايِلْ لُودْ وَ عَنَامْ وَ لَهَابْ وَ نَفْتُوحْ وَ فَتْرُوسْ وَ كَسْلُوحْ وَ كَفْتُورْ. وَ مِنْ قَبِيلَةْ كَسْلُوحْ بَسْ مَرَقَوْا الْفِلِسْطِيِّينْ.
وَ كَنْعَانْ وِلِدْ صِدُونْ وِلَيْدَهْ الْبِكِرْ وَ بَعَدَهْ وِلِدْ حِتَّا. وَ هُو بَسْ جَابْ قَبَايِلْ الْيَبُوسِيِّينْ وَ الْأَمُورِيِّينْ وَ الْقِرْقَاشِيِّينْ وَ الْحِوِّيِّينْ وَ الْعَرْقِيِّينْ وَ السِّينِيِّينْ وَ الْأَرْوَدِيِّينْ وَ الصَّمَارِيِّينْ وَ الْحَمَاتِيِّينْ. وَ بَعَدَيْن، الْقَبَايِلْ هَنَا الْكَنْعَانِيِّينْ شَتَّتَوْا. وَ التُّرَابْ هَنَا الْكَنْعَانِيِّينْ أَلْوَسَّعْ مِنْ صَيْدَا عَلَيْ قَرَارْ لَحَدِّي غَزَّةْ وَ مَاشِي عَلَيْ سَدُومْ وَ عَمُورَةْ وَ أَدْمَةْ وَ صَبُويِيمْ لَحَدِّي لَاشَعْ.
وَ دَوْل ذُرِّيَّةْ حَامْ فِي بُلْدَانْهُمْ عَلَيْ حَسَبْ لُغَّاتْهُمْ وَ قَبَايِلْهُمْ وَ أُمَمْهُمْ.

سَامْ كُلَ جَابْ أَوْلَادْ. هُو أَخُو كَبِيرْ هَنَا يَافَثْ وَ جِدّ هَنَا كُلَّ أَوْلَادْ عِبَارْ. وَ أَوْلَادْ سَامْ هُمَّنْ عِلَامْ وَ أَشُورْ وَ أَرْفَكْشَادْ وَ لُودْ وَ أَرَامْ. وَ عِيَالْ أَرَامْ هُمَّنْ عُوصْ وَ حُولْ وَ قَاتَرْ وَ مَاشْ. وَ أَرْفَكْشَادْ وِلِدْ شَالَحْ وَ شَالَحْ وِلِدْ عِبَارْ.
وَ عِبَارْ وِلِدْ أَوْلَادْ إِتْنَيْن. الْوَاحِدْ أُسْمَهْ فَالَقْ (مَعَنَاتَهْ قِسِمْ) أَشَانْ فِي زَمَنَهْ، الْأَرْض قَسَّمَوْهَا. وَ أَخُوهْ أُسْمَهْ يَقْطَانْ. وَ يَقْطَانْ وِلِدْ أَلِمُدَادْ وَ شَالَفْ وَ حَضَرْمُوتْ وَ يَارَحْ وَ هَدُرَامْ وَ أُزَالْ وَ دِقْلَى وَ عُبَالْ وَ أَبِمَايِلْ وَ شَبَا وَ أُفِيرْ وَ حَوِيلَى وَ يُبَابْ. وَ دَوْل كُلُّهُمْ أَوْلَادْ يَقْطَانْ. هُمَّنْ سَاكْنِينْ مِنْ مِيشَا جَنْب سَفَارْ لَحَدِّي جَبَلْ الصَّبْحَانِي.
وَ دَوْل أَوْلَادْ سَامْ فِي بُلْدَانْهُمْ حَسَبْ لُغَّاتْهُمْ وَ قَبَايِلْهُمْ وَ أُمَمْهُمْ.

وَ دَوْل قَبَايِلْ أَوْلَادْ نُوحْ بِذُرِّيِّتْهُمْ وَ أُمَمْهُمْ. وَ مِنْهُمْ هُمَّنْ بَسْ مَرَقَوْا كُلَّ النَّاسْ الشَّتَّتَوْا فِي الْأَرْض بَعَدْ الْغَرَقْ.

Kuuntele تكوين 10