If you have would like a copy of this version please contact info@davarpartners.org

Text: Rana Tharu New Testament, CC-BY-SA-4.0, The Love Fellowship. -- Audio: Rana Tharu New Testament Audio Bible, CC-BY-SA-4.0, Davar Partners International, The Love Fellowship, 2023

Rana Tharu New Testament

Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.

होसियार रहियओ! तुम आदमीनके दिखानके ताहीं भले काम मत् करओ। नत स्वर्गमे होन बारो तुमर दौवासे तुम कुछु इनाम नाए पएहओ।
जहेमारे जब तुम दान देत हओ, तओ बडो दिखानके ताहीं मत् करओ, जैसी कपटी यहूदी सभाघरको गल्लीमे करत हएं ताकी आदमी उनकी बढाइ करएं, मए तुमसे सच्चो कहात हओं, कि बे जो करीं, आदमीनसे प्रसंसा पाएडारी हएं। पर जब तुम दान देत हओ, तुमर दहिना हात का करत हए, सो दुस्रो आदमी नाए जान पाबए। तुमर दान गुप्तमे होबए, और गुप्तमे देखन बारो तुमर दौवा तुमके इनाम देहए।


जब तुम प्राथना करैगे तओ कपटी आदमी कता मत् होओ काहेकी आदमीनके दिखानके ताहीं सभाघरमे और सडकके चौराहोमे ठाणके प्राथना करन उनके अच्छो लगत हए। नेहात्तओ मए तुमसे कहात हओं, कि बे अप्नो प्रतिफल पाएडारी हएं। पर जब तुम प्राथना करैगे तओ अपन कोठामे जाओ; और फाटक बन्द करके अपन दौवासे प्राथना करओ जो गुप्तमे हए, तओ तुमर दौवा जो गुप्तमे देखत हए तुमके प्रतिफल देबैगो। और परमेश्वरसे प्राथना करत पेती गैर बिश्वासी कता व्यर्थमे एकए बात मत् बरबराओ। काहेकी गैर बिश्वासी सोँचत हएं कि अगर बे घरीघरी एकए बात करंगे कहेसे बिनको प्राथना परमेश्वर सुनैगो। जहेमारे बिनके जैसो मतहोबओ। काहेकी तुमरो दौवा परमेश्वर तुमर मागनेसे पहिलीयए जानत हए कि तुमर का-का जरुरत हए।
तुम अइसे परमेश्वरसे प्राथना करओ:
“हे हमर दौवा, जो स्वर्गमे हए;
तुमर नाउँ पबित्र होए।
तुमर राज्य आबए।
तुमर इच्छा स्वर्गमे जैसो पुरा भओ हए,
उइसीयए जा पृथ्वीमे फिर पुरा होबए।
हमके रोजदिन बो खानु देओ, जो हमके चाहोहए।
हमर पाप क्षमा करियओ,
जैसी हम अपन अपराधीन्के पाप क्षमा करेहएं, बे जौन हमर बिरुद्धमे गलत काम करी हएं।
हमके सतावटमे पणनके मत् दियओ,
पर शैतानसे छुटैयओ। काहेकी राज्य, पाराक्रम और महिमा सदासर्वदा तुमरी हए, आमेन।”
जहेमारे अगर तुम आदमीके बिरुद्धमे गलत काम क्षमा करैगे, तओ तुमके स्वर्गमे होन बारो दौवा परमेश्वर फिर तुमके गलत कामको क्षमा करैगो। अगर तुम आदमीनको गलत काम क्षमा नाए करैगे, तओ तुमके दौवा परमेश्वर तुमर गलत कामके क्षमा नाए करैगो।

जब तुम उपवास बैठतहओ, तओ कपटी जैसो उदासी चेहेरा मत् दिखाओ, काहेकी आदमी उनके उपवास बैठो देखएं करके बे चाँहत हए। मए तुमसे कहात हओं, कि बे जो करीं, आदमीनसे प्रसंसा पाएडारीं हएं। पर जब तुम उपवास बैठतहओ तओ अपन मुणमे तेल लगाओ और अपन मुँहुँ धोबओ। ताकी आदमी नाए, पर तुमर दौवा परमेश्वर जौन गुप्तमे हए, बो तुमए उपवास बैठो जानए। ताकी जा बात गुप्तमे होन बारो तुमर दौवा परमेश्वर देखए, और गुप्तमे देखन बारो दौवा परमेश्वर तुमके इनाम देहए।


अपन ताहीं पृथ्वीमे धनसम्पति मत् जोडओ, जहाँ किरा और काइ बिनके खतम करत हएं। और जहाँ चुट्टा घर फोरके बो चुराएके लैचलो जातहए। पर अपन ताहीं भलाई करके स्वर्गमे अपन ताहीं धनसम्पति इकट्ठा करओ, जहाँ किरा और काइ खतम नाए करत हए, और चुट्टा फिर चुराए नाए पातहएं। काहेकी जहाँ तुमर धन हुइहए, हुवँए तुमर मन फिर हुइहए।

आँखी शरीरकी एक दिया कता हए। अगर तुमर आँखी अच्छी हए, तओ तुमर सारा शरीर उजियारो हुइहए। पर तुमर आँखी खराब हए, तओ तुमर पुरो शरीर अँध्यारो होइगो। जहेमारे अगर तुम गल्तीसे जा सोँचत हओ, कि तुमर ह्रदय उजियारो हए, अगर खास करके जा अँध्यारो हए कहेसे तुमर भितरको अँध्यारो बहुत कारो हए।
कोइ आदमी एकए समयमे दुई मालिकको सेवा नाए करपएहए। काहेकी बो एकके हेला करैगो और दुस्रेके अपनए कता प्रेम करैगो। और बो एककेसँग मिलो रएहए और दुस्रेके बो खराब बतएहए। उइसीयए तुम फिर एकए समयमे परमेश्वर और धन दोनएको सेवा नाए करपए हओ।


जहेमारे मए तुमसे कहात हओं, अपने प्राणके ताहीं जा चिन्ता मत् करओ, कि हम का खएहएं, और का पिमंगे, और नए अपने शरीरके ताहीं कि का लगामंगे। का प्राण भोजनसे, और शरीर लत्तासे जद्धा मुल्यवान नाए हए? बादरके चिरैंचिरगुनीन्के देखओ, बे नए त बीज बोतहएं, नए त अन्न कटनी करत हएं, नए त बक्खारीमे जम्मा करत हएं? पर स्वर्गको दौवा बिनके खबात हए। और तुम चिरैंचिरगुनीनसे बहुत मूल्यवान हओ। तुम मैसे कौन हए जौन चिन्ता करके अपनी आयु थोरी लम्मी बनाए सकत हए? “और लत्ताके ताहीं तुम काहे चिन्ता करत हओ? मैदानके लिली फुलाके देखओ, बे कैसे बढत हएं। बे नए त परिश्रम करत हएं, नए त लत्ता बनात हएं। पर मए तुमसे कहात हओं, राजा सोलोमन फिर अपन सारा सम्पति होतएहोत फिर, बे फुला हानी सिंगार नाए करपाइ। आज फरन बारो, और कल आगीमे फेकन बारो डुबर्राके, परमेश्वर अइसे सिंगारत हए। तओ का बो तुमके लगान बारो लत्ता नाए देहए? कहाँ गओ तुमर बिश्वास?
जहेमारे तुम चिन्ता करके जा मत् कहाबओ कि का पिहएं, का खएहएं और का पैँधंगे? काहेकी गैर बिश्वासी जे सब बात ढुणत हएं, और तुमर स्वर्गमे होन बारो दौवा जा सब घटिकमी जानत हए। जहेमारे चिन्ता मत् करओ। सबसे पहिले परमेश्वरको राज्य और धार्मिकताको जीबन जीबओ, और जा सब चीज तुमके मिल जाबैगो। जहेमारे कलके ताहीं चिन्ता मत् करीयओ, काहेकी कलको दिन अपनो चिन्ता अपनए करैगो। आजको दु:ख आजके ताहीं ठिक हए।”

Kuuntele मत्ती 6