Kodaku

ईसु डोंगा रे रकब केनते बडे समुन्धर खँडा केते अकू सहर रेय मेजेना। अवुर कुछ होड़कू लवका ञेंडताडिय हेनी होड़, परकोम ते ईसु थरे कू अगतेडिया। तहाँ ईसु हेंकू राः बिसवास ञेंलके ते लवका ञेंडताडियाय थरेय कहनी तेडा, “ए बेटा, हिमातेमू, अमाः पाप माफ यना।” नआँ अँजोम केते एहूदी नियम चेचेडकू मेंडे कुछ होड़कू मने मन रे “नेय दो भगवानिय निन्दा यडा” मेनते कू कहनी तेडा। ईसु हेंकू मने मन रेकू पसींद तेडा, हेना पपाड़ी केनतेय कहनी तेडा, “अपे ची लगड खराब टेबोःपे पसींद यडा? करा टेबोः सहज गिआ? अम पाप केड हेनांञ माफ गोत्तेडा मेनाआँ किदो, रिमकोः तेम सेन बेड़ाऊ मेनाआँ? ताकि इंञ होड़ होपोन धरती रे पाप माफ राः हँक इदाना मेनाअपे पपाड़ी, हेना अपेंञ तिःवा पेआ।” तहाँ हेंय लवका ञेंडताडियाय थरेय कहनी तेडा, “रिमुःमी, परकोम तम रिमकेते ओड़ाः मी हनतेम चलोऊ।” तहाँ हेंय चिकन यनियू, अवुर रिमकेन ते ओड़ाः तुकू हनतेय चलो यनु। तहाँ भीड़ रेनकू होड़कू नआँ ञेंलके तेकू बोरो यनु, अवुर हेंकू भगवान, होड़कू हो न घियाआ हाँकिय ओवड कुआ मेनते कू बडेय वडियू।


हेना जघा वरी ईसु मड़ंग हनतेय तोरा एना। तहाँ मत्ती मेनते कू ञुमू तडिय हेनी मलगुजारी तिलाआ ओड़ाः रे दुड़ूब तन तोलोगिय ञेंल ञँमतेडिया, अवुर हेंय थरेय कहनी तेडा, “दाव इंञ तयोम तेम मेजुऊ।” हेना वरी हेंय रिमकेनते हें-नी तयोम तेय सेनतेडा। मत्ती ओड़ाः रे ईसु जोमुः लगाडिय दुड़ूब एना, तहाँ दो मलगुजारी तिलाकू अवुर पापी होड़कू मेनते फरीसिकू कहनी वकुआ, हेंकू मेजकेन ते ईसु अवुर चेला कुतय सुदा जोमुः लगड कू दुड़ूब एना। नआँ ञेंलकेते फरीसिकू हेंय रेनकू चेला कुकू होंबोर तेडा, “अपे रेनिय गुरू मलगुजारी तिलाकू अवुर पापी होड़कू सुदा ची लगाडिय जोमुआँ?” हेना वरी ईसु नआँ टेबोः अँजोम केते हेंकू थरेय कहनी तेडा, “डाक्टर चिकन होड़कू लगड मेने, लेकिन हसु कोःकू लगड जरूरत पड़ोआ। जू सेनकोःते ‘इंञ बलिदान मेने, लेकिन इंञ दयांञ चहोः तना’ मेनाआँ, भगवान राः टेबोः राः मतलोब चेडूः पे, नआँ टेबोः राः मतलोब पे जेर तेड रेदो, इंञ पापी होड़कू सुदा ची लगाडिंञ जोमुः तना, हेना पे जेर तेड मेनू, कहेकि ‘इंञ धरमिकू मेने,’ लेकिन पापिकू राः लगाडिंञ मेजकेना।”


तहाँ बतिस्मा ए-मय एहुन्‍ना रेनकू चेलाकू ईसु थरे मेजकेन तेकू कहनी तेडा, “अले अवुर फरीसिकू ची लगड अखीर ले उपासुआ, लेकिन अमाःकू चेलाकू मेने कू उपासुः तना?” हेना वरी ईसु हेंकू थरेय कहनी तेडा, “बरातियाकू सुदा दुल्हा दोहोन मेन दिन, हेंकू पसतोअकू किदो? लेकिन हेना दिन मेजुआ, दुल्हा हेंकू वरिय हिगरो गोगेया, हेन तोलोग हेंकू उपासुआ।” “नवाआँ कपड़ा वरी ओड़ेज केते मरिआ कपड़ा रे कनय मेने कू टेपीया। कहेकि हेना टेपी मरिआ कपड़ा ओर गोत्तेआ, अवुर हेना बगरा ते ओड़ेज जो-मा। अवुर नवाआँ अंगूर रस मरिआ खाल राः झोला रे कनय मेने भरोवेआ, नहीं तदो झोला ओड़ेजुआ, अवुर अंगूर रस एंडाआ, अवुर झोला हो बरबादुआ, लेकिन नवाआँ अंगूर रस ननावआँ झोला रे भरो केतेकू दोहोया, अवुर हेना बनाटंग बढ़ियाँ ते दोहोना।”


ईसु नआँ घयतेय कहनी वकू दोहो एनु, तहाँ एहूदिकू राः आराधना ओड़ाः रेनिय मुखिया मेजेना, अवुर हेंय ईसु थरे गो-ड़िय गिरो केनतेय कहनी तेडा, “इंञाअय कोड़ी होपोन निनीहोय गोजियाना। दू सेनकोःते तीम तेम छुवोंविय रेदोय जियो अयू।” तहाँ ईसु रिमकेनते चेला कुतय सुदा हेंय तयोम तेय सेनेना।
हेनेन तोलोग मियाँहोड़ बारह बरिस अँगम महेनवरी रोग रेय दोहो एना, हेंय कोड़ीहोन तयोम हनवरी सेनकेन ते ईसु राः कपड़ा छोरिय छुवों तेडा। कहेकि हेंय मन मन रेय कहनिय दोहो एनु, “मेंय राः कनापड़ांञ छुयों तेंञ चिकानुआ” मेनते। हेना वरी ईसु मुँहियों केनतेय तेरेज तेडिया अवुरिय कहनी वडियू, “बेटी, जीविम मी केटेजू, अम बिसवास केडा तेम चिकन यना।” हेना वरी हेंय कोड़ीहोन हेनेन तोलोगिय चिकन यनु।
तहाँ ईसु हेंय मुखिया ओड़ाईय तयाःतेड दो, हेना रे बसरी बजाकू अवुर होड़कू काँव राँवुः कुय सेन ञँमतेडा। तहाँय कहनी तेडा, “अड़ीः पे, नेय कोड़ीचोंडीज बेगारिय गो-जा, नेय गितीज तनायू।” नआँ टेबोः अँजोम केते हेंकू लँदा वडियाकू। हेना वरी हेना ओड़ाः रे जवर तनकू बहेर हनतेकू उडूंग तेडकुआ, तहाँ ईसु भीतारिय बोलो केनते, कोड़ी चोंडिज तीय सबतेडा, अवुर हेंय जियो रिमिया नियू। अवुर नआँ टेबोः राः चरचा हेना गोटा देस रे मिरीज यनु।

ईसु हेना जघा वरिय तोरा एना, दो बा होड़ अंद्हा कींञ हेंय तयोम ते, “ओ दाऊद खनदान रेनियू, अलिंञ थरेम दयाऊ!” मेनते कींञ हाक दोहो एनु। ईसु ओड़ाईय सेनेना, तहाँ हेंकींञ अंद्हा कींञ हो हेंय थरे कींञ मेजेना। हेना वरी ईसु हेंकीञिंय होंबोर तेडा, “इंञ नआँ कामिंञ करो सकोआ मेनाआँ अबा बिसवास यडा किदो?” तहाँ हेंकींञ कहनी तेडा, “हूँ, परभु!” तहाँ हेंकींञ मेड छुयों केतेय कहनी तेडा, “अबा जेयसे बा बिसवास केडा, हेन घयते होयाऊ!” अवुर हेंकींञ मेड जीजयानू। हेना वरी ईसु हेंकींञ चेतवन केडकींञ तेय कहनी तेडा, “अँजोम बा, नआँ टेबोः कनय थरे अलोबा लाय बेड़ायू।” लेकिन हेंकींञ उडूंग केनते गोटा देस रे हेंय राः खभेर कींञ मिरीज गोत्तेडू।

हेंकू बहेर हनतेकू उडूंगुः दोहो एनु, तहाँ कुछ होड़कू मियाँहोड़ गूँगा ईसु थरे कू इदी तेडिया, अवुर हेंय थरे भूत लगो तना। अवुर ईसु भूतिय उडूंग तेडा, तहाँ गूँगा टेबोईयू। होड़कू अहचरज यन तेकू कहनियू, “अबू इसरायिल रे नआँ घियाआ कबोह मेने बू ञेंलगाडा।” लेकिन फरीसीकू कहनियू, “नेय भूतकू रेनकू मुखिया राः सहेता ते भूतकुय उडूंग यडा।”

ईसु सींड़ सहर अवुर गाँव गाँव तेय सेनेना, अवुर हेंय एहूदिकू राः आराधना ओड़ाः तेय चेडकू, अवुर भगवान राः राज राः बढ़ियाँ खभेरिय परचारे, अवुर जे-निरीत रेनकू बेमारियाकू अवुर लटो तनकुय चिकन दोहो एनु। हेंय भीड़ रेनकू होड़कुय ञेंलतेडा, तहाँ सोग लगो एना, कहेकि हेंकू बेगर चरवाहकू भेंड़िकू घयतेकू अलमलोः तना, अवुर कू अडतना। तहाँ अनेज रेनकू चेलाकू थरेय कहनी तेडा, “बिली केना खेत दो अखीर इदाना, लेकिन बनियाँरकू ठुवा गिआ। हेनाते खेत मुँवर थरे पे बिनतीऊ, कि हेंय अनेज राः खेती ईर लगड बनियाँर कुय कूलु।”

Kuuntele मत्ती 9