ลามูลา 23
23
ซารา มาตี_ กือนา ตานัม ดัฮ
1ซารา อาดา อูมอยํ ปาญัก_ รอจ กะ ซือราตุซ ดูวา ปูโลฮ ตูโฌฮ (127) ตาโฮด ดัฮ. 2กะฆีเตอ_ ซารา โปด_ มาตี เดะ ตูโปะ คีริยาด-อาระบา_ (นู ฌาดี นังฆรี เฮโบรน)_ เดะ โซะ นังฆรี คานาอัน. อับราฮัม ญา ซูซัฮ ฮาตี_ มือนาแงฮ ปาซัน ซารา มาตี ดัฮ.
3อับราฮัม ญา บีกัซ บือดีรี_ โซะ ฮือลด บาดัด นะ ซารา_ บีนี นะ ญา_ มือเลา ฌางัน ลูมอฮ ซือมียา บักซา เฮด จะ_ 4“กู ฌาดี ซือมียา บักซา อาซิก_ นู มาแรฮ มือนูปัก ดูโดะ เดะ ตืองัฮ ลูมอฮ กาเญา. มีตา ฮาฆิ ตือปัจ ตานัฮ นะ ลูมอฮ กาเญา_ บรี กะ กู นะ บือเลฮ บูวัจ ฌีรัจ ซามา ตืองัฮ กาเญา_ บีดา กู นะ บือเลฮ ตานัม ซือมียา มาตี_ บรี ลือแงะ เดะ มาตา เลอ.”
5ลูมอฮ บักซา เฮด ตีกัฮ กะ อับราฮัม จะ 6“ตกเก เออ_ มีตา บรี มือนีงัย กะ กามี เลอ_ เกา ฌาดี กือปาลา บือซัยํ_ ซามา ตืองัฮ กามี. มีตา บรี ตานัม ซือมียา มาตี นะ เกา_ เดะ ฆูฮา ตานัม บาดัด นู บาฌิ ซูโงฮ นะ กามี เลอ. ฮอย ซาปา เดะ ลูมอฮ กามี นู นะ ตีเมา บรี ฌีรัจ กะ เกา_ เฆอ จะ นะ บลารัก ตีเมา บรี เกา อาเมด ซือมียา นะ เกา มาแรฮ ตานัม.”
7กะฆีเตอ อับราฮัม โปด_ ญา บีกัซ มือญือมัฮ กะ ลูมอฮ ซือมียา บักซา เฮด_ ลูมอฮ นังฆรี อีตู_ 8ญา มือเลา ฌางัน ลูมอฮ กูญา จะ_ “ดัฮ กาเญา ยอม บรี กะ กู_ อาเมด ซือมียา มาตี นะ กู มาแรฮ ตานัม_ บรี ลือแงะ เดะ มาตา เตอ_ บรี กาเญา มือนีงัย กะ กู เลอ. บรี กาเญา ปูโฌะ มีตา เดะ เอโฟรน_ นานะ นะ โซฮา_ บีดา กู เลอ. 9มีตา บรี ญา ซรัฮ ฆูฮา มักเปลัฮ_ นู ฌาดี ปือซากา นะ ญา_ กะ กู. ฆูฮา อีตู เตอ_ ญา อาดา โซะ ฮูโฌก บือนัก นะ ญา. บรี กะ ญา ฌูวัน นอฮปือนอฮ_ ตูโรจ กะ รือฆา นะ ญา_ โซะ ฮือลด มูคา นะ กาเญา_ บรี ฆูฮา อีตู ฌาดี นะ กู_ บีดา กู นะ บือเลฮ บูวัจ ฌาดี ฌีรัจ เลอ”_ ญา จะ.
10โซะ เอโฟรน_ ญา อาดา ดูโดะ เดะ ซามา ตืองัฮ ลูมอฮ ซือมียา บักซา เฮด. เอโฟรน ซือมียา บักซา เฮด_ ญา ตีกัฮ กะ อับราฮัม_ บรี กะ ราตา ซือมียา นู มาโซะ กะ ปีตู นังฆรี ดืองัยํ_ จะ_ 11“ฌางัน เลอ_ ตกเก เออ. เกา กือนา มือนีงัย กะ กู_ กู นะ บรี บือนัก กะ เกา_ บรี ฆูฮา นู อาดา เดะ บือนัก ฌูฆา. กู อาเกะ บรี กะ เกา_ โซะ ฮือลด มูคา โกะ ลูมอฮ ซือมียา นะ กู_ บรี กะ เกา ตานัม ซือมียา นู มาตี นะ เกา เลอ.”
12กะฆีเตอ อับราฮัม ญา มือญือมัฮ_ กะ ลูมอฮ ซือมียา เดะ นังฆรี อีตู_ 13มือเลา ฌางัน เอโฟรน_ บรี กะ ลูมอฮ ซือมียา เดะ นังฆรี อีตู ดืองัยํ_ จะ_ “ตาปี ดัฮ เกา ยอม_ มีตา บรี เกา มือนีงัย กะ กู. กู ปือนอฮ ฮาตี นะ บายัยํ รือฆา บือนัก อีตู_ บรี เกา ซาโมจ ดูเวะ เดะ กู เลอ_ บีดา กู นะ บือเลฮ ตานัม ซือมียา มาตี นะ กู_ เดะ ตือปัจ อีตู.”
14เอโฟรน ญา ตีกัฮ กะ อับราฮัม จะ_ 15“กือปาลา เออ_ มือนีงัย กะ กู เลอ_ ตือปัจ ตานัฮ อีนี อาดา รือฆา_ ฌาดี ปัจ ราตุซ (400) รีเงะ ปีระ#23.15 ฌาดี บือกะ 4.8 กีโลกรัม ปีระ.. โซะ เกา ฌางัน กู เตอ_ เตด บราปา บาญะ เลอ. ตานัม เลอ_ บาดัด นะ ซือมียา มาตี นะ เกา.”
16กะฆีเตอ อับราฮัม ญา มือเลา บือตือตู ฌางัน เอโฟรน. อับราฮัม โปด_ ตีมัง โกะ ปีระ_ ตูโรจ กะ นู ญา บือเลฮ มือเลา ดัฮ_ บรี โกะ ลูมอฮ ซือมียา บักซา เฮด ดืองัยํ เตอ. ฌาดี จะ ปีระ ปัจ ราตุซ (400) รีเงะ_ นู ตูโรจ บือกะ บือซี มือนีมัง นะ โกะ ซือมียา ฌูวัน ซือบารัก_ เดะ ฮาดัจ อีตู.
17บือนัก นะ เอโฟรน เดะ มักเปลัฮ_ นู อาดา โซะ อาตัซ มาตา อารี เดะ มัมเร_ ฌาดี จะ บือนัก ฆือนะ ฌางัน ฆูฮา นู อาดา เดะ บีดิก บือนัก_ ฌางัน โกะ ปูโฮด กายู ซือมูฮา ฌูฆา_ ราตา เดะ ตือปัจ ตานัฮ อีตู เตอ_ เอโฟรน โปด_ ญา บือเลฮ ซรัฮ 18บรี กะ อับราฮัม_ บรี ฌาดี บารัก นะ ญา_ โซะ ฮือลด มูคา นะ ลูมอฮ ซือมียา บักซา เฮด_ ฌาดี จะ โกะ ลูมอฮ ซือมียา นู มาโซะ ปี กะ ปีตู นังฆรี นะ กูญา.
19ลือปัซ อีตู_ อับราฮัม ญา ตานัม บาดัด นะ ซารา_ บีนี นะ ญา_ เดะ ฆูฮา เดะ ตือปัจ บือนัก มักเปลัฮ_ โซะ ฮือลด เดะ ตูโปะ มัมเร_ (นู ฌาดี นังฆรี เฮโบรน)_ เดะ โซะ นังฆรี คานาอัน. 20โกะ บือนัก ฌางัน ฆูฮา นู อาดา เดะ ตือปัจ อีตู_ โกะ ซือมียา บักซา เฮด_ กูญา ซรัฮ ตือปัจ อีตู บรี กะ อับราฮัม_ บีดา ญา นะ บูวัจ ฌีรัจ เลอ.
انتخاب شده:
ลามูลา 23: ULBIBLE
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید