ลามูลา 22
22
ตูฮัด ปือซัด อับราฮัม_ บรี อาเกะ อีซัก_ มือญือมัฮ กะ ตูฮัด
1ลือปัซ ลาฆู อีตู_ ตูฮัด ญา นะ ลกลีฮัจ ฮาตี นะ อับราฮัม จะ_ รือมัก เฆอ เตด รือมัก. ญา มือเลา จะ_ “อับราฮัม เออ.”
อับราฮัม ตีกัฮ กะ ตูฮัด จะ_ “กู อาดา เดะ ตือปัจ อีนี เลอ_ ตูฮัด.”
2ตูฮัด มือเลา จะ_ “เกา กือนา บาวา นานะ ตูงัน นะ เกา_ นู ปือนามา จะ_ อีซัก_ นู เกา ซายัก เตอ_ บาวา ญา บือปี กะ นังฆรี โมรียา. โซะ อีตู_ เกา กือนา อาเกะ มือญือมัฮ นานะ นะ เกา_ บรี ฌาดี บารัก ตูนู มือญือมัฮ กะ ตูฮัด. กือนา บูวัจ กะฆีเตอ_ เดะ อาตัซ บูเกะ_ นู กู นะ มือญาเระ บรี กะ เกา”_ ตูฮัด ญา จะ.
3กะฆีเตอ_ อับราฮัม บีกัซ วะตู บือบีฮัก มาตา อารี นะ ตรือเบะ_ อีกัจ ตือปัจ ดูโดะ เดะ อาตัซ กูดา ดือมิ นะ ญา_ บาวา ปราโซฮ อูรัก มูดา_ ดูวา อูรัก_ ฌางัน อีซัก นานะ นะ ญา ซามา. ญา กรัจ กายู อาปี ฌาดี ซือกูตกๆ ตาโรฮ_ บีดา นะ บูวัจ ลาฆู ตูนู มือญือมัฮ_ บือฌาลัด ปี_ กะ ตือปัจ นู ตูฮัด มือญาเระ กะ ญา ดัฮ. 4รอจ กะ อารี ตีฆา_ อับราฮัม ญา ลางอฮ ปาลา_ ลีฮัจ บือฆารี ตือปัจ อีตู_ ตะเดะ ฌาโวฮ. 5กะฆีเตอ_ ญา มือเลา ฌางัน อูรัก มูดา_ ดูวา อูรัก อีตู จะ_ “กาเญา กือนา นาตี เดะ ตือปัจ อีนี_ ฌางัน กูดา เลอ. กู ฌางัน นานะ นะ กู_ นะ ปี กะ โซะ อีตู_ ซูดัฮ มือญือมัฮ กะ ตูฮัด ดัฮ_ กามี นะ ปาเระ มาแรฮ_ บือดาปัจ กาเญา ปูลัก” ญา จะ.
6อับราฮัม อาเมด กายู อาปี_ บีดา นะ บูวัจ ลาฆู ตูนู มือญือมัฮ อีตู_ บรี กะ อีซัก นานะ นะ ญา ตาโงก. ญา อาเมด ดามัยํ_ ฌางัน รีโจก_ บือปี ซามา ฌางัน กูญา ดูวา บรานะ. 7อีซัก มือเลา ฌางัน อับราฮัม_ ปะ เดะ ญา_ จะ_ “ปะ เออ.”
ปะ เดะ ญา ตีกัฮ จะ_ “นามา เลอ.”
อีซัก ตาญา จะ_ “ลีฮัจ เลอ_ อาดา อาปี_ อาดา กายู อาปี_ ตาปี อานะ กาเมก_ นู นะ ตูนู มือญือมัฮ กะ ตูฮัด_ อาดา ปัจ ดีฮา?”
8อับราฮัม ตีกัฮ จะ_ “นานะ เออ_ ตูฮัด นะ ซียะ ตะอาซิก_ นะ บรี อาดา กาเมก_ ซืออีโกยํ_ บีดา ตูนู มือญือมัฮ.”_ กะฆีเตอ_ กูญา ฌาลัด ปี ซือรูโลยํ_ กือดูวา บรานะ.
9ตานา รอจ กะ ตือปัจ_ นู ตูฮัด มือญาเระ ดัฮ_ อับราฮัม บูวัจ ตือปัจ มือญือมัฮ กะ ตูฮัด_ ซียะ กายู อาปี_ บรี บาฌิ ดัฮ. ญา อีกัจ กากี ตางัน นะ อีซัก_ นานะ นะ ญา_ บอฮ เดะ อาตัซ ตือปัจ มือญือมัฮ_ เดะ อาตัซ กายู อาปี อีตู เตอ. 10กะฆีเตอ_ อับราฮัม อาเงา ตางัน_ อาเมด รีโจก_ นะ บูนอฮ นานะ นะ ญา. 11ตาปี อาดา ฮูลู บาลัก นะ ตูฮัด บือซัยํ เดะ อาตัซ_ บลาโลก อับราฮัม_ ดาตัก เดะ โซะ ลาแงะ_ มือเลา จะ_ “อับราฮัม_ อับราฮัม เออ.”
อับราฮัม ตีกัฮ จะ_ “นามา เลอ_ ตูฮัด.”
12ฮูลู บาลัก_ ญา มือเลา จะ_ “ฌางัน นะ บูวัจ นามา_ กะ นานะ นะ เกา เลอ. ซาเบะ วะตู อีนี_ กู ตาฮู ดัฮ จะ_ เกา ตูเฮะ กะ ตูฮัด_ ยอม ซรัฮ นานะ ตูงัน นะ เกา_ บรี กะ กู.”
13อับราฮัม ตีญุง ลีฮัจ กือลีลิก_ บือฆารี กาเมก บาปา ซืออีโกยํ_ ตาโนะ นะ ญา_ ลือกัจ เดะ ปูโฮด กายู ดัฮ. อับราฮัม ปี อาเมด กาเมก อีตู มาแรฮ_ มือญือมัฮ กะ ตูฮัด_ ฌาดี บารัก ตูนู มือญือมัฮ_ ฆาตี นานะ นะ ญา. 14กะฆีเตอ_ อับราฮัม ตืองะ ปือนามา ตือปัจ อีตู จะ_ “ตูฮัด บือซัยํ เดะ อาตัซ นะ บรี_ ฆือนะ ดัฮ.#22.14 ปือนามา อีนี นู อับราฮัม ตืองะ บรี กะ ตือปัจ อีตู_ ดัฮ กาเลฮ รือมัก_ ฌาดี บือกะ_ “ตูฮัด บือซัยํ เดะ อาตัซ ญา นะ ลีฮัจ บือฆารี.” ญา ตูโรจ กะ ปือมือเลา นะ อับราฮัม เดะ ตือนอซ 8 นู จะ_ ตูฮัด ญา นะ ลีฮัจ บือฆารี บรี อาดา อานะ กาเมก ฆือนะ ดัฮ.”_ รอจ อารี อีนี โปด_ กูญา มือเลา จะ_ “ตูฮัด บือซัยํ เดะ อาตัซ นะ ซียะ บรี ฆือนะ_ เดะ บูเกะ นะ ตูฮัด#22.14 บาซา ฮีบรู นะ กาเลฮ รือมัก_ ฌาดี บือกะ “เดะ บูเกะ นะ ตูฮัด บือซัยํ เดะ อาตัซ_ ญา นะ กือนา ลีฮัจ บือฆารี ดัฮ.”.”
15มาโซะ กือดูวา กาลี_ อาดา ซือวารา นะ ฮูลู บาลัก นะ ตูฮัด บือซัยํ เดะ อาตัซ_ ดาตัก เดะ โซะ ลาแงะ_ 16มือเลา กะ อับราฮัม จะ_ “ตูฮัด บือซัยํ เดะ อาตัซ มือเลา จะ_ กู นะ มือเลา บือฌาญี_ เดะ ปือนามา นะ กู_ นู จะ_ กรานา เกา บูวัจ กะฆีนี_ ยอม ซรัฮ นานะ ตูงัน นะ เกา_ บรี กะ กู_ 17ซูโงฮ_ กู นะ บรี ซือลามัจ กะ เกา_ นะ บรี บือแนฮ นะ เกา_ บือตามัฮ บาญะ ซือรูโลยํ. บาญะ_ ซือรูปา บือกะ โกะ บีตัก เดะ ลาแงะ เตอ_ บาญะ_ ซือรูปา บือกะ โกะ บีฌี ตานัฮ เดะ ปาตัย_ เดะ บีดิก ลาโวจ เตอ. กู นะ บรี บือแนฮ นะ เกา_ ฌือนัฮ_ เดะ ลูมอฮ ซือตรู นะ กูญา. 18กู นะ บรี ซือลามัจ_ กะ ลูมอฮ ซือมียา_ ราตา เดะ ดือนียา_ กรานา บือแนฮ นะ เกา_ ซาเบะ เกา มือนีงัย บูวัจ ตูโรจ กะ ซือวารา นะ กู ดัฮ”_ ตูฮัด ญา จะ.
19กะฆีเตอ_ อับราฮัม ปาเระ ปี_ ดาปัจ อูรัก มูดา นะ ญา_ ดูวา อูรัก อีตู. กูญา บีกัซ บือฌาลัด ปี ปาเระ กะ ตูโปะ เบเออ-เซบา. อับราฮัม โปด_ อาดา ดูโดะ ปัจ อีตู เลอ.
บือแนฮ นะ นาโฮระ
20ลือปัซ เดะ ลาฆู อีตู_ อาดา ซือมียา มาแรฮ มือญาเระ กะ อับราฮัม จะ_ “มิละคา บือโปรจ นานะ_ บรี กะ นาโฮระ_ อาดี เดะ เกา ฌูฆา ดัฮ. 21ฌาดี จะ อูซะ_ นานะ นู ซูโลก_ บูซะ_ อาดี เดะ ญา_ ฌางัน เคมูเอน_ ปะ เดะ อารัม.” 22อาดา เคเซด_ ฮาโซ_ ปินดาชะ_ ยิดลับ_ ฌางัน เบทูเอน. 23เบทูเอน ฌาดี ปะ นะ เรเบคา. กือมูฮา ลาปัด อูรัก อีนี_ มิละคา ญา ดูโดะ เดะ อาปี_ บรี กะ นาโฮระ_ อาดี กีลากี เดะ อับราฮัม. 24ลือเบฮ เดะ อีตู ปูลัก_ บีนี มูดา นะ ญา_ นู ปือนามา เรอูมัฮ_ ญา บือเลฮ นานะ ปือนามา จะ_ เทบัฮ_ ฆาฮัม_ ทาฮาซะ_ ฌางัน มาอาคา.
انتخاب شده:
ลามูลา 22: ULBIBLE
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید