लुका 4
4
सैताने येसुलाइ परिछ्या कर्ल
(मत्ति ४:१-११; मर्कुस १:१२-१३)
1येसु पबित्र आत्माइ भोरिहिन् यर्दन खोलाक्भटे फर्किहिन् आइलक्। पबित्र आत्माइ येसुलाइ उखास लाग्दो ठाँओमा लेगालकुन्। 2उ ठाँओइ सैताने ओक्रालाइ चालिस दिनसम्मय परिछ्यामाहा पारिबानाइ पापै फाँसाबाक् खोज्लोकुन्। उ चालिस दिन भोरिय येसुइ किच्छुय नहिंखाइल धर्लक्, उहेसैर्हे ओक्रालाइ एक्दमे भुख लाग्ल रैल्हकुन्।
3उहेटाकै सैताने आइबानाइ येसुलाइ बोल्लोकुन्, “साँच्चिय तुँइ परमेस्वरक् बेटायक हो भेने, यि दोंखोलाइ पिठा बनिजाहिक् बाज।”
4येसुइ ओक्रालाइ बोल्लोकुन्, “धर्मसास्टरमाहा यि लेख्ल रहेला ‘खाबाक् थोके माटेन् मानुस ना बाँचेक्।’”#ब्यबस्था ८:३
5ओक्राक्पाछु सैताने येसुलाइ अल्गो डाँरामाहा लेगाहिन् एकेछिने सन्सारक् सेब्भ्रोउ राज्जेलक् देखाहिन् ओक्रालाइ बोल्लोकुन्, 6“मुँइ तोरानि यि सेब्भ्रोउ राज्जेक् राजा आउँ यि जम्माय धनसम्पतिक् मालिक बानाबा पारम्ना, किसाबुने यि सेब्भ्रोउ थोकलक् मोरे हाथमाहा रहैस् आउँ मुँइ जक्रालाइ चाहाम्ना ओक्रानि देबा पारम्ना। 7मोरालाइ घोप्टो पोरिहिन् ढोक् कर् आउँ यि सेब्भ्रोउ थोक् तोरे भेस्ला।”
8येसुइ ओक्रानि जुबाप देलकुन्, “धर्मसास्टरक् बचनै किवा लेख्ल रहेला, सुन्, तुँइ परमपर्भु आफ्निक् परमेस्वरलाइ माटेन् ढोक् कर् आउँ ओक्रिहिक् माटेन् सेवा कर्।”#ब्यबस्था ६:१३
9ओट्का भेनेसौ सैताने येसुलाइ यरुसलेममा लेगालकुन् आउँ ओस्कोक् मन्दिरक् टुप्पाइ ठड्ध्याबा लागाहिन् यन्हिं बोल्लोकुन्, “साँच्चिहिंक् तुँइ परमेस्वरक् बेटायक हो भेइबुने लु, यछिसौ हाम्फाल। 10किसाबुने धर्मसास्टरइ यन्हिं लेख्ल रहेला, ‘तोरा रख्वारि कर्बा परमेस्वरे आफ्निक् स्वर्गोदुतलकलाइ आर्हाहिन् पाठाइस्।’#भजनसङ्ग्रह ९१:११-१२ 11आउँ ‘तोरा टाङै दोंखोक् थक्कर् बुन् लागुस् बाजिहिन् उखर्हाइ तोरानि आहिन् हाथहाथिहिंमा थाम्हेस्ला।’”
12येसुइ ओक्रालाइ जुबाप देलकुन्, “धर्मसास्टरमाहा यरङ् आको बाज्ल रहेला, ‘तुँइ आफ्निक् परमपर्भु परमेस्वरलाइ परिछ्या बुन् कर्।’”#ब्यबस्था ६:१६
13सैताने येसुलाइ हरेक किसिमक् परिछ्या करिहिन् पापै फाँसाबाक् खोजिहिन् सिधानेसौ ओर्को मौका नहिं पाबाभोरिलाइ ओक्रानि छारिहिन् जाइलकुन्।
गालिल पर्देसइ येसुइ काम सुरु कर्लक्
(मत्ति ४:१२-१७; मर्कुस १:१४-१५)
14येसुइ पबित्र आत्माक् सक्ति पाहिन् गालिलमाहा फर्किहिन् जाइलक्। तसौ येसुक् बिसइक् कहिन् चारौपटि फिंज्लकुन्। 15येसुइ सभाघरै सिच्छा देओइ आउँ जम्माहिं ओक्राक् बाखान करथ्।
नासरतमाहा येसुलाइ सुइकार बोइने कर्ल
(मत्ति १३:५३-५८; मर्कुस ६:१-६)
16येसु नासरतै आइलक् जच्छि चुटुनाइटाकै उ हुर्कल रैल्हक्। येसु आफ्निक् चलन अनुसारे बिसारिक दिनै सभाघरमाहा जाइलक् आउँ पर्भाक्नि ठध्यालक्। 17ओक्रालाइ यसैया अगमबक्ताक् सेर्पौन्या कागतक् मुठ्ठा देलिहिंक्। येसुइ उ कागतक् मुठ्ठा खोल्लोक् आउँ यरङ् कहिन् लेख्ल ठाउँ निस्काहिन् पर्ल्हक्,
18“परमपर्भुक् आत्मा मोरा उप्रै रहैस्,
किसाबुने गरिपलकलाइ खुस्सिक् खभर सुनाबाक्नि ओहिं मोरानि चुन्ल धरैस्।
कइदै भेलाहारलाइ छारिपाबाक् कहिन् बोल्बालाइ,
आउँ अन्धालकलाइ देख्लाहार बानाबालाइ,
हेंपाइमाहा पोर्लोलकलाइ खुलम-खुल्ला पार्बाक् लागि,#यसैया ६१:१-२
19आफ्निक् मानुसलकलाइ मुक्ति पाबाक् बेला आहिन् सक्ल बाजिहिन् जानाते बुल्बाक्नि
परमपर्भुइ मोरालाइ पाठाल धरैस्।”
20ओक्राक्पाछु येसुइ कागत सेर्पिबानाइ बन्ध कर्लक्। आउँ ओछि एक्जेना काम कर्लाहार मानुसलाइ फिर्ता देहिन् बस्लक्। सभाघरै रैल्हाहार जम्मायजेनाइ ओक्रिहिलाइ दिठाहिन् धर्लिहिंक्, 21तस्के येसुइ उखर्ह्वालाइ बोल्लाहा, “धर्मसास्टरक् बचनै लेख्ल यि कहिन् आजु, तोहोराखर्हाइ सुन्तिहि सुन्तिहिय पुरा भेल रहेला।”
22जम्मा मानुसलके ओक्रालाइ बाखान्बा ठाल्लिहिंक् अनुग्रहइ भोर्लो ओक्राक् कहिन् सुनिहिन् उखर्ह्वा जम्माय छक्क पोर्लुहुन्। तसौ उखर्हाइ बाज्लुहुन्, “किस् यि योसेफक् बेटायक बोइने ते?”
23तसौ येसुइ उखर्ह्वानि बोल्लाहा, “असौ पक्काय तोहोराखर्हाइ मोरानि यि खिसा बोलोहोला, ‘अ बैध! तुँइ आफ्निलाइ राम्रो पार।’ तोहोराखर्हाइ मोरानि ‘कफर्नहुममाहा कर्लक् परौ आफ्निक् सहरुहुँमा उहेरङ् अचम्मक् कामलक् कर्’ बाजिहिन् बोलोहोला।” 24कहिनक् तुङ्ङा मारिहिन् येसुइ बाज्लक्, “साँच्चिय मुँइ तोहोरानि बोल्मेहेर्ला, कुन्हुँ अगमबक्तालाइ ओक्राक् आफ्निक् गाउँ-ठाँओमा मानुसलके ओक्रालाइ इजत-मान नाकरथ।#यहुन्ना ४:४४ 25ओर्को एक्टा कहिन् आको मुँइ तोहोरानि बोल्मेहेर्ला, एलियाक् पालामाहा तिन बर्स छ मैन्हासम्मय पानि नहिं पोरिहिन् बर्के अलिकाल पोर्लो रैल्हकुन्। उटाकै इस्राएल देसै थुप्रोय बिध्वा मानुसलक् रैल्हुहुन्।#१ राजा १७:१ 26भेटौसुधा सिदोन बाज्ल ठाँओमा रैल्ह सारपत#४:२६ सिदोन बाज्ल ठाँओमा रैल्ह सारपत: यि सहर इस्राएल देसक् बाहारक् सहर रैल्हकुन्। ओछि बस्लाहार अयहुदिलक् रैल्हुहुन्। गाँओक् एक्जेना बिध्वा अइमाइक्ठालाइ माटेन् परमेस्वरे एलियालाइ पाठालकुन्।#१ राजा १७:८-१६ 27उहेरङ् करिहिन् एलिसा बाज्ल अगमबक्ता भेलटाकै इस्राएलमा थुप्रोयजेना माहारोग लाग्ल मानुसलक् रैल्हुहुन्। भेटौ परमेस्वरे सिरिया देसक् नामान#४:२७ नामान: नामान यहुदि नहिंरैल्हक्, तर सिरियाक् गयरयहुदि रैल्हक्। बाज्ल मानुसलाइ माटेन् राम्रो कारालक्, ओर्को कुन्हुँलाइ राम्रो नहिंकारालाहा।”#२ राजा ५:१-१४
28यि कहिन् सुनिसक्नेसौ सभाघरमाहा भेल जम्माय मानुसलक् रिसे मुर्मुरि भेलुहुन्। 29तसौ जाराक्-जुरुक् उठिबानाइ जम्माहिं येसुलाइ घस्टते सहरेसौ बाहार निस्कालिहिंक्। उखर्ह्वाक् यि सहर डाँराक् ठाँओमाहा रैल्हकुन् आउँ उखर्ह्वाइ येसुलाइ उहे डाँराक् टुप्पामाहा लेगाहिन् ओछिसौ घुघाबाक् खोज्लिहिंक्। 30भेटौ येसु मानुसलकक् माझक्भटे छिंरिबानाइ आफ्निक् पैंदाइ निस्किहिन् जाइलक्।
भुत लाग्ल मानुस राम्रो भेल
(मर्कुस १:२१-२८)
31ओक्राक्पाछु येसु गालिलक् कफर्नहुम बाज्ल सहरइ आइलक्, बिसारिक दिनै येसुइ मानुसलकलाइ आफ्निक् सिच्छा देलक्। 32ओक्राक् सिच्छा सुनिहिन् ओछि रैल्हाहार जम्माय छक्कय पोर्लुहुन्, किसाबुने ओहिं उखर्ह्वानि हिकमतक्भटे सिच्छालक् देलक्।#मत्ति ७:२८-२९ 33सभाघरमाहा एक्जेना भुत लाग्ल मानुस रैल्हक्। ओहिं बर्के चोटे चिच्याइहिन् बाज्लक्, 34“अ! नासरतक् येसु, तुँइ हाम्रानि किसकर्बाक् खोज्लो धरस्ला? किस् तुँइ हाम्रानि खत्तम् कर्बाक् आइल? तुँइ परमेस्वरे पाठाहिन् आइल पबित्र मानुस हो बाजिहिन् मुँइ चिन्हँम्ना।”
35यि कहिन् सुनिहिन् येसुइ उ भुतलाइ हप्कालकुन्, “चुप् लाहिन् बस् आउँ अख्निहिं यि मानुसक्भटे निस्किहिन् जाइहाल!” तसौ उ मानुसलाइ जम्माहिंक् आगारिय उ भुते पट्किबानाइ ओक्राकभटे निस्किहिन् जाइलक्, भेटौ ओक्रालाइ किच्छुय घाउँ चोट नहिंलाग्लकुन्।
36यि कहिन् देख्नेसौ जम्माजेना छक्क पोरिहिन् बाज्बा ठाल्लुहुन्, “यि मानुसक् बोलिमा कनङ् अधिकार आउँ सक्ति हाँ, यहिं ता हप्काहे बिट्के भुतलकौ निस्किहिन् पाराट्थ्ला खम।” 37तसौके उ कफर्नहुम सहरक् चारौपाखा येसुक् बिसइमा बाँइ-बाँइ भेलकुन्।
येसुइ थुप्रोय मानुसलकलाइ राम्रो कारालक्
(मत्ति ८:१४-१७; मर्कुस १:२९-३४)
38सभाघरक्भटे निस्किहिन् येसु सिमोन बाज्ल मानुसक् घरै जाइलक्। उटाकै सिमनक् सासेक् जर लागिहिन् थाला पोर्ल रैल्हक्, घरक् जम्माय मानुसलके ओक्रानि राम्रो काराइदे बाजिहिन्, येसुलाइ बिम्ति कर्लुहुन्। 39येसुइ ओक्राक् छेंओइ जाहिन् ओक्रानि लाग्ल जरलाइ हप्काइ देलकुन्, तसौ जरे ओक्रालाइ छारिहाल्लकुन्। तसौ उठिबानाइ उहेखर्हाक् सुसार कर्बा ठाल्लक्।
40बियार पखै लहुर डुब्नेसौ मानुसलके थुप्रोय थरिक् बेरामि मानुसलकलाइ येसुक्ठालाइ लेहिन् आइलुहुन्। येसुइ उ जम्माहिंक् उप्रै हाथ धरिबानाइ जम्माहिंलाइ राम्रो कारालक्। 41थुप्रोय जेनाक्भटे भुतलकौ चिच्याइ-चिच्याइ यन्हिं बाजिहिन् निस्कलुहुन्, “तुँइ साँच्चिहिंक् परमेस्वरक् बेटायक हो।” तर येसुइ उ भुतलकलाइ हप्काहिन् थ्यापय साराबा नहिंदेलाहा, किसाबुने येसुसेहे मुक्ति देलाहार राजा खिरिस्ट हो बाजिहिन् उखर्हाइ चिन्ह्थ।
येसुइ कर्ल काम
(मर्कुस १:३५-३९)
42बिहान पखै उँजत भेइटे बिट्के येसु कुन्हुँ नहिंभेल सुन्ने ठाँओमाहा जाइलक्। भेटौ मानुसलकक् धुइरो सेहे ओक्रानि खोज्ते जाइलिहिंक्, ओक्रानि भेंटानेसौ उ मानुसलके येसुलाइ बोल्लिहिंक् “हाम्रानि छारिहिन् तुँइ कट्टुहु बुन् जा ना है” बाजिहिन् येसुलाइ रोक्बाक् कर्लिहिंक्। 43येसुइ उखर्हालाइ बोल्लाहा, “मुँइ परमेस्वरक् राज्जेक् खुस्सिक् खभर ओर्को सहरलकुहुमा जानाते बुल्बा पोर्लाहार। किसाबुने परमेस्वरे मोरानि यिहे काम कर्बाक्नि पाठाल धरैस्।”
44यरङ् करिहिन् येसुइ यहुदियाक् जम्मा ठाँओक् सभाघरलकै जाहिन् पर्चार कर्ते बुल्लक्।
انتخاب شده:
लुका 4: DEWZ
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2024 (Active), Mother Tongue Translators Society and Wycliffe Bible Translators, Inc. All rights reserved.
