Matius 4
4
Smwangat yatkar nir ulun nateman Yesus na ain letkape
4:1-11
(Mrk. 1:12-13; Luk. 4:1-13)
1Mpene Ratu Smwangtany nrure Yesus far ain letkape nema smwangat yatkar nir ulun nateman I.#Ibr. 2:18; 4:15 2Na iano I to ntame doan lere buty fat, nwayat ma namlafar. 3Mpe smwangat yatkar nir ulun nma ma nakmat Yesus ma nfalak, “Farlan Ko ye Ratu Anaky, no mfwalak ber batyar ye ma reluk roti.”
4Nempa Yesus nfalak, “Na Kitap Lelerap dalam rarengi feti to lan roti ma nafmorip tomwatar, nempa nof ngribatnir ma Ratu nfalak a nbal.”#Ul. 8:3
5Mpene smwangat yatkar nir ulun nor Yesus far Yerusalem. Na kote ye ma tomwatar rof mpenempen rma ma rsatngur ber Ratu. Na iane smwangat yatkar nir ulun nau Yesus na Ratu Ni Das Silai Ni bubungan das. 6Betno nfalak, “Farlan Ko ye Ratu Anaky, mpwutuk mof ye far bab! Fali rarengi na Kitap Lelerap dalam na Ko farye:
‘Keta Ratu nfarete Ni malaektar ma rajake Ko,
ma keta ral tangnir la rsaluk Ko,
nema emar kete rtutuk sir a na bati.’”#Mzm. 91:11-12
7Ne Yesus nfalak, “Na Kitap Lelerap dalam rarengi nbal farye, ‘kete miteman mir Mangnrure ma neluk mir Ratu ne.’”#Ul. 6:16
8Ne smwangat yatkar nir ulun nor Yesus far bubuar sa ma medase desar. Na iane i nfatutu monuk ain faretar na saryamprene ror nir kabain ngafelar ber Yesus. 9Ne smwangat yatkar nir ulun nfalak, “Keta kal monuk kabanir ma mswalan a ne ber Ko, lan feti mswatngur ber yakw.” 10Mpe Yesus nfalak ber i, “Hei smwangat yatkar nir ulun, mbwie mof ye! Fali rarengi na Kitap Lelerap dalam, ‘Ka msyatngur ber mir Mangnrure ma neluk mir Ratu ne, ma mkyarya ber lan I!’”#Ul. 6:13 11Mpe smwangat yatkar nir ulun a ne nti a ntate Yesus, ma malaektar rma rof surga ma rlangun I a na Ni perluar.
Yesus ntabw ma nkarya na propinsi Galilea
4:12-17
(Mrk. 1:14-15; Luk. 4:14-15)
12Noak a ne Yesus ndengar feti romat Yohanes ma rnau i a na sel. Mpe I nti a ntate propinsi Yudea ma nbali I far propinsi Galilea.#Mat. 14:3; Mrk. 6:17; Luk. 3:19-20 13I to namin kote Nasaret nempa nti kote Kapernaum ma namin iane. Kote Kapernaum a ne namin twemul Galilea seriny na nus Zebulon ma Naftali.#Yoh. 2:12 14Yesus namin kote ne la nafdiat safe ma luryain e, Ratu nfalak ber nabi Yesaya. Ratu nfalak farye:
15“Mdyengar, kmi ma mimin nus Zebulon ma nus Naftali,
mir nusar ye ramin nlosir twemul Galilea na kewas Yordan balisya.
Tomwatar ma to Yahudi sir a ne yadin ma ramin ain a ne.
16Luryain a ne sir rmorip a na makrokap dalam,
nempa lere ye rsalan Ratu Ni snyain ma idak desar.
Tomwatar ma rmorip a na nuse ne mamate nkuase sir.
Nempa lere ye rsalan snyain ma idak ma nodir dalmir lo.”#Yes. 9:1-2
17Ntabw nof a ne, Yesus nafwibar ber sir, “Ka mtyate mir salar, fali to dodo a nbal e, Ratu neluk Rai ma nfarete saryamprene ye lo.” #Mat. 3:2
Yesus ntar mangfutar ma rlarat I
4:18-22
(Mrk. 1:16-20; Luk. 5:1-11)
18Na ler sa e, Yesus nmpan nalyole twemul Galilea seriny. Ne I nsalan mangfutar du ma rlui nir fuat ma ntey inar. Sir a ne Simon ma rtar feti Petrus ma wainy Andreas. 19Ne Yesus nfalak ber sir, “Mya ma mlyarat Yakw, lere ye to minriak inar lo nempa keta kuftutu kmi ma minriak tomwatar ma rlarat Yakw.” 20Ntabw nof a ne sir rnau kalin nir fuat ma rlarat desar Yesus. 21Ma Yesus nmpan a nbal, ne I nsalan tomwatar du, radu ye awayar sir. Sa e ngarany Yakobus ma sa e ngarany Yohanes, sir a ne Zebedeus angkir. Sir raktem amany rasusan nir fuat na sori dalam. Ne Yesus ntar Yakobus ma wainy Yohanes ma rlarat I. 22Mpe rnau kalin desar nir sori ma amany ma rlarat Yesus.
Yesus naftutu ma nafngamone tomwatar yadin
4:23-25
(Luk. 6:17-19)
23Ne Yesus nmpan a nlole propinsi Galilea ma naftutu tomwatar na das sampangar. Ma nafwibar Ibar Ngamone ber tomwatar feti Ratu neluk Rai ma nfarete saryamprene. Ma nafngamone nbal tomwatar rof ninr maningkyar felnir mpane. #Mat. 9:35; Mrk. 1:39 24Mpe ibar na Yesus a ne, nsor monuk propinsi Siria nwayat ma tomwatar yadin rma ma rakmat I. Sir rma e ror tomwatar ma rkoman suse fali nir maningkyar felnir mpane. Tomwatar a ne ma smwangat yatkar rsung sir, rngerw ma ramlukut. Sir ror tomwatar a ne ber Yesus ne I nafngamone sir monuk. 25Iane nwayat ma tomwatar yadin rlarat Yesus. Sir a ne ma rma rof propinsi Galilea, Dekapolis, Yerusalem, propinsi Yudea, ma sir ma rof wer Yordan balisya nbal.
اکنون انتخاب شده:
Matius 4: YMD
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
