Toona 3
3
Biaŋinba ki bi fiin wɔbik ki u somm
1Dasiar yenlekir dinn ki Piita nan Jɔɔnn din tan saa Yennu jiantu ŋasaakak ni Yenmeiyoo. 2Ŋanne ki bi saa yaa bin kɔɔ Yennu jiantu ŋasaakak tammɔb nba ki bi din yi Tammɔŋaŋ na, ki la jasɔɔ nna ki u kar leŋ, ki poŋ tee wɔbik u maaru niwa; ki daar yejaŋaakur ki bi din tuu jiiu ki baar nanɔ tammɔb maŋ boor ni, a wuu mei likirii niib nba baat Yennu jiantu ŋasaakak maŋ ni na.
3Yoo nba ki u tan la Piita nan Jɔɔnn ki bi yaa bin kɔɔ na, ki u miarib likirii. 4Ki bi jiant ki goriiɔ sirrr; ki Piita tan yetɔ a “I goriit.” 5Ŋanne ki u ji nur u nunii ki goriib, ki daan mi a u sa gaar siare bi peŋ. 6Ŋaan ki Piita betɔ a “Ti lek ki mɔk likirii ki sa turani, ŋaan ta mɔk linbae ki ti yaa tin tura. Mii tura mɔb Yisa Masia nba tee Nasaret nirɔ na sann ni, fiit kii somm,” 7ŋaan soor u niidiitu po nuu ki fiinɔ.
Li taakpaak ni ki jɔɔ na taa kakit yiama, 8ki u tab ki fiir set, ki ji piin somm ki lin, ki tan weib ki kɔɔ Yennu jiantu ŋasaakak maŋ ni, ki yuuk ki mɔbit nan parpeenn, ki piak dont Yennu sann. 9Ki niib kur lau ki u somm ki piak dont Yennu sann. 10Ba ji din bann nan ŋɔɔe tee miatɔɔ nba tuu kaar ki mei niib likirii Yennu jiantu ŋasaakak tammɔŋaŋ nna, ki li ji yaar ŋaan litib nan wa paak na paak.
Biaŋinba ki Piita mɔɔntir Yisa barŋanii
11Ki wɔbik maŋ puur wɔb Piita nan Jɔɔnn; ki li teen niib na kura bakitnauŋ bonchiann, ki bi chiar saan lakin bi boor ni. Ba lakin sian na yi Solomon barintir ni.
12Piita nba la niib na yoonba ki u yet a “Yimm Israel teeb, bee ki li yaar ŋaan liti nan nirɔ na? ki bee ki i barii timm nna? Ta te ki jawɔbik na fiir somm na, i dukii mi a li tee ti mɔŋ paŋ amii ti mɔŋ yentinu paakee? 13Yennu nba din tee Abraham nan Aisak nan Jakɔb nan ti yejaleeb Yennu na, ŋɔɔe tee daanɔ nba donn u Toontunnɔ Yisa ki turɔ u mɔŋ yabint. Yisa maŋe ki i jiiu ki teenɔ ti yudamm nuu ni na, ki Pailat din poŋ bikin sinsinn a wun ŋaau, ki i bia yêtɔ Pailat boor ni. 14Ŋɔɔe lek tee Yennu nirɔ, ki bia jenna tee Popeendaanɔ, ŋaan ki i lek yêtɔ, ŋaan bia miar Pailat a wun nyinn nikpiiruk ki turi. 15Li paak, yimme te ki bi kpii Manfoturtɔɔ maŋ; ŋaan ki Yennu fiinɔ kuun ni, ki timme tee linba na siara damm.
16“Yisa maŋ sann paŋ nba ki ti yi nee te ki jɔɔ na paak. Wɔbik na tee wunba ki i poŋ tuu miu ki bia laatɔe, ŋaan ki u tan paak na, kimaan wa teen Yisa sann yada na paak. Wa teen Yisa yada na paake te ki u paak ki see i numm nna.
17“Tɔn, n naa waas, n mi nan yimm nan i yudamm nba daan te ki bi kpii Yisa na, i daan ki bann ya tun linba maŋ paaki. 18Ŋaan Yennu din pak u maan ki tur ti sɔkiniinba, ki bi mun pak tur niib, ki yet a see ki u Niganntɔɔ Masia-n lek dii fara. Tɔn, ki Yennu set tan te ki li gbenn teen mɔnii, nan ya set tan tun biaŋinba na.
19“Li paak, i nyik i biit man, kii waa Yennu sɔnu, ki wun nyik chab i toonbiit, 20ki u sa turi foon, ki bia tan sa tun Yisa Masia i boor ni, wunba ki u poŋ gannɔ ki turi na; 21ŋaan Yisa maŋ lek sii be Yendɔuŋ ni, ki Yennu-n tan ŋamm bona kura, kaman nan wa din te ki u popeenn sɔkiniinba nba din be yaayoo ni na yet biaŋinba na, ki bi mun pak turit na.
22“Ŋann maŋe ki Moses mun din yet a ‘Ti Yomdaanɔ Yennu sa turi u sɔkiniisɔɔ, a ki u sii tee i mɔŋ nirɔ, kaman nan wa nyinn min biaŋinba ki teenin u sɔkinii i boor nna na. Gbiintirɔ man ki tun linba kur ki u sa pak turi; 23ki daanɔ nba ki gbat sɔkinii maŋ maami, Yennu sa nyinn li yɔɔ i sinsuuk ni ki biirɔ.’
24“Yennu sɔkinii Samuel nan sɔkiniinba nba wei u paak ki din piak Yennu maan, bi kura din want linba tan sa teen Yennu Niganntɔɔ Masia ti yoo nee. 25Yennu mɔsona nba ki u din senn ki tur u sɔkiniinba maŋ, li mɔsona tee i yare; ki lor nba ki u din lor nan ti yejamm na, li lor mun bia tee i yare, kimaan u din yet Abraham a ‘A yaaboonyenɔ nie ki tingbouŋ na teeb kura tan sa la n mɔsonŋann.’ 26Li paak ki Yennu gann u Toontunnɔ Masia maŋ ki tumɔ i boor ni sinsinn, a wun te ki i kur-n nyik i biit ki la mɔsonŋann maŋ.”
انتخاب شده:
Toona 3: BIM
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
