Matiu 9
9
Yesu twali ɓe mǝrǝwuna rǝkwana male
(Markus 2:1-12; Luka 5:17-26)
1Yesu pǝlǝa eauwe a waru, yale a nkaring o a la male. 2Aɓea aɓwana yinǝi wi nǝ ɓe mǝrǝwuna a kala. Lang Yesu sǝn guliarǝu malea ka, ne mǝkwano ama, “Nwangsǝ ɓabumo, munem, à twalǝno ban acauɓikea mo.”
3Aɓea amǝkani Nggurcau nea rǝia ama, “Ɓwa mǝnia kǝ twal ɓamuri ama yì ka, Ɓakuli na!”
4Acemǝnana Yesu surǝ na rǝ ɗenyicau malea ka, banggia wia ama, “Palang sǝ wu kǝ pak ɗenyicau mǝɓane a ɓabum wun anggo? 5Mǝ ye na kwano kuti ɓì: ɓǝa na ama, ‘À twalǝno ban acauɓikea mo’ le, ko ɓǝa na ama, ‘Lo gya?’ 6Sǝ ace mǝnana ɓǝ̀ wu sǝlǝ ama Muna mala Ɓwa ka ndanǝ rǝcandǝa a ɓanza nǝ̀ twal ban acauɓikea ka, mǝ nǝ lǝmndǝa wun.” Pǝlǝa Yesu pǝlǝa aban mǝrǝwuna sǝ ne wi ama, “Lo kar kala mo o a ɓala mo.”
7Sǝ ɓwabure par bui lo o a ɓala. 8Aɓwana mana à ram ngga, ɓangciu pakkia wia arǝ gir mana à sǝn ngga. À ɓwangsǝ Ɓakuli mǝnana pe aɓwana-mǝpǝnde ulang man yì rǝcandǝa ka.
Yesu tunǝ Matiu ɓǝ̀ kpate
(Markus 2:13-17; Luka 5:27-32)
9Yesu puro nǝ̀ kuti ka yi sǝn ɓeɓwa mana à tunǝki ama Matiu mǝ'ak boalo-cemi, aban do aɓa tara ak boalo-cemi. Yesu ne wi ama, “Yiu a tam.” Kara lo o ata Yesu.
10Lang Yesu na ban li a ɓala ka, amǝ'aki aboalo-cemi pas andǝ aɓea aɓwana mana amǝ Farisi twalia amǝ'cauɓikea na ka, à yì do ata Yesu andǝ alaggana male aban li. 11Sǝ amǝ Farisi sǝn Yesu aban li andǝ aɓwana mǝnia ka, à ɗi alaggana male ama, “Ace man sǝ ɓwamǝgule ma'wun kǝ lili andǝ amǝ'ak boalo-cemi andǝ amǝ'cauɓikea?”#9:11 Ɓalli gbal aɓa: Luk 15:1,2. 12Yesu nǝ̀ ok man yì cau ka pǝlǝa earia wia ama, “Aɓwana mǝnana rǝia bang ngga kǝgir oasǝia arǝ mǝsonzǝo ɗang; amǝkwano na à alkiyita mǝpaɓuri ka. 13Wu kyane wu kya bǝl ɓa mǝnia yì nggurcau mana ama: ‘Sǝn mǝsǝswatǝr na ǝn earkiyice ka, ɗarǝa na ɗang.’ Ən yiu ace tunǝ amǝ'cauɓoarna ɗang, nda ace amǝ'cauɓikea.”#9:13 Ɓalli gbal aɓa: Mat 12:7; Hos 6:6.
Aɓwana ɗi Yesu amur gilmur
(Markus 2:18-22; Luka 5:33-39)
14Àkǝ̀ pwari mǝno ka alaggana mala Yohana Mǝbatisǝma yiu aban Yesu sǝ à ɗi ama, “Man tsǝa sǝ sǝm sǝnǝ amǝ Farisi ka, sǝm nggǝ gilmur sǝ alaggana mo ka à kǝ gilmur ɗang?” 15Yesu nyesǝia wia ama:
Lang sǝ agyajam mala bura-manfela nǝ̀ pak bumkiɗikea mǝnana nda abania peatu ka? Pwari nǝ̀ ngga yiu à nǝ̀ yia twal bura-manfela a rǝia; a pwarî sǝ à nǝ̀ gilmur.
16 Kǝ ɓwa pà nǝ̀ kpakǝri eakǝna daura nǝ kasǝna nggurbyau mǝbǝshe ɗang. Ɓǝa pa anggo ka kasǝne mǝbǝshe nǝ̀ yia tsǝk eakǝna daurae nǝ̀ san kpǝm nǝ̀ wori man ɗiɗyal ka.
17 Sǝ ɗǝm ngga, kǝɓwa pà nǝ̀ so bǝsa mùr-anap aɓalǝ asambǝram mǝ'e ɗang. Ɓǝ̀ soe ka asambǝrami nǝ̀ arkia, sǝ mur-anap ni nǝ̀ sukkio, sǝ asambǝrami nǝ̀ ueɓà. Bǝsa mur-anap ka à kǝ soe aɓalǝ asambǝram mǝbǝshe. Anggo sǝ yia kǝm ngga à nǝ̀ auwa.
Yesu loasǝ lú sǝ twalban rǝkwana
(Markus 5:21-43; Luka 8:40-56)
18Lang Yesu na ban nea wia amǝnia yì acau ka, ɓe ɓwamǝgule ndakpapi mala amǝ Yahudi yiu yi kūndǝo a ɓadǝmbǝi ne wi ama, “Ɓoarnsarilem wu àkǝ̀ dyadyan. Yiu tsǝk buo a rǝì, sǝ mǝsǝì nǝ̀ sa nǝ̀ pak yilǝmu.”
19Yesu pǝlǝa lo o ate, andǝ alaggana male.
20Nǝ̀ nggǝ ká ka, ɓe mɓwama mǝnana nkila kǝ kanggia rǝì apǝlǝkia lum-nong-ɓari ka, kar a nzǝmi yi je kun daura male. 21Ne ɓamuri ama, “Ɓǝ̀ mǝ nǝ kumô mǝ je daura male ka, rǝam nǝ̀ mala.”
22Yesu pǝlǝ rǝì sǝni, sǝ ne wi ama, “Mɓwama, ɓangciu ɓǝ̀ kǝa pakko ɗang! Guliarǝu mo twalǝno ban kwano mo.” Àkǝ̀ banì mǝno sǝ rǝ mɓwame mala.
23Kutio mala Yesu a ɓala mala mǝno yì ɓwamǝgule ka, yi sǝn amǝ'twang ntetu andǝ aɓwana mana à rambǝa à kǝ ɓua ka. 24Pǝlǝa nea wia ama, “Wu mǝsǝe! Ɓoarnsarile wu nǝ wú ɗang. Nda a ntulo.” Kara à oali nǝ oalo. 25Lang à tsǝngŋǝna aɓwana à purna a nza ka, Yesu kutio bwal ɓoarnsarile a garabui, sǝ lo dumnǝdo. 26Mǝnia yì cau ka akiban kat aɓa mǝno yì bu-nzali ka.
Yesu mǝn mǝsǝ ante
27Yesu purni ban mǝno nǝ̀ nggǝ o ka, aɓea ante ɓari lo aban ká ate. À loasǝ gia ama, “Muna mala Dauda#9:27 Muna mala Dauda: Ko “Mǝkà Dauda.”, ɓwamur sǝm!”
28Lang Yesu kutina a ɓala ka, ante mǝnia yiu abani, sǝ ɗia ama, “Wu earǝna nǝi ama mǝ nǝ gandǝ mǝn amǝsǝ wun le?”
À eare ama, “E, Mǝtalabangŋo!”
29Pǝlǝa je mǝsǝia sǝ na ama, “Kǝla mǝnana wu earǝna nǝi ka ɓǝ̀ dupa wun anggo.” 30Àkǝ̀ banì, mǝsǝia mǝna. Sǝ Yesu nunkiria pepe ama, “Wu kǝa ne kǝɓwa ce ɗang.” 31Sǝa ma à puro à kya mesǝ ce Yesu a bu-nzali mǝno kat.
Yesu tsǝk mǝtalasǝ-ɓunna na cau
32À nda ban puro à nǝ̀ o ka, aɓea ɓwana yiu nǝ ɓeɓwa mǝnana kukwar kutia rǝì sǝ kǝ gandǝ na cau raka aban Yesu. 33Yesu pusǝ kukwar mǝnana a rǝì ka, àkǝ̀ banì ɓwa mǝnana kǝ gandǝ na cau ɗiɗyal raka, tita na cau. Ɓwabunda ndali sǝ à na ama, “Sǝm malaká sǝn kǝgir kǝla man aɓa Isǝrayila ɗang.”
34Sǝ amǝ Farisi ka à yì bangŋa ama nǝ murǝm mala akukwar sǝ Yesu kǝ pusǝki akukwar.#9:34 Ɓalli gbal aɓa: Mat 10:25; 12:24; Mar 3:22; Luk 11:15.
Yesu sǝn mǝsǝswatǝr mala aɓwana
35Yesu gya arǝ anggea-là andǝ amuna-là kat, aban kanigir aɓalǝ andakpapi mala amǝ Yahudi, kǝ hamnǝ Cau Amsǝban mala Domurǝm mala Ɓakuli, sǝ kǝ twalban akwano andǝ arǝpangŋa kat.#9:35 Ɓalli gbal aɓa: Mat 4:23; Mar 1:39; Luk 4:44. 36Lang yi sǝn lakki mala aɓwabunda ka, mǝsǝswatǝr malea pakki wi, acemǝnana à nda aɓa tanni. Kǝ mǝpyaumǝsǝu pa amuria ɗang, kǝla anzur mǝnana yalu pa amuria raka.#9:36 Ɓalli gbal aɓa: Ɓal 27:17; 1Amur 22:17; 2Kpa 18:16; Ezǝk 34:5; Mar 6:34. 37Pǝlǝa ne alaggana male ama, “Turo Wal-mǝsa ka nda kpǝm, sǝ amǝturo lakki ɗang. 38Wu zǝmbǝi Mǝtala-ɓaban ɓǝ̀ tasǝ amǝturo ɓǝa yiu a ɓaban male.”#9:38 Ɓalli gbal aɓa: Luk 10:2.
اکنون انتخاب شده:
Matiu 9: mbu
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. and © The Nigeria Bible Translation Trust 2016
