Susumo 11
11
Gwotyɔ̌n Babilɔn
1E jeng yane, hâ lêm bemât jey mwa há sè hining zɔng. 2Jeng de bemat o ba kyě gwɔsɔ e rwa rak, ko yɛn a wɔ̀ sɛ̀ byel hwak e vwêl Babilɔnya, yɛn a sangal e hwomo. 3Ko yɛn a ha na bemɛn, ba ye, “Vey in, na wot yong bagat bwos, wot ráng vɛ naka.” Yɛn a ra fwom na bagat bwos e tô beta, na kwolta e tô bwos. 4Ko yɛn a ye, “Tik na wot a lɔk a bato mot repomo, na wot a lɔk gwotyɔ̌n gwolwis de gwô wɔ wul larwak! Ano de wot e bin sɛ̀ reza. Lɔ́k hemo hê wuna hot, yaga na wot kwon shara hot kpɛɛ e jey mwa wɛt.”
5Dagwi Darwey a gyirik, na a di repomo mo tanga gwotyɔ̌n gwolwis de bemat o ba ga lɔk. 6Ko a ye, “Hàa! Yɛn a sé regyɛng bemat vining, mwa hɛn lem mɛn hining. Ko di, yerê pyɛ de ba pɛrɛ yɛ! E ngamo nuyel, vit a pyɛ de yɛn e simo ra de yê dal ɛn! 7Tik na wot gyirik, wot suk balem mɛn, yaga na yɛn a bin dun pyɛ de bê ha e tē mɛn.” 8Ano de Dagwi Darwey a shara hɛn kagwa e neyɛnɛ̂ jêy mwa, ko fwôm lɔk o gwa tumal. 9Yaga ano, ba yila kwɔn o, à Babilɔn,#11:9 Babilɔn: E lêm BeIbrani rezâ Babilɔn ra sé bagat na retîn ha “suk”. yaga e hwomo de Dagwi Darwey a suk balêm mwâ bemat. Yi e hwomo kwong de a shara hɛn kagwa e neyɛnɛ̂ jêy mwa.
Yére Shɛm
10Yére Shɛm a yet ngan: Jeng de Shɛm a vɔk neshey naga, a tɔ Arpakshat neshey neba e bamâ tɛmɛ-nshi. 11E bamâ tɔ̂ Arpakshat, Shɛm a to ros neshey naga betungun (500), a to sɛ̀ nèy bewen na behwong.
12Jeng de Arpakshat a wul neshey kuru batat na nɛ netungun (35), a tɔ Shela. 13E bama mo, a ros neshey naga benaas na nɛ netat (403), a vɔk nèy nehak bewen na behwong.
14Jeng de Shela a wul neshey kuru batat (30), a tɔ̀ Ɛbɛr. 15A ros neshey naga benaas na nɛ netat (403), a vɔk nèy nehak bewen na behwong. 16Jeng de Ɛbɛr a wul neshey kuru batat na nɛ nenaas (34), a tɔ Pɛlɛk. 17Ko a ros neshey naga benaas na kuru batat (430), a vɔk nèy nehak bewen na behwong.
18Jeng de Pɛlɛk a wul neshey kuru batat (30), a tɔ Rɛyu. 19E bama mo, a ros neshey naga beba na nɛ shanetat (209), a vɔk nèy nehak bewen na behwong.
20Jeng de Rɛyu a wul neshey kuru batat na nɛ neba (32), a tɔ̀ Sɛruk. 21A ros neshey naga beba na nɛ netaama (207), a vɔk nèy nehak bewen na behwong.
22Jeng de Sɛruk a wul neshey kuru batat (30), a tɔ Nahor. 23E bama mo, a ros neshey naga beba (200), a vɔk nèy nehak bewen na behwong.
24Jeng de Nahor a wul neshey kuru baba na nɛ shanetat (29), a tɔ Tɛra. 25Ko Nahor a ros neshey naga na kuru rining na nɛ shanetat (119), a vɔk nèy nehak bewen na behwong o.
26Jeng de Tɛra a wul neshey kuru bataama (70), a tɔ Abram, na Nahor, tanga Haran.
27Yére Tɛra a yet ngan: Abram, na Nahor tanga Haran, ko Haran yɛ à dâ Lɔt. 28Haran a tānga ku e ra da mɛ Tɛra e vwêl tɔ mɛ, e repomô Ur wo BeBabilɔn. 29Abram tanga Nahor yɛn a vos beha. Zâ hwâ Abram à Sarai, ko hwâ Nahor ba tang ɛ a Milka. Gwà hwong Milka à Iska, ko da mɛn à Haran. 30Sarai, hwâ Abram, a sé sang-gwon, vit a hɛ na hwey.
31Ko Tɛra a jut hwey mɛ Abram, na Lɔt, hwêy sɔ mɛ Haran, tanga Sarai, hwâ sɔ mɛ Abram o. Mwa hɛn ba kaba gwong yi e Ur wo BeBabilɔn vɔk e sevwêl Kanaan, ko jeng de yɛn a wul Haran, ba sangal e hwomo. 32Neshey Tɛra mwa e jey na sé naga beba na nɛ netungun (205), a ku.
اکنون انتخاب شده:
Susumo 11: bomBI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust