Simuluho 41
41
Josefa u talusa litolo za Faro
1Lilimo ze peli ha li se li felile, Faro a lola. Mwa tolo ya hae n'a yemi kwa Nuka ya Nile. 2N'a bona ku omboka likomu ze nde ze nunile ze supile, mi za kala ku fula mutaka. 3Cwale, likomu ze ñwi ze supile hape za omboka, ili ze maswe, ze otile. Za t'o yema kwatuko a za pili fa munanga wa nuka. 4Likomu ze otile zeo za ca likomu ze supile ze nunile, mi hona fo Faro a zuha. 5A lobala, mi a lola hape. Mwa tolo yeo, a bona lutaka lwa libele fo ku melile makunka a supile, a tezi hande, a buzwize. 6Cwale makunka a mañwi a supile a mela, ili a manyinyani a nyanine, a cinelizwe ki moya o cisa. 7Tukunka to tu supile, to tunyanine, twa miza a matuna a beile hande. Faro a pasumuka, mi a bona kuli n'a lola. 8#Dan 2.2 Habusa a zuha a filikani. Kiha s'a lumela balauli kaufela ba mwa Egepita. A ba bulelela litolo za hae, kono ha ku na ya konile ku mu taluseza zona.
9Ndun'a maweta kih'a li ku Faro, “Na itumelela kacenu kuli ni fosize. 10U n'o nyemezi batanga ba hao, mi wa beya ndun'a ba lienga ni na mwa tolongo, mwa ndu ya muzamaisi wa mapolisa. 11Zazi le liñwi lwa lola. Yo muñwi ni yo muñwi a ba ni tolo ni taluso ya yona. 12Ne lu inzi ni mucaha wa Muheberu, ili mutang'a muzamaisi wa mapolisa, mi lwa mu bulelela litolo za luna. A lu taluseza zona, mi a bulelela yo muñwi ni yo muñwi taluso ya tolo ya hae. 13Kwa ezahala hande-nde sina mw'a n'a taluselize. Na, na kutisezwa mwa situlo sa ka, mi ndun'a ba lienga a bulaiwa.”
14Faro a lumelela Josefa, mi kapili-pili ba mu zwisa mwa tolongo. Ha s'a ipeuzi ni ku apala liapalo li sili, a taha fapil'a Faro. 15Faro a li ku Josefa, “Ne ni lolile, mi ha ku na ya konile ku talusa tolo ya ka. Cwale ni bulelezwi kuli ha u ka utwa tolo, wa kona ku i talusa.”
16Josefa a alaba, a li, “Isiñi na, muñ'a ka! Mulimu ki yena ya ta fa Faro kalabo ye nde.”
17Faro a li, “Ni lolile ni nze ni yemi fa munanga wa Nuka ya Nile. 18Na bona ku omboka likomu ze nde ze nunile ze supile, mi za kala ku fula mutaka. 19Kiha se ku omboka ze ñwi hape ze supile ze otile, ze maswe, ili mufuta o maswe ka ku fitisisa wa likomu ze ni boni mwa Egepita kaufela. 20Likomu ze otile zeo za ca likomu ze nunile. 21Kono niha li li cile, ne ku si na mutu ya n'a ka ziba, kakuli ne li sa li hona mo ne li inezi pili kwa bumaswe ni ku ota. Kiha ni zuha. 22Na lola hape, ni nze ni bona makunka a supile a mabele, ili a matuna, a na ni mabele a makima, a s'a buzwize, a melile fa lutaka lu lu luñwi. 23Cwale kwa mela hape makunka a supile a manyinyani, a nyanisizwe ki moya o cisa. 24Tukunka to, to tu supile, to tunyanine, twa miza makunka a supile a matuna. Litolo za ka zeo ni li bulelezi balauli, kono ha ku na nihaili a li muñwi ya ni taluselize zona.”
25Josefa a li ku Faro, “Litolo ze peli zeo li talusa nto i liñwi. Mulimu u ku bulelezi s'a ta eza. 26Likomu ze nunile ze supile ki lilimo ze supile, mi ni makunka a matuna a supile i sa li lilimo ze supile. Taluso ya zona ki i liñwi. 27Likomu ze otile ze supile ze tile mwamulaho, ni tukunka to tu nyanisizwe ki moya o cisa, ki lilimo ze supile za tala. 28Ki sona se ni ku bulelezi kuli Mulimu u ku bonisize s'a ta eza. 29Ku ta ba ni lilimo ze supile za kutulo ye tuna hahulu mwa naha ya Egepita kaufela. 30Mwamulaho a zeo, ku ta ba ni lilimo ze supile za tala, mi lilimo za lico ze ñata li ta libalwa mwa naha ya Egepita. Tala i ka t'o sinya lifasi. 31Linako za kutulo li ta libalwa, kakuli tala ye ka taha mwamulaho i ka ba ye tuna hahulu, ye sabisa. 32Tolo ya hao ha i tile habeli, Mulena Faro, kikuli litaba li lukisizwe ki Mulimu, mi u ta eza cwalo hona cwanoñu fa.
33“Cwalehe, muñ'a ka, u kete mutu ya na ni kutwisiso, ya butali, a zamaise Egepita. 34U kete ni manduna ba ba ta talima ka za njimo mwa naha, mi ba nge kalulo ya buketalizoho ya lico ze ta kutulwa ka zona lilimo ze supile zeo za kutulo ye ñata. 35Ba swanezi ku kubukanya lico kamukana mwa lilimo zeo za kutulo ze taha. Ba beleke ka taelo ya hao, mi ba buluke lico zeo mwa minzi, li babalelwe. 36Lico zeo li ka bulukelwa ku tusa naha mwa lilimo ze supile ze taha, ili za tala ye ka ba teñi mwa Egepita, kuli batu ba si ke ba shwa ka nako ya lukupwe.”
Josefa u eziwa mubusisi wa Egepita
37Faro ni manduna ba hae ba lumela muhupulo wo. 38Yena Faro a li ku bona, “Mutu ya swana ni yo, lu ka mu fumana kai, ya na ni moya wa Mulimu?” 39Faro kiha s'a li ku Josefa, “Sina ha ku bonahala kuli Mulimu u ku bonisize zeo kamukana, ha ku na yo muñwi ya na ni kutwisiso kamba ya ku fita kwa butali. 40#Lik 7.10 Ni ta ku eza muzamaisi wa naha ya ka, mi batu ba ka kaufela ba ta eza z'o ta ba laela. Na, ki na feela ya ka ku fita, kakuli ni Mulena.” 41Faro kih'a li ku Josefa, “Wa bona, cwale ni ku beya muzamaisi wa Egepita kaufela.” 42#Dan 5.29 Faro a zwisa liseka le li kwa munwana wa hae, le li na ni liswayo la bulena, mi a li beya kwa munwana wa Josefa. A mu apesa liapalo ze nde, mi a mu tama sifaha sa gauda mwa mulala. 43A mu inisa mwa koloi ya bubeli ya bulena mi mapolisa ba ba ne ba zamaya fapil'a hae ne ba li, “A mu kubame!” Kamukwaocwalo Josefa a ketelwa buzamaisi bwa Egepita kamukana. 44Faro a li ku yena, “Ki na Mulena. Ha ku na mutu mwa Egepita kaufela ya ka nanula lihutu kamba lizoho a si ka lumelelwa ki wena.” 45Kiha s'a beya Josefa libizo la Zafenati-Panea. A mu fa musali ya bizwa Asenati, mwan'a Potifera muprisita wa munzi wa Onu. Cwale Josefa a kala ku zamaya naha ya Egepita kamukana.
46Josefa n'a na ni lilimo ze mashumi a malalu h'a kala ku sebeleza Faro, mulena wa Egepita. A funduka mi a zamaya mwa naha kamukana. 47Mwa lilimo ze supile za lico ze ñata, naha ya ba ni kutulo ye tuna. 48Josefa a kubukanya lico kaufela mwa lilimo zeo ze supile za kutulo mwa naha ya Egepita, mi a li buluka mwa minzi. Mwa munzi ni munzi, n'a kubukanya lico ze zwa mwa masimu a fakaufi ni ona. 49A kubukanya lico ze ñata hahulu mane za swana inge mushabati wa kwa liwate ka buñata bwa zona. Lico za ba ze ñata hahulu luli, mane a ba a tuhela ku li likanya, kakuli ne ku sa konahali kuli li likanyiwe.
50Lilimo za tala li si ka fita kale, Josefa a pepa ni Asenati, mwan'a Potifera muprisita wa Onu, bana ba babeli ba bashimani. 51Josefa a li, “Mulimu u ni libalize manyando a ka kaufela ni lubasi lwa ndate kamukana.” Cwale a beya mweli wa hae libizo la Manase. 52Hape a li, “Mulimu u ni file bana mwa naha mo ni til'o nyandela.” Kih'a beya wa bubeli libizo la Eferaimi.
53Cwale lilimo ze supile za kutulo ye nde, ye ne ba ikola ba Egepita, za fela. 54#Lik 7.11 Lilimo ze supile za tala za kala, sina mw'a n'a bulelezi Josefa. Kwa ba ni tala ni mwa manaha a mañwi kamukana. Kono mwa naha ya Egepita kaufela ne ku na ni lico. 55#Joa 2.5 Naha ha i se i kenelwa ki tala, batu ba t'o kupa lico ku Faro. Yena a bulelela Maegepita kamukana, a li, “Mu ye ku Josefa, mu y'o eza s'a ka mi bulelela.” 56Tala ha i se i keni naha kaufela, Josefa a kwalula matuli a lico kamukana, mi a lekiseza Maegepita lico, kakuli cwale tala n'e se li ye tuna mwa naha ya Egepita. 57Batu ne ba zwa mwa lifasi kaufela ku t'o leka lico ku Josefa, kakuli tala ne li ye tuna mwa lifasi kamukana.
Currently Selected:
Simuluho 41: Lozi09
Tõsta esile
Share
Kopeeri
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.