Simuluho 38
38
Juda ni Tamare
1Ka yona nako yeo, Juda a siya banabahabo mi a y'o yaha ni Hira wa mwa munzi o bizwa Adulami. 2Hona ko, Juda a y'o bona musizana, ya n'a pepilwe ki munna ya n'a bizwa Shua wa Mukanana, mi a mu nyala. 3Kih'a itwala, mi a pepa mwana wa mushimani, mi a mu beya libizo la Eri. 4A itwala hape, a pepa mushimani, mi a mu fa libizo la Onani. 5Hape a pepa mushimani, mi a li ki Shela. Ha ku pepwa Shela, Juda n'a sa li kwa Kezibi.
6Juda a batela Eri, mwan'a hae wa mweli, musali. Libizo la hae ne li Tamare. 7Mikwa ye maswe ya Eri ya nyemisa Muñ'a Bupilo, mi a mu bulaya. 8Cwale Juda kiha s'a li ku Onani, “U kutise ndu ya muhulwan'a hao. U mu ezeze liswanelo za munna sina ha u li munyan'a mufu, kuli muhulwan'a hao a be ni lusika.” 9Kono Onani n'a ziba kuli bana ha ba na ku ba ba hae. Cwalehe, nako kaufela ha n'a kopana ni mbelwa yo, n'a nz'a ezezanga fafasi, kuli muhulwan'a hae a si ke a ba ni lusika. 10S'a n'a ezanga seo, Muñ'a Bupilo n'a sa si tabeli, mi ni yena a mu bulaya. 11Cwale Juda a li ku mukwenyan'a hae Tamare, “Kutela haenu ku ndat'aho. U nz'o li mbelwa cwalo, ku fitela mwan'a ka Shela a hula.” N'a bulela cwalo ka ku saba kuli Shela ni yena mwendi u ka shwa sina bahulwani ba hae. Tamare kiha s'a kutela ku ndat'ahe.
12Ha ku se ku felile mazazi a mañatanyana, musal'a Juda, yena mwan'a Shua, a shwa. Juda ha s'a felize sililo, yena ni mulikan'a hae Hira wa Adulami ba ya kwa Timina, ko ne ku kutelwa lingu za hae. 13Mutu yo muñwi a bulelela Tamare, a li, “Mukwenyan'a hao u ya kwa Timina ku y'o kuta lingu za hae.” 14Cwale a tubula liapalo za sililo z'a n'a apezi, a ikapesa lisila kwa pata, kih'a t'o ina kwa makenelo a nzila ya Enaimi, munzi o kwa mukwakwa o ya kwa Timina. N'a ziba kuli cwale Shela n'a s'a hulile, kono n'a si ka mu fiwa kale kuli a mu nyale.
15Juda h'a mu bona, a hupula kuli ki lihule kakuli n'a ikwahezi kwa pata. 16A ya ku yena kwatuko a mukwakwa, a li, “Taha kwanu, ni bata ku kopana ni wena.” N'a sa zibi kuli ne li mukwenyan'a hae.
Musali yo a li, “U ta ni fa sika mañi?”
17A alaba, a li, “Ni ta ku lumela nkomwana ya puli mwa mutapi wa ka.”
A li, “Ku lukile, haiba u ka ni fa swalelele ku fitela u ni lumela yona.”
18A mu buza, a li, “Cwalehe, ni ta ku fa swalelele ya sika mañi?”
Yena a alaba, a li, “Liswayo la hao ni muhala wa lona ni mulamu o zamaela ku ona.” A mu fa zona. Cwale ba kopana mi a itwala. 19Cwale Tamare a zuha, mi a ikela. A zwisa lisila l'a n'a ikapezise, mi a apala liapalo za hae za ku silisa.
20Juda a luma mulikan'a hae wa kwa Adulami ni pulinyana kuli a y'o nga swalelele ya hae ku musali yo, kono h'a si ka mu fumana. 21A buza batu ba fa sibaka seo, a li, “Lihule le ne li inzi kwatuko a mukwakwa wa Enaimi li kai?”
Ba alaba, ba li, “Ha ku na lihule kwanu.”
22A kutela ku Juda, mi a li, “Ha ni si ka mu fumana. Batu ba mwateñi ba li ha ku na lihule ku bona.”
23Juda a li, “U si ke wa lika ku kutisa linto zani. Batu ba ka lu seha. Ne ni mu lumelezi pulinyana ye, nihaike ha u si ka mu fumana.”
24Mwamulaho a likweli ze talu, mutu yo muñwi a t'o bulelela Juda cwana, a li, “Mukwenyan'a hao Tamare n'a kopani ni munna, mi ka nako ye u itwezi.”
Juda a laela, a li, “A mu mu zwiseze kwand'a munzi, mu mu cise, mane a be a shwe.”
25Ha ba mu zwisa cwalo, a lumelela linzwi ku mukwenyan'a hae, a li, “Ni filwe mba ki muñ'a lika ze. Mu li talimisise, mi mu bate muñ'a zona. Ki liswayo le, ni muhala wa lona, ni mulamu wo.”
26Juda a li ziba, mi a li, “Ki niti. Ki na ya fosize. Ne ni swanezi ku mu nyalisa ku mwan'a ka Shela.” H'a si ka kutela ku kopana ni yena hape.
27Nako ya hae ya ku puluha ha i se i fitile, kwa bonahala kuli u itwezi mambile. 28Ha s'a puluha, yo muñwi a zwisa lizoho. Mupepisi a li swala, a li tama ka bwanda ka kafubelu, mi a li, “Yo ki yena ya pepilwe pili.” 29Kono a kutisa lizoho la hae, mi mwanahabo a pepiwa pili. Mupepisi a li, “Wo ki ona mukwa o' fumani ka ona nzila ya ku zwa!” Kih'a mu biza Perezi. 30Cwale mwanahabo a pepwa ni bwanda bo bufubelu kwa lizoho. Yena a bizwa Zera.
Currently Selected:
Simuluho 38: Lozi09
Tõsta esile
Share
Kopeeri
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.