SAN LUCAS 22
22
Are cjoao na queẍén sinchehe na para rrotse na Jesús
(Mt. 26.1‑5, 14‑16; Mr. 14.1‑2, 10‑11; Jn. 11.45‑53)
1Co are Jesús ẍa tají nttiha ngain Jerusalén, ochiaon joí tti quiai que jine na niottja que chondaha levadura, co mé tti quiai que dinhi pascua. 2Ngain tiempo mé merocoa cain chojni anto vancheẍoxinhi na tti vandac̈ho Jesús. Mexinxin cain xidána que vaquetonha ngain icha xidána, co cain ximaestroe ley vaẍaon xa ngain cain chojni mé para que jehe xa nasoenxon xa Jesús; mexinxin jehe xa vacjé xa queẍén sinchehe xa para tsjaya xa co chojni tsoñaoha na.
3Cottimeja Satanás joixinhi ngain ansén Judas Iscariote, jehe ná de tti tteyó chojni que vacao Jesús. 4Co Judas jihi cjoi joitsjehe xidána que vaquetonha ngain icha xidána, co xipolicié nihngo icha importante, para cjoao xa de ixin queẍén jehe tsjago ttinó jí Jesús para sitse xa. 5Cain jehe xa anto vintteché xa co ndac̈ho xa ixin sanjo xa tomi ngain jehe Judas. 6Co Judas vittoexin co ocoexinhi ẍaxaon ixin queẍén sinchehe para que sinchechienhe Jesús ngá rá xa are ẍonhi chojni sintte ngain Jesús.
Are joinecaho Jesús tti tteyó chojni que vacao
(Mt. 26.17‑29; Mr. 14.12‑25; Jn. 13.21‑30; 1 Co. 11.23‑26)
7Are joí tti nchanho de quiai que dinhi pascua are vagoen na coleco para vaganjo na ngain Dios. 8Ngain nchanho mé Jesús rroanha Pedro co Juan co jehe ndac̈ho ngain na:
―Ttji ra dinchechjian ra tti sontte na ngain quiai pascua jihi.
9Jehe na ndac̈ho na ngain Jesús:
―¿Ttinó rinao sinttachjianxin na?
10Jesús ndac̈ho ngain na:
―Are jaha ra sigaha ra ciudad jihi, setan ra ná xí que jidicao ná nchíẍa de jinda. Rroehe ra xí mé hasta tti ngain nchia que jehe xa sixinhi xa 11co ndache ra tti nchiandoha nttiha: “Ximaestro ndac̈ho xa nganji: ¿Quettinó jí tti cuarto que jehe xa sinenxin xa ngain quiai pascua conixin tti tteyó chojni que ẍicao xa? 12Cottimeja jehe tti ndoha mé tsjagoha ra ná cuarto jie ngain piso yoxin que ojí listo. Nttiha nchechjianxin ra tti sontte na.
13Cayoi chojni mé savinttecji na co vittja na cain inchin ndac̈ho Jesús. Co nttiha joinchechjianxin na tti joinecaho na Jesús ngain quiai pascua.
14Are ovittja hora para joine na, Jesús conixin tti tteyó representanté vintte na ngain mesa. 15Cottimeja Jesús ndac̈ho ngain na:
―¡Janha anto joinaho joine conixin jaha ra ngain quiai pascua jihi saho que janha ndasenhe na! 16Janha rrindattjo ra seguro que rrocjanha na sinttasayá quiai pascua hasta que cain tti rroc̈ho quiai jihi tsoenja ngain tti ttetonha Dios.
17Cottimeja coá ná vaso de vino co joanjo gracias ngain Dios, co ndac̈ho ngain na:
―Dihi ra jihi co tonchjeyehe chó ra, 18ixin janha irrocjanha na sihi vino hasta que tsija tti ttetonha Dios.
19Después coá niottja co joanjo gracias ngain Dios, cottimeja váña nio co joanjo nio ngain jehe na co ndac̈ho:
―Jihi rroc̈ho cuerpona janha que rroẍanjo para ndasenhe para tsjenguijna ra. Cain tiempo nchehe ra janhi para rroẍaxaonxin ni ra.
20Cai jamé joinchehe conixin vaso de vino are ojoexin joine na co ndac̈ho:
―Vaso jihi rroc̈ho tti trato naroaxin que jnina sinchesegurá. Co jnina mé singo jni para que tsjenguijna ra.
21’Pero jaxon rá tti xí que rrondache chojni queẍén para rrotse na na janha, rá xí mé nttihi jí ngataha mesa conixin rana janha. 22Janha chonda que senhe na inchin jiquininxin, pero ¡anto tangui tsonhe tti rrondache chojni queẍén para rrotse na na!
23Cottimeja tti tteyó chojni que vacao Jesús coexinhi na joanchianguihi chó na ixin quexehe tti rrondache chojni queẍén para rrotse na Jesús.
Are joinchediscutí na ixin quensen sehe icha importante
24Cottimeja joinchediscutí na ixin quexehe de jehe na tti sehe icha importante ngain tti ttetonha Dios. 25Pero Jesús ndac̈ho ngain na:
―Ngain mundo jihi, cain rey de cain nación, jehe ttetonha inchin jehe rinao, co cain xí que chonda cargo de ngain cain nación, dinhi xa xí que nchehe jian. 26Pero jaha ra chondaha ra que sintte ra jamé, ixin tti sehe icha importante ngayaha ra, pero mé chonda que sehe inchin tti icha nchín. Co tti tsetonha ngayaha ra, mé tti chonda que icha tsjenguijna ra. 27Ndachjenji ni ra, ¿quensen icha importante, a tti dehe jine ngain mesa, o ani tti nchehe ẍa que diquenhe jehe tti jine ngain mesa? Seguro jehe tti jí ngain mesa, mé tti icha importante. Pero janha rrihi nttihi ngayaha ra inchin ná tti nchehe ẍa.
28’Jaha ra tti vintte ra cainxin tiempo nganji na janha are janha vetan tangui. 29Mexinxin janha rrichjaha ra ná joachaxin para que jaha ra tsetonha ra, jañá inchin joachaxin que chjana Ndodana janha, 30para que sintte ra co sihi ra ngain mesana nttiha tti janha ttetonha, co sintte ra ngain lugar de joachaxin para sinchejuzguehe ra tti tteyó grupoe chojni Israel.
Jesús ndac̈ho que Pedro rrondac̈ho ixin jehe chonxinha Jesús
(Mt. 26.31‑35; Mr. 14.27‑31; Jn. 13.36‑38)
31Ndac̈ho Jesús cai:
―Simón, Simón, tsjenxin; Satanás danchia joachaxin para que tsontsjenga ra jaha ra como si rrocji ra trigo. 32Pero janha rrinttatsán ñao Dios para ixin jaha, para que ẍonhi tiempo rrotjañaha tti jaha ditticaon. Co jaha are sac̈hjaha joaẍaon, ttjenguijna icha chojni que ditticaon para que sitticaon na jian cainxin tiempo.
33Simón Pedro ndac̈ho ngain Jesús:
―Janha rinaho tsji cain lugar conixin soixin, masqui siaxinna conixin soixin o hasta tti senxin soixin cai janha nttiha senxin na.
34Jesús ndac̈ho ngain Pedro:
―Pedro, janha rrindattjo que jai mismo icha saho que rrotsje conttaxichia, jaha orrondac̈ho ninxin nttiha que chonxinha na.
Are ojoí tiempo que Jesús tangui conhe
35Cottimeja Jesús joanchiangui ngain tti chojni que vacao co ndac̈ho:
―Are janha coetonha ra para joindache ra chojni de ixin Dios, co ixin cjoioha ra ni bolsa, ni tomi, ni catte, ¿ac̈honja gondaha ra?
Jehe na ndac̈ho na:
―Nahi, ẍonhi.
36Cottimeja ndac̈ho Jesús ngain na:
―Co jai jeha jamé, ẍo chonda ra bolsa, ttjiho ra, co cai tomi; co ẍo chondaha ra espada nchecji ra chamarrá ra para ttenanxin ra espada. 37Ixin janha rrindattjo ra que chonda que siconna janha inchin jitaxin Palabré Dios: “Jehe venhe inchin chojni que nchehe jianha.” Ixin cain tti jitaxin de ixin janha chonda que tsonhe.
38Cottimeja jehe na vinttendac̈ho na:
―Nttihi jí yó espada.
Co Jesús ndac̈ho:
―Conixin yao.
Are Jesús joinchetsenhe ñao Dios ngain Getsemaní
(Mt. 26.36‑46; Mr. 14.32‑42)
39Cottimeja vac̈hje Jesús co inchin costumbre que jehe vanchehe, jehe sacjoi para ngagaha tti jnanchjan de Nttaolivo, co rroé tti chojni que vacao. 40Co are ojoiji na nttiha, jehe ndac̈ho ngain na:
―Nchetsenhe ra ñao Dios para que sitaha ra de sinchehe ra cosa jianha.
41Cottimeja Jesús sacjoi nchion cjin de ngain na, inchin cjinxin ttixinhi ni de tja ni ná ẍo, co nttiha vettoxin nttajochjihi para joinchetsenhe ñao Dios. 42Co jehe ndac̈ho:
―Padre, si rinao, tanc̈hjandaha na para que janha sattoha ngain tti anto tangui que tsonna, pero tsoenha inchin janha rinaho, sino que tsonhe inchin soixin rinao.
43Cottimeja joicononxin ná ángel de Dios ngain Jesús para que joinchesoji espiritue Jesús. 44Co ixin jehe icha tangui conohe ngain ansén, jehe icha jian joinchetsenhe ñao Dios co ndachjín cjan inchin jni, co yeye gota vinttji ngataha nontte.
45Co are joexin joinchetsenhe ñao Dios, vingattjen co cjoi ngain tti chojni que vacao; co jehe na otatejoa na ixin icoixinha na de joachjaon. 46Cottimeja jehe ndac̈ho ngain na:
―¿Quedonda tatec̈hin ra? Dingattjen ra, co nchetsenhe ra ñao Dios para que sitaha ra de sinchehe ra cosa jianha.
Are tse na Jesús
(Mt. 26.47‑56; Mr. 14.43‑50; Jn. 18.2‑11)
47Jesús ẍa jinichja jañá are ojoí anto tsje chojni. Tti vinhi Judas, jehe ná de tti tteyó chojni que vacao Jesús, jehe mé tti jitaon nttiha de cainxin chojni mé, co are ojoí, jehe conchienhe ngaca Jesús para coetoxin. 48Cottimeja Jesús ndac̈ho ngain Judas:
―Judas ¿acoetoxin na para cjoago ixin janha tti Xí que joixin de ngajni?
49Co tti icha chojni que vacao Jesús, are vicon na jihi, ndac̈ho na ngain Jesús:
―¿Atsjaya na conixin espada?
50Co ná de chojni mé joinchenihi ná xinchehe ẍé xidána icha importante, ixin conc̈hinjihi ná ndatsjoen xa lado jian xa. 51Pero Jesús ndac̈ho ngain tti chojni que vacao:
―Tanc̈hjanda ra xa; conixin yao.
Cottimeja Jesús catte ndatsjoen xí mé co ndatsexin. 52Cottimeja ndac̈ho Jesús ngain cain xidána que vaquetonha ngain icha xidána, conixin ngain xipolicié nihngo icha importante, co ngain cain xittetonha ngain nihngo mé, tti xicjoi para sajoicao xa Jesús:
―¿Ajoihi ra joirroehna ni ra conixin espada co nttá inchin janha rrocji ná tti chehe? 53Cain nchanho are janha joarihi nganji ra ngain nihngo icha importante, jaha ra ẍonhi tiempo joinao ra rrotse ni ra. Pero jai hora jihi tti mero hora para sinchehe ra jihi, ixin Satanás tti jichonda joachaxin jaxon.
Pedro ndac̈ho ixin jehe chonxinha Jesús
(Mt. 26.57‑58, 69‑75; Mr. 14.53‑54, 66‑72; Jn. 18.12‑18, 25‑27)
54Cottimeja tse na Jesús, co sajoicao na para ngain nchiandoha xidána icha importante. Co Pedro cjinxin jirroexin. 55Nttiha ngain patioe nchia mé cjoaga na ná ẍohi co nttiha tavinttendanji na ẍohi mé para xiẍohe na. Co cai Pedro nttiha tavehe ngayé na. 56Cottimeja ná nc̈himozé xidána mé, are vicon nc̈ha que Pedro tajixiẍohe ngandehe ẍohi nttiha tavetsjehe nc̈ha jian co ndac̈ho nc̈ha:
―Cai xí jihi vacao xa Jesús.
57Pero Pedro c̈hoha ndac̈ho ndoa, co jehe ndac̈ho:
―Janha chonxinha xí mé.
58Nchion después vicon ná xí, co xí mé ndac̈ho xa ngain:
―Jaha cai ná de chojní Jesús.
Pero Pedro ndac̈ho:
―Nahi, janha jeha chojní jehe.
59Inchin ná hora después iná xí ẍa cjan xa ndac̈ho xa:
―Ján ndoa xí jihi vacao xa Jesús, ixin jehe xa cai Galilea regioen xa.
60Cottimeja Pedro ndac̈ho:
―Janha nonaha de quehe rrinichja jaha.
Ngain rato mé are Pedro ẍa jinichja jamé, otsje ná conttaxichia. 61Cottimeja Jesús ngaria co tsjehe ngain Pedro, cottimeja Pedro ẍaxaon ixin Jesús ondac̈ho: “Saho que conttaxichia rrotsje va jai, jaha orrondac̈ho ninxin nttiha que chonxinha na janha.” 62Cottimeja Pedro vac̈hjexin de nttiha co anto tsjanga.
Are cjoanoa xa Jesús
(Mt. 26.67‑68; Mr. 14.65)
63Xisoldado que tenda Jesús cjoanoa xa co ẍanguí xa nttá. 64Jehe xa coejehe xa con Jesús co ẍanguí xa tton ngá con co ndac̈ho xa ngain:
―¡Datsoenhe quensen goen!
65Co ndac̈ho xa icha cosa feo ngain.
Are Jesús ngain juzgadoe nihngo
(Mt. 26.59‑66; Mr. 14.55‑64; Jn. 18.19‑24)
66Co are ovingasán ẍatte cain xittetonha ngain nihngo, cain xidána que vaquetonha ngain icha xidána, co cain ximaestroe ley para sajoicao xa Jesús ngain juzgadoe nihngo. Nttiha joanchianguixin xa Jesús, co ndac̈ho xa:
67―Nttihi ndachjenji ni ra, ¿ajaha tti Cristo?
Jehe ndac̈ho ngain xa:
―Si rrondattjo ra que ján, sitticaonnaha ra. 68Co si sanchianguiha ra ná cosa, jaha ra rrondachjenjiha ni ra, ni tsanc̈hjandaha ni ra satsji. 69Pero desde jai, janha, tti Xí que joixin de ngajni, osarihi ngain lado jian de Dios que chonda cainxin joachaxin.
70Cottimeja cainxin xa joanchianguihi xa Jesús co ndac̈ho xa:
―Mexinxin, ¿ajaha tti Xenhe Dios?
Jesús ndac̈ho:
―Ján, janha inchin ndac̈ho jaha ra mismo.
71Cottimeja vinttendac̈ho xa:
―¿Quedonda tsjé na icha chojni de testigo? Ján na mismo coinhi na tti jianha que ndac̈ho xí jihi.
Currently Selected:
SAN LUCAS 22: plsNT
Tõsta esile
Share
Copy
Want to have your highlights saved across all your devices? Sign up or sign in
© 1982, Wycliffe Bible Translators, Inc.