Génesis 13
13
Abramwan Lot rakikäyanqan
1Warminta pusharkur y llapan imëkantapis aparkur Egiptupita Abram kutikurmi Neguevman charqan. Pëwanmi sobrinun Lotpis ëwarqan. 2Abramqa alläpa kapuqyuqmi karqan. Tsëmi qorinpis, qellëninpis y wätankunapis atska karqan. 3Neguevpita ichikllapa ichikllapa ëwarmi Bet-elman Abram charqan. Tsënömi kutikurqan nöpata täranqan kaqman. Tsëqa karqan Bet-elpita Hai markaman ëwaqchömi. 4Tsëchömi altarta unëna perqashqan kaqchö Teyta Diosta adorarqan.
5Lotpis tiyun Abramnömi kapuqyuq karqan. Pëpapis atskam üshankuna, chiwankuna, wäkankuna y toldunkuna karqan. 6Tsënö atska wätankuna ishkanpapis kayäpuptinmi jinanllachöqa täräyänanpaq tinkurqannatsu. 7Tsëmi Abrampa wätanta mitsiqninkuna y Lotpa mitsiqninkuna qewa rëkur pelyakuyaq. Tsë witsanqa tsëchö tëkäyarqan cananeo y ferezeo nunakunam.
8Mitsiqninkuna tsënö pelyakuyaptinmi sobrinun Lotta Abram nirqan: <<Tsë castalla këkarqa ama chikinakushuntsu ni mitsiqnintsikkuna liryakuyätsuntsu. 9Rikanqëkinöpis kë yachanqantsikqa jatunmi akranëkipaq. Tsëmi karu karu täkunantsikpaq juk läduman ewkunki. Umapa ëwaptikim noqaqa urapana ewkushaq. Urapa ëwaptikinam umapa ewkushaq>>.
10Tsënö niptinmi Lotqa Jordán mayu kuchun pampakunata llapan Zoar marka lädupa rikachakurirqan. Tsë pampakunaqa atska yaku kaptinmi Edén huertanöraq#Gén. 2.8-9. y Egipto markanöraq shumaq verdiräkurqan. Tsënöqa karqan Sodoma y Gomorra markakunata Teyta Dios manaraq ushakätsiptinmi. 11Tsëmi Lotqa mas alli kaptin akrarirqan Jordán mayu lädun pampakunata. Y Abrampita rakikarmi inti yarqamunan kaq läduman ewkurqan. 12Abramnam jinan Canaánllachö quedakurqan. Lotnam Jordán mayu pampachö këkaq markakunapa ëwar Sodoma markayaq charqan tsëchö täkunanpaq. 13Sodomachöqa Teyta Diosta mana cäsukuq jutsasapa nunakunallam täräyarqan.
14Lot ewkuptinnam Abramta Teyta Dios nirqan: <<Kë tëkanqëkipita norti kaq lädupa, sur kaq lädupa, inti yarqamunan kaq lädupa y inti jeqanan kaq lädupa rikachakï. 15Tsë rikanqëkitaqa llapantam qoykushqëki. Tsëmi imëyaqpis qampaq y mirënikikunapaq kanqa.#Hech. 7.5. 16Mirënikikuna atskaq kayänanpaqmi miratsishaq. Aqushanö llutëpa kayaptinmi pipis yupëta puëdinqatsu. 17Ëwar rikapakamur jinantinpa tumamunki. Llapan rikanqëki kaqtaqa qamtam qoykushqëki>>.
18 Teyta Dios tsënö niptinmi Abram ewkurqan llapan imëkantapis aparkur Hebrón markapa lädunman. Tsëchömi karqan atska encina montikuna. Tsë montikunaqa karqan Mamre nunapam. Tsëchö täkurmi Teyta Diosta adorananpaq altarta Abram perqarqan.
Currently Selected:
Génesis 13: qwhB
Tõsta esile
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.