Zuwã 21
21
Zezusi hã tisiré norĩ 7 na ihâiba za'ra norĩ u, isihâi'rézé wasu'u
1Tawamhã Zezusi hã ma tô duré tãma sihâi'ré za'ra, tisiré 're inomro mono norĩ u. Isõ'u zaihâ u ma tô itẽme sihâi'ré za'ra. Tiberiadi na 'ri nho'õmo nhisi 'rata, isõ'u hã te 're hâimana. Ãne duré itẽme isihâi'ré za'ra zé wasu'u hã.
2Tawamhã Zezusi siré 're inomro mono norĩ nima norĩ hã te siré asimro, Sima Pedru, duré Tome isi'ubza na da te 're isisi mono hã, duré Natãnaéu hã, duré Zebedehe 'ra zahuré hã, duré aibâ maparane isiré 're ine zahuré hâiba amo norĩ hã. Cana na 'ri nhisi ãma 're ihâimana mono, Natãnaéu hã. Galiléa ãma, Cana hã. 3Tawamhã Sima Pedru te tisiré ihâiba amo norĩ ma tinha, ãne:
— Tepe zô, wa za mo, wa hã.
Tawamhã ma tô duré isiré norĩ, tãma nharĩ za'ra, ãne:
— Asiré, wa za ãma ai'aba'ré ni, tepe zô.
Tawamhã ma tô oto wairé rob u, tepe zô si'aba'ré da. Ãhã wa, âi ba sihutu wamhã, uba're wa, ma tô asisi, abazipara hã te te nasi siwi wabzuri da, tepe zô. Tane nherẽ, ãhã wamhã te te siwi 'mai'âri õ di, taha bara na hã. 4Tawamhã awẽ wi te Zezusi hã za, pu'u zaihâ na. Ãhã wamhã, ta norĩ hã te te siwi 'madâ'â wamhã, te te siwi waihu'u za'ra õ di, tô Zezusihi nherẽ hã. 5Tawamhã ma tô 'mahârâ za'ra, ãne:
— Ĩsisãnawã norĩ, e ma tô i'mai'âri za'ra wa'wa, tebe hã.
Tawamhã asa ma tô ãma sada'âbâ za'ra, ãne:
— Mare di. Wa te 'mai'âri za'ra õ di. Â baba di.
6Tawamhã te tãma 'ru za'ra, ãne:
— Ma'ãpé, abazipara hã asimire niwĩ asiwi mei wa'aba, tebe hã 'mai'âri za'ra wa'aba da.
Tahawa, ma tô oto abazipara hã tinhimire niwĩ siwi time, âi ba. Te te wasiwi mei wamhã, â hawi te te siwi wazere waihu'u õ di, uba're u hã, tebe hã ahâ uptabi wa, i'remhã. 7Tahawa, te Zezusihi siré 're imorĩ te te 're isawi pese mono hã Pedruhu ma tinha, ãne:
— Õ hã, Wanhib'apito.
Tawamhã imreme te te wapari wi, awa'awi ma tô si'uza, Sima Pedru hã. Te te romhuri da, ma tô aré ti'uza hã sani. Tawamhã si'uza pari, ma tô uba're hawi tobro, âi ba, Zezusihi u morĩ da. 8Zezusihi siré 're inomro mono hâiba amo norĩ hã te uba're na abazipara hã siwi tisa. Romhuture di oto, â zada'ré u hã. 9Â zada'ré u, te te siwi ãma ropto wamhã, ma tô oto wairé, rob u. Tawamhã uzâ, ma tô siwi tisã. Pré'a nhisiwi, te tebe hã daba'wara. I'u'ẽtẽ wapu zama te isu daba'wara. 10Tawamhã ãne te tãma nharĩ za'ra:
— Tebe hã asiwi i'mai'âri za'ra wa'wa hã we asiwi 'mai'âri aba.
11Tawamhã Sima Pedru uba're wa, ma tô ãzé abazipara zô, â zada'ré u te te sari da, tepe ré hã. Tebe hã 'masisi uptabi di. 153 na ihâiba hã, isa'ẽtẽ si hã. Tebe hã ahâ uptabi nherẽ, abazipara hã te te sina tari õ di. 12Tawamhã Zezusi te sô tihârâ za'ra, ãne:
— We ai'aba'réi wa'aba, asaihuri aba da.
Tawamhã ãne isiré 're inomro mono norĩ te te siwi sadanharĩ õ di: “E 'wa hã a hã.” Tinhib'apito za'ra na, te te siwi waihu'u siromo wa, te te siwi sadanharĩ õ di, duré sina hâtâ'â za'ra wa. 13Tawamhã Zezusi hã ma tô i'u'ẽtẽ wapu hã tãma sõmri za'ra. Tepe zama, ma duré tãma sõmri za'ra, te te ihuri da hã.
14Ab're hawi hâiwa'utu pari, te nasi itẽme sihâi'ré za'ra, Zezusi hã, tisiré 're inomro mono norĩ ma. Ãhã na itẽme iwisi za'ra zém na hã, si'ubdatõ oto itẽme isihâi'ré za'ra zé hã, isiré 're inomro mono norĩ u hã.
Zezusi hã Pedru te te sina isadanharĩzé wasu'u
15Tawamhã saihuri pari, Zezusi hã te Sima Pedruhu ma tinha, ãne:
— Sima, Zuwãhã 'ra, ma'ãpé, ĩma waihu'u. Ã norĩ ma, ĩzawi pese za'ra di. A hã bété, e ta norĩ nhipai u aima ĩzawi pese uptabi di.
Tawamhã Pedru te asa tãma tinha, ãne:
— Ĩhe. Ma tô asina ĩwaihu'u siro, te 're i'asawi pese mono zém na hã.
Tawamhã Zezusi te tãma tinha:
— Pone'ẽrebâ 'madâ'â'wa, tinhimizama te te 're i'madâ'â pese za'ra mono ne, ma'ãpé ĩzazei'wa norĩ hã 're ab'madâ'â pese mono za.
16Tawamhã te duré sina sadanha, ãne:
— Sima, Zuwãhã 'ra, e aima ĩzawi pese uptabi di.
Ãhã wamhã, Pedru, ma duré asa ãma tãma wa'rã ãne:
— Ĩhe. Ma tô asina ĩwaihu'u siro, te 're i'asawi pese mono zém na hã.
Tawamhã Zezusi te tãma tinha, duré ãne:
— Ma'ãpé ĩzazei'wa norĩ hã 're ab'madâ'â pese mono za, pone'ẽrebâ 'madâ'â wẽ 'wa ne.
17Te duré sadanharĩ na sahu, ãne:
— Sima, Zuwãhã 'ra, e tô aima ĩzawi pese uptabi di. — Ãne te duré Pedru hã sina sadanha, si'ubdatõ ãma.
Tawamhã si'ubdatõ te te sadanharĩ wa, pẽ'ẽzé di oto, Pedru hã. Tawamhã Zezusihi ma, te duré tinha, ãne:
— Uburé marĩ hã aima waihu'u pese di. A hã ma tô asina ĩwaihu'u siro, te 're i'asawi pese mono zém na.
Tawamhã Zezusi te tãma tinha, ãne:
— Ma'ãpé, ĩzazei'wa norĩ hã 're ab'madâ'â pese mono za, pone'ẽrebâ 'madâ'â wẽ 'wa ne.
18Te duré tawamhã tãma tinha, ãne:
— Tô sena wa aima rowasu'u: Aipréduptéb ré, ma tô 're asi'uza mo, nimomo 're ane mono da, asima 're irowẽ mono zéb uwaibaba. Tane nherẽ, asi'ihi wapsi, te za aipaihi hã iwẽ zahuré, da te ai'awasisi da, nimomo asima rowẽ õ nherẽ, da te asaprõni da.
19Ãne sõ'awib õ nherẽ, ma tô tãma waihu'u siro, idâ'âzém na hã, za tãma iromhâimanazém na hã. Sihâiba zawi ãna, za dâ'â wa, te za 'Re ihâimana u'âsi mono ãma 're dawata za'ra.
Tawamhã Zezusi te duré Pedruhu ma tinha, ãne:
— 'Re ĩmorĩzém na te za 're aimo, ĩzarina.
Zezusi hã Pedruhu ma, te te irotizé wasu'u, Zuwãhã ãma
20-21Tawamhã nimomo simisutu si'aba'réi ré, ma tô Pedru hã aipi'ra. Sipi'rai wamhã, ma tô 'madâ, Zezusihi siré 're imorĩ te te 're isawi pese mono hã. Bara na si'ubumroi ré saihuri da, ma tô isõ're ãma nhamra. Duré ãhã wamhã ma tô sadanha ãne: “Wanhib'apito, e 'wa hã te za asô te te danhimro, te te dama aihâiba nhomri da.” Ãne ma tô tawamhã sadanha. Tawamhã Pedru te te 'madâ'â wamhã, te Zezusi ãma sadanha, ãne:
— Wanhib'apito. Ã hã bété, e niha za tãma iromhâimanazé hã.
22Tawamhã Zezusi asa te tãma tinha, ãne:
— Apâ we ĩmorĩ õ ré, idâ'â'õzé te tãma pisutu wamhã, taha si ãma 're 'madâ'â mono õ di za, 're aimorĩ da, ĩzarina. Asi'ãma si te za 're irosa'rata mo, 're ĩmorĩzém na si 're aimorĩ da.
23Tawamhã Zezusi te te 're isawi pese mono, dâ'â ãna 're ihâimana u'âsi mono na rowasu'u hã ma tô te te ropé, Zezusihi zazei'wa norĩ u. Tane nherẽ, Zezusi hã te te tãma pisutu õ di, idâ'â'õzé hã. Taré ma tô Pedruhu ma waihu'u: “Apâ we ĩmorĩ õ ré, idâ'â'õzé te tãma pisutu wamhã, taha si ãma 're 'madâ'â mono õ di za.” Ãne si ma tô ãma hã tãma tinha.
24Ta hã Zezusihi wasu'u na aima rowasu'u za'ra wa'aba 'wa hã, Zezusihi siré 're imorĩ. Ta hã duré ãma rob'ui'éré'wa. Zezusihi wasu'u na isimirowasu'u hã sena uptabi na wa tô wasina waihu'u za'ra ni.
Zuwã te te irob'ui'éré 'rãsutu zé
Zuwã 20.30-31
25Zezusi hã te te dama 're i'arob'manharĩ wẽ mono zé hã ahâ uptabi di, da te ãma irob'ui'éré za'ra õ hã. Da te ãma rob'ui'éré za'ra 'wa'âhã, aré tãma rob're su'ure di ibaihâ ma hã, duré ti'ai ãma hã. Nimame aré duré 're isimi'wara mono zéb da hã mare di.
Currently Selected:
Zuwã 21: xavBP
Tõsta esile
Share
Kopeeri
Want to have your highlights saved across all your devices? Sign up or sign in
© 2011, Wycliffe Bible Translators, Inc.All rights reserved.