Atu 17
17
Paulu norĩ hã Tesalonita ãma te te iromhuri za'ra zé wasu'u
1Tawamhã Paulu norĩ hã te oto ai'aba'ré, Ãfipuri na 'ri nho'õmo nhisi wa'wai baba, duré Aporoniza na 'ri nho'õmo nhisi wa'wai baba. Tawamhã ma tô oto aihutu, Tesalonita na 'ri nho'õmo nhisi u. Tame te rowahutuzé hã 're sa, zudeu norĩ te hã. 2Paulu hã nimomo 're simasisi mono sidâpâsi, te rowahutuzéb u 're zasi, 're ihâimana mono zéb zarina. Tahawa, Tesalonita u wisi wamhã, ma tô duré ãzé, rowahutuzéb u. Tawamhã si'ubdatõ romhuri 'rãsutu na ma tô dama rowasu'u sabadu na, 'Re ihâimana u'âsi mono zadawa wasu'u na rob'ui'éré 'rata na, tame 're isi'ubumroi mono norĩ ma. 3Ãne ma tô dama rob'rãzarõtõ:
— “Cristu hã Danho'reptui'wa da, 'Re ihâimana u'âsi mono te te wama ipisudu hã te za robzépata. Te za duré dârâ. Dâ'â uptabi nherẽ, te za apâ hâiwa'udu.” Ãne te wama ãma rowasu'u, irob'ui'éré 'rata na hã. Zezusi hã te aima iwasu'u za'ra wa'wa hã wa tô waihu'u pese za'ra ni, tô õ hã Cristu, 'Re ihâimana u'âsi mono te te wama ipisudu, Danho'reptui'wa da.
4Tawamhã ni'wam norĩ zudeu norĩ hã ma tô saze za'ra, Paulu norĩ te te tãma irowasu'u za'ra zéb zarina. Tahawa, ma tô isiré tihâimana za'ra, Paulu norĩ siré, Silaha me. Duré gregu norĩ zudeu'õ norĩ hã, 'Re ihâimana u'âsi mono ãma 're iwata za'ra mono norĩ hã, ahâ na ma tô duré saze za'ra. Pi'õ norĩ zama ma tô saze za'ra, dama mreme pire na 're ihâimana za'ra mono hã. Ta norĩ zama ma tô oto isiré tihâimana za'ra.
5Tane nherẽ, zudeu norĩ, isazei'õ'wa norĩ hã ma tô ãma 'madâ'â wẽ'õ za'ra, Paulu norĩ hã. Tahawa, ma tô 'ri nhi'riti na aibâ iwasété norĩ ma si'upana 'ru za'ra, iwa'a norĩ ma. Tawamhã ta norĩ hã ma tô sitẽme sito, Paulu norĩ zada hâimana za'ra da. Ãhã wamhã, ta norĩ ma tô ãma siwi ro'wa'rutu pese, 'ri nho'õmo ãma. Aibâ nhorõwa hã ma tô duré siwi uirĩ, Zasãhã nhorõwa hã. Paulu norĩ zô sisisi da, ma iré hã siwi uirĩ. Taha pari, ma tô oto sô asisi, te te siwi sani da, danho're u. 6Tane nherẽ, oto sô sisisi wamhã, robaba zahuré di, Paulu norĩ hã. Te te sa'rese za'ra õ di. Tahawa, Zasã norĩ hã ma tô Paulu norĩ upana dasiwi waibu ni, isiré isazei'wa norĩ me. Tawamhã dama ipire norĩ nho're u ma tô te te simro. Tawamhã mreme 'rãihâ na te 'mahârâ za'ra, isaprõni'wa norĩ hã, ãne:
— Õ hã, aibâ norĩ hã daro mono bâ, 're idahâimana za'ra mono zém na ma tô ãma dawi saprĩ za'ra. Ma tô dawi ro'wa'rutu za'ra. Ãhã na ma tô duré we aimasisi, waza'ru u. 7Zasã hã ma tô tinhorõwa u 'mazasi zahuré, i'rata simasisi zahuré da a'â. Roma ãma danhib'apito nhimiroti wa'rãmi, te 're hâimana za'ra. Ãne te wama nharĩ za'ra: “Zezusi hã, taha si danhib'apito uptabi hã.”
8Tawamhã taha wasu'u hã da te wapari za'ra wamhã, ma tô dazahi sina nharĩ za'ra ni. Dama ipire norĩ zama ma tô duré sada tizahi za'ra. 9Tahawa, dama ipire norĩ ma, ma tô Zasã norĩ hã rob'uiprazé hã sõmri za'ra, isisani za'ra zéb da hã. Taha pari, ma tô satõrĩ za'ra, tinhorõwa u si'aba'ré da apâ.
10Tawamhã mara simei wi, ma tô isazei'wa norĩ Paulu norĩ hã siwi satõrĩ zahuré, Silaha me, Beréa na 'ri nho'õmo nhisi u neb zahuré da.
Paulu norĩ hã Beréa ãma te te iromhuri za'ra zé wasu'u
Tawamhã Beréa u sihutu wamhã, ma tô Paulu norĩ hã ai'aba'ré, zudeu norĩ te, rowahutuzéb u.
11Beréa ãma 're isi'ubumroi mono norĩ nhimirosa'rada hã, wẽ di. Tesalonita ãma 're isi'ubumroi mono norĩ nhimirosa'rata nei õ di. Zezusihi wasu'uwẽ hã ma tô wapari pese za'ra. Awẽ sidâpâsi, ma tô 'Re ihâimana u'âsi mono zadawa wasu'u na rob'ui'éré 'rada hã da te 're sõré za'ra, Paulu norĩ nhimirowasu'u hã tô sena zô da te ãma 're rosa'rata pese za'ra mono da. 12Tahawa, zudeu norĩ hã ahâ na ma tô saze za'ra. Gregu norĩ si'aibâ norĩ hã ma tô duré saze za'ra, ahâ na. Gregu norĩ sipi'õ norĩ zama ma duré ahâ na saze za'ra, isibro pese norĩ hã. 13Tawamhã taha wasu'u hã ma tô waptãrã apâ Tesalonita u, ãne: “Beréa ãma te duré u, dama rowahutu Paulu hã, 'Re ihâimana u'âsi mono zadawa wasu'u na hã.” Ãne hã zudeu norĩ hã te te wapari za'ra wamhã, ma tô Paulu norĩ zarina ai'aba'ré, Beréa u siti'ru sina. Tame ma tô duré timreme wasété na dawi ro'wa'rutu za'ra, sada dazahi za'ra da. 14Tawamhã isazei'wa norĩ hã awa'awi ma tô oto Paulu hã satõrĩ za'ra, âporé zaihâ u morĩ da. Sila norĩ si Timotiuhu me te isa'u aimasisi zahuré, Beréa ãma. 15Paulu hâiba wapto'wa da hã ma tô duré si'mazatõrĩ za'ra, isazei'wa norĩ hã isiré 'masi'aba'ré da, Atena na 'ri nho'õmo nhisi u te te siwi saprõni za'ra da. Taha pari, ma tô apâ ai'aba'ré, Beréa u. Pauluhu mreme hã te apâ siwi ti'â, Sila norĩ ma, Timotiuhu me, itẽme nep su'u zahuré da, Atena u hã.
Paulu hã Atena ãma te te iromhurizé wasu'u
16Atena ãma, Paulu hã te oto sô mapari zahuré, Sila norĩ zô Timotiuhu me. Tame romhâiba 'manharĩ hã ahâ na te 're simasa, ãma 're idawata za'ra mono zéb da hã. Tahawa, da'ãma pẽ'ẽzé uptabi di, Paulu hã. 17Tahawa, zudeu norĩ te, rowahutuzéb ãma ma tô awẽ sidâpâsi marĩ wasu'u na te te azada'âbâ, zudeu norĩ hã duré zudeu'õ norĩ, 'Re ihâimana u'âsi mono ãma 're iwata za'ra mono norĩ zama. 'Ri nhi'riti nho'õmo na da te 're i'ubumroi mono zéb u te te da'anhopẽtẽ mono sidâpâsi, ma tô duré marĩ wasu'u na te te da'azada'âbâ, Paulu hã. 18Zezusihi wasu'uwẽ na ma tô dama rowasu'u. Dâ'â nherẽ, apâ ihâiwa'utuzém na ma tô duré dama rowasu'u. Tahawa, Epiturezuhu nhimirowahutu zarina, duré etozitu norĩ nhimirowahutu zarina dama rowahutu'wa norĩ hã ma tô duré ãma sada'âbâ za'ra, Paulu hã. Tawamhã nima norĩ hã ma tô ãne sisadanharĩ za'ra ãma:
— E marĩ na te wama rowasu'u za'ra. Simiza'rese bâ.
Nima norĩ hã te duré ãne sima nharĩ za'ra:
— Ãté ihâiba'õ norĩ wasu'u na te wama rowasu'u, iwaihu'upese hâiba amoi wasu'u na, wa te ãma 're saze za'ra mono da.
19Tawamhã Paulu hã ma tô siwi saprõ, Are'opadu na rosa'rata'wa norĩ si'rã'õtõzém nhisi u. Tame ma tô tãma nharĩ za'ra, ãne:
— E te za wama iwaihu, asimirowahutuzép té hã. E marĩ, te wama iwasu'u za'ra. 20Iwasu'u hã wa te waihu'u za'ra õ di. Duré wama ãma sahu za'ra na pé, wa te waihu'u za'ra da.
21Atena ãma 're isi'ubumroi u'âsi mono norĩ hã, duré darob amoi hawi itẽme 're isihutu mono norĩ hã marĩ hã rowasu'u té hã te te 're wapari ze za'ra mono di. Te te sima ãma 're rowasu'u ze za'ra mono di duré. Tahawa, te ãne tãma nharĩ za'ra, Pauluhu ma.
22Tahawa, Paulu hã hâiwi ma tô za, danho're te te tãma rowasu'u za'ra da, Are'opadu ãma. Ãne te taha wamhã tãma nharĩ za'ra:
— Aibâ norĩ, ãme Atena ãma 're ai'ubumroi wa'aba mono norĩ hã ma'ãpé ĩwapari pese za'ra wa'aba. 'Re aihâimana za'ra wa'aba mono zé hã wa tô waihu'u. Romhâiba hã ahâ na te 're simasa, ãma 're i'aiwata za'ra wa'aba mono zéb da hã. 23'Ri baba 're ĩmorĩ wa, wa tô te azabu, ãma 're i'aiwata za'ra wa'aba mono zé hã. Nimame, wa tô wedeza ne hã sabu, romhâiba 'manharĩ ma, marĩ hã isisiwimhã da te 're isa'ra za'ra mono zé hã. Taha ãma rob'ui'éré hã wa tô duré sabu. Ãne rob'ui'éré hã: “Iwaihu'upe hã wa te waihu'u za'ra õ nherẽ, ãma 're iwawata za'ra mono zé, ã hã.” Waihu'u õ nherẽ, ãma 're i'aiwata za'ra wa'aba mono hã wa za oto aima waihu'u za'ra wa'wa sõ'awi.
24— 'Re ihâimana u'âsi mono hã ma tô ti'a hã 'manha, duré uburé marĩ hã iwa 're ihâimana za'ra mono da hã. Ta hã Danhib'apito uptabi, hâiwa ãma, ti'ai ãma zama. Tahawa, ãma 're idawata za'ra mono zéb da, 'ri hã danhib'rata na da te 're i'manharĩ za'ra mono ãma hã, 're sãmra mono õ di. 25Õhõ si ma tô dapẽ'ẽzanizé hã te te dama 're anhomri. Taha zarina si te duré 're dapẽ'ẽzani za'ra. Taha si, ma tô uburé marĩ hã te te dama 're anhomri, ãma 're idahâimana za'ra mono zéb da hã. Tahawa, da te 're ipawaptob za'ra mono zéb zô, 're simipari mono õ di. 26Isãna'rata hawimhã, aibâ misire nherẽ, ma tô ta hawimhã atébré dapoto mono bâ, 'Re ihâimana u'âsi mono hã. Tahawa, dapoto mono bâ ma tô dasitébré. Ma tô duré da'ãma ropé, ropâ 're dasi'ubumroi mono da. 'Re idahâimana za'ra mono sidâpâsi, ma tô te te dama 're apisutu, ti'a hã, iwa 're idahâimana za'ra mono zéb da hã. Niha wahum na iwa 're idahâimana za'ra mono zéb da hã, ma tô duré te te dama 're apisutu. 27Ãne ma tô te te dama 're ab'manharĩ, sô 're danhopré mono da, niha wamhã, ãté te te 're sõpẽtẽ za'ra mono da. Romhâ na wanhiti 're hâimana mono õ di tô, 'Re ihâimana u'âsi mono hã. 28Ta hã 're morĩ u'âsi õ 'wa'âhã, ãne aré 're wahâimana za'ra mono õ di. Duré waihu'u pese õ 'wa'âhã, ãne aré, duré 're wanomro mono õ di. Asõ're za'ra wa'aba na te rosawẽrẽ'wa norĩ hã ãne wama rowasu'u za'ra: “Wa norĩ hã isimipodo, i'ra.” 29Tahawa, wa norĩ hã 'Re ihâimana u'âsi mono 'ra wamhã, e marĩ na wa za wa te ãma 're rosa'rata za'ra, 'Re ihâimana u'âsi mono ãma hã. E ẽtẽ waipo pré oru 'manharĩ na wa za wa te ãma 're rosa'rata za'ra. E ẽtẽ waipo prã prata 'manharĩ na, e ẽtẽ 'manharĩ na wa za wa te ãma 're rosa'rata za'ra. Mare di. Ãne, wa te ãma 're rosa'rata za'ra mono õ di za. Danhipese na da te 're irob'manharĩ za'ra mono nei õ di, 'Re ihâimana u'âsi mono hã. 30'Re ihâimana u'âsi mono hã dama waihu'u ãna 're danomro mono ré, te te 're dahâ za'ra siromo mono õ di. Tane nherẽ, ãhã na ropâ 're idasi'ubumroi mono hã te za te te 're da'awada'uri, dawasété wi 're dasipizari za'ra mono da, isiniwĩ 're danomro mono da. 31Bâdâ hã ma tô sima pisutu siro, romhâ ré, danho'a te te dama i'arowairébézéb da hã. Tahawa, te ãne dama roti, 're dasipizari za'ra mono da. Ni'wa hã ma tô pisutu, sena na da'ãma rowairébé'wa da hã. Dâ'â uptabi nherẽ, apâ te te ihâiwa'udu, ma tô pisutu, 'Re ihâimana u'âsi mono hã. Apâ te te ihâiwa'utuzéb zarina, ma tô ãne hã dama waihu'u za'ra, õ hã da'ãma rowairébé'wa na hã.
32Tawamhã dadâ'â nherẽ, apâ dahâiwa'utuzé wasu'u hã da te wapari za'ra wamhã, ma tô ãma dasima rowẽ za'ra ni. Tane nherẽ, ihâiba amo norĩ hã te ãne tãma nharĩ za'ra:
— Nimahã bâtâ na wa za duré aiwapari za'ra ni, apâ 're idahâiwa'utu za'ra mono zé wasu'u na.
33Tawamhã Paulu ma tô tiwi timorĩ za'ra. 34Tane nherẽ, ni'wam norĩ hã ma tô Pauluhu ãma sasõmri za'ra. Zezusi hã ma tô saze za'ra. Aibâ hã, Dionizi'u na isisi hã ma tô saze, da'ãma rowairébé'wa norĩ siré Atena ãma, dama ipire uptabi hã. Pi'õ Damarisi na isisi hã ma tô duré saze. Duré ni'wam norĩ hã tamemhã umro na ma tô siré saze za'ra.
Currently Selected:
Atu 17: xavBP
Tõsta esile
Share
Kopeeri
Want to have your highlights saved across all your devices? Sign up or sign in
© 2011, Wycliffe Bible Translators, Inc.All rights reserved.