Atu 13
13
Banabé norĩ hã tinhimiromhuri na te te isãna'rata zahuré zé wasu'u
1Tawamhã Ãtioquia ãma 'Re ihâimana u'âsi mono zadawa 'mahârâ'wa norĩ hã duré dama rowahutu'wa norĩ hã te 're si'ubumro, isazei'wa norĩ wazari. Ãne isisi norĩ hã: Banabé, duré Simiã, isisi amo na isisi hã Ihâimana 'rã na; duré Luciu, Sireni ãma aré 're isãmra mono hã; duré Saulu, duré Manaé, apito Erodihi siwadi aré, Manaé hã, Erodihi nhorõwa ãma siré prédub zahuré wa. 2Tawamhã nimahã bâtâ na ma tô ta norĩ hã saihuri ãna asimro a'â, Wanhib'apito ãma wata za'ra da. Tahawa, ma tô 'Re ihâimana u'âsi mono pẽ'ẽzani hã ãne tãma waihu'u za'ra:
— Banabé norĩ ma, wa tô romhuri hã pisutu zahuré, Sauluhu me. Te te ĩma 're romhuri zahuré mono da, wa tô ĩsima pisutu zahuré, ta norĩ hã. Tahawa, te ipisutu zahuré zéb zarina, te za oto tãma ipisutu za'ra wa'wa, asiti wa'aba oto neb zahuré da.
3Tawamhã 'Re ihâimana u'âsi mono ma, te duré mreme zu, saihuri ãna. Tinhib'rada ma tô i'rãi ãma sa'ra za'ra, Banabé norĩ 'rã nhisiwimhã, 'Re ihâimana u'âsi mono te te tãma iwaihu'u za'ra zéb zarina, te te tãma pisutu za'ra da, romhuri hã. Taha parip si, ma tô siwi satõrĩ zahuré, neb zahuré da oto.
Sipri ãma Banabé norĩ te te iromhuri zahuré zé wasu'u
4Tawamhã Banabé norĩ hã ma tô tineb zahuré, Sauluhu me. 'Re ihâimana u'âsi mono pẽ'ẽzani ré, ma tô tineb zahuré, Sere'usiza na 'ri nho'õmo nhisi u. Ta hawi, te duré tineb zahuré, Sipri na rob'ré za'iti nhisi u. Ãhã wamhã, rowa'u'u na uba'renem na ma tô saprĩ zahuré, dame. 5Tawamhã ma tô aimasisi zahuré, Saramina na 'ri nho'õmo nhisi u. Tame ma tô tinhimiromhuri na sãna'rata zahuré. Zudeu norĩ te, rowahutuzé mono bâ, ma tô tame 'Re ihâimana u'âsi mono hã dama sadawa wasu'u zahuré. Taha wamhã, Zuwã Marcu hã ma tô ime timorĩ zahuré, romhuri na te te pawaptob zahuré da.
6-8Sipri na rob'ré za'iti nhisi wa'wai baba, si'aba'réi wamhã, ma tô aihutu, Pafusi na 'ri nho'õmo nhisi u. Tame abzé tede'wa hã ma tô sõpẽtẽ za'ra, zudeu norĩ siré hã, Bazezusi na isisi hã. Gregu norĩ nhiminhisi na hã Erima na isisi amo hã. 'Re ihâimana u'âsi mono zadawa 'mahârâ'wa newa, te taré te te dama 're rowasu'u. Danhib'apito siwadi, Bazezusi hã. Sérgiu Paulu na danhib'apito nhisi hã. Ta hã, rosa'rata waihu'u pese 'wa. Tawamhã ma tô sô tihârâ zahuré, Banabé norĩ zô Sauluhu me, te te wapari pese da, 'Re ihâimana u'âsi mono zadawa wasu'u hã. Tawamhã Erima hã abzé tede'wa hã ma tô 'Re ihâimana u'âsi mono zadawa wasu'u hã tiwi wẽ'õ zahuré, danhib'apito hã Zezusihi wasu'uwẽ te te saze tõ da. 9Tawamhã Saulu, Paulu na isisi amo hã, 'Re ihâimana u'âsi mono pẽ'ẽzani tãma ihâimana za'ẽtẽ zarina, ma tô abzé tede'wa te te 'madâ'â sina, 10tãma tinha, ãne:
— Wa'uburé 'ra, a hã. Uburé iwẽ nhitob'ru, a hã. Aihâimana nhipese di. Iwasété si, te asima 're i'azawi pese mo. 'Re ihâimana u'âsi mono nhimiroti hã wẽ nherẽ, te dawi ãma 're i'azaprĩ u'âsi mo, iwasétére na. 11Ãhã na 'Re ihâimana u'âsi mono hã te za ai'azâ. Tawamhã te za a'â atob'a. Bâtâ nhimirowa'a hã 'madâ'â õ di za a'â.
Tawamhã awa'awi, ma tô titõmozazu, Erima hã. Ma tô duré tiwi tirobra, tob'a wa. Tahawa, ma tô te te nasi rob'upi dazô, ni'wa hã te te saprõni da. 12Tawamhã danhib'apito hã aibâ itob'a na te te 'madâ'â wamhã, ma tô saze, sena na Zezusihi wasu'uwẽ hã. Wanhib'apito nhimiroti na ma tô duré titob'uzu.
Ãtioquia amoi ãma Paulu norĩ te te iromhuri zahuré zé wasu'u
13Tawamhã Paulu norĩ hã te ai'aba'ré, Pafusi hawi, Pãfilia na danhipti'a nho'õmo nhisi u. Rowa'u'u na uba'renem na te ai'aba'ré, dame. Tane nherẽ, taha wamhã Zuwã Marcu, ime morĩ zahuré õ di. Ma rẽme zahuré, tame Zeruzalẽ u morĩ da apâ. Pãfilia u sihutu wamhã, Peregui na 'ri nho'õmo nhisi u te ai'aba'ré, Paulu norĩ hã. 14Ta hawi, te duré ai'aba'ré, Pisidiza na danhipti'a nho'õmo nhisi u. Tawamhã ma tô aihutu, Ãtioquia u. Sihutu wamhã, sabadu na ma tô asisi, zudeu norĩ te, rowahutuzéb u hã. Tame te taha wamhã asimro ni. 15Tawamhã ma tô ni'wa hã dama sõré, 'Re ihâimana u'âsi mono nhimiroti na Mozési te te irob'ui'érézém na hã. Isadawa 'mahârâ'wa norĩ nhimi'ui'éré hã te duré dama sõré. Te te sõré za'ra parimhã, rowahutuzéb ãma 're da'anhimi'rui mono 'wa hã ma tô Paulu norĩ hã ãne 'mahârâ za'ra, te te dama rowasu'u za'ra da:
— Wasiré Izaraéu nhihudu norĩ, asima wẽ za'ra wa'aba wamhã, te za wama irowasu'u za'ra wa'wa, wama robze za'ra da.
16Tahawa, Paulu hã hâiwi ma tô za. Tinhib'rada, ma tô dama wẽ, ari'iwi dasi'ubumro da. Tawamhã te dama tinha, ãne:
— Wasiré Izaraéu nhihudu norĩ, ĩwapari za'ra wa'aba. Duré zudeu'õ norĩ, a norĩ wa'aba zama wasiré õ nherẽ, 'Re ihâimana u'âsi mono ãma 're aiwata za'ra wa'aba mono norĩ hã, ĩwapari za'ra wa'aba. 17'Re ihâimana u'âsi mono hã Izaraéu nhihudu norĩ nhib'apito hã ma tô wahi'rata norĩ hã sima pisutu za'ra, ãma sib'a'uwẽ za'ra da. Isihudu sidâpâsi, ma tô te te 're apawapto, sitébré da, Ezitu ãma tisiré'õ norĩ 'rata 're si'ubumroi mono ré hã. Ta hawi, ma tô sani za'ra, tiwaihu'u pese na. 18A'ubuni wi, 're dahâimana za'ra mono ré, ma tô te te 're da'ab'madâ'â pese da'ãma wa'a ãna simi'ẽ na, tãma 're damreme wasété hâ za'ra mono nherẽ. 40 na ma tô da'ãma tiwahu, a'ubuni wi te te 're da'ab'madâ'â mono ré hã. 19Cana'ã na romnhisi ãma ma tô 'Re ihâimana u'âsi mono hã da'uprosi. 7 na dapoto wamri mono bâ ma da'uprosi, a'uwẽ norĩ hã iwa 're idasi'ubumroi mono hã. Tawamhã tinhib'a'uwẽ ma, ma tô sõmri za'ra ti'a hã, Izaraéu nhihudu norĩ ma. 20Iwa dawi 're rob za'ra mono ré hã, 450 na ma tô ãma tiwahub za'ra.
— Tawamhã dama imreme pire norĩ hã misi sidâpâsi ma tô dama pisutu za'ra, isadawa para da'ãma rowairébé'wa 're hâimana za'ra mono da, Samuéu hã ipotozéb u. Tawamhã ma tô podo, Samuéu hã. Prédu wamhã, ta hã ma tô 'Re ihâimana u'âsi mono hã te te dama 're sadawa wasu'u. Ta hã isadawa 'mahârâ'wa. 21Tawamhã Izaraéu nhihudu norĩ hã ma tô tiwi waptẽrẽ za'ra, 'Re ihâimana u'âsi mono wi, ni'wa hã danhib'apito ne, te te 're ida'uwati mono da hã, te te pisutu da. Tahawa, 'Re ihâimana u'âsi mono hã ma tô tãma hâiba nhomri za'ra, Saulu hã da'uwati'wa da. Sauhu mama hã, Quisi na isisi hã. Bẽzamihĩ nhihudu ta hã, Quisi hã. Saulu hã te te 're da'uwati mono ré hã 40 na ma tô ãma tiwahu. 22Tawamhã te te oto 're da'uwati mono tõ da, ma tô waze, 'Re ihâimana u'âsi mono hã. Isa'u hã ma tô Dawi hã dama hâiba nho, da'uwati'wa da oto. Ta hã ma tô duré wẽsã oto. Ãne te te iwẽsãmrizé hã: “Dawi hã Zéséhé 'ra ĩma wẽ di. Ĩnhimiroti te te ãma uwaimrami da, te za te te 're ĩwapari u'âsi.” Ãne ma tô Dawi hã wẽsã, 'Re ihâimana u'âsi mono hã. 23Dawihi nhihudu uwaibaba, ma tô 'Re ihâimana u'âsi mono hã pisutu Zezusi hã, Izaraéu nhihudu norĩ nho'reptui'wa da hã. Wahi'rata norĩ ma, te te iropisutuzéb zarina, ma tô pisutu. 24Zezusi hã tinhimiromhuri na te te dama sãna'rata õ ré, ma tô Zuwã Batista hã te te dama 're rowahutu, wasiré Izaraéu nhihudu norĩ ma, dawasété wi 're dasipizari za'ra mono da, duré â dawabzuri hã da te 're 'manharĩ za'ra mono da. 25Tawamhã tinhimiromhuri te te isazârizéb u ro'rutu wapsi, te dama siwasu'u, ãne: “Cristuhu zô te 're asimipari za'ra wa'aba mo. Tawamhã te ĩ'ãma 're irosa'rata za'ra wa'aba mo, Cristuhu newa, Danho'reptui'wa da, 'Re ihâimana u'âsi mono te te ĩpisutu newa. Tazahã, ta hãi õ di, wa hã. Ĩza'u si ĩma ipire hã te za wei mo. Wei wisi wapsi, wa hã tãma ĩwapure di za. Tãma ĩwapure wa, ipara'uza wasisizé, te apâ tiwi wasihu waihu'u õ di za, ĩnhisé wa.” Ãne te dama siwasu'u, Zuwã Batista hã.
26Te duré dama tinha, ãne:
— Wasiré Abra'ãhã nhihudu norĩ, ĩwapari za'ra wa'aba, duré zudeu'õ norĩ, 'Re ihâimana u'âsi mono ãma 're aiwata za'ra wa'aba mono norĩ zama. Uburé wa'udâna ma tô iwasu'uwẽ hã wei watẽme satõrĩ za'ra, wahâiba mono bâ, danho'reptuzé wasu'u hã. 27Zeruzalẽ ãma 're isi'ubumroi mono hã, duré tame dama ipire norĩ zama, Zezusi hã Danho'reptui'wa na te te waihu'u za'ra õ di. Sabadu sidâpâsi, 'Re ihâimana u'âsi mono zadawa 'mahârâ 'rata 'wa norĩ nhimi'ui'éré hã da te dasima 're sõré za'ra mono nherẽ, iwasu'u hã te te waihu'u za'ra õ di, ta norĩ hã. Tahawa, Zezusi hã dâ'â da, te te siwi ãma roti wamhã, te te waihu'u za'ra ãna, ma tô 'Re ihâimana u'âsi mono zadawa 'mahârâ 'rata 'wa norĩ nhimirowasu'u hã siwi ãma uwaimra, si'uihâ na. 28Zezusi hã marĩ iwasédé hã te te 'manharĩ õ nherẽ, ma tô õ norĩ hã siwi waptẽ, Pilatuhu wi, da'wapéi'wa norĩ hã te te siwi wĩrĩ da, wasété ré ne. 29Tawamhã Zezusihi ãma uburé 'Re ihâimana u'âsi mono mreme ui'éré 'rada hã te te siwi ãma uwaimrami parip si, ma tô siwi si'ra, wedepo'o nhonhi'rãmi hawi. Ãhã wamhã, ma tô duré siwi tisẽ, ẽtẽ zahâpâ wa, ab're 're. 30Tane nherẽ, 'Re ihâimana u'âsi mono, ma tô apâ hâiwa'utu, dâ'â uptabi nherẽ. 31Tawamhã apâ hâiwa'utu pari, ma tô nasi dama sihâi'ré, bâtâ ahâ na, Zezusi hã. Galiléa hawi, Zeruzalẽ u aré isiré isi'aba'ré norĩ ma, ma tô nasi tãma sihâi'ré za'ra. Ta norĩ hã te oto te te dama 're wasu'u wẽ za'ra Zezusi hã, Izaraéu nhihudu norĩ ma.
32— Wa norĩ zama iwasu'uwẽ hã wa te aima sõmri za'ra wa'aba da, wa ai'rata wahâimana za'ra wa'aba ni. 33'Re ihâimana u'âsi mono, wahi'rata norĩ ma, te te iropisudu hã ma tô wama ãma uwaimrami za'ra oto, wasiré isihudu norĩ ma. Zezusi hã ma tô apâ hâiwa'udu. Apâ ihâiwa'utuzé wasu'u na 'Re ihâimana u'âsi mono ãma danho're na rob'ui'éré, isãna'remhã, te wama wasu'u, ãne:
“A hã ĩ'ra. Ã bâtâ na aihâiwa'utuzém na wa za Aimama na aima 're ĩhâimana.”
34— Duré ãma rob'ui'éré 'rata hâiba amo hã te duré wama wasu'u 'Re ihâimana u'âsi mono, Zezusi dâ'â uptabi nherẽ, apâ za te te ihâiwa'utuzém na, dâ'â u'âsi nomro tõ da. 'Re ihâimana u'âsi mono te tinha, ãne:
“Dawihi ma, tô sena marĩ iwẽ na te tãma iropisutuzém na wa za taha u'âbâ aima ãma uwaimrami za'ra wa'wa.”
35Ihâiba amo na rob'ui'éré isãna'remhã, te duré wama wasu'u za'ra, ãne:
“Te te aima 're iromhuri wẽ u'âsi mono hã dâ'â wamhã, rẽme õ di za, hâiba 'ro tõ da.”
36Te duré dama rowasu'u, ãne:
— Dawi hã ti'ai ãma 're morĩ ré, ma tô 'Re ihâimana u'âsi mono ma sina uwaimra, te te tãma ipisutuzéb zarina. Te te sina tãma uwaimrami pari, ma tô dârâ, Dawi hã. Ihi'rata norĩ 'ru ãma ẽtẽ zahâpâ wa ab're wa, ma dasiwi sẽrẽ ni. Da te dasiwi sẽrẽ wamhã, ihâiba hã ma ti'ro. 37Tane nherẽ, 'Re ihâimana u'âsi mono apâ te te ihâiwa'udu hã, 'roi õ di. Hâiba wẽ na ma tô apâ hâiwa'utu. 38-39Wasiré norĩ, ma'ãpé aihĩni ĩwapari pese za'ra wa'aba, tô sena na waihu'u za'ra wa'aba da. Danho'reptuzé wasu'u hã wa za aima waihu'u za'ra wa'wa. Zezusi hã, dawasété pari'wa. Duréihã, Mozési hã ma tô wahi'rata norĩ ma ãma rowasu'u za'ra, 'Re ihâimana u'âsi mono nhimiroti na. Isimiroti zarina 're dahâimana za'ra mono nherẽ, dawasédé da te dasima 're pari waihu'u za'ra mono õ di, ãma. Tane nherẽ, ãhã na Zezusi hã da te dasina 're umnhasi za'ra mono wamhã, dawasédé te te oto da'ãma 're i'ab'madâ'â mono õ zarina, te za oto te te 're da'awẽsãmri. 40-41Duréihã 'Re ihâimana u'âsi mono zadawa 'mahârâ 'rata 'wa hã ma tô ãne na ãma rob'ui'éré, 'Re ihâimana u'âsi mono mreme na, ãne:
“'Re aihâimana za'ra wa'aba mono ré, wa za niha dama rob'manha, ipipa na. Tawamhã za te dama irob'manharĩzém na te za ãma 're asiwawã za'ra wa'aba mo, ni'wa hã te te ãma 're aipo're pu'u za'ra wa'aba mono nherẽ.
'Madâ'â za'ra wa'aba. A norĩ wa'wa hã ĩ'ãma aiwa'ẽ za'ra wa'aba norĩ hã, te za tãma 're a'rãmi za'ra wa'aba mo, ĩnhimirob'manharĩ pipa ma. Tawamhã ĩzadawa para te za ai'utõrĩ 'wa.”
42Tawamhã Paulu norĩ hã zudeu norĩ te, rowahutuzém hawi pusi zahuré wi, ma tô waptẽrẽ zahuré ni, sabadu amo na te te dama rowasu'u na sahu zahuré da. 43Tawamhã rowahutuzém hawi dawairébé wamhã, da'ahâ na te Paulu norĩ siré ai'aba'ré ni, Banabéhé me, zudeu norĩ hã, duré zudeu'õ norĩ hã, duré zudeu norĩ hâimanazéb zarina 're ihâimana za'ra mono norĩ zama. Tawamhã ma tô tãma roti za'ra, 'Re ihâimana u'âsi mono nhimipawaptobzém na siptete sina ãma 're hâimana u'âsi za'ra mono da.
44Tawamhã sabadu amo na aihĩni ma tô tasi'rã'õtõ ni, 'ri nho'õmo ãma 're idasi'ubumroi mono hã, Wanhib'apito zadawa wasu'u hã da te wapari za'ra da. Da'umro di, da te iwapari za'ra õ hã. 45Tane nherẽ, da'ahâ na idasi'rã'õno hã zudeu norĩ hã te te da'madâ'â za'ra wamhã, ma tô da'ruiwapari za'ra. Tawamhã Pauluhu mreme hã ma tô dawi wẽ'õ za'ra, zudeu norĩ hã. Tahawa, timreme na ma tô nasi ãma tãma wa'rãmi za'ra, Pauluhu mreme wa'rãmi. Ma tô duré ãma tiwa'ẽ za'ra. 46Tane nherẽ, pahi ãna ma tô Paulu norĩ hã tãma nharĩ za'ra, zudeu norĩ ma, ãne:
— A norĩ wa'aba ma, uimrehẽne wa tô aima rowasu'u za'ra wa'aba ni, 'Re ihâimana u'âsi mono zadawa wasu'u na hã. Tane hã tô, wẽ di. Tane nherẽ, taré newa, ma tô asiwi iwẽ'õ za'ra wa'wa, iwasu'uwẽ hã. Tahawa, ibâi õ di, hâiwa ãma rowẽ ãma 're i'aihâimana u'âsi za'ra wa'aba mono zéb da hã, 'Re ihâimana u'âsi mono 'rata. Tahawa, wa za airẽme za'ra wa'aba ni, zudeu'õ norĩ ma, wa te tãma 're rowasu'u za'ra mono da oto. 47Wanhib'apito hã ma tô ãne na wama roti za'ra oto:
“A norĩ wa'wa hã wa tô aipisutu za'ra wa'wa, zudeu'õ norĩ ma, 're rob'uiwẽ za'ra wa'aba mono da, iwẽ na, taha zarina te 're ida'anho'reptui mono zém na daro mono bâ ãma 're ropéi wa'aba mono da, dama.”
48Tawamhã zudeu'õ norĩ hã Pauluhu mreme te te wapari za'ra wamhã, toi uptabi za'ra di. Wanhib'apito zadawa wasu'u na ma tô tiwata za'ra. 'Re ihâimana u'âsi mono hã, rowẽ na i'rata 're hâimana u'âsi za'ra mono da, te te sima ipisutu za'ra norĩ hã ma tô saze za'ra, Zezusi hã.
49Tawamhã Wanhib'apito zadawa wasu'u hã ma tô ropé, daza'rui mono bâ, tame danhipti'a nho'õmo ãma 're idahâimana za'ra mono norĩ u. 50Tane nherẽ, zudeu norĩ hã ma tô tame dama ipire norĩ hã wada'uri wasété za'ra, Paulu norĩ zada hâimana za'ra da. Pi'õ norĩ hã imreme pire norĩ hã, 'Re ihâimana u'âsi mono ãma 're iwata za'ra mono norĩ, zudeu'õ norĩ, ta norĩ zama ma tô wada'uri wasété za'ra, sada hâimana za'ra da. Tawamhã ma tô ãma rowasété zahuré ni, Paulu norĩ ãma, Banabéhé me. Ma tô tãma rob'ru zahuré ni, ta hawi danhipti'a nho'õmo hawi neb zahuré da, danhiti. 51Tawamhã Paulu norĩ hã ma tô tipara zapru hã wamirĩ zahuré, da'ãma dâ'â zahuré tõ da oto. Tahawa, õne haré ma tô tineb zahuré, Iconizu na 'ri nho'õmo nhisi u. 52Tawamhã Zezusihi zazei'wa norĩ hã Ãtioquia ãma 're isi'ubumroi mono hã te 're to za'ra. 'Re ihâimana u'âsi mono pẽ'ẽzani na ma tô aptete za'ra, ipẽ'ẽ mono bâ.
Currently Selected:
Atu 13: xavBP
Tõsta esile
Share
Kopeeri
Want to have your highlights saved across all your devices? Sign up or sign in
© 2011, Wycliffe Bible Translators, Inc.All rights reserved.