Atu 1
1
1-2Teofilu, wa hã Luca, ĩnhimi'ui'éré 'rata na wa tô aima rob'ui'éré pa, Zezusi 're imorĩzém na. Ti'ai ãma 're morĩ ré hã ma tô te te 're da'apawapto. Ma tô duré te te dama 're arowahutu. Isãna'rata hawimhã, i'rãsutu u wa tô aima ãma rob'ui'éré. Hâiwa u imorĩzé wasu'u na wa tô duré ãma aima rob'ui'éré pa.
Tawamhã hâiwa u morĩ õ ré, ma tô tizadawa wasu'u'wa norĩ ma rob'ru za'ra, te te sima iwẽ za'ra zéb uwaibaba, sô ihârâ za'ra norĩ ma. 'Re ihâimana u'âsi mono pẽ'ẽzani ré, 're morĩ wa, ma tô isadawa para tãma rob'ru za'ra, te te duré ãma 're dapawaptob za'ra mono da, duré iwasu'uwẽ te te dama 're wasu'u za'ra mono da, isine. Ãhã na wa za duré aima rob'ui'éré, hâiwa u morĩ za'u si, te te 're ipawaptob za'ra mono zé wasu'u na hã.
Zezusi hã tizadawa wasu'u'wa norĩ ma, nasi isihâi'rézé wasu'u
3Zezusi hã dâ'â nherẽ, hâiwa'utu wamhã, tihâiba na u'âsi te tô nasi tãma sihâi'ré za'ra, tizadawa wasu'u'wa norĩ ma hã. Nasi itẽme isihâi'ré za'ra zém na hã, 40 na ma tô bâdâ hã ãma ne. Tô sena, Zezusi hã hâiba ré za oto apâ 're imorĩ na te te ãma waihu'u za'ra da, te nasi itẽme sihâi'ré za'ra, taré newa, te te nasi ãma siwi wawã tõ da. 'Re ihâimana u'âsi mono, da'ãma 're isib'a'uwẽ mono zém na ma tô duré tãma rowasu'u za'ra. 4Tawamhã nimahã bâtâ na i'rata sãmra za'ra ré, te tãma roti za'ra, Zeruzalẽ ãma simipari sina a'â hâimana za'ra da. Ãne te tãma roti za'ra, Zezusi hã:
— Ĩmama, te te aima iropisutu za'ra wa'aba zéb zô asimipari za'ra wa'aba za a'â. Te te iropisutuzé hã wa tô aima wasu'u za'ra wa'wa. 5Zuwã Batista hã ma tô â na si, â dawabzuri te te dama 're ab'manharĩ. Ãnei õ di za oto, a norĩ wa'wa hã. Ai'ãma 're ronomro za'ra wa'aba mono õ ré, te za oto 'Re ihâimana u'âsi mono hã Tipẽ'ẽzani na si te te 're aihâiba ubu za'ra wa'wa, iré 're anomro u'âsi aba mono da.
6Tawamhã siré si'ubumroi ré, te siwi sadanha, isadawa wasu'u'wa norĩ hã:
— Wanhib'apito, e tawamhã, ãhã na te za wama asi'apito za'ra, Izaraéu nhihudu norĩ ma hã warob 're duré wama 're roti mono da, wahi'rada Dawi hã te te dama 're iroti mono ne hã, romanu norĩ te te 're wawada'uri za'ra mono tõ da.
7Tawamhã Zezusi te asa tãma nharĩ za'ra, ãne:
— Ĩmama ma si waihu'u pese di. Taha si ma tô bâdâ hã sima pisutu pese, te te dama ãma i'uwaimramizéb da hã. A norĩ wa'wa hã bâdâ hã waihu'u za'ra wa'aba da, Ĩmama te te aima pisutu za'ra wa'aba õ di, te te dama ãma i'uwaimramizéb da hã. 8Tane nherẽ, te za Tipẽ'ẽzani hã we aima sõmri za'ra wa'wa. Tawapsi, te za tiwaihu'u pese na asiptete za'ra wa'wa, dama 're ĩzadawa wasu'u za'ra wa'aba mono da. Te za tô dama 're ĩzadawa wasu'u za'ra wa'aba mo, Zeruzalẽ ãma. Zudéa na danhipti'a nho'õmo nhisi ãma te za duré dama 're ĩzadawa wasu'u za'ra wa'aba mo, daza'rui mono bâ, Samaria na danhipti'a nho'õmo nhisi ãma zama. Uburé daza'rui mono bâ romhâ na zama te za oto dama 're ĩzadawa wasu'u za'ra wa'aba mo.
Zezusi hã hâiwa u imorĩzé wasu'u
9-10Tawamhã tizadawa wasu'u'wa norĩ ma, te te tãma roti za'ra pari, ma tô Imama hã tiwi âri za'ra, isõ'a za'ra, hâiwa u morĩ da oto, Zezusi hã. Morĩ ré, te te siwi sawẽrẽ. Tawamhã hâiwa'a 'rowi ma tô tiwi tizébré za'ra oto. Tahawa te te siwi 'madâ'â waihu'u õ di oto. Tawamhã hâimo te te siwi sawẽrẽ mono ré, aibâ norĩ hã ma tô sa'rese ãna aima'wara zahuré, isababab za'ra, uza hâirã ré. 11Tawamhã ãne te tãma nharĩ za'ra:
— Galiléa ãma 're aihâimana za'ra wa'aba mono norĩ, e marĩ da, te aimasap sina, hâimo ãma isawẽrẽ za'ra wa'aba mo. Zezusi hã 'Re ihâimana u'âsi mono, hâiwa u te te aiwi i'âri za'ra wa'wa hã, ta hã te za we apâ mo. Hâiwa u ãma morĩ ré, ma tô isawẽrẽ za'ra wa'aba mo. Hâiwa u ãma aiwi imorĩ aba ne, te za we apâ mo.
Zeruzalẽ ãma Zezusihi zadawa wasu'u'wa norĩ, nasi isi'rã'õtõzé wasu'u
12Tawamhã Zezusihi zadawa wasu'u'wa norĩ hã te oto apâ ai'aba'ré, Oriwera na ẽtẽ 'rãihâ nhisi hawi, Zeruzalẽ u. Ta hawimhã, Zeruzalẽ u hã misi na ti'ai pibuzé hã. 13Ãhã wamhã, ma tô oto aihutu, Zeruzalẽ u. Sihutu wamhã, 're idanhimi'wara mono zéb u te oto ai'aba'ré. Hâimo te sai'uri za'ra, tisi'ubumrozéb u sisisi da, 'ri nhisi u. Isadawa wasu'u'wa norĩ hã ãne isisi za'ra hã: Pedru, duré Zuwã, duré Tiagu, duré Ãdré, duré Filipi, duré Tome, duré Batolomeu, duré Mateu, duré Afeuhu 'ra Tiagu na isisi, duré Sima zeroti norĩ me aré 're imorĩ, duré Zuda Tiaguhu 'ra. Ta norĩ hã ma tô hâimo sai'uri za'ra. 14Tawamhã awẽ sidâpâsi te nasi si'rã'õtõ, 'Re ihâimana u'âsi mono ma, mreme zusi da nasi, Zezusihi no norĩ me, duré ina Maria na isisi hã aimawi pi'õ norĩ me.
Mati'asi hã Zudaha nhowa're're, 'Re ihâimana u'âsi mono te te ipisutuzé wasu'u
15Tawamhã bâdâ hã siwaptom na ãma ne pari, ma tô isazei'wa norĩ hã si'rã'õtõ, 120 na ihâiba za'ra hã. Tawamhã Pedru hã ma tô wahudu hâiwi, te te tãma rowasu'u za'ra da. Ãne te tãma rowasu'u za'ra:
16-20— Wasiré Zezusihi zazei'wa norĩ, ĩwapari za'ra wa'aba. Zudaha wasu'u na wa za aima rowasu'u za'ra wa'wa. Duréihã, 'Re ihâimana u'âsi mono pẽ'ẽzani hã ma tô Zuda hã waihu'u siro, romhâ ré. Tahawa, Dawihi ma, ma tô tinha, dama roti'wai ma, te te iwaihu'u siromo zém na te te ãma rob'ui'éré da. Tawamhã Dawi hã ma tô Zudaha ãma rob'ui'éré siro, poto õ ré. Ãne ibaihâ na ãma irob'ui'éré hã: “Isõrõwa ãma hã 'ri baba di za oto. 'Ri baba na te za oto 're sa. Ni'wa hã iwa 're sãmra mono õ di za oto.” Ãne Zudaha dâ'âzé wasu'u na hã ma tô wama rob'ui'éré za'ra.
— Rob'ui'éré na iwasu'u hã ma tô sina uwaimra Zuda hã, tidâ'âzé wasu'u hã te te sina waihu'u ãna. Siwi iwẽ'õ'wa norĩ hã ma tô te te sô simro, Zezusihi zô. Isiré 're wanomro mono nherẽ, wasiré romhuri, Zezusi te te tãma pisutu nherẽ, ma tô te te sô danhimro, te te dama hâiba nhomri da. Te te dama hâiba nhomri parip si, ma tô sima uipra ti'a hã, Zezusi te te dama isõmrizé wa'âbâ na. Tawamhã tame ma tô dârâ, tinhipti'ai 're, Zuda hã. Ma tô waptãrã, ti'ai wa. Waptã'ã wamhã, ma tô nomohaipo'o. Nomosipo'o wamhã, uburé isãna ma tiwi asa'wa. Ãne ma tô Zuda hã sina uwaimra, za idâ'âzé wasu'u na rob'ui'éré hã.
— Tawamhã iwasu'u hã 'ri baba, ma tô te te ropé, Zeruzalẽ ãma. Tahawa, Asédama na ma tô isipti'a hã da te 're sisi za'ra, dasimremezém na. Wamreme na ãma isaprĩzé hã, dawapru za'warizém na darom nhisi na.
— Duré ãne 'Re ihâimana u'âsi mono, te te iwaihu'u siromo zéb zarina ma tô rob'ui'éré siro, Dawi hã Zudaha wasu'u na: “Romhuri hã, itei õ di oto. Ni'wa te hã za oto, isõwa're'remhã.” Ãne ma tô ãma rob'ui'éré siro, Dawi hã.
21-22— Tahawa, wa norĩ hã wa za aibâ hã wasiwi 'maipisutu ni, Zezusi apâ ihâiwa'utuzém na wasiré te te dama 're rowasu'u mono da, Zudaha nhowa're're. Zuwã Batista, â dawabzuri hã te te dama 're i'ab'manharĩ mono zém hawi, ti'ai ãma 're morĩ ré, Wanhib'apito Zezusihi siré 're iwanomro mono norĩ zô, wa za wanhopré ni, duré hâiwa u morĩ ré, wasiré wa te i'madâ'â za'ra norĩ zô. — Ãne te dama rowasu'u, Pedru hã.
23Tawamhã aibâ maparane ma tô isisi na pisutu zahuré ni, Zuzé Zustu na isisi hã, duré ihâiba amo hã, Mati'asi na isisi hã. Zuzé Zustu hã, Basaba na isisi amo hã. 24-25Taha pari, te oto tiwi rowaptẽrẽ za'ra, 'Re ihâimana u'âsi mono wi, ãne:
— Wanhib'apito, a hã aima dawaihu'u pese di. Tahawa, ma'ãpé wei wama waihu'u za'ra na. E niha aibâ hã te asima iwẽ, ipisutu da hã, wasiré Zezusihi zadawa wasu'u'wa da. Zezusihi ma, te te 're iromhuri mono zéb da hã Zuda hã ma tô tirẽ. Tahawa, a hã tãma ipisutuzéb u, ma tô mo. E 'wa hã te za ipisu, Zudaha nhowa're're, wasiré isadawa wasu'u'wa da hã.
26Tawamhã 'Re ihâimana u'âsi mono hã te te ipisudu hã te te waihu'u za'ra da, ma tô marĩ hã sima me za'ra, te te siwi ãma uwaimrami da. Tawamhã ma tô siwi ãma uwaimra oto. Mati'asi hã ma tô oto siwi waihu'u za'ra, 'Re ihâimana u'âsi mono te te ipisutu na, Zudaha nhowa're'reb da. Tawamhã Mati'asi hã aibâ 11 na isadawa wasu'u'wa da hã, Zezusi te te ipisutu za'ra norĩ me, te za oto 're mo. Tahawa, 12 na ihâiba za'ra hã oto apâ, Zezusihi zadawa wasu'u'wa norĩ hã.
Currently Selected:
Atu 1: xavBP
Tõsta esile
Share
Kopeeri
Want to have your highlights saved across all your devices? Sign up or sign in
© 2011, Wycliffe Bible Translators, Inc.All rights reserved.