Génesis 40
40
Huaꞌanoꞌsa huaꞌnapisoꞌ, Cosiri noꞌtëquën shaꞌhuitërinsoꞌ
1Ina piquëran cato huaꞌanoꞌsari Iquipito copirno tëhuëtopi: Aꞌnasoꞌ, copirno huino oꞌshitonaꞌpiroꞌsa huaꞌan. Aꞌnantaꞌ, ina marë chachin pan ninaꞌpiroꞌsa huaꞌan. Cato chachin copirno tëhuëtopi. 2-3Napoaton copirnori inapita noꞌhuirin. Noꞌhuiton tashinan pëiquëtacaisoꞌ camaitërin. Napohuachina cato chachin inaquë poꞌmopi. Ina tashinan pëisoꞌ, copirno aꞌpairinsopita capitan pëinënquë yaꞌhuërin. Cosi yaꞌhuëarinquë chachin poꞌmopi. 4Copirno aꞌpairinsopita capitanisoꞌ, Cosi itapon: “Isopita cato huaꞌanoꞌsa quëmari noya aꞌpaiton, catahuaquëꞌ,” itërin. Inapotohuachina inapita huaꞌanoꞌsasoꞌ, huaꞌqui inaquë yaꞌhuëpi.
5Aꞌna tashiso nipirinhuëꞌ, cato huaꞌanoꞌsa chachin, huaꞌnapi. Aꞌnaya aꞌnaya huaꞌnapisoꞌ, co inachachin tapon huaꞌnapihuëꞌ, nisha nisha tapon huaꞌnapi. 6Tashíramiachin Cosiriso nicapon huëꞌpachina, sëtápi quënanquirin. 7Napoaton, cato chachin natanin:
—¿Onpoatomata iporasoꞌ paꞌpi sëtëramaso pochin yaꞌnoramaꞌ? itërin.
8—Catocoi chachin huaꞌnapiraihuëꞌ, co insonta yaꞌhuërinhuëꞌ maꞌsona tapon huaꞌnaraiso anitotiincoisoꞌ, itopi.
—¡Yosë mini nanitërin maꞌsona tapon huaꞌnarësopita anitotiinpoasoꞌ! Shaꞌhuitoco huaꞌnaramasoꞌ, itërin.
9-10Napotohuachina oꞌshinaꞌpiroꞌsa huaꞌansoꞌ, huaꞌnarinso Cosi shaꞌhuitërin:
—Huëꞌëhuëquë aꞌnara opa yaꞌhuë niꞌnahuë, cara sëꞌpahuaninsoꞌ. Nicasoco chachin, papo sëꞌpatarin. Papo sëꞌpatahuaton, yancotarin. Yancotërinquëranchin nitërinsopita cayarin. 11Ina pirayan cantaꞌ, huaraon oꞌorinsoꞌ minënën sëꞌquëato, huaniárahuë. Opa cayarinso masahuato, huaraon oꞌorinquë shiꞌshirahuë. Inapotahuato huaraon ihuëtërahuë. Ihuëtohuatora maꞌparinco huachi, itërin. 12-13Napotohuachina, Cosiri itapon:
—Naporinchi paya. Maꞌsona tapon huaꞌnaranso shaꞌhuichinquën: Cara sëꞌpahuaninsoꞌ, cara tahuëri tapon naporin. Cara tahuëriya quëran, huaraonsoꞌ quëma tëhuëransoꞌ yonquiantarin. Nanan anoyatahuatënquën naquëranchin acoantarinquën ina marëꞌ sacataantacasoꞌ. Iráca naporanso chachin naquëranchin oꞌshitaantaran huachi. Ina tapon, ina pochin huaꞌnaran. 14-15Inapotohuachinquën, canta nosoroatonco yonquico. Ocoincoso marëꞌ huaraon shaꞌhuitëquëꞌ. Iprioroꞌsa yaꞌhuëpiquë caso yaꞌhuëpirahuëꞌ, topinan quëran noꞌhuitonaco paꞌaninaco. Co manta onporahuë niꞌton, co tashinan pëiquë yaꞌhuápaꞌhuaso yaꞌhuërinhuëꞌ. Napoaton nosoroco cantaꞌ, itërin.
16-17Napotohuachina, copirno marëꞌ pan ninaꞌpiroꞌsa huaꞌantaꞌ: “Noyachi shaꞌhuitërin paya,” taꞌton, huaꞌnarinso Cosi shaꞌhuitërin:
—Canta nipirinhuëꞌ, iso pochin huaꞌnarahuë: Cara yaꞌhuiri pan acoinanquë pitëmotorahuato, huiríton panoꞌsa quëpárahuë. Yaꞌnatontarinso acoinanquë, nisha nisha cashi cashin panoꞌsa copirno marëꞌ yaꞌhuërin. Napoaponahuëꞌ, inairaroꞌsa huëꞌsahuatona pitëmotorahuë quëran capitarinaco, itërin. 18Napotohuachina, Cosiri itapon:
—Cara pan acoinansoꞌ, cara tahuëri tapon naporin. 19Cara tahuëriya quëran, huaraonsoꞌ quëmanta tëhuëransoꞌ yonquiantarin. Naporo chachin piyapinënpita camaiapon: “Noninquë huënquëconorahuatomaꞌ, naraquë pëꞌtënco chimiꞌin,” itapon. Inapotohuachinën, chanaro caꞌtëroꞌsari noshanën caponaꞌ, itërin.
20Cara tahuëriya quëran, huaraon huaꞌhuatërinso tahuëri nanirin. Naporoꞌ yaꞌipi catahuarinsopita huaꞌanoꞌsa ichicapacancanacaso marëꞌ, panca pita ninin. Yaꞌipi përarinsopita niꞌtonënquë huaraonsoꞌ camaitërin: “Cato huaꞌanoꞌsa chachin tashinan pëi quëran ocoicoꞌ,” tënin. 21Oꞌshinaꞌpiroꞌsa huaꞌansoꞌ, naquëranchin asacataantarin. Napoaton naquëranchin iráca pochachin huaraon oꞌshitaantarin. 22Pan ninaꞌpiroꞌsa huaꞌanso nipirinhuëꞌ, huaraoni piyapinënpita camairin naraquë pëꞌtënacaiso marëꞌ: “Noninquë huënquëconorahuatomaꞌ, tëpacoꞌ,” itërin. Cosiri shaꞌhuitërinso chachin nitopi. 23Oꞌshinaꞌpiroꞌsa huaꞌanisoꞌ, Cosiri catahuacaso marëꞌ shaꞌhuitërinsoꞌ, naniantërin. Inapoaton co catahuarinhuëꞌ.
Currently Selected:
Génesis 40: cbt
Tõsta esile
Share
Kopeeri
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.