Génesis 23
23
Sara chimininsoꞌ
1Sarasoꞌ, pasa cato shonca canchisë piꞌi icanin. 2Ina quëran Quiria-arpa ninanoquë chiminin. Ina ninanosoꞌ, Ipron itopi antaꞌ. Inaso Canaan parti yaꞌhuërin. Saꞌin chimininso marëꞌ Apraansoꞌ, sëtaton, naꞌnërárin, ayanárin, naporin.
3Ina quëran, saꞌincoꞌ nonën patahuaton, yaꞌhuëhuanoꞌsa nontapon paꞌnin. Yaꞌhuëhuanoꞌsasoꞌ, itiroꞌsa itopi. Huaꞌanoꞌsa nipisopita niyontoyantopiquë, quënanconin. Inaquë nontahuaton itapon:
4—Caso co yaꞌhuëhuancohuëꞌ niporahuëꞌ, yacaparanquëmaꞌ. Saꞌahuë chiminin niꞌton, chiminpatamara nipoꞌmoramasoꞌ noꞌpaꞌ paꞌantoco canta topirahuë, itërin. 5Napotohuachina, Iti huaꞌanoꞌsari itaponaꞌ:
6—Natanquë sinioro shaꞌhuichinquën. Yosë huayoninquën niꞌton, quëmasoꞌ chiníquën nanantëran. Nipoꞌmoraisoꞌ noꞌpaꞌ insosona noya noya niꞌnanquë, saꞌancoꞌ poꞌmoquëꞌ. Co incoi tëranta apiratarainquënhuëꞌ, itopi. 7-8Napotohuachinara, Apraanso huanirahuaton, itiroꞌsa nontaantacaso marëꞌ mónsho tënin:
—Tëhuënchachin isoporinquë saꞌahuëcoꞌ poꞌmocaꞌhuaso nohuantohuatamaꞌ, catahuaco. Canpitari yaꞌhuërënamëhuë Sohuaro huiꞌnin Ipron itopisoꞌ, nontoco topirahuë. 9Maquipiraquë nanin yaꞌhuërinsoꞌ, paꞌanchinco. Inaso noꞌpanën intonquë yaꞌhuërinsoꞌ. Onposona paꞌtërinsoꞌ noꞌtëquën pahuërëtarahuë. Inapohuato, chiminpatoi nipoꞌmocaꞌhuaiso marëꞌ isoporinquë yaꞌhuëtarinco huachi. 10Ipronta Iti piyapi. Inanta inaquë chachin nisarin niꞌton, aꞌnapita huaꞌanoꞌsa natantonënquë inaora chachin Apraan shaꞌhuitërin. Chiníquën nonin ninano yaꞌcoanataquëchin, naꞌhuëpisopitantaꞌ, natanacaiso marëꞌ:
11—Ama sinioro napoquësohuëꞌ. Topinan naninso quëtaranquën. Inainpichin noꞌpaꞌ yaꞌhuërinsontaꞌ, quëchinquën. Aꞌnapitanta natantonënquë shaꞌhuitaranquën. Napoaton saꞌancoꞌ poꞌmoquë huachi, itërin.
12Napotopirinhuëꞌ, Apraanso yaꞌhuëhuanoꞌsa inachintopiso nitotaton, anoyatarin. Naquëranchin yaꞌhuëhuanoꞌsa niꞌtonënquë mónsho taantarin. 13Aꞌnapitanta natantonënquë, Ipron itaantapon:
—Natanquë api nontaantaꞌinquën topirahuë. Onpopionta noꞌpa marëꞌ pahuërëꞌ maquëꞌ. Naporo huarëꞌ saꞌahuëcoꞌ poꞌmoarahuë, itërin.
14-15—Noya sinioro paꞌ. Ina noꞌpasoꞌ, catapini pasa coriqui prata quëran nininsoꞌ paꞌtërin. Canpoaso maꞌhuaënpoa niꞌtëhuaꞌ, co inaíchin marëꞌ aquëtë huarëꞌ nonsápaso yaꞌhuërinhuëꞌ. Napoaton, poꞌmochanquë saꞌanco huachi, itërin.
16Napohuachina, Apraanso ina nápo marëꞌ anoyatërin. Ina quëran Iti huaꞌanoꞌsa niꞌtonënquë, noꞌtëquën pahuërëtërin. 17-18Inapoaton Apraani, Ipron noꞌpanën Maquipiraquë yaꞌhuërinsoꞌ, paꞌanin. Ina noꞌpasoꞌ, insina nararo Mamiriri huaꞌanëntërin quëran, piꞌi pipirinso parti quëparitërin. Noꞌpaꞌ, nanin, nararoꞌsa inainpichin yaꞌhuërinsoꞌ, inapita Apraani huaꞌanëntërin huachi. Iti huaꞌanoꞌsari yaꞌipiya quëran nitotopi. Ninano yaꞌcoanataquëchin naꞌhuëpisopitantaꞌ, nitotopi.
19Nani anoyatahuaton Apraansoꞌ, Maquipira naninquë saꞌincoꞌ poꞌmorin huachi. Noꞌpaꞌ paꞌaninquë napotërin. Ina noꞌpasoꞌ shaꞌhuirahuëso chachin, Mamiriri huaꞌanëntërinso noꞌpa quëran, piꞌi pipirinso parti quëparitërin. Ina roꞌtësoꞌ, Ipron itopi antaꞌ. Canaan parti yaꞌhuërin. 20Ina pochin Apraan, noꞌpaꞌ, nanin, inapita paꞌanaton, huaꞌanëntërin. Itiroꞌsari, paꞌantërin nipaꞌpitacaiso marëꞌ.
Currently Selected:
Génesis 23: cbt
Tõsta esile
Share
Kopeeri
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.