San Mateo 20
20
Ejempluꞌ bee bene enu rriꞌi riñaꞌ lu uva
1Leꞌca uni Jesuse lubee beneꞌnu.
―Elurnibiyaꞌ Diose neca xi neca tucu bene enu rluꞌcu tucu yuu llene nú nuꞌ uva, nu silaꞌtuꞌ uchiuꞌulla nzecuaꞌnalla bee mosoꞌ para nú riꞌi riñaꞌ lu uvaꞌlla. 2Nu unixulla lubee mosoꞌ zeꞌe nú calu ixiulla beei tebichia nu uzela beei, che uxeꞌlalla beei nú che riꞌi beei riñaꞌ lu yuꞌlla. 3Cheelá uchiuꞌulla nzalla tucu rquie quieꞌ silaꞌ nu ulañiꞌlla nú nucuaꞌa chiucu chuna bee bene ruꞌu iꞌya enu la luꞌcu riñaꞌ. 4Che unilla lubeei: “Uquia riꞌihua riñaꞌ lu yuua elu nuꞌ uva nu ixiucahua lunú riala yaxuhua.” Che chu nzuebeei riñaꞌlla. 5Leꞌca uchiuaꞌla bene zeꞌe nzalla tucu rebibichia, nu leꞌca esquie nzaꞌlalla tucu rquie chuna uche, nu leꞌca esquieꞌala unilla lubee bene enu nucuaꞌa ruꞌu iꞌya enu la luꞌcu riñaꞌ. 6Nu tucu rquie ayuꞌ uche, uchiuꞌu zecaꞌlalla nzalla ruꞌu iꞌya nu uchuꞌulla stexcuaꞌa bee bene enu la luꞌcu riñaꞌ, nu unilla lubeei: “¿Xiquie nú debichia nucuaꞌahua caꞌa nu la riꞌihua riñaꞌ?” 7Che uni bee bene zeꞌe lulla: “Xne lá llelaꞌru riñaꞌ riꞌiru.” Che unilla lubeei: “Uquia riꞌihua riñaꞌ lu yuua, elu nuꞌ uva nu ixiucahua lunú riala yaxuhua.”
8’Chenu uyuꞌu rulaꞌ, uni patrón lu mosoꞌ enu rnibiyaꞌ lubee mosoꞌ: “Ubixia bee mosoꞌ nu uquixie udixiuxu bee enu uriña último, nuche chu ixiulu beelá bee enu rluti uriña.” 9Nu chenu uriña bee mosoꞌ enu uyuꞌu lu riñaꞌ tucu rquie ayuꞌ uche, ye beei uyaxu beei tucu nú rriꞌi bene ana tebichia. 10Chequie chenu uyala nú yaxu bee mosoꞌ enu uyuꞌu rluti lu riñaꞌ, uriꞌi beei elliebacuꞌ nú maselá yaxu beei, pero leꞌca ye beei uyaxu beei tucu nú rriꞌi bene ana tebichia. 11Chequie chenu riaxu beei ulebeei lu patrón zeꞌe, 12nu unibeei lulla: “Bee bene quieꞌ uriña uche, nu uriꞌitsia beei riñaꞌ tucu hora nu udixiulu beei tucu nú rixiulu liꞌiru, nu liꞌiru uriquiꞌru uriꞌiru riñaꞌ lubee debichiallu.” 13Chequie ucuaqui patrón zeꞌe, nú unilla lu tucu beei: “Amigo, lecaxi nú necha neca uriꞌá lulu. Xne liꞌá unixua lulu nú calu ixiualu tebichia. 14Enzeꞌe uyucu dimiꞌlu nu yaalu. Xne liꞌá niarquia nú ixiua bene enu uche uyuꞌu lu riñaa tucu nú udixiua liꞌilu. 15¿Xieꞌ leca modo riꞌá lunú niarquia cuna dimiala?, urre ¿Xieꞌ ria arquiꞌlu nú rriꞌi nzeꞌca la?” 16Scua necane, xne bee bene enu leca tineca nee aca neca equie bee nzeꞌe, nu bee bene enu neca equie nee la aca neca equie bee nzeꞌe bichia zeꞌe. Xne huaxi bee bene nezeneꞌ lu inziuꞌ Diose pero la huaxi bee bene enu chenala inziuꞌnu.
Udixiuleꞌe Jesuse bese rriuna nú uti bee bene liꞌinu
(Mr. 10:32-34; Lc. 18:31-34)
17Chenu nza Jesuse enza Jerusalén, che ubixianu lu chiꞌchiucu bee beneꞌnu tucu chú nu uninu lubeella:
18―Nediyaꞌlaꞌhua nú nzaꞌahua enza Jerusalén elu deteꞌ cuenda bee bene Liꞌá Bene enu uxeꞌla Diose lubee uleꞌya enu rnibiyaꞌ lubeelá bee uleꞌya, cuna lubee ulaxcuela enu reca ley, nu nibiyaꞌ beei nú atia. 19Nu deteꞌ cuenda beei Liꞌá lubee bene rene para nú lliꞌchinu beei Liꞌá, nu zeteꞌcheꞌ beei Liꞌá nu quieꞌe beei Liꞌá lu cruse, pero bichia rriuna huañi zecaa.
Unacuꞌ naꞌ Jacobo cuna Juan tucu faura lu Jesuse
(Mr. 10:35-45)
20Chequie uyabica unaꞌa Zebedeo cuna rucu llianaꞌ beella lu Jesuse, nu utsulliquilla lunu, nu unacuꞌlla tucu faura lunu. 21Che unedichiaꞌ Jesuse lulla:
―¿Xi niarquiꞌlu?
Nu unilla lunu:
―Chenu nibiyaꞌlu niarquia nú zucu tucu endua cueꞌtselu chúbe, nu stucui zucu cueꞌtselu chúbeca.
22Pero uni Jesuse lubeella:
―La riꞌihua beyaꞌ lunú rnacuꞌhua. ¿Xieꞌ nuꞌ modo nú nehuana zecahua tucu nú nehuana zecaa la? ¿Xieꞌ nuꞌ modo riquiꞌhua zecahua lunú riala zecaa la?
Che uni beella lunu:
―Aahuaꞌ, riquiꞌru.
23Che ucuaquinu lubeella:
―Neli nú nehuana zecahua tucu nú nehuana zecaa. Nu riquiꞌhua zecahua lunú zecaa. Pero enu zucu cueꞌtsea chúbe urre chubeca. La neca Liꞌá enu riala nibiyaꞌ nucuaꞌ, sino que necala nucuaꞌ para bee bene enu ucañila Diose Paa liñibe.
24Nu chenu ubeneꞌ se xiꞌi bee beneꞌnu nucuaꞌ, ule beella lu Juan cuna lu Jacobo. 25Pero ubixia Jesuse beella nu uninu lubeella:
―Liꞌihua nediyaꞌhua, nú bee bene enu rnibiyaꞌ lu iliulabe quieꞌ rnibiyaꞌ beei lubee bene tucu nú niarquiꞌtsia beei, nu bee bene enu neca equie cuaꞌ rriꞌi beei tucu nú niarquiꞌtsia beei lubee bene lunú rnibiyaꞌ beei. 26Pero letahua la yala nú acane scua. Sino que enu niarquiꞌ nibiyaꞌ letahua, rquiꞌña nú zibiꞌlla lu yehua, 27nu enu niarquiꞌ nú mase aca neca equie letahua, rquiꞌña nú acalla enu zibiꞌ luhua, 28scua tucu nú uriña Liꞌá Bene enu uxeꞌla Diose, lá yela para nú zibiꞌ bee bene lua, sino que uriña lu iliulabe para nú zibiꞌa lubee bene, nu equie nú atia tsilaꞌa huaxi bee bene lu stula beei.
Uriyeca Jesuse chiucu bene enu la yeꞌe lu
(Mr. 10:46-52; Lc. 18:35-43)
29Chenu uchiuꞌu Jesuse cuna bee beneꞌnu eyeche Jericó, nzequie huaxi bee bene liꞌinu. 30Nu chiucu bee bene enu la yeꞌelu nucuaꞌa ruꞌu inziu, chenu ubeneꞌ beei nú udete Jesuse zeꞌe, urixialibeei nú unibeei lunu:
―¡Detá, lliꞌñi David, uhuaꞌa arquiꞌ liꞌiru!
31Nu uquiꞌyaꞌ beei uriꞌi bee bene para nú zaca beei, pero masescaꞌlá urixialibeei nú unibeei:
―¡Detá, lliꞌñi David, uhuaꞌa arquiꞌ liꞌiru!
32Chequie utsuxe Jesuse nu ubixianu rucu bee bene enu la yeꞌelu zeꞌe nu uninu lubeei:
―¿Xi niarquiꞌhua nú riꞌá luhua?
33Che unibeei lunu:
―Detá, niarquiꞌru nú yeꞌe iꞌculuru para nú lañiꞌru.
34Chequie uhuaꞌa arquiꞌ Jesuse beei, nu utiꞌyanu iꞌculu beei. Hora zeꞌe uyeꞌe lubeei, nu chu nzequie beei liꞌinu che.
Currently Selected:
San Mateo 20: zpl
Tõsta esile
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.