Luka 24
24
Okwinguka kwaafu
(Mateu28.1-10; Maleka16.1-8; Jowani20.1-10)
1Kono cwale ba liywaa no matatekelo no sunda amasikusiku akati sebeli ata ku liyumbelo, okutwala emitondo ana kuula. 2Cwale sebeli akawana eliwee nali tundisiwa ba liyumbelo, 3kono aba ana kwingena mu liyumbelo kasi kuwana olutu lwaye. 4Asikomokile eyo sebeli amona alume ayiili aimanine aku mangile eikumango no kumyamyata. 5Cwale asikomokike ni kwinamena etimala banji, alume sebeli amba kwa onyene nji, “Iikene aba musaela wuyu no kuyoya kwaafu?
6Kamupuluke eyo ana kumyambela Jesu yosili mu Galileya. 7‘Nji Omwana no munu kame sabeekiwe mu maoko no aanu asikutenda esibi, mane angongoteliwe, mi liywaa no waatu ainguke.’”
8Cwale akati awo sebeli apuluka amaywi aye, 9mi aba ana kuuka okutunda ku liyumbelo sebeli ambela ano kukwana likumi ni mumweya ni kwaanu onje eyo ina tendahala. 10Cwale neli Maliya Magdalena ni Jo-anna ni Maliya inawaye Jakobo na njili akati sebeli aamba eyi kwa tumiwa. 11Kono amaywi aa kame ana kumonahala kwa onyene nji matangu mi kasi kwapumena. 12Kono Pitolosi sebeli oimana ni kwitukela ku liyumbelo aka nangelamo, kono sebeli okawana feela olwambi ana kupungeliwamo mi Jesu kasamo. Sebeli ouka yo komokile esi sina tendahala.
Omwendo no Kuta ku Imause
(Maleka16.12,13)
13Ba liywaa elyo ayiili kwawo ana ku kon̄anga Jesu sebeli ata ku mundi wisaniwa nji Emausi ibima ikwana itanu ni yiili okutunda ku Jelusalema, 14alemine okwambota kwiinu yonje eyo ina tendahala. 15Alemine okwamba nu kwambota bamweya, Jesu ni yonyene sebeli osheeteta ni kuta noo. 16Kono amiyo oo sebeli akwangwwa oku mulimuka, 17Jesu sebeli wamba nji, “Iikene mukwambota me mweenda?”
Cwale sebeli aimana ni kumonahala okweena. 18Cwale omunjili mukaci koo, osilitina lya Kileopasi sebeli otambula Jesu nji, “Wene wemboci feela ongenda nokwalimuka eyo ina tendahala mu Jelusalema mu maywaa ano?”
19Jeau sebeli wamba kwa onyene nji,
“Iikene einu eyo? mi sebeli aamba nji, “Okukumanena neyi ya Jesu no Nazaleta,” woyo ona kutendanga omunuhi wa Nyambe mu musebezi ni liywii balubala wa Nyambe naanu onje.
20Omo apulisita etu no akulu na busisi omo ana kumutwalela nji aibaiwe ni kungongoteliwa. 21Kono kame tuna kusepa nji yoso yoyisa Isilaele! Ee, mi komone munyima no eyi, sebeli maywaa aatu okutunda abo ina kutendahalela eyi. 22Cwale akati no sikwata setu nakutu komokisa, kakuli kame ana kwikala ku liyumbelo amasiku-siku. 23Kono kasi kuwana olutu lwaye, cwale sebeli auka aamba nji kono kame ana kumona epono no mangeloi awo ana kwamba nji kame ayoya. 24Mu sikwata setu anjili sebeli ata ku liyumbelo nu kawana kanyi eso ana kwamba akati, kono yonyene kasi kumumona.”
25Cwale Jesu sebeli wamba kwa onyene nji, “Anyi alume no aelo no micima no kwapumena wangu yonje eyo ana kwamba anuhi a Nyambe! 26Kana kasi kulukela nji Kilesite ayandele einu ni kwingena mu kanya yaye?” 27Cwale okutateka kwa Mushe nanuhi onje a Nyambe na kwatolokela mu man̄olo onje okukumanena ni Jesu.
28Cwale aba ana kusheeteta abeebi ni mundi ana kuta, Jesu sebeli omonahala yoli balubala loo, 29kono sebeli amuusa ni kwamba nji, “oikale naaci kakuli sebeli mangolwaa mi eliywaa lyaika kale.” Cwale sebeli ota okaikala noo. 30Cwale yoli noo ba tafule sebeli oshimba esinkwa ni kusifuyola ni kusipatoola mane ni kwaaba. 31Cwale amiyo oo sebeli atona ni kumulimuka nji ya Jesu, kono sebeli opicuka mukaci koo. 32Cwale sebeli akwambota mukaci koo nji, “Kandi ngasibine emicima yetu kai simatuka aba ana mbanga naaci mu ndila, abo mane yo tubalela aman̄olo?”
33Cwale sebeli aimana mu nako eyeyo ni kuuka ku Jelusalema, nukawana ano kukwana likumi ni mumweya aunganine bamweya nawo ana kwikalanga noo, 34ona kwamba nji, “Ombumu nainguka luli mi namonahala kwa Simoni!”
35Cwale sebeli aamba eyo ina tendahala mu ndila, mane nomo ana kumu limukela ba kupatoola esinkwa.
Jesu yo Kumonahaza kwa Iyetwa aye
(Mateu28.16-20; Maleka16.14-18; Jowani20.19-23; Tikezo1.6-8)
36Asilemine okwamba eyi, Jesu yonyene sebeli oimana mukaci koo.
37Sebeli acila onene oku yambuta nji mwendi silumba ana mono. 38Sebeli wamba kwa onyene nji, “Iikene eyo mukukataleza mane nuukwibanguta etipuzo mu micima yenu.? 39Komumone amaoko ni makondo nji yamene, komuni leme kakuli esilumba kasikwite olutu simba eifuba kakuli mene mumwine nji nikwite.”
40Kame ana kwamba eyi ni kwamonisa amakaa aye ni makondo aye. 41Asiulwile okupumena, mulibaka no ku wabelelwa, ni kukomoka, sebeli wamba kwa onyene nji, “Mukwite esi no kulya?” 42Sebeli amuba eseemba no ndi no kukon̄ela, 43mi sebeli oshimba ni kulya balubala woo amwine.
44Cwale sebeli wamba kwa onyene nji, “Aa amaywi ange awo nina kwamba kwaanyi meni sili nenu nji yonje eyo in̄olilwe mu mulawo wa Mushe nanuhi a Nyambe ni mu lisamu iiyatetetwe.”
45Cwale Jesu sebeli oyatulula etingana too nji ayupisise aman̄olo, 46cwale sebeli wamba kwa onyene nji, “Esi sokame sin̄olilwe nji Kilesite afanene okuyanda nji eli no waatu ainguke kwaafu, 47mi nji okubaka ni kulemeniwa eibi iyitiwe mu litina lyaye mu tinaha tonje okutateka mu Julusalema. 48Aanyi muli apaki no inu eyi. 49Cwale komumone, kame nituma esepiso ya sitange kwaanyi, kono mwikale mu mulenen̄i okutwala abo samu katambulele amaata atunda ku wilu.
Jesu yo Shimbelwa Kuwilu
(Maleka16.19-20; Tikezo1.9-11)
50Cwale Jesu sebeli washimba ni kuta ku Betaniya, cwale sebeli oimeka amakaa aye ni kwa fuyola. 51Ababo yo lemine okwa fuyola sebeli waasiya ni ku shimbelwa kuwilu. 52Cwale sebeli auka ku Jelusalema awabelelwe onene, 53cwale sebeli atwalelela mu Ndoo ya Nyambe alumbeka Nyambe.
Currently Selected:
Luka 24: lyn
Tõsta esile
Share
Copy
Want to have your highlights saved across all your devices? Sign up or sign in