LUKA 20
20
1YI ku dinga diba dia matuku aa, pakakweyesayi bantu mu tempelo, yi pakakwambilayi losangu lunengela, pakalwa makanda manene yi bafundi ba mikanda kudiyi, yi babakulu, 2yi bakamutôyela ene, Utwambili dia bumanya bwencenca Owe bintu bebi yinabu, yi nani akakupa bumanya bobu ? 3Yei akapingasa yi akabatôyela ene, Meme kabicu nakunwapangusa diapangusa dimodimwe, yi nungwambili ; 4Kunumeya kwa Yoano kwakadi ndo kwa diulu sungu kwa bantu ? 5Yi bakakwelesañana mbata mikyeabo ene, Ndo tuxetôya ene, Kwa diulu, yei unatôya ene, Kukai kanwamwetabusa ? 6Mo ndo tuxetôya ene, Kwa bantu ; bungi bwa bantu banatwela mabwe, bwalo bwamakwetabuxixibwabo ene, Yoano akadi mudimuxi. 7Yi bakapingasa ene, Katusolubukwa kwakadiku. 8Yi Yisu akabatôyela ene, Meme kabidi kisonwambila pa bumanya bungwencenca bintu bebi yinabu.
9Yi akabanga kutôyela bantu mwele ou ene, muntu akakuna kibidi kia finyo, yi akakixiya ku makaci a bena midimo, yi akancuka ku munga mbata kikondo kingi. 10Yi ku kikondo kia mamoma kwakatumayi musadi kudi bena midimo bixemupabo mamoma a kibidi ; mo bena midimo bakamukuma, yi bakamuncula makaci matupu. 11Yi akatuma munga musadi kabidi ; mo bakamukuma yei kabidi, yi bakamukolomona yi bakamuncula makaci matupu. 12Yi akatuma munga amusatu ; yi bobo, pakadi bamamutapa kabidi, bakamutenyeka kunci. 13Yi fumu a kibidi kia finyo akatôya ene, Nakukisa beci ? Nakutuma mwanami munangibwi ; ambeci banamunemeka. 14Mo pakamumona bena midimo, bakakwelañana nkanyi ene, You ndo muna mwokito ; tumuxipi bixeakala mwokito ndo ěcu. 15Yi bakamutenyeka kunci kwa kibidi yi bakamuxipa. Mbwôso fumu a kibidi unakwenca yinabo beci ? 16Unalwa bumisa bena midimo baba, yi unapa banga bantu kibidi kia finyo. Yi pakakwombwabo bakatôya ene, Ai ! kumoni. 17Mo yei akabatebela yi akatôya ene, Mbwôso kinani kieki kiakafundibwa ene, Dibwe diakanyañana babaki ba ncibo, kadedi diamalwa dibwe dia ku ilunga basodi ? 18Muntu mwoso unapona kulu kwa dibwe dedi unaxipibwa bicini bicini ; mo muntu mwoso unapona dedi kulu kwanci, dinamupela bukula bea masangu.
19Yi bafundi ba mikanda yi makanda manene bakapalala ku ola you ndo kumukwata ; yi bakacina bantu ; bwalo bwakalubukwabo mwakatôyayi mwele ou ku bwalo bwabo. 20Yi bakamuxexela yi bakatuma batebedi bakadielekyesa mikyeabo iuna bena nkwami, bixemutongolabo ku kutôya kwanci, bixemulongolabo kudi ngulu ya mulopwe yi ku bumanya bwanci. 21Yi bakamwapangusa ene, Mweyexi, twalubukwa ene, Owe watôya tôya yi weyesa eyesa yi nkwami, yi kusotebela mumbidi ă muntu mwoso, kate weyesa eyesa mwosambu ă Ncembi yi sôsôlwo. 22Kwalelekyela yi bwadi coco kulambula Kyesa, ndo kumoni ? 23Mo yei akalubukwa ncimi yabo, yi akabatôyela ene, Kukai nungwelekyesa ? 24Nungwebesi denalio. Udi kifwanisa kia ñani ? yi mukanda ă ñani udi kulu ? Yi bakapingasa ene, Kia Kyesa. 25Yei akabatôyela ene, Mbwôso nulongoli Kyesa bintu bia Kyesa, yi nulongoli Ncembi bintu bia Ncembi. 26Yi bakadi kabasolubukwa kumutongola ku diyi dedi ku mpala ya bantu ; yi bakakamina diyi diakapingasayi, yi bakapudikila.
27Yi banga baSaduki bakalwa, banyañana bwalo bwa kwombuludibwa kwa bafu ene, kakunako. Yi bakamwapangusa 28ene, Mweyexi, Mosese akatufundila ene, Ndo muntu mukulwanci unafwa, udi yi mukaxi, yi unafwa kutena amalela bana, mwakunyenci unangata mukaxi yi unalelela mukulwanci bana. 29Kwakadi lolo bana ba mama sambwali. Mwamukulu akangata mwamukaxi dibakwa, yi akafwa kutena bana. 30Yi you amubidi 31yi you amusatu akamwangata ; yi mo nako kabidi babalumi sambwali ; bakadi kabasoxiya bana, yi bakafwa. 32Kunyuma mwamukaxi akafwa kabidi. 33Mbwôso ku kwombuludibwa kwa bafu kunakalayi mukaxi a muntu kai ? bwalo bwakamwangata bantu sambwali. 34Yi Yisu akabapingasa ene, Bana ba mwociya ou bamangata mabakwa yi bamapebwa mabakwa ; 35mo bobo bamakwelekyexebwa ene, bamalelekyela yi kwangata kidi mu mwociya yiwa, yi mu kwombuludibwa kudi bafu, kabasoangata mabakwa yi kabasopebwa mabakwa. 36Bwalo butasolubukwabo kufwa kabidi, bwalo bwamalelekyelabo yi bangele, yi badi bana ba Ncembi, bwalo budibo bana ba kwombuludibwa. 37Mo bwalo bwa bafu, ene, banabixibwa, isanga Mosese akakwebesa noku mu diembi dia dibunca, pakabikilayi Fumu ene, Ncembi a Abalami yi Ncembi a Isaka yi Ncembi a Yakobo. 38Mo yei kiena Ncembi a bafu kate a bena môyo ; bwalo bwakala bantu boso yi môyo ku mpala anci. 39Yi banga bafundi ba mikanda bakamukulumuna ene, Mweyexi, wamatôya loko. 40Bwalo bwakacinabo pa kumwapangusa bunga bwalo kabidi nyô.
41Yi akabatôyela ene, Kukai batôya ene, Kalistu udi Mwana a Dafidi ? 42Yi Dafidi mikyenci amatôya mu mukanda ă Misambu ene, Fumu akatôyela Fumwami ene, Xikama pa kidyo kiamene 43binakuteka bantu batanda yinebe katanda ka makasa ebe. 44Dafidi lolo umwabikila ene, Fumu ; mbwôso yei udi mwananci beci ?
45Yi pakadi bungi bwa bantu badi mu kubaka macu, akatôyela beyi banci ene, 46Nudimuki bwalo bwa bafundi ba mikanda, bananga kwendakana yi mayanga malemale, yi bananga kubixibwa mu mabanca a bisalu, yi bananga nkwasa ya buxi mu bixingidilu, yi bidi bia buxi mu mbaki ; 47badedya ncibo ya bakaxi ba bafu, yi balomba lomba ndombu milemile yi mancanga. Kababa banabelebwa lopelo lunadika kukola.
Currently Selected:
LUKA 20: Luna_NT
Tõsta esile
Share
Copy
Want to have your highlights saved across all your devices? Sign up or sign in
© La Société biblique de Genève