Иоанн 2
2
2 бетӀер
Канаялда бертин
1КӀиго къоялдасан Галилеялъул Кана абулеб шагьаралда бертин букӀана. ГӀисал эбелги йикӀана берталъ. 2Берталъе ахӀана ГӀисаги гьесул муридалги. 3Кинабго чагъир гьекъон бахъараб мехалъ, эбелалъ ГӀисада абуна берталъ чагъир лъугӀун бугилан. 4ГӀисаца гьелда абуна:
– Я, дир эбел, дида щай дуца гьеб абулеб бугеб? Дирго иш гьабизе жеги болжал щун гьечӀогури.
5Амма эбелалъ бертадул иш тӀубазабулел рукӀарал гӀадамазда абуна гьас малъараб гьабейилан. 6Гьениб букӀана рацӀцӀалъизариялъул гӀадат тӀубазабизе жугьутӀаз лъим жанибе тӀолеб гамачӀ бекӀкӀун гьабураб анлъго рагӀ. Щуго-анлъго къали унаан щибаб рагӀалъубе. 7ГӀисаца гьезда абуна гьел рагӀал лъадал цӀезареян. Симсимун лъадал цӀезабуна гьез гьеб анлъабго рагӀ. 8Пурччби цӀезарун тамадаясухъе гьебги босун айилан абуна ГӀисаца гьел бертадул иш тӀубазабулел гӀадамазда. Босун щвезабуна гьез гьеб. 9Тамадаяс гьелъул хӀалбихьизе цин жинцаго гьекъана. Чагъир батана гьеб. Амма киса гьеб бачӀарабали гьесда лъалароан. Гьеб лъалаан дол гӀадамазда. 10Гьебмехалъ, ахӀун аскӀовегун, тамадаяс бахӀарасда абуна:
– Кибгоги берталъ цин лъикӀаб чагъир кьола гьекъезе, цинги гӀадамал мехтидал, квешабги бахъула цебе. Дуцайин абуни гьанжелъагӀан тун букӀун буго бищунго лъикӀаб чагъир.
11Гьедин гьениб – Галилеялъул Кана шагьаралда – бихьизабуна ГӀисаца тӀоцебесеб мугӀжизат. Загьирлъизабуна жиндирго къудрат. Муридалги божана ГӀисада.
12Цинги ГӀисаги, гьесул эбелги, вацалги ва муридалги Капернаумалде ана. Чанго къо бана гьез гьениб.
ГӀисаца даранчагӀи Мукъадасаб Рокъоса къватӀире гъола
13ЖугьутӀазул Пасха тӀаде щолеб букӀиндал, ГӀиса Иерусалималде ана. 14Мукъадасаб Рокъове лъугьиндал, ГӀисада гьенир ратана къурбаналъе хъвезе гӀи-боцӀиги маккалги ричулел гӀадамал, жидерго столазда нахъа гӀодор чӀун ругоан гӀарац хисулел чагӀиги. 15ЦӀалаца гӀадин квар-гӀарщалъ рухулаго гьел гӀадамалги гӀи-боцӀиги къватӀире гъуна ГӀисаца, гӀарац хисулел чагӀазул столалги кӀалагъоркье чӀвазарун, гӀарац гӀодобе щущазабуна. 16Маккал ричулел чагӀазда гьес абуна:
– Нахъе босе гьаб кинабго. Дир Инсул рукъ базаралде сверизабуге, – ян.
17Гьебмехалъ ГӀисал муридазда ракӀалде щвана: «Дур рукъалъухъ бергьараб хӀасраталъ вухӀулев вуго дун», – абун ТӀухьдузда хъван бугеб калима.
18Гьенир рукӀарал ягьудияз ГӀисада гьикъана:
– Дуца кинаб гӀаламаталдалъун нижеда бихьизабилеб гьеб киналъего дур ихтияр букӀин?
19ГӀисаца гьезие жаваб кьуна:
– Нужеца гьаб Мукъадасаб Рукъ биххизабе, цинги лъабго къоялда жаниб дица гьеб цӀидасан бала.
20Гьесие жавабалъе ягьудияз абуна:
– Гьаб Мукъадасаб Рукъ базе кӀикъоялда анлъго сон къваригӀана. Лъабго къоялда жаниб бан бажарилищ духъа гьеб?
21Гьеб Мукъадасаб Рукъалъул мисалалда ГӀисаца бицунеб букӀун буго жиндирго черхалъул хӀакъалъулъ. 22ГӀиса хваралъуса вахъараб мехалъ ракӀалде щвана муридазда гьесул гьел рагӀаби. Гьебмехалъ божана гьел ТӀухьдузда хъван букӀаралдаги ГӀисаца жидедаго бицун букӀаралдаги.
Лъида щиб ракӀалда бугебали лъала ГӀисада
23Иерусалималда ГӀиса Пасхаялъул байрамалда вугеб мехалъ, гьесдасан загьирлъарал гӀаламатал рихьун, гӀемерал гӀадамал божана гьесда. 24Амма ГӀиса лъиданиги божизе кколароан. Гьел киналго щал кколелали лъалеб букӀана гьесда. 25Пуланав чи гьадинав-додинав вугилан лъицаниги бицинчӀониги, жиндаго лъалаан лъида щиб ракӀалда бугебали.
Currently Selected:
Иоанн 2: АварАК
Tõsta esile
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023