San Mateo 6
6
Ndá kuꞌva xíniñuꞌu yo chindee yo na ndaꞌvi
1Saa ndi̱kaꞌan tuku Jesús xiꞌin na, káchi ra saa:
―Tá íkan ndo ya vaꞌa kúni Ndioxi, ta kuenta koo ndo täxi ndo kuni naꞌa ya íkan ndo, ta chinuu vaꞌa na tuꞌun ndo nuu inka na xaꞌa ya íkan ndo, chi tá íkan ndo saa ta köo ka ya vaꞌa niꞌi ndo nuu Ndioxi. 2Tá ndá ndóꞌo̱ síniꞌi xuꞌun nuu na ndaꞌvi, ta ndïtuꞌun ndo xiꞌin ndiꞌi naꞌa xaꞌa ya íkan ndo, ya chinuu vaꞌa na tuꞌun ndo, saa chi saa íkan naꞌa, na uvi ini. Ndítuꞌun na xiꞌin ndiꞌi na ndóꞌni veꞌe ñuꞌu sinagoga, saa ndítuꞌun na xiꞌin na xíka kuaꞌan ichí, xaꞌa ya kúni na kindoo vaꞌa na nuu naꞌa. Xaꞌa ya íkan na saa, ta köo ka ya vaꞌa niꞌi na nuu Ndioxi. 3Ta saa ndóꞌo̱, tá síniꞌi ndo xuꞌun nuu na ndaꞌvi, ta täxi ndo kundaa ini ndaꞌa kuáꞌá ndo xaꞌa ya íkan ndaꞌa itin ndo. Ndïtuꞌun ndo xiꞌin na taꞌan ndo, ni vaꞌa ni ítaꞌan ndo xiꞌin na, ta ndïtuꞌun ndo xiꞌin na. 4Tá táxi ndo xuꞌun ndaꞌa na ndaꞌvi, ta taxi sěꞌe ndo ya. Ta saa Iva yo Ndioxi, ra xíto ya íkan sěꞌe ndo, taxi ra ya vaꞌa ndaꞌa ndo.
Káꞌan Jesús ndá kuꞌva kaꞌan yo xiꞌin Ndioxi
(Lc. 11:2-4)
5Saa káꞌan ka Jesús xiꞌin na, káchi ra saa:
―Tá káꞌan ndo xiꞌin Ndioxi, ta ïkan ndo tá íkan naꞌa na uvi ini. Saa chi na ikán ta kútoo na ndikundita na ini veꞌe ñuꞌu sinagoga án tutun calle, kútoo na kaꞌan kóꞌó na xiꞌin Ndioxi ya ná kuni naꞌa káꞌan na xiꞌin ra. Ta ndixa káꞌan i xiꞌin ndo köo ka ya vaꞌa niꞌi na. 6Sundi ndóꞌo̱, tá kúni ndo kaꞌan ndo xiꞌin Ndioxi, ta vaꞌa kiꞌvi ndo ini veꞌe ndo, saa ndikasi ndo yeꞌe, ta saa kaꞌan ndo xiꞌin ra. Ta Iva yo Ndioxi xíto ra ya káꞌan sěꞌe ndo xiꞌin ra, saa taxi ra ya vaꞌa ndaꞌa ndo nuu ndiꞌi naꞌa.
7’Tá káꞌan ndo xiꞌin Ndioxi, ta ndïko koo ndo kaꞌan ndo suvi iin saa nuu tuꞌun, chi saa íkan naꞌa, na köo ndíkun Ndioxi, ndíkani ini na kuni soꞌo Ndioxi ya káꞌan na xiꞌin ra kuaꞌa ni nuu tuꞌun. 8Ïkan ndo tá íkan na ikán, saa chi Iva yo Ndioxi ta xa xíni ra unkua xíniñuꞌu ndo, ni täꞌan ka kaꞌan ndo xiꞌin ra, ta xa xíni va ra unkua xíniñuꞌu ndo. 9Ta vaꞌa, tá káꞌan ndo xiꞌin ra, ta soꞌva kaꞌan ndo xiꞌin ra:
“Tata Iva yo Ndioxi, ra íyo nuu ndivi,
ná xaa toꞌo ni naꞌa kivi un.
10Ta ná kixiun kaꞌnda chiñu un ñuu ivi yóꞌó.
Tá kuꞌva xáꞌnda chiñu un nuu ndivi saa ná koo ya ikan na ñuu ivi yóꞌó.
11Ta taxi un ñaꞌa ya xíniñuꞌu nde kuxi nde kivi vitin.
12Xaa kaꞌnu ini un xaꞌa kuachi nde,
saa chi saa tu ndeꞌe va xáa kaꞌnu ini nde xaꞌa kuachi na íkan ya väꞌa xiꞌin nde.
13Täxi un ndikava nde ndaꞌa ya väꞌa, chindee un ndeꞌe nuu ya väꞌa.
Chi yóꞌo̱ ku ra xáꞌnda chiñu, yóꞌo̱ ku ra kúu mií ndee ta ndiꞌi naꞌa xáa kaꞌnu yóꞌo̱ ndiꞌi saa kivi ya vaxi. Saa ná koo ya”.
Soꞌva kachi ndo xiꞌin Ndioxi ―káchi Jesús xiꞌin na.
14Saa káꞌan ka ra xiꞌin na, káchi ra saa:
―Saa chi tá xáa kaꞌnu ini ndo xaꞌa kuachi ya íkan inka na xiꞌin ndo. Ta saa Iva yo Ndioxi ra íyo nuu ndivi xáa kaꞌnu ini ra xaꞌa kuachi ndo. 15Sundi tá köo xíin ndo xaa kaꞌnu ini ndo xaꞌa naꞌa, ta ni Iva yo Ndioxi xäa kaꞌnu ini ra xaꞌa kuachi ndo.
Ndisaa Ndioxi ná kuni ya xíxi suꞌun yo
16’Tá xíxi suꞌun ndo, ta sïndikava ndo ini ndo, tá kuꞌva íkan naꞌa, na uvi ini. Saa chi saa íkan na ikán, síndikava na ini na ya kúni na ná kuni naꞌa ya xíxi suꞌun na. Xaꞌa ya íkan na saa ta xa ndi̱niꞌi na ya vaꞌa nuu naꞌa, ta köo ka ya vaꞌa niꞌi na nuu Ndioxi. 17Sundi ndóꞌo̱, tá xíxi suꞌun ndo ta ndikata ndo nuu ndo, saa chuꞌun ndo xiní ndo. 18Täxi ndo kundaa ini naꞌa ya xíxi suꞌun ndo, ndisaa Iva yo ná kundaa ini xíxi suꞌun ndo, saa niꞌi ni ndo ya vaꞌa nuu ra, saa chi ndisaa mií ra xíto ya íkan ndo.
Chivaꞌa ndo ya kuika nuu ndivi
(Lc. 12:33-34)
19Saa ndi̱kaꞌan tuku Jesús, káchi ra saa:
―Küni ndo koo kuaꞌa ni ya kuika ndo ñuu ivi yóꞌó, chi ìyo kiꞌvi kiti tikixin kaxi ndiꞌi ri ya án kuxin ya ta ndiꞌi xaꞌa ya. Ni na kuiꞌna ta ìyo ni kiꞌvi na sikuiꞌna na ya. 20Vaꞌa ka xaa súvi ndo ya kúni Ndioxi, saa ku nuu koo kuaꞌa ni ya kuika ndo nuu ndivi, nuu köo tikixin íyo, ni küxin ya, ni na kuiꞌna ta köo na kuakiꞌvi sikuiꞌna na ya. 21Saa chi nuu íyo ya kuika kúu mií ndo, ta ikán koo ya vaꞌa ndo ―káchi Jesús.
Tá tu vaꞌa íyo nduchi nuu yo, ta saa vaꞌa íyo ndiꞌi ini yo
(Lc. 11:34-36)
22Saa ndi̱kaꞌan tuku Jesús xiꞌin na, káchi ra saa:
―Nduchi nuu yo ta nda tá káa ñu̱ꞌu̱ ya ndítuun naꞌa, saa íyo ya. Tá tu vaꞌa nduchi nuu ndo, ta saa vaꞌa ndiꞌi ini ndo, yéꞌe ndiꞌi ini ndo. 23Tá tu väꞌa íyo nduchi nuu ndo, ta ni nima ndo ta väꞌa íyo ya. Tá tu ndíkani ini ndo xíka ndo nuu ñu̱ꞌu̱ yéꞌe, ta süvi ya ndaa ku ya xíka ndo nuu yéꞌe̱, ¡tá íin naꞌa, na xíka nuu naá va, saa íin ndo!
Tá xáꞌnda chiñu Ndioxi nuu yo ta küꞌvi kaꞌnda chiñu ya kuika nuu yo
(Lc. 16:13)
24Saa ndi̱kaꞌan tuku Jesús, káchi ra saa:
―Nda iin naꞌa ta küvi xaa chiñu na nuu uvi xitoꞌo na. Tá íyo uvi xitoꞌo na, ta kundasi nuu na kuni na iin ra ta inka ra ta vaꞌa ni kuni na xiꞌin ra. Án iin ra koto vaꞌa ra nuu ta inka ra köto vaꞌa ra nuu. Saa ndóꞌo̱, tá táxi ndo xáꞌnda chiñu Ndioxi nuu ndo, ta küvi taxi ndo kaꞌnda chiñu ya kuika nuu ndo. Ta saa tu tá táxi ndo xáꞌnda chiñu ya kuika nuu ndo, ta küvi taxi ndo kaꞌnda chiñu Ndioxi nuu ndo ―káchi Jesús.
Köo ndáa yaꞌvi ya kundiꞌi ni ini yo
(Lc. 12:22-31)
25Saa ndi̱kaꞌan tuku Jesús, káchi ra saa:
―Káꞌan i xiꞌin ndo, kündiꞌi ni ini ndo xaꞌa ñaꞌa kutaku ndo. Ni xaꞌa ya kuxi ndo án ya koꞌo ndo, ni toto kundixi ndo kündiꞌi ini ndo xaꞌa. Saa chi ya vaꞌa yo ku ya ndáa yaꞌvi ni ka nuu ñaꞌa xíxi yo. Ta ni toto ndíxi yo ta köo ndáa yaꞌvi ni ya nuu ikin kuñu yo. 26Koto ndo ndá kuꞌva táku kiti sàà, ni köo chíꞌi ri, ni köo síkee ri, ta ni köo chívaꞌa ri ñaꞌa yaka ri. Ta saa ni xíxi ri, saa chi mií Iva yo Ndioxi ra íyo nuu ndivi ku ra táxi xíxi ri. Ta ndisaa ka vi ndóꞌo̱, ndáa yaꞌvi ni ka ndóꞌo̱ nuu Ndioxi, süvi ka vi kiti sàà. 27Ta ndóꞌo̱, süvi xiꞌin ya ndíꞌi ni ini ndo ku ya kuchiñu ndo sikuaꞌnu sukun loꞌo ndo mií ndo, saa chi iindaa Ndioxi kuu ra xáꞌnda chiñu ndá kuꞌva sukun koo ndo.
28’¿Ndachu ndíꞌi ni ini ndo xaꞌa toto kundixi ndo? Koto ndo ndá kuꞌva xáꞌnu ita iku, köo xáa chiñu ya síkuaꞌa ya toto ya. 29Ta saa ni yeꞌe káꞌan i xiꞌin ndo. Ni ra rey Salomón ta ni vaꞌa ni xi̱ndixi ra, kuika ni ndi̱xiyo ra, ta köo ndi̱xindixi luvi ni ra tá kuꞌva íyo ita. 30Ni loꞌo ni kivi táku ita vali, chi iin kivi xáa ya, ta inka kivi ndáꞌva ndiꞌi ya. Saa táan na ya ini xitun xíxi ya, ta Ndioxi ndáa ra ya ta luvi ni síkundixi ra ya. Ta saa ndáa ra ndóꞌo̱ chi ndáa yaꞌvi ni ka ndóꞌo̱ nuu ita ikán. ¿Ta ndachu loꞌo ni kándixa ndo Ndioxi ya kundaa ra ndóꞌo̱? 31Kündiꞌi ka ini ndo kaꞌan ndo, mií kee ñaꞌa kuxi yo, ta mií kee ñaꞌa koꞌo yo, ta mií kee toto kundixi yo, kachi ndo. 32Naꞌa, na köo xíni Ndioxi ku na ndíꞌi ni ini xaꞌa taꞌan ñaꞌa yóꞌó. Ta ndóꞌo̱, ta kündiꞌi ini ndo xaꞌa ya yóꞌó. Saa chi Iva ndo ra íyo nuu ndivi ta xa xíni ra unkua xíniñuꞌu ndo. 33Ndinuꞌu ni ini ndo kundikun ndo ichí nuu xáꞌnda chiñu Ndioxi, saa íkan ndo ya vaꞌa nuu ra. Ta ndiꞌi ka ñaꞌa ya xíniñuꞌu ndo ta mií ra taxi ndiꞌi ya ndaꞌa ndo. 34Yakan kündiꞌi ni ini ndo xaꞌa ñaꞌa ya kuniñuꞌu ndo kivi vaxi. Saa chi kivi vaxi ta xa kúu mií ya tindoꞌo va. Chi iin iin kivi ta xa ndíso mií va ya tindoꞌo.
Currently Selected:
San Mateo 6: xta
Tõsta esile
Share
Copy
Want to have your highlights saved across all your devices? Sign up or sign in
Active: ©Wycliffe Bible Translators, Inc. All rights reserved.