Uruti 4
4
Boonsi wɔ Uruti kila bi ki
1Boonsi i jɔrɔkɔ, ntiŋ i ta sɔɔ bwɔtɔnŋ ki ra.#4.1 Boonsi i jɔrɔkɔ, ntiŋ i ta sɔɔ bwɔtɔnŋ ki ra. Kí wuru arɔɔ wulu kiri ɲaanpo-a niŋ mani nu. Uruti kila ki myɛ wuru koŋ wɔ̀ tɛ, ŋì i fwuu ntiŋ sun, Boonsi i na niŋ fwuudera ja. Ntiŋ i niŋ dɔri tu : « Miŋ katiŋ, na sunu sɔɔ kwumaŋ. » Koŋ ki i na sɔɔ. 2Boonsi i kili ki ru cɛɛnni byinŋ dɔri bo arì sun, nini i na sɔɔ kí fan. Nini sɔɔ-ɔ waarinŋ wɔ̀ ru, 3ntiŋ i ǹʼbi Elimelɛki koŋ ki tɛ nini bataa ɲaanna tu : « Nawomi wɔ̀ po-i Mowabu kɛniŋ ki ru, nmari i na, nmari i yibɛɛ tindaŋ Elimelɛki wɔ pwɔkulinŋ ki ju-a. 4Míŋ wuru ǹʼtɛ, ŋí i miŋ tɔɔnnakwun niŋ wu, niŋ fa ŋí i ǹʼbi tu miŋ ǹʼŋunsan cɛɛnni kiri fa koŋ pyɛ kiri bataa ɲaanna kwumaŋ. A nʼji-a ji kani ki tɛ, ǹʼŋunsan, a nʼdumiŋ ji-a ji ǹʼtɛ kì, ǹʼbi ńʼtɛ, míŋ a ǹʼŋunsan sabu, a miŋ po san nmaŋ, ǹʼŋunsan ki tɔnŋ i tu-a míŋ na. »
Kanishitɔnŋ ki tu : « Míŋ a pwɔkulinŋ ki ŋunsan. »
5Niŋ ɲaan ki tɛ, Boonsi tu : « A miŋ pwɔkulinŋ ki ŋunsan jibi wɔ̀ Nawomi gbɛ, Uruti wɔ̀ po-i Mowabu kɛniŋ ki ru, ŋi i niŋ kila nʼwɔ mari mìŋ shikaŋ, nwɔma kani ki fa po san koŋ beenimaan ki wɔ kaniŋ ki sun kì. »
6Kanishitɔnŋ ki i ǹʼbi Boonsi tɛ : « A niŋ ji ǹʼnu, míŋ a so kani ki shi-i kì, sabu míŋ i kɛni-na, míŋ fa na ńʼyɛri ki ŋununu shii mwɔ kì. Kani ki shi mɔ́ɔ́n shi ru, ŋì i bili ǹʼsun, mínki yɛrima ki tu míŋ a so ǹʼshi-i kì. »
7 Isirayɛlitɔnŋ kiri gbɛ fɔlɔfɔlɔ, a kí ji wuru ǹʼtɛ, arì i finŋ bɛɛ ŋunsan walima arì i finŋ bɛɛ rucini, koŋ tenŋ ki wuru a kanŋ na kari ki san wɔri-ra a kaashi ki tɛ. Niŋ mamaan ki wuru ǹʼji-a, tu konaŋ kiri fu niŋ bi ki sun.
8Niŋ na, ŋì i kɛɲɛ niŋ ladaŋ ki wu, kanishitɔnŋ ki ǹʼbi-i Boonsi tɛ waarinŋ wɔ̀ ru tu : « Miŋ kani ki shi ŋì i ji nʼwɔ », ntiŋ i a kanŋ na kari ki san wɔri Boonsi tɛ. 9Niŋ mamaan ki ra, Boonsi i ǹʼbi cɛɛnni kiri tɛ, niŋ fa konaŋ ki bataa tɛ tu : « Jiŋ, ábɛɛ bataa i míŋ shɛɛri ri i, tu finŋ woo finŋ wuru Elimelɛki fa a danshuru Kilijɔn niŋ fa Malɔn wɔ, tu míŋ nini bataa sa. 10Tu ŋí i ji-a Uruti, Malɔn wɔ mari ki kila, nwɔma ŋí i kɔɔtɛ tu koŋ beenimaan ki wɔ kaniŋ ki ra a tindaŋ kiri faninmwuŋ, niŋ fa sɔɔta ki ru. Ábɛɛ ji-i niŋ bi kiri bataa shɛɛri kiri i jiŋ sɛbɛ. »
11Cɛɛnni kiri fa koŋ wɔ̀ri wuru nmaŋ, nini bataa i ǹʼbi : « Aawe, yibɛɛ i yìrì shɛɛri ri i. Mari wɔ̀ a de mɔɔn kaniŋ ki sun, Ŋuntiŋ Kirinŋ baraka mwɔɔnna de nmari ru. Ŋì i nmari ji miŋ tu Arashɛɛli niŋ fa Leya, Isirayɛli konanbi ki bataa po-i nini wɔ̀ri ru. Ŋì i tumaŋ sinaŋ wɔri nʼtɛ Efarata sɔɔta ki ru, ŋì i tɔ sinaŋ wɔri nʼtɛ Bɛtilɛhɛmu ciiru! 12Ŋì i nupo mwɔɔnna wɔri nʼtɛ, ŋì i po ka mari bulaaŋ ka ru. Nʼwɔ kaniŋ ki ji Tamaari fa Yuda danshuru Pɛrɛsi wɔ ki sali! »
13Boonsi i Uruti shi awɔ mari i, Ŋuntiŋ Kirinŋ i baraka de nmari ru. Nmari i ciishi, nmari i danshuru ji. 14Bɛtilɛhɛmu mari kiri i ǹʼbi Nawomi tɛ :
« Coolinŋ i Ŋuntiŋ Kirinŋ wɔ.
Ŋì daŋ wɔri-i miŋ tɛ, nwɔ̀ ra a ɲakili tu miŋ na.
Kirinŋ ǹʼji tɔ sinantiŋ i Isirayɛli kɛniŋ ki ru.
15Ka daŋ ka ra na miŋ tɔnfili,
ŋì i nʼɲaannaju kini nʼbwuubikɔni ki ru.
Miŋ samari ki pari-i nʼgbɛ danshuru jɔnpɔni wu,
sabu nmari miŋ bidi-i a tɛ, nmari i danshuru ji wɔri nʼtɛ. »
16Nawomi i daŋ ki pa bili a kuŋ nu, nmari i ji daŋ ki padaŋ i. Nmari i ǹʼnakili. 17Nmari tonfan mari kiri i daŋ ki sunjo-ri tu : « Nawomi danshuru kila-i! » Kí i daŋ ki tɔ ki ye tu : Yobɛdi. Niŋ Yobɛdi ki i na Yesayi ji, Yesayi wɔ̀ i masa Dawuda tiŋ ki i.
18Dawuda tiŋ cɛɛnni kiri tɔ kiri i kari i, ŋì i shi Pɛrɛsi sun :
Pɛrɛsi Hɛsirɔn ji-i
19Hɛsirɔn i Aramu ji,
Aramu i Aminadabu ji.
20Aminadabu i Naasɔn ji,
Naasɔn i Salima ji
21Salima i Boonsi ji,
Boonsi i Yobɛdi ji.
22Yobɛdi i Yesayi ji,
Yesayi i Dawuda ji.
Currently Selected:
Uruti 4: JOB
Tõsta esile
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.