Matyu 28
28
Jisasa Malunya Sakateamo Doko
1 #
Make 16:1-8; Luku 24:1-12; Jone 20:1-10 Sambata gii doko pateamopa, yuu yongalanya pia. Dokopa Maria Magadala tange dokopa, Maria mende dokopa, dolapo malu doko kanja peambi. 2Gii dokopa titiwali andake mende minatala, Kamongonya enjele mende kaiti-kisa katao isa ipupala, kana doko kapilya mina-mina pyoo nyoo kapya latala, dokonya ketae petea. 3Baanya lenge-lyaapi doko yuu-wapaka pingili pia. Baanya yonge pee doko etete kyeo lao polepole pia. 4Dopa piamo kandatala, amii malu isoo kateami dupa walu lao paka kaeyami dokome, lombapae sepala kumapae joo siami. 5Dokopa enjele dokome enda dolapo lamaiyoo, “Paka nakaeyalapape. Jisasa pyao yukuiyamino doko nyakambame kutilyambinona lao nambame masilyo. 6Baa sakatato leamoli pyoo sakatatalamo. Kamongo doko seteamino panda dakenya nasilyamona, kanja ipupa. 7Kandatala baanya disaipolo dupa kalyamino dokonya nyakamba yapa pupala, baa malunya sakatatala Galali wambao pelyamona, dokonya baa kanjaminona lamaiyepape. Nambame pii langya epo doko langitilyona” lea. 8Dopa leamopa enda dolapo paka kaeyambiaka doko, eteke kaeyapae andake mendeme tumbiamopa, malu doko yapa yakinatala, alo pyao disaipolo dupa lamaiya peambi. 9#Make 16:9-11; Jone 20:11-18Disaipolo dupa lamaiya peambinopa, Jisasame kaitinisa kandanyetala lao pituu, “Wanalapo, yongama etete!” lea. Dokopa enda dolapo pao Jisasanya mokonya kopetala mambo piambi. 10Dopa piambinopa Jisasame enda dolapo lamaiyoo, “Nyakamba paka nakaenya, nambanya kaiminingi dupa kalyamino dokonya pupala, dupa Galali pena lapape. Dupame dokonya namba kanjaminona” lea.
Sambo Lena Lao Pii Wasoo Maiyamino Doko
11Enda dolapo peambinopa, malu isoo kateami amii dupanya mendapu siti dokonya pupala, pia dupa pitaka prisa mupa dupa lamaiyami. 12Dokopa prisa mupapi, Juumanya isingi akalipi, dupame pii lao kambutala, amii dupa muni longo mendapu maiyami. 13Maitala pii dapa lena lamaiyami: “Nyakama luu palipamanopa, Jisasanya disaipolo dupa kuka ipupala, baanya yonge doko waa katao nyoo pamini-lamona lapape. 14Gapena dokome pii dake setamo doko, baa auu kaena lao naimame baa pii lamaitamanopa, nyakama-kisa pundu mende naipapomona” leami. 15Dopa lateaminopa, amii dupame muni dutupa nyepala, lena leamiliaka pyoo lao taeyami. Pii doko lao Juu dupa-kisa taeyami doko, indupapi taeyapaeyaka silyamo.
Wai Pii Epe Doko Lao Taeyalapape Leamo Doko
16 #
Make 16:14-18; Luku 24:36-49; Jone 20:19-23 #
Matyu 26:32; Make 14:28 Disaipolo 11 dutupa Galali pupala, Jisasame manda mendenya pena lea dokonya peami. 17Dokonya pao Jisasa kandatala, baa mambo piami. Dopaka doko, mendapu mona lapo paleami. 18Dokopa Jisasa baa dokaita kateami dokonya pupala lamaiyoo, “Yuupi, kaitipi dupa pitaka isepe lao Goteme kyeto doko namba ditia. 19#Ap 1:8Dopana, nyakama pupala, akali tata dupa pitaka nambanya disaipolo jina lao pii lamaiyepape. Lamaitala, Takange dokopi, Ikiningi dokopi, Oli Spirita dokopi, dutupanya kenge dokonya kaimbu pyatakamai, 20nambame pyepape lao langio dupa pitaka wata-minina lao mana lamaiyepape. Salapape! Namba nyakama-pipaka katao, yuu etata gii doko kandao nyetamana” lea.
Doko kiningi.
Currently Selected:
Matyu 28: Enga
Tõsta esile
Share
Kopeeri
Want to have your highlights saved across all your devices? Sign up or sign in
© 2023 Wycliffe Bible Translators, Inc. All rights reserved.