Svun Lucas 22
22
Ja' li' yaloj ti ispas trate ti Judase ti chac' entrucal ti Jesuse
(Mt 26.1-5,14-16; Mc 14.1-2,10-11; Jn 11.45-53)
1Po'ot xa'ox sta sc'ac'alil li q'uin ti c'alal chich' ve'el pan ti muc' bu yich'oj svuquesobil xch'ute, ja' li q'uin coltael sbie. 2Ti totil paleetique xchi'uc ti much'utic ta xchanubtasvanic ta smantaltac Rioxe, isnopilanic c'u x'elan tstaic ta milel ti Jesuse, yu'un xi'emic o li crixchanoetique.
3Ti Satanase i'och ta yo'on ti Judase, ti Judase ja' jun ta slajchava'al yajchanc'optac ti Jesuse, ja ti Iscariote sbi noxtoque. 4Ba sc'opon ti totil paleetique xchi'uc ti jayvo' totil yu'unic tey ta temploe, ja' ba yalbe ti c'u x'elan snopoj chac' entrucal ti Jesuse. 5Ti c'alal iya'iique, xmuyubajic xa tajmec, iyalbeic ti ta xac'beic taq'uine. 6Ti Judase ixch'am li taq'uine, isa' ti c'uxi xu' chac' entrucal ta mucul ti Jesuse.
Ja' li' yaloj ti c'u x'elan isliques Santa Cena ti Cajvaltic Jesuse
(Mt 26.17-29; Mc 14.12-25; Jn 13.21-30; 1~Co 11.23-26)
7Ista sc'ac'alil c'alal tsve'ic pan ti muc bu yich'oj svuquesobil xch'ute, ja' o ti c'alal tsmilic li ch'iom chij ta scuenta li sq'uinal ti c'alal iloq'uic ta mozoile. 8Ti Jesuse istac ech'el li Pedroe xchi'uc li Juane, ja' yech iyalbe chac li'i:
―Batanic, ba meltsanic li jve'eltic ta scuenta li q'uine ―x'utatic.
9Isjac'beic ti Jesuse:
—¿Bu chac'an chba jmeltsanticotic un? ―Xutic.
10Itac'av ti Jesuse:
—Ti c'alal xa'ochic ta yutil jteclume, tey chataic ta be jun vinic scuchoj jp'ej q'uib ya'al. Ja' nap'letaic ech'el, ti bu nail ch-oche, tey xa'ochic uc, 11ja' yech xc'ot avalbeic li yajval na chac li'i: “Li Jchanubtasvaneje ta la sjac': ¿Bu jc'olucal chavac'boticotic lanae ti ta jti'ticotic o li chij ta q'uin jchi'uc li cajchanc'optaque?” Xavutic c'otel. 12Tey chac' avilic jc'ol muc'ta cuarto ta xcha'cojol sjol sna, tey xa ac'bil scotol li c'usitic ta xtune. Ja' tey xameltsanic li jve'eltique ―x'utatic ech'el yu'un ti Jesuse.
13Ibat xcha'va'alic, ja' yech istaic chac c'u cha'al i'albatic ech'el yu'un ti Jesuse, ja' tey ismeltsanic li ch'iom chij ta scuenta li q'uine.
14Ti c'alal ista yora ve'ele, ti Jesuse xchi'uc ti yajchanc'optaque ixchol sbaic ta mexa. 15Ti Jesuse ja' yech iyal chac li'i:
―¡Ja' ono'ox yech oy ta co'ol ti co'on chive'otic jcotoltic ta sti'el li chij scuenta q'uin lavi mu to chlic li jvocole! 16Chacalbe ava'iic ti mu xa bu ta jti' li chije, ja' to ti c'alal sta sc'ac'alil ti c'alal teyotic xa yo' bu tspas mantal ti Rioxe ―x'utatic yu'un ti Jesuse.
17Ti Jesuse istam jun p'is ya'lel uva, iyalbe coliyal ti Rioxe, ti c'alal ilaje, ja' yech iyal chac li'i:
―Ilo, uch'an acotolic; 18chacalbe ava'iic ti mu xa bu chcuch' li ya'lel uvae, ja'to mi tal cuentainvanuc ti Rioxe ―x'utatic yu'un ti Jesuse.
19Istam noxtoc jp'ej pan ti Jesuse, iyalbe coliyal ti Rioxe, ti c'alal ilaje, ixut li pane, iyac'be li yajchanc'optaque ja' yech iyal chac li'i:
―Li'i ja' jbec'tal jtacupal, yu'un chcac' jba ta milel ta scoj amulic. Ja' me yech xapasulanic o yo' xana'icon oe ―x'utatic.
20C'alal laj ve'icuque, istam noxtoc li p'isob ya'lel uvae, ja' yech iyal chac li'i:
―Li p'is li'i, ja ta scuenta ti chc'ot ta pasel li c'usi ach' chapanbile, ja' ti chmal jch'ich'el ta acojique. 21Pero ti much'u chiyac' entrucale li' scajanoj sc'ob ta ba mexa uque. 22Vo'on ti Xch'amal crixchano li c'ote, ta ono'ox xquich' pasbel chac c'u cha'al albil jc'oplale, pero ¡toj abol sba li much'u chiyac' entrucale! ―X'utatic yu'un ti Jesuse.
23Lic sjac'ulanbe sbaic much'u junucal ti chac' entrucal ti Jesuse.
Ja' li' yaloj ti ja' chcom ta jpasmantal ti much'u mu sna' stoy sbae
(Mt 20.25-28; Mc 10.42-45)
24Li yajchanc'optaque ja'o lic yut sbaic ta scuenta ti much'u junucal ti más ichbil ta muc' chc'ot yu'unique. 25Ti Jesuse ja' yech lic yal chac li'i: «Li jyu'eletic ta yantic balamile, mantal no'ox tspasic, ta xilbajin li xchi'iltac ta abtele, ti much'utic tsots yabtelique, ja' tsc'anic ti albil sc'oplalic ti toj lec yo'onique. 26Yan li vo'oxuque ma'uc yech tsc'an chapasic. Ti much'u tsc'an ti ich'bil ta muc' ta xc'ote, ja' tsc'an ti ja' yech chac c'u cha'al li much'u más to creme, ti much'u tspas mantale, ja' tsc'an ti ja yech chac c'ucha'al ti much'u ta xtune. 27¿Much'u ti más tsots sc'oplale, mi ja' ti much'u chotol tsmala sve'el ta mexae o mi ja' ti much'u ta xac' tal ve'lile? ¿Mi mu ja'uc van ti much'u chotol no'ox ta mexa ta smala sve'ele? Yan li vo'one ma'uc yech ta jpas, tal tunicon avu'unic chac c'u cha'al li much'u chich' tal li ve'lile.
28»Li vo'oxuque jun avo'onic achi'inicon ti c'alal iquich'ulan crontainele. 29Yech'o un chacac'be apasic mantal chac c'u cha'al chiyac'be jpas mantal ti Jtot uque, 30Li vo'oxuque chave'ic chavuch'ic vo' jchi'uc ta mexa yo bu ta jpas mantale, cha chotiic ta muc'ta chotlebal yu'un vo'oxuc cha chapanbeic sc'oplal li lajchachop j'israeletique.» ―X'utatic yu'un ti Jesuse.
Ja' li' yaloj ti “chaval ti mu xavojtiquinone”, x'utat yu'un Jesús ti Pedroe
(Mt 26.31-35; Mc 14.27-31; Jn 13.36-38)
31Ti Cajvaltique ja' yech iyal noxtoc chac li'i:
—Simón, Simón chcal ava'i, ti Satanase ay xa sc'anbe permiso ti Rioxe ti ac'u avich'ic lilinel chac c'u cha'al chic' jic'ael li trigoe; 32pero li vo'one ijc'anbe xa vocol Riox ti ac'u scoltaote, yo' mu xlaj o xch'unojel avo'one. Ti c'alal xa sutal ta jtojole, patbo me yo'on lachi'iltaque yo' mu xicta o sbaique ―x'utat ti Pedroe.
33Ti Simone ja' yech iyal chac li'i:
—Cajval, jnopoj xa lec ti xu' mi co'ol li ochotic ta chuquele, mi co'ol li chamotique ―xi ti Pedroe.
34Itac'av ti Jesuse:
—Pedro, chacalbe ava'i, lavie ti c'alal mu to'ox ch-oc' li queleme, ox'ech'el xa'ox aval ti mu xavojtiquinone ―x'utat yu'un ti Jesuse.
Ja' li' yaloj ti i'albatic onox ti chich'ic crontainel ti lajchavo'e
35Ti Jesuse isjac'be li yajchanc'optaque:
—C'alal lajtaquic ech'ele, muc xavich'ic ech'el ataq'uinic, mi ja'uc ave'elic, mi ja'uc axonobic, ¿mi oy c'usi palta ava'iic? ―X'utatic.
Itac'av scotolic:
―Ch'abal ―xiic.
36Ti Jesuse ja yech iyal chac li'i:
—Lavi une, ti much'u oy yav staq'uine, ac'u yich' ech'el, ti much'u oy snuti'e, ac'u yich' ech'el noxtoc; ti much'u ch'abal yespadae, ac'u xchon jlicuc spimil c'u', ac'u sman o junuc. 37Ti x'elan chacalbeique, yu'un chc'ot onox ti c'u x'elan ts'ibabil jc'oplal ta sc'op Rioxe: “Ta sp'ise ta jmulavil.” Xi onox ts'ibabil. Yu'un scotol ti c'u ono'ox x'elan ts'ibabil jc'oplale ta xc'ot scotol ―x'utatic yu'un ti Jesuse.
38Ja' yech iyalic chac li'i:
—Cajval, oy li' chib espadae ―xutic.
Itac'av ti Jesuse:
―Ta'luc o xa li c'usi chcaltique ―x'utatic.
Ja' li' yaloj ti isc'opon Riox ta Getsemaní ti Jesuse
(Mt 26.36-46; Mc 14.32-42)
39Ts'acal to ti Jesuse iloc' ech'el, ibat ta vits Olivotic yu'un tey onox chc'otilan; li yajchanc'optaque ixchi'inic ech'el. 40Ti c'alal ic'otique ja' yech i'albatic chac li'i:
—C'oponic Riox yo' mu xa ch'unic o sujel ta mulile ―x'utatic.
41Ti Jesuse ijelav to ech'el jts'uj, ja' yech snamal ibat chac c'u cha'al snamal xitenobajotique, isquejan sba, isc'opon Riox. 42Ja' yech iyal chac li'i: «Tot, ti xu'uc to ti mu xquich' jvocole; lec, pero ma'uc me xc'ot ti c'usi tsc'an co'on jtuque, ja' ac'u jpas li c'usi chac'an li vo'ote.» ―Xi.
[ 43Ja' o ital jun ángel ta vinajel, tal stsatsubtasbel ti spat xocone. 44Ti c'alal mu xa x'ech' iya'i li svocole, más to isc'opon o ti Rioxe, ichiq'uinaj, ti xchiq'ue co'ol xchi'uc ch'ich', sts'ujts'on xa yalel ta balamil.]
45Ti c'alal laj sc'opon ti Rioxe, ibat yo' bu li yajchanc'optaque, vayem scotolic c'ot sta yu'un chat yo'onic tajmec.
46Ja' yech i'albatic chac li'i:
―¿C'u yu'un ti chavayique? Licanic, c'oponic Riox yo' mu xa ch'unic o sujel ta mulile―x'utatic yu'un ti Jesuse.
Ja' li' yaloj ti itsaque ti Jesuse
(Mt 26.47-56; Mc 14.43-50; Jn 18.2-11)
47Ti c'alal xyaquet chlo'ilaj ti Jesuse, ja'o tey ic'ot epal crixchanoetic. Ti Judase, ti ja' slajchava'al o ta yajchanc'op ti Jesuse ja babe ech'el. Inopoj ech'el yo bu ti Jesuse ja' o isbuts'. 48Ti Jesuse ja' yech iyalbe chac li'i:
—Judas, ¿mi ta buts'el chavac'on entrucal ya'el vo'on ti Xch'amal crixchano li c'ote? ―Xut.
49Ti jayvo' tey xchi'uquic ti Jesuse, c'alal iyilic ti c'usitic yolel ch-c'ot ta pasele, isjac'beic:
―Cajval, ¿mi xu' chcac'beticotic espada? ―Xutic.
50Oy jun xchi'ilic ta yajchanc'op ti Jesuse, isloq'ues yespada, istuch'be loq'uel sbats'ichiquin ti smozo más totil palee. 51Ti Jesuse ja' yech iyal chac li'i:
―Mu xavutic, ta'luc xa o, ―x'utat yu'un ti Jesuse.
Ispicbe xchiquin li mozoile, lec xa icom. 52Ti Jesuse isc'opon ti totil paleetique, xchi'uc ti jayvo' totil yu'unic ta temploe, xchi'uc ti moletic ti tey c'ot tsacvanicuque:
―¿C'u yu'un ti ta espada ta te' tal atsaquicon chac c'u cha'al j'eleq'ue? 53Scotol c'ac'al tey jchi'ucoxuc ta muc'ta templo, pero muc' xa tsaquicon. Pero lavie ista xa sc'ac'alil avu'unic, ti ja' xa cha spasic ta manta li yajval ic'al osile ―x'utatic ti jtsacvanejetique.
Ja' li' yaloj ti iyal ti Pedroe ti mu xojtiquin ti Jesuse
(Mt 26.57-58,69-75; Mc 14.53-54,66-72; Jn 18.12-18,25-27)
54Ti c'alal istsaquic ti Jesuse, tey iyiq'uic ech'el ta sna ti más totil palee. Li Pedroe nomnomtic tijil ech'el ta spat ti Jesuse. 55Stsoyojic c'oc ta o'lol ti'na, tey joyol chc'atinic, tey c'ot chotluc li Pedro uque. 56Oy tey jun quiarail iyil ti tey chotol chc'atin uque isq'uelbe lec sat, ja' yech iyal chac li'i:
―Le'e tey to'ox xchi'uc li much'u ay atsaquic tale ―xi.
57Li Pedroe muc' xal ta jamal ja' yech iyal chac li'i:
—Ants li vo'one mu xcojtiquin. —Xi.
58Ta jliquel o i'ojtiquine yu'un otro jun, xi iyale:
―Li vo'ote ja' achi'il li vinic le'e ―x'utat.
Itac'av li Pedroe:
—I'i jchi'iltic, ma'uc vo'on ―xi.
59I'ech' xa'ox nan junuc ora, xi iyal otro jun noxtoque:
―Ta melel ja' xchi'il le'e. Yu'un jgalilea uc ―xi.
60Ti Pedroe ja' yech iyal chac li'i:
―Jchi'iltic mu jna' li c'usi chavale. ―Xi.
Ti c'alal yolel chal yeche, ja'o i'oc' quelem. 61Yech'o un ti Cajvaltique ijoyij, isq'uelbe sat li Pedroe, ja'o iyul ta sjol ti yech onox i'albat yu'un ti Cajvaltique: «Lavie ti c'alal mu to'ox ch-oc' queleme, ox'ech'el xa'ox aval ti mu xavojtiquinone.» —X'utat onox yu'un ti Jesuse. 62Iloc' ech'el li Pedroe, ba yoq'uita sba tajmec.
Ja' li' yaloj ti iyilbajinic ti Jesuse
(Mt 26.67-68; Mc 14.65)
63Ti jayvo' ixchabiic ti Jesuse islabanic, ismajic. 64Ismacbeic sat, ja' yech isjac'beic chac li'i:
―¡Alo ca'tic much'u lasmaj! ―Xutic.
65Islabanic tajmec scotol c'usi iyalbeic.
Ja' li' yaloj ti iyiq'uic ech'el ta stojol jmeltsanejc'opetic ti Jesuse
(Mt 26.59-66; Mc 14.55-64; Jn 18.19-24)
66Ti c'alal isacub osile, istsob sba scotol li moletic yu'un Jurioetique, xchi'uc ti totil paleetique xchi'uc ti much'utic ta xchanubtasvanic ta smantaltac Rioxe, iyiq'uic ech'el yo' bu stsobobbail jmeltsanej c'opetic ti Jesuse. Ja' yech isjac'beic chac li'i:
67―Albon ca'iticotic, ¿mi vo'ot ti Cristoote? —Xutic.
―Vo'on, mi xacutique, mu xa ch'unic. 68Mi oy c'usi chajac'beique, mu xa tac'becon. 69Vo'on ti Xch'amal crixchano li c'ote, ta xa xichoti ta sbats'ic'ob ti Riox scotol xu' yu'une ―x'utatic yu'un ti Jesuse.
70―Ja' o isjac'beic scotolic: ¿Ti xcaltique che'e vo'ot ti xch'amalot Rioxe? ―Xutic.
Itac'av ti Jesuse:
Atuc xa avalic ti vo'one. —Xi.
71Scotolic ja' yech iyalic chac li'i: ¿C'u xa stu cu'untic yan rextico? Ica'itic xa ti iloc' ta ye stuque. ―Xut sbaic.
Currently Selected:
Svun Lucas 22: LeqAC
Tõsta esile
Share
Copy
Want to have your highlights saved across all your devices? Sign up or sign in
© Sociedad Biblica de Mexico AC