Mark 1
1
Sambatiis aa asok kuboñ kite Atambatun
(Májiye 3.1-12; Luk 3.1-18; Saaŋ 1.19-28)
1Iye i Hirim Heetoofe hu heesoke hu mite mu Yesu *Kiris, Añi ite Atambatun híjabina fu. 2Naane *Esayi *ayiŋana ite Atambatun akiñje i bo aane:
«Arijamatan! Íñje Atambatun,
íñje káboñina ayiŋana úuma éegilani toko,
eeja eefarei bítim bu#1.2 Malasi 3.1..
3O aamo fu an u aa ataŋk t'eramba i aŋ'aane:
“Arifare bítim bu bija t'Anahaan u;
árihino búhuhu beejoŋoore#1.3 Esayi 40.3.!”»
4T'iyu, Saaŋ n'abin. *Aŋ'aboste t'eramba i, abe n'aŋ'awaare aane:
—Ariwatanooro kinij koonuun keejakut ku, abe n'árihin ariibostee, áriiwufoor kaanuku ariwayaa, aŋkut áriyemi naane hítiyar hu. Abe Atambatun n'aboŋketuun wuhoofoor wu.
5Bakate ku *Súde kareyi fe, ni bakate ku Serusalem iŋi kaja kaŋaaboo. Iŋi kasok tu buhooŋu bakaaku wuhoofoor wi káhine wu, abe Saaŋ n'aŋ'abosteiin ti kaayelu ku kiŋki kaane *Surdeŋ.
6Saaŋ aŋ'asiimo kaawañ keerokee ni bihan bite éŋgelem. Abe n'aŋ'ayit nibaŋ eewuuj no hikeejio#1.6 A̱juk 2 Bákayi ku 1.8.. Buhoofooro boone, kukus, ni májiŋin. 7Naane iye af'awaare ésuk i:
—Ake aroŋa inde hiñaawiam eeyak bibin, abe ahaŋamhaŋ sembe. Ihaŋahaŋ káteti te o kaanuku íiruŋgunan íijendin sikaku soone. 8Íñje, ibosteuunboste nu móhujo; bare akina, o kabosteuun nu Búwejet Beenabe bu.
Kaboste kite Yesu
(Májiye 3.13-17; Luk 3.21-22)
9Tu kunak kondu, Yesu n'ánuutin ti hike hikinu hite *Gálile, iŋi heenee *Nasaret. Saaŋ *n'abostoo ti kaayelu kite *Surdeŋ. 10Yesu ti kánuutina ku tu móhujo mu, n'ajuk kane bufor bu bífeŋgino, abe Búwejet Beenabe bu nu búwanein naane búnokoorum bite húleebaan bibin te o. 11Kaaji ni kíhaminn t'etiir bufor bu keene:
—Awe a̱amo fu añi úuma i ímaŋie u. T'awe ti hikawam hutoofe fu#1.11 A̱juk yooŋ Élookiin i 2.7; Esayi 42.1..
Setani n'aŋes káhinu Yesu eehoofoor
(Májiye 4.1-11; Luk 4.1-13)
12Afiyeit yooŋ, náami Búwejet Beenabe bu ni bitiŋg Yesu eeja t'eramba i. 13N'ariiko bo kunak bakan bákasuba. Setani n'aŋes káhinio eehoofoor. Yesu ámoomi bo ni bíndakakureŋ bu, abe emalaka i ifi katofotooro.
Eriboora yite Yesu étiyar i
(Májiye 4.12-22; Luk 4.14-15; 5.1-11)
14H'abine hu áami Saaŋ akulee, Yesu n'aja *Gálile. N'awaare bo Hirim Heetoofe hu héenuutina hu t'Atambatun. 15Aŋ'aane:
—Tireeŋa toko, *Jáyi jite Atambatun júlohenno! Ariwatanooro kinij koonuun keejakut ku, abe n'áriyilen ti Hirim Heetoofe hu!
16Áyemia ti bija bu ti katafa kite *han hite Gálile, n'ajuk embaala bákasuba, Simoŋ n'at'o Andere ti káfiiten embaalu. 17Yesu n'aaniin:
—Áririboorin n'íñje, abe n'iŋ'íhinuun áriiyemi embaala kúŋgowulan.
18Toko-toko yooŋ, ni kawasan simbaalu sooniin keeriboor ne o.
19Katofa diŋgilis, n'ajuk Saakiin n'at'o Saaŋ, biñi bite Sebede, boko tu busoona booniin ti kajokoor simbaalu. 20N'ahaŋ aruwiin. Ni kawas faafiin Sebede n'eroka yeene toko tu busoona bu keeriboor ne o.
Ániine u e erab i ee élaaman
(Luk 4.31-37)
21Yesu n'eriboora yeene ni kaja *Káfernawom. *T'erimaas ite Esuwif i, Yesu n'ayooso ti *báalawum booniin. N'áyemi toko ti kaliikeniin mite m'Atambatun. 22Keejame ku ni kajahale kareyi fe. Ábuki aliikenutiin naane *émuse yite Eluwa yite Moyis, bare aŋ'aliikeniin ayan faŋ.
23Ake ániine eebaje erab n'ahaŋ áyoosein toko ti báalawum bondu. N'ataŋk t'etiir aane:
24—Híiña, Yesu ite u *Nasaret, kame baŋka úne? Kame kátowutan uni k'a̱bine fu? Ímoomi awe a̱amo fu aañ: an eenabe u a Atambatun áboñina u!
25Yesu n'akamoor t'erab i abe n'aane yo:
—A̱koowan, abe n'a̱nuut t'ániine ondu!
26Erab i n'éhin ániine u éebit ni sembe, abe n'enuut te o ti kajaŋgu t'etiir. 27Bondu nu bútumb bihaŋ ésuk i kikaw kayak iŋi kaanoor toko:
—Kame bonde buŋ? Áwufoora úne bike b'úmusut kajuku! Aŋ'aŋ'áhamin ayan faŋ ni birab bu, ni bíhin yooŋ naane asoke i!
28Diŋgilis kep, náami huruwu hoone hijamaa tu búsuk bite *Gálile fe.
Yesu n'aritan bakan úkaan kéesomute
(Májiye 8.14-17; Luk 4.38-41)
29Yesuiin ni kánuutin ti *báalawum bu, abe ni kahaŋ kaja t'enuuf ite Simoŋiin n'Andere. Boko kariboore ni Saak, ni Saaŋ. 30Íñaay ite anaare Simoŋ t'ahurusee, ábuki bitiba bu te o. Hi Yesu areeŋe hu kep, ni kasoko iŋ'ite hu anaare u. 31N'atof areeŋ, n'ajoko t'emoŋu, abe n'aritano. Anaare u n'ahaŋ ákoyi, abe n'áyemiiin ti katofotoor.
32H'aamo hu tinendana, taanak tu káalumein#1.32 taanak tu káalumein: *t'erimaas ite Esuwif i, an awarut karoku doon fe. Ifi tija ayak abin áami túlumaa, an áyinooni káhinu burok beetoofo, naane kayitu an éesomute bija ti Yesu., ésuk i ni kabino ni kéesomute ku, bija ki sirab su sujoke ku fe. 33Bakate ti hikinu hu kareyi káyemie fu toko tíyaŋ ti karuŋ ku. 34N'aritan bakan úkaan, bakate wúsomut wánowan. Bakate sirab su yooŋ úkaan, n'anuutaniin so. Abe n'áhin so seekoowan, ábuki súmoomi akina aamo fu aañ#1.34 Yesu ámaŋiit sirab su siseedoo t'ésuk i..
Yesu n'awaare Gálile ereyi fe
(Luk 4.42-44)
35Tifiit, Yesu n'arito nu hurabu hu, abe n'ánuutin. N'aja t'eramba i, éeyemi bo ti kalawu. 36Simoŋ ni bakano ni kajoo hiŋes. 37Hi kajuko hu ni kaano:
—Ésuk i fe bokondii ti hiŋes.
38N'ásafiniin aaniin:
—Útof núuja ti kaaku kikinu keeemo ku nere. Iwarawar yooŋ kawaare bo, ábuki iŋ'ite ho h'ibine fu.
39Iyu a aje fu añaahoor *Gálile ereyi fe, aŋ'awaare ti *ñáalawum ñu, abe n'ákutoor sirab su.
Yesu n'áhin ániine eebaje u yafot i éekoyi
(Májiye 8.1-4; Luk 5.12-16)
40Ake ániine eebaje *yafot n'átofin áŋaabein Yesu. N'asaaho éejiŋgitan hágilao, abe n'áwasiyano aano:
—Af'á̱maŋi, á̱nooniam káhinu íikoyi#1.40 íikoyi: ti *kigerekaay, akiñjeekiñj: «Af'á̱maŋi, á̱yinooniam (káhinu) *iikuur but.» T'eluwa yite Esuwif i, an eebaje kásomut kondu akuurut; awarut kalohu ésuk i..
41Yesu n'ayubiyen ániine u naane. N'araaw emoŋio, eegoro abe n'aane:
—Ímaŋamaŋi fu, á̱koyi!
42Toko-toko, yafot i n'étowuto, ániine u n'ákoyi. 43-44Yesu n'ajab áhamino ásuf, aano:
—A̱jamatan jak! Atum'a̱sok bo an fe, bare a̱ja *t'asaraha u á̱awufooro naane a̱amo i, abe n'á̱hin kaasarah ki *Moyis asoke ku, beekuur ésuk i fe kaanuku á̱koyia#1.43-44 Kóŋkeyin t'Esuwif i, *yafot i ef'éyemi t'an, at'akin t'afeeneŋ n'ésuk i. O kanuutanee tíyaŋ hikinu hu. Áhina ite *wusarah wu taŋ aware fu kajuku te o n'aano ákoyia. Bare bala an ondu ábatikein éeŋaabein ésuk i, o kajabu áhin wusarah weesokee wu *t'Eluwa yite Moyis. A̱juk Esaraha i 14.1-32..
Ahaban, n'aano ayeet.
45Ániine u afina aja, n'aŋ'akam bo t'aje-je fe, Yesu asooñen aŋkut áyini buyooso ti hikinu t'ánuuseit. Bare aŋ'áriikein t'eramba i, ésuk i iŋi kánuutin tánotan keeja keeŋaaboo bo.
Currently Selected:
Mark 1: cwt
Tõsta esile
Share
Kopeeri
Want to have your highlights saved across all your devices? Sign up or sign in
© 1999, Wycliffe Bible Translators, Inc. All rights reserved.