Yuxan 21
21
Iysanıń Galilada jeti shákirtine kóriniwi
1Bunnan soń, Iysa Tiberiya kóliniń jaǵasında shákirtlerine jáne kórindi. Bul bılay boldı: 2Shimon Petr, Egiz dep atalǵan Tomas, Galilanıń Kana qalasınan bolǵan Nataniel, Zebedeydiń ulları hám Iysanıń shákirtlerinen jáne ekewi birge edi. 3Shimon Petr olarǵa:
– Men balıq awlawǵa ketip baratırman, – dedi.
– Bizler de seniń menen birge baramız, – dedi olar.
Olar barıp, qayıqqa mindi. Biraq sol túni hesh nárse tuta almadı.
4Tań atqanda, kóldiń jaǵasında Iysa turǵan edi. Biraq shákirtleri Onıń Iysa ekenin bilmedi.
5Iysa olardan:
– Háy, doslar, balıǵıńız joq pa? – dep soradı.
– Joq, – dep juwap berdi olar.
6– Awıńızdı qayıqtıń oń jaǵına salıńlar, sonda tutasızlar, – dedi Iysa.
Olar aw salıp, kóp balıq tutqanlıqtan, awdı tartıp shıǵara almadı.
7Iysanıń súyikli shákirti Petrge:
– Bul Iyemiz! – dedi.
«Bul Iyemiz» degendi esitkennen, Shimon Petr shapanın túrip kólge sekirdi. 8Al basqa shákirtler balıq tolı awdı súyrep, qayıq penen keldi. Óytkeni olar jaǵadan shama menen eki júz shıǵanaq uzaqlıqta edi. 9Olar jaǵaǵa shıqqanda, ol jerde jaǵılıp atırǵan kómirdi hám qozdıń ústine qoyılǵan balıq penen nandı kórdi.
10Iysa olarǵa:
– Házir tutqan balıqlarıńızdan alıp kelińler, – dedi.
11Shimon Petr qayıqqa minip, balıqqa tolı awdı jaǵaǵa tartıp shıǵardı. Awda bir júz eliw úsh iri balıq bar edi. Balıqlar sonshelli kóp bolsa da, aw jırtılmadı. 12Iysa olarǵa:
– Kelińler, azanǵı awqattı jeńler, – dedi.
Shákirtleriniń hesh qaysısı Onnan: «Sen kimseń?» – dep sorawǵa batına almadı. Sebebi Onıń Iyemiz ekenin biletuǵın edi. 13Iysa jaqınıraq keldi de, nandı alıp, olarǵa berdi. Balıqlar menen de usılay isledi.
14Solay etip, bul Iysanıń ólimnen tirilgeninen soń, shákirtlerine úshinshi márte kóriniwi edi.
Iysanıń Petr menen sóylesiwi
15Azanǵı awqattı jep bolǵannan soń, Iysa Shimon Petrden:
– Yuxan ulı Shimon, Meni olardan da kóbirek súyeseń be? – dep soradı.
– Awa, Iyem. Seni jaqsı kóretuǵınımdı bileseń-ǵo, – dedi Oǵan Petr.
Iysa oǵan:
– Qozılarımdı otlat, – dedi.
16Iysa ekinshi márte onnan:
– Yuxan ulı Shimon, Meni súyeseń be? – dep soradı.
Petr Oǵan:
– Awa, Iyem. Seni jaqsı kóretuǵınımdı bileseń-ǵo, – dedi.
Iysa oǵan:
– Qoylarımdı baq, – dedi.
17Úshinshi márte Iysa onnan:
– Yuxan ulı Shimon, Meni jaqsı kóreseń be? – dep soradı.
Petr Onıń ózinen úshinshi márte: «Meni jaqsı kóreseń be?» – dep soraǵanına qapa boldı.
– Iyem, Sen hámmesin bileseń, Seni súyetuǵınımdı da bileseń, – dedi Petr.
Iysa oǵan bılay dedi:
– Qozılarımdı otlat. 18Saǵan shının, haqıyqatın aytaman: jas waqtıńda belbewińdi óziń baylap, qálegen jerińe baratuǵın ediń. Biraq qartayǵanıńda qollarıńdı sozıp turasań hám basqa birew belbewińdi baylap, seni qálemegen jerińe alıp baradı.
19Iysa bunı Petrdiń qanday ólim menen Qudaydı ullılaytuǵının bildiriw ushın aytqan edi. Usını aytıp bolıp:
– Izime er, – dedi.
20Petr artına burılıp, Iysanıń súyikli shákirtiniń izlerine erip kiyatırǵanın kórdi. Bul – keshki awqat waqtında Iysanıń kókiregine súyenip jatıp: «Iyem, Saǵan kim satqınlıq isleydi?» – dep soraǵan shákirt edi. 21Petr onı kórip, Iysadan:
– Iyem, oǵan ne boladı? – dep soradı.
22Iysa oǵan:
– Men kelemen degenshe, onıń jasawın qálesem, saǵan ne? Sen Meniń izime er, – dedi.
23Solay etip, tuwısqanlar arasında: «Bul shákirt ólmeydi», – degen sóz tarqaldı. Biraq Iysa Petrge: «Ol ólmeydi», – degen joq. Al: «Men kelemen degenshe, onıń jasawın qálesem, saǵan ne?» – degen edi.
24Bulardıń hámmesi haqqında gúwalıq berip, usılardı jazǵan sol shákirt. Bizler onıń gúwalıǵınıń haqıyqat ekenin bilemiz.
25Iysa islegen basqa da kóp isler bar. Eger olar birme-bir jazılǵanda, jazılǵan kitaplar dúnyaǵa sıymas edi, dep oylayman.
Currently Selected:
Yuxan 21: QrqMK22
Tõsta esile
Share
Kopeeri
Want to have your highlights saved across all your devices? Sign up or sign in
© Институт перевода Библии, 2022