Lukas 5
5
Yesuhz raak leh teu paez Daehz
(Matthe 4:18-22, Markus 1:16-20)
1Naeh seu seu ngihz Yesuhz ceng boh waar nawngz Kennesaret, wungz ihz keui teur aacz daehz prawk cu Hnhz aez daehz bawnz ngarz mony reu ma Phraz Pen Caoh. 2Hnhz awlz ceun luang aarz lamz deukz boh a waar, tahz kahz keui cur thaz ceun luang, haaoz boh rup daehz. 3Yesuhz kut tuhz ceun luang seu lamz an naeh ceun luang Simon, maanyz aez ceun luang hnhz mok yaan waar teur nyaenz. Yesuhz kaw keu dez kaai ceun luang sawnz aez wungz ihz.
4Meuz Hnhz a wa sawnz aez ne Hnhz lao Simon, “Lan ti omz truh, rup teuk klaez rup pehz keui rae aez trupz bawnz kahz.”
5Simon mial daz, “Tahz, ehz khatz phawmz rup kahz sawmz raang kaw nam bawnz hawkz hawkz. Keuiz daz beuk Mih daz ceun diz kaw ngaz rup boh.” 6Meuz keuh cih tawiz ne, keuh rup talz kahz heungz baaiz rup keuh paw ngaz teutz. 7Keuh keul waacz tihz aez ihz an naeh kaai ceun luang taang lamz truz kawr daehz. Ihz keu diz kaw truz leh kawr, kahz neuk ceun luang tang aarz lamz paw ngaz beukz. 8Meuz Simon Petros awlz lawng an diz ne, seuk deumz kingz sangz aacz ngaai Yesuhz daz, “Oz Tahz, praasz yaan yaan ohz raez, kawp reung dengz kawi ohz heungz baaiz.”
9Petros boh ihz an naeh kawmz hnhz hacz aamz keui sangz baaiz kaai an bawnz kahz heungz. 10Kuanz bohz hnhz Yakop kaar Yohn an naeh kuanz Sebede kaw sangz. Yesuhz daz Simon nahz, “Yak doz, seu ni lan mih ngaz naeh tahz kahz khahz ihz.”
11Keuh mok ceun luang a waar, thengz hacz aamz kaw tawiz Yesuhz.
Yesuhz seuk neum ihz tut
(Matthe 8:1-4, Markus 1:40-45)
12Meuz Yesuhz naeh tuhz weng seu ti ne maang ihz hawkz tut tang toz. Meuz hnhz awlz Yesuhz ne kupz lao daz, “Tahz, beuk Mih sunz kaw cih aez ohz seu ngamz.”
13Yesuhz teuk bawrz tihz rae teu hnhz daz, “Ohz sunz boh, aez seu ngamz.” Meuz diz luat tut hnhz kaw a wa bilz. 14Yesuhz lao hnhz, “Yak daz ihz nahz lawng an ni, keuiz daz lan plaez toz mih a saangz longz, pukz caw tang kreung lu an Moses seumz mok ta mih a wa seu ngamz ne aez penz saak se aacz ngaai ihz.”
15Keuiz daz reu oiz Yesuhz baaiz yeung lae, wungz ihz keui truz cu Hnhz, aez daehz bawnz teuk ngarz traz boh an penz keui aez moh rak. 16Keuiz daz Hnhz lae lan ti seun tapz rae suz tawngz ceun Hnhz kai cih.
Yesuhz seuk neum ihz yam seu plaakz
(Matthe 9:1-8, Markus 2:1-12)
17Naeh seu seu ngihz, Yesuhz yeung sawnz boh ne Pharise boh ihz mawz kyaamz teur ka, an truz thaz tawiz weng prih Kalile tang prih Yio boh weng Yerusalem keui keu dez boh a diz. Taanz khoz Phraz Cen Cen caang cih aez ihz moh rak ne naeh kaai Hnhz. 18Ihz teur ka leh truz ihz yam seu plaakz yaetz boh kaai saatz. Keuh kyaam kut tuhz kaang, leh hnhz lan tam aacz ngaai Yesuhz. 19Keuiz daz wungz ihz heungz baaiz rae nam caang. Kawp ceun diz keuh raw lang kusz kaang, klawkz seum teuk eupz teur ka, plawiz cur ihz penz tang saatz peur lah wungz ihz, aacz ngaai Yesuhz. 20Meuz Yesuhz awlz reung dengz yum keuh ne daz ihz penz nahz, “Raen aez, a wa plawiz lawt reung dengz kawi mih keuiz.”
21Pharise boh ihz mawz kyaamz keui thaang tuhz phawmz daehz daz, “Hnhz an ni upz pleung Phraz Pen Caoh, naeh taw Phraz Pen Caoh pan plawiz lawt bawnz reung dengz kawi.”
22Yesuhz mas tuhz phawmz keuh thaang ceun diz rae daz keuh nahz, “Kawp naehz pehz thaang ceun diz a? 23An nae lao yoh? ‘A wa plawiz lawt reung dengz kawi,’ ne yoh haz? ‘Ceng nuar lan raez’, ne yoh haz? 24Ohz ngaz aez pehz mas Kuanz Ihz ne maang a na plawiz bawnz reung dengz kawi tuhz prih keu tehz.” Yesuhz daz ihz yam seu plaakz nahz, “Ohz daz mih nahz, ceng raez, leh saatz mih weng kaang daehz raez.”
25Meuz diz luat ihz an diz kaw ceng aacz ngaai ihz, leh saatz an daehz yaetz rae weng, lupz phrawz tang Phraz Pen Caoh. 26Keuh sangz klawhz ihz rae lupz phrawz Phraz Pen Caoh. Keuh sangz baaiz rae daz, “Meu ni ehz a wa awlz an rak seum sangz.”
Yesuhz raak Lewi
(Matthe 9:9-13, Markus 2:13-17)
27Waaiz an diz Yesuhz lae thaz weng ne awlz ihz seutz khawn hawkz, mus hnhz daz Lewi, keu dez boh sumz seutz khawn rae Yesuhz daz hnhz nahz, “Truz tawiz Ohz.” 28Lewi mok thengz hacz aamz rae ceng lan tawiz Hnhz.
29Waaiz an diz Lewi raenz pawiz a kaang daehz raak Yesuhz truz suamz, ihz seutz khawn boh ihz teur ka kaw truz suamz kawmz. 30Pharise teur ka boh ihz mawz kyaamz keui nae teu paez Yesuhz, “Kawp naehz pehz suamz kawmz ihz seutz khawn boh ihz raai keui a?”
31Yesuhz daz mial keuh nahz, “Ihz moh rak nam lo tahz seu neumz, ihz penz keui pan lo a. 32Ohz truz ta raak leh ihz keu sangz nam anz, truz ta ihz raai keui aez caanz daehz eunz.”
Kaerz seum suamz
(Matthe 9:14-17, Markus 2:18-22)
33Ihz teur ka daz Yesuhz nahz, “Teu paez Yohn keui kai kaerz seum suamz boh kai suz tawngz, teu paez Pharise keui kaw cih ceun diz, cih naehz teu paez Mih keui yeung suamz yeung tiangz a?”
34Yesuhz daz keuh nahz, “Tahz seu naaoz, meuz yeung naeh kawmz boh khaekz daehz ne anz caang aez keuh kaerz seum suamz? 35Keuiz daz kraao leh tahz seu naaoz praasz lan keuh ne keuh ngaz kaerz seum suamz.”
36Yesuhz leh mony pung taek lao keuh nahz, “Yaeh nam siarz leh banz kaai kreung teun mehz teuk baangz kreung trimz, beuk cih ceun diz teuk luh kreung teun mehz, kaai kreung trimz kaw nam laep. 37Yaeh nam leh omz seu pit teun mehz sapz tuhz seu kiz hurz trimz, beuk cih ceun diz omz seu pit ne teuk plakz seu kiz, omz kaw car rae seu kiz hurz kaw ngaz luh. 38Omz seu pit teun mehz kaw bawnz sapz tuhz seu kiz teun mehz leun. 39Ihz tiangz omz seu pit trimz ne nam song omz seu pit teun mehz. Keuh daz, ‘An trimz baaiz rak.’”
Currently Selected:
Lukas 5: ril
Tõsta esile
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.