Matío 11
11
Yɛɛ́so a á ega eshúŋɔ anu ánɛ Jáaŋ Mbaptísi
(Lúk 7.18-35)
1Yɛɛ́so á mak á leshūŋ menu muɔ mɛ́t, á mbū meziŋ‑ntō pí ntsɔp pīa mé legēm, éfhó á ajʉʼ mɛ́t ŋgʉ̄ɔ. Ńziŋɛ nzíʼnɛ epuɔ, ńtswīi ŋke mbɔŋ á ntē metésɔŋ apak alāʼ mɛ́t.
2Á ge egɔ́, mbɔ Jáaŋ a ke tshí á ŋgyā atʉɛ́, ńjúʼ mɛ́ nɔŋ ŋghítɛ menu mīi, Yɛɛ́so Nzaʼ‑Ŋkhʉ, a á si ŋghʉ̄ɛ. Ńtó nnɔ yí ŋ́gɛ, pɔ́ egʉɔ nzɛ́tte á Yɛɛ́so ŋ́gɛ, 3yí mé Nzaʼ‑Ŋkhʉ yīi, a á si eshʉ̄ʼɛ lā, kɛɛ mɛ́ zɛɛ́t nzwíʼtɛ eyi ndɛʼɛ lɛ́? 4Yɛɛ́so á kó mbwɛ̄t á mbū pɔ́p ŋ́gɛ: «Pɛ epīŋ nzem, ḿbɛ́te eshúŋ á Jáaŋ, á ajū mīi, pɛ é si ndɔ̄kɔ metuúŋ mɛ́ njúʼɔ, mbɔɔ azi, pɛ é si ndɔ̄kɔ menēk mɛ́ njʉ́ɔɔ: 5Wɔ efʉʉ́‑menēk é si njʉ́ɔ ejʉʼ. Meŋkeluʼ é nɔŋ ndūu á esī nzīŋɛ. Megaŋ kaʼpáp é nɔŋ ntʉ̄ɛ̄, ḿbīŋɛ á nnɔ. Wɔ etsɛɛ́t‑metuúŋ é nɔŋ njúʼɔ ejʉʼ. Mepfhō epuɔ é nɔŋ nzímɛ. Mɛ́ nɔŋ ntswīi ŋke mbɔŋ, á mbū wɔ te kuʼ ánɛ azō. 6Eshhʉ̄ mbɔŋ a á si ŋgɔ́ á ŋiŋ yīi, a á véŋ á gá té miʼte. »
7Epuɔ pīi, Jáaŋ a á ntó á wɔ́p, é gʉɔ. Yɛɛ́so á zi á leshūŋ menu ánɛ Jáaŋ á mbū alāʼ, ndé ŋ́gɛ: «Pɛ ekímte páʼ pɛ lɛɛ́ te ŋgʉ̄ɔ á késáatswɛt, á njʉ́ɔ ŋiŋ yīi, a á páʼ taʼ akekaʼa yīi, fefwɛt a á si ncʉ̄ʼnɛ ɛ́. Ŋgáŋ, pɛ lɛɛ́ ŋgʉɔ á njʉ́ɔ á kwaʼ Jáaŋ yí méŋwɛ̄t. 8Pɛ le jʉ́ɔ á gɔ́ páʼ lā? Pɛ le jʉ́ɔ á maʼ menzhó ŋkāp lɛ́? Epuɔ pīi, é maāʼ menzhó ŋkāp, é naŋteé áa ánɛ meŋgyā mefɔ. 9Pɛ lɛɛ́ ŋgʉɔ éwú, á njʉ́ɔ Jáaŋ, á taʼ ntswi‑ŋke Ndém. Á épúp, meŋ chʉ́ɛ nnɛ̄t eshúŋɔ á wɛ́, a zeéŋ efáŋ ntɔ́k mbɔɔ ntswi‑ŋke Ndém mɛ́t. 10Yí mé ŋiŋ yīi, Ndém a le lé ánɛ lezēŋ tsí, á ntē aŋwaʼne yí ŋ́gɛ: “Meŋ a shʉʼ etó á ntswi‑ŋke ga, a epīk á mvhɔ wu, ńcūŋte á mɛnzhɛ, tɛ́ o ezīŋ éwú eshʉ̄ʼ.” 11Meŋ chʉ́ɛ nnɛ̄t eshúŋɔ á wɛ́ á kwaʼ anuúnē ŋ́gɛ, á shʉʉ̄ʼ ánɛ epuɔ metsem, á ndo esī atsetsáʼ, tɛ ntshí á ayáʼa, mmɔʼ ŋiŋ yīi, anu zí á faáŋ ntɔ́k azi Jáaŋ, a te éwú ú. Táʼ, méŋ agáʼ ŋiŋ yīi, a á ndáʼ nzī á lejūʼ á mbɔŋɔ́ ánɛ Lefɔ Ndém tsīi, é zii tsetsɔŋɔ lā, a tɔɔ́k á Jáaŋ. 12Tɛ efhó ánɛ afʉʼ Jáaŋ nnoʼ‑epuɔ á ntshi, ŋ́gʉɔ ntshí ánɛ ayáʼa, megaŋ mbo é nɔŋ ndʉɔ́ʼɔ Lefɔ Ndém lʉɔ́ʼe. Epuɔ pīi é fók mbʉʼ mé piŋ ŋkó éwú. 13Á épúp tɛ́, Mɔɔ́sɛ mbɔɔ metswi‑ŋke Ndém metsem, é le shúŋ anu ánɛ Lefɔ Ndém, tɛ ŋkó ánɛ afʉʼ Jáaŋ. 14Pɛ nɔŋɔ ŋkɔ̄ŋɔ á lezhɛ̄ á mbɔŋɔ́, á ŋiŋ yīi Jáaŋ a á ewiɛ́, mbɔ meŋ shúŋɔ á wɛ́ ŋ́gɛ, yí mé Eli yīi, a le nɔ̄ŋ ŋgɔ̄ ezéŋ eshʉʼe. 15Ŋiŋ a wiɛ metuúŋ á lelɔk njúʼ ejʉʼ, á júʼ. »
16Yɛɛ́so á zéŋ ndé ŋ́gɛ: «Meŋ gɔ elɔ̄ɔk akɔ̄, ḿbɛ́ efʉʼ ánɛ epuɔ ŋguʼ puɔ ɔ̄? Pɔ́ swhií ewɔŋkhʉ̄ pīi, pɔ́ naŋteé á azá, emɔ̄ʼ é nɔŋ ntɔ́ŋɔ emɔ̄ʼ mé ŋghi teté, ńdʉ́ɛ́ ŋ́gɛ:
17“Pek é tɔ́ŋ ndendɔ̄ŋ, ŋ́gɛ pɛ ezéŋ, pɛ te zéŋ.
Ḿbwɛ̄t lewhʉ̄, pɛ te lāa.”
18Á zéŋ ŋgɔ́ páʼ, pɛ le ghʉ̄ épúp ánɛ Jáaŋ. A le shʉ̄ʼē, ńnɔŋ te mpfɛ́tɛ azō ɔ́, a te nnúu meluʼ ɔ́, mɛ́ zɔte á yí ŋ́gɛ: “Esī e lē ŋgɔ á yí#11.18 Pɔ́ lɛɛ́ ndʉ́ɛ́ páʼā, ńdɔkɔ ŋ́gɛ, a gɔ́ áa apia..” 19Méŋ‑Ŋiŋnɔŋ wuɔ, a á piŋ eshʉ̄ʼ azí, ńnɔŋ mpfɛ́tɛ azō, ńnɔŋ nnúu meluʼ, mɛ́ zɔte á yí ŋ́gɛ: “Jʉ́ɔ á ŋiŋ wɔ̄, a á si ŋkʉ́ʼnɛ nzáa apʉp, ńzéŋɛ mbía meluʼ. Ŋ́gɔ́ á esoó wɔ tswí‑ncup, mbɔɔ eyi emɔ̄ʼ epuɔ tepɔŋ.” Táʼ, mɛ́ jʉɔ́ epuɔ pīi, é lɔɔ̄k azhɛ̄‑anu nnáŋ, ńzhɛ́ á légɛ Ndém a á ŋgaŋ anuúnē. »
Yɛɛ́so a á ega ndāa ánɛ metésɔŋ Ŋgaliléa
(Mat 10.15; Lúk 10.13-15)
20Yɛɛ́so á fhó éwú, ńzī á lethū epuɔ tésɔŋ pīi, a le ghʉ̄ á lelʉɛ meŋkʉʼne anu éwú. Ńthúɔ á wɔ́p melaʼ mīi, a le ghʉ̄ meŋkʉʼne anu mɛ́t, pɔ́ piŋ te gɔ̄ nnɛ̄t zɔp, ḿbīŋ nzem á mbū Ndém ɛ́. Ńthú á wɔ́p ndé ŋ́gɛ: 21«Wóó epuɔ Kolazin lōo, wóó epuɔ Betsayída lōo, pɛ é wɔ eshhʉ̄ tepɔŋ. Meŋkʉʼne anu mīi, meŋ gɛ nzóko ŋghʉ̄ɛ á alāʼ pɛ, meŋ nde wíʼe, ńdɔkɔ ŋghʉ̄ɛ á ntē tésɔŋ Tíi pɔ́ Sidɔŋ, mbɔ ŋgia é éwú yīi, pɔ́ lē ndáʼ ŋgɔ̄ nnɛ̄t zɔp, ńzwík mezwiŋ epa, ḿbōk á avhō, ńdɔk ntswī á légɛ, pɔ́ é wáʼ atswhī tepɔŋ zɔ́p, ḿbīŋ nzem á mbū Ndém. 22Kwaʼ anuúnē, meŋ shúŋɔ á wɛ́ ŋ́gɛ, a láʼ aleʼé zīi, Ndém a záʼa ntsaŋ epuɔ menɔŋ, anu zɛ́ a epék ntɔ́k azi epuɔ Tíi pɔ́ Sidɔŋ.
23Ḿbiŋ ŋgɔ́ mé pɛ epuɔ Kafaanawum,
pɛ é kwaŋ ŋ́gɛ, Ndém a a shʉʼ ekɔ́ʼne á wɛ́,
tɛ pɛ epfēŋ lephū lɛ́?
Ŋgáŋ, a a shʉʼ esóʼne á wɛ́ sóʼne, tɛ pɛ ekó á apwɛt.
Éghʉɛ épúp melaʼ mīi, meŋkʉʼne anu mīi, mɛ́ le ghʉ̄ á alāʼ pɛ, mɛ́ le wíʼe ndɔ̄kɔ ŋghʉ̄ɛ á tésɔŋ Sodɔm, mbɔ tésɔŋ mɛ́t, a zɛɛ́t tɛ ntshí á ayáʼa. 24Meŋ ndɔkɔ eshúŋɔ á wɛ́ ŋ́gɛ, a láʼ aleʼé zīi, Ndém a záʼa ntsaŋ epuɔ menɔŋ, anu zɛ́ a epék ntɔ́k azi epuɔ tésɔŋ Sodɔm. »
Yɛɛ́so a á ega eswíŋtɛ á Mɔʼɔ́ yi
(Lúk 10.21-22)
25Yɛɛ́so á ghʉ ndé ŋ́gɛ: «Mɔʼɔ́ ga, Atsyapuɔ, wu yīi, o pɔɔ́ŋ lephū pɔ́ esī atsetsáʼ, meŋ á syákne á wú, páʼ o ke lʉ̄ɔ menu mú, á mbū megaŋ azhɛ̄‑anu mbɔɔ á mbū meghi, ḿbiŋ ntswī á mbū epuɔ pīi, é páʼ ewɔŋkhʉ̄ lā, éwɔ te zhɛ́‑anu. 26Ŋŋ me Mɔ́ʼɔ, á gɔ́ épúp páʼā, ŋ́gɔ́ áa páʼ wu mé kɔŋ.
27«Mɔʼɔ́ ga a lē mbú ŋgyá mete ntsem á mbū meŋ. Ŋiŋ a gɔ le zhɛ́ páʼ meŋ Méŋ yi, meŋ á épúp ɔ́, ńdaʼ yí. Ŋiŋ á pīŋ le zhɛ́ páʼ, Mɔʼɔ́ ga a á épúp ɔ́, ńdaʼ gá Méŋ yi, mbɔɔ epuɔ pīi, Mɔ́ a á tswi á wɔ́p á ŋiŋ yīi, Mɔʼɔ́ yi a á ewiɛ́.
28«Ŋiŋ ntsem yīi, a á kʉɛ apiʼ, tɛ á nɔŋ nzɛ́tɛ á yí, á nɔŋ ŋkáa, a eshʉʼ njʉ́ɔ á gá, meŋ eghʉ̄ a ezwīte. 29Pɛ epɛ́ akʉɔʼté zá, ńzwík á ntɔ̄ŋ pɛ, ńcʉ́ʼ meŋ ezíʼne á wɛ́ menu Lefɔ Ndém, melaʼ mīi, meŋ á ŋiŋ, ńdáŋte, ntē gá é pwɛ́ne. Pɛ eghʉ̄ épúp, ńnáŋa ŋgwīɛ̄ apwɛne á ntē pɛ. 30Á épúp, akʉɔʼté zá á zaŋneē á lepiʼ, apiʼ zá á piŋ mbú te zɛ̄ɛt. »
Currently Selected:
Matío 11: ybb
Tõsta esile
Share
Copy
Want to have your highlights saved across all your devices? Sign up or sign in
© CABTAL