Juan 13
13
Jesupa ichi ome p'ɨrrɨapataɨrã jĩru sɨɨda
1Egitodepa wãnana k'ɨ̃risiapataɨ ewari pai naena Jesupa k'awa basima ichi ewari pasit'a, nãɨ ĩjũa ameek'ari ichi Ak'õremá wãi k'orea. Jesupa jõma ichidirã nãɨ ĩjũane be minachia k'ɨ̃ria bada pẽra ichia mãɨrã k'ɨ̃ria basima ichi piui ewaridea.
2K'ewará nek'o p'anasidama. Mãɨ naena tiorepa Simón warra Juda Iscariotea k'ɨ̃risiapisima Jesú jitapimẽrá. 3Jesupa k'awa basima ichi Ak'õrepa ne ãarea ichi juade bɨsit'a, mãɨnepa k'awa basima ichi Tachi Ak'õremãɨpa chek'ari mãicha ichimá wãit'a. 4Maamina nek'o p'anɨne Jesú bai nɨbeek'ari ichia anamari jɨ̃ bada wẽak'ari maapae k'ak'ua p'oapiparí atak'ari k'ɨrrɨde p'araasima. 5Maapae p'arat'u ĩjĩsidia bɨde pania weak'ari, chi ichi ome p'ɨrrɨapataɨrã bɨɨrɨ sɨɨmaa beesima. Ãchicha sɨɨk'ari ãchi jĩru p'oapisima chi k'ak'ua p'oapiparidepa.
6Jesupa Simón Pedro bɨɨrɨ sɨɨyá ooside, Pedropa nãɨya jarasima:
—Mɨ Chipari, ¿pɨa mɨ jĩru sɨɨik'ãra?
7Jesupa p'anoosima:
—Naapae mɨa oo bɨt'a pɨa k'awawẽa bɨma maamina mãɨya bak'ari mãɨ pia k'awaipɨ.
8Maamina Pedropa jarasima:
—¡Mɨ jĩru pɨa ewariaba pida sɨɨiwẽma!
Jesupa jarasima:
—Mɨa pɨ jĩru sɨɨepɨra, pɨ mõrewẽpɨ.
9Mãɨpuru Simón Pedropa jarasima:
—Mãɨya bɨpɨra, mɨ Chipari, mɨ jĩru aba sɨɨrãse, ¡mãɨpari mɨ jua mãɨnepa mɨ poro sida sɨɨse!
10Mãɨ k'orea Jesupa jarasima:
—Chi ẽpẽra ãarea k'ui bɨpa, ichi jĩru wa sɨɨiwẽa bɨma, ichi k'ak'ua ãarea pia sɨɨ bɨ pẽra. Mãra ãarea sɨɨ p'anɨma, maamina aba nãma bɨma sɨɨwẽa bɨt'a.
11Jesupa k'awa basima k'aipa ichi jitapiit'a. Mãɨpuru jarasima: «Aba nãma bɨma sɨɨwẽa bɨt'a».
12Ãchi jĩru sɨɨk'oak'ari Jesupa mãicha ichi anamari jɨ̃parí jɨ̃sima. Maapae nek'opataɨmá mãicha suak'abari beek'ari jarasima:
—¿K'awa p'anɨk'ãra k'ãarea mɨa mãra jĩru sɨɨsit'a? 13Mãrapa mɨ Jarateapariade apatama mãɨnepa mãra Chipariade apatama. Piarã arí jara p'anɨma, mãɨya bɨ pẽra. 14Mãɨpa mɨ, mãra Chiparipa mãɨnepa Jarateaparipa mãra jĩru sɨɨda pẽra, mãra pida ara abaɨ jĩru sɨɨdai p'anɨma. 15Mɨa jãɨya unupisima ara machicha chi k'aripadamẽrá. 16Mɨa piarã jararuma: abaɨ pida chi chipari pae pari mimiaparí ichi chipari k'aepẽra atepe bɨwẽma. Chi peeda ichi peeda k'aepẽra atepe bɨwẽma. (Chi chipari pae pari mimiaparipa oopari jĩra mɨa ooda pẽra, mãra pida abarik'a mãɨya oodai p'anɨma). 17¿Mãɨ ũri p'anɨk'ãra? Mãɨya oodaipɨra piarã pia p'ananaipɨ.
18»Mɨa mãɨ mãrá ãarea jarawẽa bɨma, mɨa jɨrɨ atadaɨrã sãmaasã́ bet'a k'awa bɨ pẽra. Maamina mɨa jararuma Tachi Ak'õre pedeade bɨ bɨ jĩra piarã mãɨyamẽrá: “Chi mɨ ome nek'o bada, mɨ ome chi nek'ĩramá beesima”.#Salmo 41:9. 19Mɨa ara nãɨyana mãɨ jararuma waidi mãɨyai naena, piarã mãɨyarune mãrapa Mɨne ĩjãanamẽrá.#Isaía 43:10. 20Mɨa piarã jararuma: chi mɨa peedá pia pedea bɨpa mɨá pia pedea bɨma. Ichiaba chi mɨá pia pedea bɨpa chi mɨ Peedá pia pedea bɨma».
Jesupa Juda k'orea jarada
Mateo 26:20-25; Marco 14:17-21; Luca 22:21-23
21Mãɨya jarak'ari Jesú minachia sõp'ua beesima. Mãɨya bɨde nãɨya jarasima:
—Mɨa piarã jararuma: aba mãranepemapa mɨ jitapiipɨ.
22Ichi ome p'ɨrrɨapataɨrã abarik'a chi ak'ɨ p'aneesidama, k'ai jara bɨt'a k'awadawẽa p'anana pẽra. 23Mãɨrãnepema aba, chi Jesupa minachia k'ɨ̃ria uru baparí,#13:23 Ichik'á suak'abari basima. Griego pedeade nãɨya bɨ bɨma: Jesú p'echude ɨ̃rɨ bari badat'a. Judiorã Egitodepa wãnana k'ɨ̃risiapataɨ ewaride mãɨya nek'opachidama. Chi Jesupa minachia k'ɨ̃ria uru baparí. Juanpa ara ichi mãɨya jarapachima. ichik'á suak'abari basima. 24Simón Pedropa ichiá taudepa jarasima k'ai k'orea pedea bɨt'a Jesua idimẽrá. 25Maapae chi Jesuk'á suak'abari bɨpa idisima:
—Tai Chipari, ¿k'aipa pɨ jitapiima?
26Jesupa p'anoosima:
—Chi mɨa p'ana p'arat'ude bek'eak'ari abaɨa tearua, mãɨ ichipɨ.
Ara mãɨne p'ana p'arat'ude bek'eak'ari Jesupa Simón Iscariote warra Judá teasima. 27Judapa mãɨ k'ok'ari Tiore sõne eda beesima. Mãɨne Jesupa ichiá jarasima:
—Pɨa ooi bɨt'a isapea oose.
28Maamina Jesú ome nek'omaa p'ananarãpa k'awadaé pasima k'ãre k'orea mãɨya jarasit'a. 29Judapa ãchi erreara enemeepachi pẽra, waapẽarãpa k'ɨ̃risiasidama Jesupa ne atapade a bɨek'ãra a k'ɨ̃risiasidama arapaapataɨ ewari oodai pae, mãɨyawẽpɨra chupuria k'edea ne teade wãmẽrá. 30Judapa p'ana jitak'ari ara mãɨne tajatá wãsima. Mãɨ p'ãrio nɨbasima.
Jesupa pedea chiwidi pedeada
31Juda wãk'ari Jesupa jarasima:
—Naapae Tachi Ak'õrepa unupiipɨ mɨ, chi Ẽpẽra Warra chi choma bɨt'a. Mãɨ awara mɨnepa Tachi Ak'õrepa unupiipɨ ara ichi chi choma bɨt'a. 32Mɨ, chi Ẽpẽra Warrapa Tachi Ak'õre chi choma bɨt'a unupiipɨra, Tachi Ak'õrepa mɨ abarik'a chi choma bɨt'a unupiipɨ. Ichia tãaraawẽa bɨde mãɨ unupiipɨ. 33Mãra mɨ warrarã pẽra mɨa jararuma: mɨ mãra ome tãaraa baiwẽma. Mɨa judiorã chi mãɨrã chaarearã́ jarada jĩra nãɨyana mãrá jararuma: mãrapa mɨ jɨrɨdaipɨ, maamina mɨ wãrumá p'ue wãnaiwẽma.#Juan 7:33; 8:21.
34»Mɨa oopi bɨ pedea chiwidi mãrá jararuma: minachia chi k'ɨ̃ria p'anat'ɨ.#13:34 Mɨa oopi bɨ pedea chiwidi. Tachi Ak'õre oopi bɨ pedea chi naena bada k'orea unupatama nãma: Levítico 19:18; Deuteronomio 6:5. Mɨa mãra minachia k'ɨ̃ria bɨ jĩra mãra sida abarik'a chi k'ɨ̃riat'ɨ. 35Mãɨya chi k'ɨ̃ria p'ananaipɨra, ãareaɨrãpa k'awadaipɨ mãra mɨ ome p'ɨrrɨapataɨrãt'a».
Pedropa Jesú itu bɨwẽane ada
Mateo 26:31-35; Marco 14:27-31; Luca 22:31-34
36Simón Pedropa Jesua idisima:
—Tai Chipari, ¿pɨ sãmá wãima?
Mãɨne Jesupa p'anoosima:
—Mɨ wãrumá pɨ nãɨyana p'ue wãiwẽma, maamina mãɨya bak'ari mɨ k'aade wãipɨ.
37Pedropa idisima:
—Tai Chipari, ¿k'ãre k'orea mɨ pɨ ome p'ue wãiwẽma? Mɨ pɨ k'orea piui bɨma.
38Mãɨne Jesupa jarasima:
—¿Pɨ mɨ k'orea piarã piui bɨk'ãra? Mɨa piarã jararuma: et'erre pirui naena bari k'ak'o ũpea mɨ unuk'aade aipɨ.
Currently Selected:
Juan 13: tdc
Tõsta esile
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.