ማቲወስት ወንጌል 22
22
ፈወነ 22
ቅየንል ጭጝሸቍ እቂዝ ተከድ
(ሉቃ. 14፡15-24)
1እየሱስም እንደ ገነ ጛጭስ ላየ ተከ እንት የው ድቁ፦ 2«ምጝግስተሰማያት ጝዅርት ቅየንዝጠ ዲግሰው ንጕስ ተከች። 3ጭጝሸቍ እቅድዛትም ቅየኒል ተርጛንስ ማጥን ጝኣገልጋያንድዛት እፃቑ። ጭጝሸቍ እቅድ ግን ቅየኒል ፊርጥጘ በኒየቍም።
4እንደ ገነም ላጥ ኣገልጋያን፦ « ‹እንወ ይሰጝግጢዝመ ስወቍ ይሲዝፂዝ ዝውሽትጝኵ፤ እጝቅቅ ኣስልሽኩ፤ ቅየኒል ላቝጥን› ይርን ድቍጥን» የው እፃቑ። 5ጭጝሸቍ እቅድ ግን ጭጝንድየንት ቸለል ይጝ ላውድ ጝቺዝጝል፣ ላውድ ጝኒግርንል ፊሩ። 6ላጥ እዳቐቍድ ቈሽ ጝኣገልጋያንድዛት ፃይጝ በርጝ ድድብጝ ቍዉ። 7ኣይንድም ንጕስድ ቈጣሽ ዊተድር በርስ ጝኣገልጋያንድዛት ቍወቍ እቅድዛት ድሱ፤ ጝታኻትመድየንትም ልየዝ ዀሱ። 8ጝዝ ግረም ጝኣገልጋያንድዛት፦ ‹ቅየኒዙ ድግስድ እንወ ኣስልሽኩ፤ ጭጝሸቍድ ግን ድግሲዝ ጥውሸቍ ኣቕጝ ችጝሺየቍም። 9እንዝ ማጥን ዋጥርጥረነው ጒደነይልቅ ፊትርን ችጝርነው እጅርድቅ ጭጝጥን› ዩ። 10ጝኣገልጋያንድም ጒደን ጨቨቅ ፊርጝ ጭቓድም ቀሰውድም ችጘውድቅ እጝቅትቅ ጭጝጝ ቅየኒዝ ደዘድየንት ኣብንዝ እቻዝ።
11ንጕስድም ጭጝሸቍ እቅድዛት ቓልጠ ደዘይል ጥዋንድ ቅየንዙ ኣልቨ ሲሪየው ላው እጅር ጝጊስ ቓሉ። 12ንጕስድም፦ ‹ይወደጅወ! ቅየን ኣልቨ ሲሪጝቀ ኣወይር እንል ጥውሩ?› ዩ፤ እጅርድየን ግን ዝም ዩ። 13ንጕስድም ጝኣገልጋያንድዛት፦ ‹ጝናን ልኵድ እፅቍርን ቢዘይዙ ጥመይል ፊስርን ማልጥን፤ ጝግልም ሊዝዝመ እርቍጣን ገጫዘው ሚከረዝ ኣጡ› ዩ።#ማቲ. 8፡12፤ 25፡30፤ ሉቃ. 13፡28። 14ጭጝሸቍድ ንቕፀቍ ጛይ፤ ማርፅሽተቍድ ግን ዊትቍ ጛይ።»
ግቭር ኪፍለነውዝ ማጥን ኣልተው ዋቕረ
(ማር. 12፡13-17፤ ሉቃ. 20፡20-26)
15እንዝ ግረ ፈሪሳንድ ፍጝ ፊርጝ፣ እየሱስት ጝዊግተው ዊገይዝ ኣወሽጝ ፃውርጥጘጘ ማኽርኽርሽ። 16ጝታክንደጥድዛትም ኺረውድስት ዊግኒጅቅ ላብጠ ፃቭጝ እየሱስትል፦ «ክንሰተወ! ክት እማንተው እጅር ኣረጘ፣ እደረት ጒደነድም እማንዝ ክንስረር ኣረጘ ኣርቕነኵን፤ ኣውማውስቅ ኣድልዊጝቀ እጝቅትቅ እኵለዝ ቓልደር የጝ። 17እስቲ ድቍ፤ ወረጘ ተከኵ? ቂሳርስ ግቭር ኪፍለነው ጥውሸኵመ ጥውሻው?» ይጝ እፃቕ። 18እየሱስ ግን ጝታተኰልድ ኣርቓንስቅ፦ «እፈ ተክዘጥ ክታትርነ! ወረጘ የጝ ይት ፊትንትድርነውድ? 19እስቲ ግቭርዝ ኪፍልሸው ጊንዝቭድየንት ቓሊስጥን?» ዩ። ጛይም ላው ዲናር ነስጝ ጝጭስ ቓሊስ። 20ጘጝም፦ «እኒን ጊንዝቪል ቃርፅሸተው ሚልኪዝመ ፃፍሸው ፅፈቲዝ ኣውቱ የጝ?» ዩ። 21ጛይም፦ «ቂሳርቱዋ!» ይ፤ ጘጝም፦ «እደስለስ ቂሳርትውውድ ቂሳርስ ይውጥን፤ እደረትውድም እደረስ ይውጥን» ዩ። 22ጛይም እኒንት ወሽጛንድ ጊርምሽጛ ጝት በርጝ ፊር።
ክርጘይስ ጐነዝቍዝ ኣልተው ዋቕረ
(ማር. 12፡18-27፤ ሉቃ. 20፡27-40)
23ጘጝ ግርየይዝ ሰዱቃን እየሱስትል ተር፤ ሰዱቃንድ ክርጘይስ ጐነዝ ኣምናቍ ዊን፤ ጛይም፦#ኻወ. 23፡8። 24«ክንሰተወ! ሙሴ፦ ‹ላው እጅር ዅር እዅሪቀ ክርሽ ጝዝንድ ክረው ጝዝኒዝ እውነየንት ድው ክረዊዝ ዚረ ቲኪነ› የውኩ።#ዘዳ. 25፡5። 25ይናግል ላጝጠ ዚን ዊን፤ በውረድ እውነት ድው እዅሪጝቀ ክራንስቅ ጝሳትውድ ክረው ጝዝኒዝ እውነየንት ድዉ። 26ጘጝም ክረዊዝ ዚረ ቲክዪጝቀ ክሩ፤ ሸወትረድም ጘጝት ክሩ፤ እነይጛ ላጝጠትረይል ኣሽ ቲረ ቲረዝ ድውጛ እጝቅቅ ክር። 27ኻትሸነይዝም ጝርቕም እውነየን ክርች። 28እንዝ ማጥን ጝርት እጝቅቅ ድውጛንስቅ ክርጘይስ ጐነይዝ ኰር እኝቸን እውነየን ኣዊዝ እውነ ኣተ ጚ?» ይጝ ዋቕር።
29እየሱስም፦ «ቅዱሳን መፃፋኒዝመ እደረት ኻይሊዝ ኣርቓይርነቅ ኣቕርናንስቅ ቀትርነኵ። 30ክርጘይስ ጐነይዝ ግረ እቅ ሲመይትቍ መላካኒዝጘ ኣጥቍጚ ድዋቍም፤ ገባሻቍም። 31-32ክርጘይስ ጐነይዝቍዝ ግን እደረ ክታጭስ፦ ‹ያን ኣቭርኻምት ኣምላክ፣ ይሳቅት ኣምላክ፣ ያይቈቭት ኣምላክ የጝ› የው ዊግተውድየንት ኣንቭቪርነቅመ? እደረ ፅበቍዝ ኣምላክ የጝጚ ክረቍዝ ኣምላክም ኣየው» የው ዊሱ።#ዘፀ. 3፡6። 33ኽዝቭድም እኒንት ወሻንድ ጝክንስኒዝቍዝ ዲንቅሹ።
እጝቂስቅ ዲቈው ትዛዝድ
(ማር. 12፡28-34፤ ሉቃ. 10፡25-28)
34ፈሪሳንድም እየሱስ ሰዱቃንድዛት ዝም ሸጘ ወሽጛንድ ላው ኣቕጝ ኣኽቭሽ። 35ጛጊስም ላው ወሪትት ኽግ ክንሰተ እየሱስት ፊትንጠ በን፦#ሉቃ. 10፡25-28። 36«ክንሰተወ! ወሪትት ኽጊስ እጝቂስቅ ዲቈውድ ኣውየን የጝ?» የው ዋቕሩ። 37እየሱስም፦ «‹ክኣምላክ ኣደረት ክእዘኒዝ፣ ክኒፍሲዝ፣ ክኻሰቪዝ፣ ምሉበምሉዝ ቀን።›#ዘዳ. 6፡5። 38እጝቂስቅ ዲቈው በወትረ ትዛዝድ እኒን የጝ። 39ሊጘትረድም ጝት ተከኵ፤ እንም፦ ‹ክፃምረድየንት ክቕምትጘ ቀን› የው የጝ።#ዘሊ. 19፡18። 40ወሪትት ኽግዝመ ነቭያታኒዝ እጝቅቅ እንዛይ ሊጘይዝ ጥቅልሽጝኵ» ዩ።
ክርስቶስ ኣውት ዅር ኣቐጘ
(ማር. 12፡35-37፤ ሉቃ. 20፡41-44)
41ፈሪሳንድ ኣኽቭሽጝ ፅብጛ እየሱስ ጛት፦ 42«ክርስቶስት ማጥን ወረጘ ይርና? ጘጝ ኣውት ዅርስ የጝ?» የው ዋቕሩ። ጛይም፦ «ዳዊትት ዅራ» ይጝ ዊስ። 43ጘጝም፦ «እደስለ፣ ዳዊት እደረት መንፈሲዝ ኻይልዝ ዊግታንድ፦ ‹ይኣደረ› የው ጭጘውድ ወረጘ የጝ?
44‹እደረ ይኣደረት
<ክፃለታንድዛት ክልኲዝ ደደነ ፃቭጪስቅ፣
የለዊል ጐይ> ዩ።›#መዝ. 110፡1።
45ነስየ ዳዊት ጝቕም፦ ‹ይኣደረ› የው ጭጘውዝየ ኣወይ የጝ ጝዅር ኣጠ ቸለውድ?» ዩ። 46እን ዋቕረይዝ ላው ቃል እኳ ዊስጠ ቸለው እጅርም ዊኒየው፤ ኣይንቲስ ግረ ኣውማውቅ ጝት ዋቕርጠ ዲፍሪየውም።
Currently Selected:
ማቲወስት ወንጌል 22: ኽምጣኣኪ
Tõsta esile
Share
Kopeeri
Want to have your highlights saved across all your devices? Sign up or sign in