Panagnaan 1
1
Junyaꞌ pinapayak
1Ni panagnaan, lay pinapayak meꞌ Tuhan junyaꞌ ka langit. 2Sibuwa junyaꞌ pinapayak, yaꞌ lagi mantuk maka yaꞌ gi isihan. Lindom jaꞌ labbasakayi maka limun meꞌ boheꞌ. Sugaꞌ luu na pin Rū Tuhan usik pajataꞌ man kuwit boheꞌ.
3Pag-anu siꞌ, magpalman na Tuhan, yuk na, “Pōꞌ ko dantaꞌ.” Dari ilooy ma luu du dantaꞌ. 4Pag ndaꞌ Tuhan, kamahapan na ya.
Pag-anu, lay na baw sakkat Tuhan dantaꞌ maka lindom. 5Boꞌ lay awnan na dantaꞌ yana “llaw,” kuwan lindom, yana “sangom.” Pag bay pingkaꞌ sangom, pag taabut sayu, ilooy na llaw sibuwa.
6Pag-anu, magpalman na baw Tuhan, yuk na, “Subay situ luu sallangan man nakkat boheꞌ ndiyoꞌ ka njataꞌ.” 7Dari siꞌ lay du Tuhan mapayak sallangan man nakkat boheꞌ. 8Boꞌ lay awnan na sallangan looy “langit.” Pag bay pingkaꞌ sangom, pag taabut sayu, ilooy na ni kaduwa ngallaw na.
9Pag-anu, magpalman na baw Tuhan, yuk na, “Subay situ boheꞌ taꞌ babaw junyaꞌ pahiyu pa disu lugar mari pōꞌ na tanaꞌ lagguꞌ.” Dari siꞌ, lai du magjatu. 10Boꞌ lay awnan Tuhan tanaꞌ lagguꞌ looy “gumi.” Kuwan boheꞌ looy ma bay pasihaꞌ, lay awnan na “dilawut.” Pag ndaꞌ Tuhan meꞌ looy, kamahapan na ya.
11Pag-anu, magpalman na baw Tuhan, yuk na, “Subay situ luu katumbu-tumbuhan tomoꞌ taꞌ gumi. Subay luu jinisan tinanom ka kakayu-kayuhan ma bigihan buwaꞌ da mari paeka.” Dari siꞌ, lai du magjatu 12batan lai na tomoꞌ taꞌ gumi jinisan tinanom ka kakayu-kayuhan kaniya-kaniya ka buwaꞌ na ddas ka bigi na. Pag ndaꞌ Tuhan meꞌ looy, kamahapan na ya. 13Pag bay pingkaꞌ sangom, pag taabut sayu, ilooy na ni katallu ngallaw na.
14Pag-anu, magpalman na baw Tuhan, yuk na, “Subay situ luu siga sūꞌ pōꞌ taꞌ langit man nilang llaw ka sangom. Subay sila pinakoy man mindogahan musim, man ngitung haliyan buwan sampay itungan buwan ni taun. 15Maka subay sila ninag man marantaan junyaꞌ.” Dari siꞌ, lai du magjatu 16batan lay na Tuhan mapayak duwa sūꞌ mehe. Ilooy ma basag dantaꞌ na, yana mataallaw muwan dantaꞌ llaw-llaw. Kuwan ilooy disu ma kulang basag dantaꞌ na, yana buwan ma muwan dantaꞌ sangom. Maka lay gi ya mapayak siga potean. 17Ilooy siꞌ labbasakayi, lay inannaꞌ meꞌ Tuhan taꞌ langit binuwat sūꞌ ni junyaꞌ 18sangom-llaw, maka man magsigantiꞌ-gantiꞌ dantaꞌ ka lindom. Pag ndaꞌ Tuhan meꞌ looy, kamahapan na ya. 19Pag bay pingkaꞌ sangom, pag taabut sayu, ilooy na ni ka-mpat ngallaw na.
20Pag-anu, magpalman na baw Tuhan, yuk na, “Subay situ meka jinisan balnyawa mehe-dikiꞌ ni dilawut sampay ni jawom boheꞌ langngin. Maka subay meka jinisan manuk-manuk maglomengan ni antalaan.” 21Dari siꞌ, lay na Tuhan mapayak mimon jinisan daying ka balnyawa njawom boheꞌ sampay na siga sattuwa mehe banahan ni dilawut. Maka lay na du ya mapayak mimon jinisan manuk-manuk. Pag ndaꞌ Tuhan meꞌ looy, kamahapan na ya. 22Pag-anu siꞌ, lay gi sinupaatan meꞌ Tuhan siga balnyawa looy mari sila paeka, yuk na, “Hanak-balanak na kam supaya pannoꞌ na dilawut meꞌ bi. Damikiyan, kaam pun siga manuk-manuk, hanak-balanak na du kam supaya maglipat lagi eka bi taꞌ babaw junyaꞌ.” 23Pag bay pingkaꞌ sangom, pag taabut sayu, ilooy na ni kalima ngallaw na.
24Pag-anu, magpalman na baw Tuhan, yuk na, “Subay situ luu jinisan balnyawa taꞌ gumi, yana kahayop-hayopan ma inipat ka ga sattuwa tawun sampay siga balnyawa ma palele taꞌ gumi.” Dari siꞌ, lai du magjatu. 25Pag ndaꞌ Tuhan mimon balnyawa ma bay papayak na, kamahapan na ya.
26Pag-anu, magpalman na baw Tuhan, yuk na, “Subay situ kitabi mapayak manusiyaꞌ meꞌ limbagan arat-tabiat tabi. Sila na magbayaan mimon hayop ka sattuwa taꞌ junyaꞌ sampay ga daying, ga manuk-manuk ka mimon balnyawa ma palele taꞌ gumi.” 27Dari ilooy ma lay na Tuhan mapayak manusiyaꞌ meꞌ limbagan na du. Bay pinapayak meꞌ na lalla ka danda. 28Pag-anu siꞌ, lay na baw sila supaatan Tuhan, yuk na, “Hanak-balanak na kam supaya lataꞌ na junyaꞌ meꞌ panubuꞌ bi. Kaam na magbayaan mimon taꞌ babaw junyaꞌ sampay ga daying ni dilawut ka ga manuk-manuk sampay mimon balnyawa mehe-dikiꞌ taꞌ junyaꞌ.”
29Maka lay gi magpalman Tuhan ninsila, yuk na, “Luu na situ jinisan tinanom-tinanom ka buwaꞌ-buwaꞌ kayu dean ku kaam man bi magbalanjaꞌ. 30Damikiyan, dean ku na du mimon katumbu-tumbuhan ni siga hayop ka ga sattuwa tawun ka ga manuk-manuk sampay mimon balnyawa ma palele mari luu balanjaꞌ da.” 31Pag ndaꞌ Tuhan mimon ma bay pinapayak meꞌ na, tud kamahapan na ya. Dari pag bay pingkaꞌ sangom, pag taabut sayu, ilooy na ni ka-nnom ngallaw na.
Currently Selected:
Panagnaan 1: sjm
Tõsta esile
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.