يوحنا 9
9
سِيذِيثْنغ عِيْسَى يسْݣنْفَا يج وضَرْغَاڒ
1وَامِي تُوْغَا عِيْسَى يݣُّوْر ذݣ وبْرِيذ يُوْفَا يجّن ن ورْيَاز ذ اَضَرْغَاڒ يخْڒق-د اَمنِّي. 2نَّان-اَس يمحْضَارن نّس: "آ لْمُعَلِّم، ؤُݣ إِي يعْصَان؟ مَا ذ وَانِيتَا مَا ذ لْوَالِدِين نّس وَامِي د يخْڒق ذ اَضَرْغَاڒ؟"
3ينَّا-ٱسن عِيْسَى: "وَار يعْصِي وَانِيتَا ؤُڒَا ذ لْوَالِدِين نّس. ئِخْڒق-د ذ اَضَرْغَاڒ بَاش مَارَّا اَذ ࢲرن مِين يزمَّر أَربِّـي اَذَايس يخْذم. 4خْمِي يتِيڒِي ذ نْهَار، ئِتْخصَّا-يَانغ أَ نخْذم ڒخْذَايم ن ونِّي إِي ذَايِي د يسّكّن. خْمِي د تَاوض دْجِيڒث، وَار يزمَّر ؤُڒَا ذ يجّن اَذ يخْذم. 5مَدَامَا عَاذ دْجِيغ ذِي دُّنشْت، نش ذ نُّوْر ن دُّنشْت."
6وَامِي ينَّا اَمُّو، ئِسُّوْسف ذݣ وشَاڒ يݣّا زَّايس اَبدْجَاع س يكُوْفَّان نِّي يسرْس-يث خ ثِيطَّاوِين ن وضَرْغَاڒ. 7ينَّا-ٱس عِيْسَى: "رُوْح اَذ تسِّيرْذذ ذِي صَّرِيج ن سِيلْوَام." (أَوَاڒ-أَ سِيلْوَام يخس اَذ يِينِي <ونِّي إِي د يتْوَاسّكّن.>) ئِرُوْح يسِّيرذ، يروّح يتْوَاڒَا.
8سِّيوْڒن جَارَاسن جِّيرَان ذ يِوْذَان إِي ث يسّْنن زِي قْبڒ نَّان، مَاشِي ذ وَانِيتَا يتْغِيمَان يتتَّار؟
9ڒبْعَاض زَّايْسن نَّان: "قَا ذ نتَّا."
نَّان ينّغْنِي: "لَّا، ئِتَاوِي-د ذَايس وَاهَا."
وَلَكِن نتَّا ينَّا: "قَا ذ نش."
10نَّان-اَس: "مَامّش ݣنْفَانْت ثِيطَّاوِين نّش؟"
11ينَّا-ٱسن: "بْنَاذم نِّي ؤُمِي قَّارن عِيْسَى ييْسِي-د اَبدْجَاع يسرْس-اَيِي-ث خ ثِيطَّاوِين ينُو. ينَّا-ٱيِي رُوْح غَار سِيلْوَام اَذ تسِّيرْذذ. رُوْحغ سِّيرْذغ، روّْحغ تْوَاڒِيغ."
12نَّان-اَس: "مَانِي يدْجَا؟"
ينَّا-ٱسن: "وَار سِّينغ."
أَضَرْغَاڒ نِّي يشهّذ خ سِيذِيثْنغ عِيْسَى
13ؤُوِين اَرْيَاز نِّي يذوْڒن يتْوَاڒَا غَار يفَرِّيسِيْين. 14تُوْغَا نْهَار نِّي ذ سّبْث ن لْعِبَادَا وَامِي ذَاس يسرْس عِيْسَى اَبدْجَاع خ ثِيطَّاوِين نّس يسْݣنْفَا-ث. 15نَّان-اَس ؤُڒَا ذ يفَرِّيسيْين، مِين ذَاش يوقْعن وَامِي شك تْوَاڒِيذ؟
ينَّا-ٱسن: "ئِسرْس-اَيِي اَبدْجَاع خ ثِيطَّاوِين ينُو، سِّيرْذغ ذوْڒغ تْوَاڒِيغ."
16نَّان ڒبْعَاض ن يفَرِّيسِيْين نِّي: "بْنَاذم نِّي وَار يدْجِي شَا زِي أَربِّـي مِينْزِي وَار يوقَّار شَا نْهَار ن لْعِبَادَا."
وَلَكِن ڒبْعَاض نّغْنِي نَّان: "لَّا، مَامّش بْنَاذم ذ لْعَاصِي زَعْمَا اَذ يݣّ لْمُعْجِيزَاث-أَ؟" خ مَانَايَا يوْقع لْخِلَاف جَارَاسن.
17نَّان-اَس عَاوذ إِ وضَرْغَاڒ نِّي: "مَامّش تْوَاڒِيذ شك ونِّي إِي ش يسْݣنْفَان ثِيطَّاوِين نّش؟"
ينَّا-ٱسن: "نتَّا ذ نَّبي."
18وَلَكِن عَاذ وَار ؤُمِينن شَا يسْرَائِيلِيْين نِّي بلِّي نتَّا تُوغَاث ذ اَضَرْغَاڒ يذْوڒ يتْوَاڒَا حتَّا وَامِي د ڒَاغَان إِ لْوَالِدِين نّس. 19نَّان-اَسن: "مَا ذ وَانِيتَا ذ مِّيثْوم إِي ثقَّارم يخْڒق-د ذ اَضَرْغَاڒ؟ مَامّش يݣَّا ڒخُّو نتَّا يِتْوَاڒَا؟"
20نَّان-اَسن لْوَالِدِين نّس: "نشِّين نسّن بلِّي وَانِيتَا ذ مِّيثْنغ يخْڒق-د ذ اَضَرْغَاڒ. 21وَار نسِّين شَا مِين ذَاس يوقْعن ڒخُّو يذْوڒ يتْوَاڒَا. وَار نسِّين شَا ونِّي إِي ث يسْݣنْفَان زِي ثِيطَّاوِين نّس. سّقْسَام-ث كنِّيو، نتَّا قَا يمْغَر اَذ يسِّيوڒ نِّيث خ يِيخف نّس." 22نَّان لْوَالِدِين نّس اَمنِّي مِينْزِي ݣّْوْذن زݣ يمقّْرَانن ن أَيث-إِسْرَائِيل. تُوْغَا يمقّْرَانن نِّي تَافْقن بلِّي ونِّي غَا يشهْذن عِيْسَى ذ لْمَسِيح، أَث طرْدن زِي ثمْزِيذَا. 23خ مَانَايَا نَّان لْوَالِدِين نّس سّقْسَام-ث كنِّيو نتَّا قَا يمْغَر.
24ڒَاغَان-د وِيس مَرّْثَاين إِ ورْيَاز نِّي تُوْغَا يدْجَان ذ اَضَرْغَاڒ نَّان-اَس: "إِيوَا حْمذ أَربِّـي شك! قَا نشِّين نسّن اَرْيَاز نِّي نتَّا ذ لْعَاصِي."
25ينَّا-ٱسن: "نتَّا مڒَا ذ لْعَاصِي زَعْمَا نش وَار سِّينغ شَا. سّْنغ يجّن ن ثْمسْڒَايْث: تُوْغَايي ذ اَضَرْغَاڒ ڒخُّو تْوَاڒِيغ."
26نَّان-اَس: "مِين ذَاش يݣَّا؟ مَامّش يݣَّا يسْݣنْفَا-ش زِي ثِيطَّاوِين نّش؟"
27ينَّا-ٱسن: "نِّيغ-اَوم-ت وَار ذَايي ثْصنّْطم شَا. مَايمّي ثخْسم اَذ تسْڒم عَاوذ؟ مَا ثخْسم ؤُڒَا ذ كنِّيو اَذ تِيڒِيم ذ يمحْضَارن نّس؟"
28زَوَرن-ث نَّان-اَس: "شك إِي يدْجَان ذ اَمحْضَار نّس! قَا نشِّين ذ يمحْضَارن ن مُوْسَى. 29نشِّين نسّن بلِّي أَربِّـي يسِّيوڒ اَك مُوْسَى، وَلَكِن ونِّي وَار نسِّين شَا مَانِيس إِي د يُوْسَا."
30ينَّا-ٱسن ورْيَاز نِّي: "مَانَايَا ذ ڒْعَجب! ئِسْݣنْفَا ثِيطَّاوِين ينُو، كنِّيو وَار ثسِّينم شَا مَانِيس نتَّا! 31نشِّين نسّن أَربِّـي وَار يتسْڒِي شَا غَار يِنِّي يعصَّان؛ لَّا، ئِتسْڒَا غَار يِنِّي إِي ث يتْوقَّارن ذ يِنِّي يخدّْمن س مِين يخس. 32عمَّارْص وَار نسْڒِي ذِي زْمَان بْنَاذم يخْڒق-د ذ اَضَرْغَاڒ اَذ د يَاس شَان يِجّن اَذَاس يسْݣنْفَا ثِيطَّاوِين. 33أَرْيَاز-أَ، مَعْلِيك وَار يدْجِي شَا زِي أَربِّـي اَتَاف وَار يزمَّر اَذ يݣّ وَالُو!"
34نَّان-ٱس: "شك ذ لْعَاصِي زݣ وَامِي د ثْخڒْقذ، مَا ثْرزُّوْذ اَذَانغ ثسْڒمْذذ نشِّين؟" ڒخْدّنِّي طرْدن-ث زِي ثمْزِيذَا.
35ئِسْڒَا عِيْسَى بلِّي ونِّي طرْدن-ث زِي ثمْزِيذَا. وَامِي ث يُوفَا ينَّا-ٱس: "مَا تَامْنذ زِي مِّيس ن بْنَاذم؟"
36ينَّا-ٱس: "مِين يعْنَا ونِّي آ سِيذِي حمَا اَزَّايس اَمْنغ؟"
37ينَّا-ٱس عِيْسَى: "أَقَا ثࢲْرِيذ-ث، ذ ونِّي إِي كِش يسَّاوَاڒن."
38ينَّا-ٱس: "ؤُمْنغ زَّايش آ سِيذِي." ڒخْدّنِّي يسجّذ-اَس.
39ينَّا عِيْسَى: "ؤُسِيغ-د غَار دُّنشْت-أَ اَذ حَاسْبغ حمَا يِنِّي يدْجَان ذ يضَرْغَاڒن اَذ تْوَاڒَان، يِنِّي يتْوَاڒَان اَذ ضرْغْڒن."
40سْڒِين-اَس ڒبْعَاض زݣ يفَرِّيسِيْين إِي يدْجَان ذِنِّي نَّان-اَس: "مَا ؤُڒَا ذ نشِّين ذ يضَرْغَاڒن نِغ؟"
41ينَّا-ٱسن عِيْسَى: "مَعْلِيك ذ يضَرْغَاڒن إِي ثدْجَام، أَتَاف وَار ذَايْوم بُو ڒْمُعْصِيّث. وَلَكِن كنِّيو ڒخُّو ثقَّارم نشِّين نتْوَاڒَا. خ مَانَاينِّي عَاذ ذَايْوم ڒْمُعْصِيّث."
Currently Selected:
يوحنا 9: ريف
Tõsta esile
Share
Copy
Want to have your highlights saved across all your devices? Sign up or sign in