Matyo 10
10
Yeso a Tú Ngaŋə́zoŋə́ndzəm Əjí zə̂ Ntsɔb Pɛ̌
(Mag 3.13-19; Luk 6.12-16)
1Yeso a fóŋ ngaŋə́zoŋə́ndzəm əjí ntsɔb pɛ̌ ə́fɛ̂ mətɨ nə́ pó á mə́ kəm nə́ əjwi təpɔŋ kə́ tsóʼ pɨ páʼ pó túg nə́ əlɔʼ pópə ntê məghɔ ntsəmə. 2Lɛ̌ məlɛ́n mə́ məntú mí mə́ ntsɔb pɛ̌; ntsɛɛmbi ŋwu lə́ Saamun (páʼ pə̈ fóŋ nə́ nə́ Pita lə́) pó ndim əyǐ Andəlu, Jɛmsə mɔ́ Zebedi pó ndim əyǐ Jɔnə; 3Filib pó Batolomiə, Tɔməsə pó Matyo, nkwânchubə aláʼə, Jɛmsə mɔ́ Alfɔsə pó Tadiosə, 4Saamun ŋwu zilɔd#10.4 Zilɔd lə́ kə pə́ nkyeetə yitsə̌ ə́ kə póʼnə nə́ ńgə́ aláʼə azóobə́ á tə́əmə ngǎ pó. pó Juda Iskaliɔt páʼ a nə fi nə́ Yeso.
5Yeso a nə ńtú pɨ pɨ ntsɔb pɛ̌ lə́ ńtə́gtə ághɔ́b ńgə́, “Kɔ nə́ kwúnə á mə́mə aláʼə pətəjǐsê kəənə á mə́m tɔ̂ŋ Pəsamalitan yitsə̌. 6Ghɛn nə́ pə́ á mbô məmbéŋ mə́ ndzɛd mə́ Islɛl páʼ mə́ péŋ nə́.” 7Nə́ ghɛn, nə́ tíʼə ə́sóŋə ńgə́, “Anuə nəfoonə nəpóolə á páatə!” 8Tsóʼ nə́ pəghoonə́, ńjúmkə pəkwûə, ńtsóʼ ngǎŋnkaʼ ńkə́ ńkəm pɛ̌sê. Nə́ kwá lə́ tə fɛ̂ nkéebə, kə́ nə́ ə́fɛ̂ kətaŋə. 9Kɔ nə́ túg nkáb yitsə̌ á apa pəənə́, kəənə á pə́ pə́ pəpɔ́ŋə́, pəshílə kɨ pəkə̂pa. 10Kɔ nə́ lɔgə̂ apeemə nənyinə kɨ ətsəʼ pɛ́n pɛ̌, kɨ ngwubə kɨ mbaŋ ńté ńgə́ pə́ chîə á mə́ zə́g nə́ ngaŋəfaʼ ntsəmə.
11Mbɔʼ nə́ kwúnə á tɔ̂ŋ ntsəm kəənə aláʼə atsəm, nə́ chwaalə̂ ŋwu páʼ mənu mí mə́ koʼnə̂ nə́ ńchîə á ndɛ̂ yí tə ńdáʼ ə́fɛ́lə. 12Ndɛ̂ ntsəm nə́ kwú nə́ ə́wɨ́ nə́ chaʼtə̂ ngǎŋndɛ̂, ə́sóŋ ńgə́, “Mbwɔ́dnə ə́ chîə á mbɨ pəənə́.” 13Mbɔʼ ndɛ̂ yi wɨ́ ə́ koʼnə̂, mbwɔ́dnə əjɨ ə́ chî wə́. Mbɔʼ jɨ́d ə́ chî koʼnə̂ pô, mbwɔ́dnə əjɨ ə́ pəənə̂ á mbô pəənə́. 14Mbɔʼ ŋwu ntsəm páʼ a kě nə́ áwə́ənə́ á ndɛ̂ yí pí pô ńkə́ ńchîə atséebə ajɨ́ jwə́ʼtə pô, nə́ tə́ ə́fɛ́lə á ndɛ̂ yi wɨ́ kəənə á aláʼ yə wɨ́, nə́ kɔdtə̂ akəpóglə́ á məko pəənə́. 15Mäŋ fiʼtə̂ áwɨ́ nə́ ndə̌ŋdəŋ ńgə́ á yǒ pə́ alě asáʼə́məsáʼ lə́ Əsê a túgə akóolə́mə́lə́ŋə á mbô pɨ pə́ Sodom pó Gomolya ńtsɛ pɨ pə́ tɔ̂ŋ yi wə́.
16Mäŋ túmə áwə́ənə́ apeŋ lə́ ándó məmbéŋ mə́ ndzɛlə á mə́m əfunə́. Nə́ shib ńgyáŋə ándó mənóolə ńkə́ ńchî nə́ əpoʼ wə́ənə́ ándó alúʼə. 17Lɔg nə́ ndɛd nə́ pɨ pə́ təpɔŋə; pó yǒ lɔgə̂ áwɨ́ ghɛn ə́fɛ̂ á mbô ngaŋə́sáʼə́məsáʼə kə́ ə́shúmə áwə́ənə́ á mə́m məláʼ mə́ Əsê mə́ Pəjusə. 18Pə́ yǒ soŋə̂ áwɨ́ ghɛn nə́ pəənə́ á mbi ngaŋə́sáʼə́láʼ pópə pəfo ńté mə. Zəənə́ á yǒ fɛ̂ əseenə á mbô pɨ ńgə́ nə́ náŋkə nkɨ yi əshîʼnə á mbô pó ḿbɨ ḿbá pətəjǐsê. 19Əghâ ándó pə́ yǐ nə́ ńgwaamə̂ áwɨ́, kɔ nə tə́ ńjwaʼ mbɨ əjɨ ńgə́ pəg yǐ sóŋə pə́ ńgə́ akə̂ kɨ ńgə́ pəg yǐ chwáakə pə ńgə́ akə̂. Ndɛd yi wɨ́ ə́ yǒ koʼ, pə fiʼtə̂ áwɨ́ nə́ anu mbɔʼ nə́ sóŋə. 20Ńté ńgə́ lə́ lǒo kě pɨ tséebə pô. Lə́ lǒo pə́ Ajwiə Tǎ páʼ a yǒ nə́ tséebə laŋə̂ á mə́m pəənə́.
21Pɨ pó yǒ fi pəlim pɔ́b pə jwítə, pətǎ pə kə́ fi pɔ́ póobə́. Pɔ́ pə́ yǒ tsɔ́ʼ pɔ́ pə́ ŋwíŋ tə́əmə a ndzəm pətǎ pɔ́b pópə pəmǎ pɔ́b tə ghɛd pə jwítə ághóobə́. 22Ŋwu ntsəmə a yǒ peenə̂ áwɨ́ té mə, lə́ ŋwu ntsəm páʼ a yǒ nə́ ńtɨ́ ńtyantə̂ tə ńkoʼə̂ a ndwegtə a yǒ chwáalə. 23Mbɔʼ pə́ yǒ ńtsaŋkə̂ áwə́ənə́ aliʼə́ atsəm, nə́ kə ńgɛnə̂ aliʼə́ ndaʼə. Mäŋ fiʼtə̂ áwɨ́ nə́ ndə̌ŋdəŋ ńgə́ Mɔ́ Ŋwunə a yǒ jitə̂ yǐəə lə́, nə́ kě ndɛd túgə á mə́ kwú nə́ á mə́m əláʼ ətsəmə á mə́m Islɛl nə́ nkɨ yi əshîʼnə ghɛn pô.
24Ndzoŋdzəmə a kě jî ńtsɛɛlə̂ ndzéʼkə əyǐ pô, móonə afaʼə a kě kə́ ńjî ńtsɛɛlə̂ tǎ afaʼ əyǐ pô. 25Á koʼnə̂ á mbô ngaŋə aŋwaʼlə á mə́ chî nə́ ándó ndzéʼkə əyǐə, ńkə́ ńkoʼnə̂ á mbô móonə afaʼə á mə́ chî nə́ ándó tǎ afaʼ əyǐə. Mbɔʼ pə́ fóŋ nətû nə́ ndɛ̂ nə́ əfo pɛ̌sê, lə́ələ́ pə́ ńgə́ pə́ yǐ fóŋ ngǎŋndɛ̂ nə́ əlɛ́n páʼ wɨ́d ə́ pə́g nə́ ńdaŋə̂ wɨ́d wə̂.
Ŋwunə a Koʼnə̂ nə́ Mbɔʼ Pə́ Pɔ́gə Yə́
(Luk 12.2-7)
26Á pə́ ńgə́ kɔ nə́ pɔ́gə ághóobə́. Anu yətsə́ a kě ə́wɨ́ chî páʼ pə kə́bkə nə́ páʼ pə́ yǒ nə́ kě ŋáʼ pô. Anuə atsəm páʼ pə́ lyáŋ nə́, pə́ yǒ ghɛd pə́ jîə. 27Anu maŋ sóŋ nə́ nə́ pəənə́ á mə́m ndzəmə́, fiʼtə̂ nə́ zə́ələ́ á mə́m əliʼ pə ŋwaʼ nə́. Anu pə́ kə́ nə́ ńchámtə á nətôglə pəənə́, kɔ́ʼ nə́ ńtə́əmə á ndu məláʼ ə́fiʼtə̂. 28Kɔ nə́ pɔ́gə ŋwu páʼ təmbɔʼ a jwítə tsɔʼə na mbɨ ḿbə́ ńkě chî təmbɔʼ a jwítə mə́lə́glə pô. Lə́ pɔ́g nə́ pə́ Əsê páʼ təmbɔʼ a tsəŋkə̂ na mbɨ pó mə́lə́glə á mə́m móg tə měe. 29Pə́ kě mənchwînə mɛ́n mbɛ̌ nə́ táʼ ndɔ́la finə̂? Lə́ təmbɔʼ táʼə á pə́ ńkě á əsê wǔ tsɔʼə tə ghə́ Tǎ əwəənə́ a pí pô. 30Tsɔʼə mənoŋ mə́ chî nə́ atû pɨ pətsəm, Tǎ əwəənə́ a kə́ ə́sháŋə mə́ələ́. 31Lə́ələ́ pə́ ńgə́, kɔ nə́ pɔ́gə, nə́ səglə̂ ńtsɛɛlə̂ apoŋə mənchwînə.
Pɨ pó pí nə́ nə́ Klisto pópə pɨ pó kǐ nə́ yə́
(Luk 12.8, 9)
32Ŋwu ntsəm páʼə a pí nə́ mə á əshîsaŋə, maŋ yǐ kə́ pímə yə́ á mbi Tǎ mə páʼə a chî nə́ á nəpóolə. 33Lə́ ŋwu ntsəm páʼə a kǐ nə́ mə á əshîsaŋə maŋ yǐ kə kǐə yə́ á mbi Tǎ mə páʼə a chî nə́ á nəpóolə.
Maŋ kě lə́ nə́ Mbwɔ́dnə Yǐ Pô Maŋ Yǐ lə́ nə́ Ŋwíŋ Ntsoolə
(Luk 12.51-53; 14.26, 27)
34Kɔ nə́ kwaŋ ńgə́ maŋ yǐ lə́ á mə́ fɛ̂ nə́ mbwɔ́dnə á ndu ndəsê. Maŋ nə ńkě yǐ lə́ á mə́ fɛ̂ nə́ mbwɔ́dnə pô, maŋ kə yǐ lə́ á mə́ ghɛd nə́ ńgə́ pɨ pə́ tə́ ḿbóʼnə nə́ ŋwíŋ ntsoolə. 35Ńté ńgə́ maŋ kə yǐ lə́ á mə́ kɔn nə́ atûə mɔ́ mbyâŋnə pó tǎ əyǐə, ə́ kɔnə̂ yə mɔ̂ məngyě pó mǎ əyǐə, ə́ kɔnə̂ yə́ ngwě mɔ́ pó mə́pɨ́ əyǐə. 36Ngaŋkəpa ŋwunə a yǒ tíʼ pə́ lə́ ndim əyǐə.
37Ŋwu ntsəm páʼ a kɔŋ nə́ tǎ əyǐ kəənə mǎ əyǐ ńtsɛɛlə̂ mə, a kě koʼnə̂ á mə́ pə́ nə́ ndzoŋdzəmə mə pô. Ŋwu ntsəm páʼ a kɔŋ nə́ mɔ́ əyǐ yi mbyâŋnə kɨ yi məngyě ńtsɛɛlə̂ mə, a kě koʼnə̂ á mə́ pə́ nə́ ndzoŋdzəmə mə pô. 38Ŋwu ntsəm páʼ a kě nə́ atǐə apagləpaglə ají twá ńdzoŋə̂ mə pô, a kě koʼnə̂ á mə́ pə́ nə́ ndzoŋdzəmə mə pô. 39Ŋwu ntsəm páʼ ä chwa nə́ nchîmbî əjǐə a yǐ péŋkə zə́ələ́, ŋwu ntsəm páʼ a péŋkə nə́ nchîmbî əjǐ ńté mə a yǐ zə́ənə zə́ələ́.
40Ŋwu ntsəm páʼ a pí nə áwə́ənə́ á ndɛ̂ yí, a pí lə́ mə, ŋwu ntsəm páʼ a kə́ nə́ ḿbímə mə á ndɛ̂ yí, a pí lə́ ŋwu páʼ a tú nə́ mə. 41Ŋwu ntsəm páʼ a pí nə́ ntûsê á ndɛ̂ yí ńté ńgə́ lə́ ntûsê, ä kwá ntsɔ́ʼəfaʼ ntûsê. Ŋwu ntsəm páʼ a kə́ nə́ ḿbímə ŋwu páʼ a tɨ́ nə́ ndə̌ŋdəŋ, ńté ńgə́ lə ŋwunə a tɨ́ nə ndə̌ŋdəŋ a yǐ kwá ntsɔ́ʼəfaʼ ŋwu páʼ a tɨ́ nə́ ndə̌ŋdəŋə́. 42Mbɔʼ ŋwu tsə̌ a kə fɛ̂ tsɔʼə táʼ ndɔ́ŋ nkǐ yi féŋtə nə́ á mbô táʼ mɔ́ ghɛn yitsə̌ ńté ńgə́ lə́ ndzoŋdzəm mə, mäŋ fiʼtə̂ áwɨ́ nə́ ndə̌ŋdəŋ ńgə́ a kě ntsɔ́ʼəfaʼ əjǐ yǐ péŋkə pô.
Currently Selected:
Matyo 10: azo
Tõsta esile
Share
Copy
Want to have your highlights saved across all your devices? Sign up or sign in