Luka 4
4
Shetene ɗeɗim Yesu
(Matta 4:1-11; Markus 1:12-13)
1Yesu ruhwaka i Shinekw Cuɗiɗɗina ga, huwaya ada Urdun‑a, Shinekw sahan hukəla ala akiɓde, 2ha hənɗay kurkur fuɗaw, Shetene ɗeɗimka akənahan, ba s'ama kini pika ba a hənɗay hay sahan de. Adede a ahan ga, may vəɗka. 3Mezlene Shetene dzakəna, wa: «Abə ba ike Kine s'Askwaf ga, dzana zla a kuwan gə na saŋa á mbiɗka ɗəfka.» 4Yesu zləmkənhənaŋa, wa: «Niya i hətsɗay a wakita s'Askwaf de, wa: “Ɗu səlammərzheŋ ga, ǎ za apə ɗəfka ɗaya ba#Me Gurɗay 8:3.”»
5Shetene ane dzənkəlede ala apə ma tsəgwanna ka, ciɗa mbəslkəlhan gurɗay bay hay gə a duniya de ba cecena, 6wa: «Ə̌ŋ vərak hakuma atə duna tsəre gə a gurɗay bay hay sahan de ba cecena ayika. Aɗaba ɗa ɗəfkude a alay de ayuwa, ənne kini əŋ vərna a ɗu gə əŋ mica. 7Abə kə hətskuka tsaw galəmnzay ayuwa ga, ihay sahan ba cecena gɨkiya ande ayika.» 8Yesu zləmkənhənaŋa, wa: «Niya i hətsɗay, wa: “Hadzən galəmnzay aba Askwaf Ɗuduwuna aka, gɨn sləra aba ayina wuran ɓile#Me Gurɗay 6:13.”»
9Shetene ane hukəla ala a Zheruzalem, laka a təfɗila apə ŋa s'adaw s'Askwaf‑a, dzakəna, wa: «Abə ba ike Kine s'Askwaf ga, njuŋa zla ada akəna ka ala akapa, 10aɗaba niya i hətsɗay, wa: “Askwaf ǎ dzatəna a malika hay ene à ɗá cigken#Awar 91:11.” 11Adəɓa kini, wa: “À ɗá naya a veɗikinakude al alay tan gəni kə tanaŋa ba aba səlay‑a kini apə kuwan‑a#Awar 91:12.”» 12Yesu mbəɗkəlhənariya, wa: «Niya i hətsɗay, wa: “Ɗemɗema ba Askwaf Ɗuduwuna aka#Me Gurɗay 6:16.”» 13Shetene ane kəɗkəlede dabari hay ene ba cecena a ɗeɗimɗiya ga, hərkənde ba huɗay ene, si bigeɗe adəɓa.
Tamandar sləra Yesu a Galile
(Matta 4:12-17; Markus 1:14-15)
14Yesu ane mbəɗiŋa ala a Galile, ruhwaka i nzəɗa Shinekw Cuɗiɗɗina. Labara ene slide a higay sahan de ba cecena. 15Tsətsugəkəlhətan away a ɗaha hay a adaw guɓaɗay hay tan de, ɗaha hay ba cecena ɗa ɗəɗəmika.
Ɗa Nazaret ɗa təfka bə Yesu
(Matta 13:55-58; Markus 6:1-6)
16Yesu laka ala a Nazaret, a hu de gə wuran ghərak ede. Bək həts mbas ga, laka ala a adaw guɓaɗay de ka aŋa gigiya, mezlene slabakakude a dza wakita. 17Ɗa vərkən wakita s'Ezayi ɗu mbəɗɗitənande me s'Askwaf a ɗaha hay, papərkede ga, nzək ma gə niya i hətsɗay ede, wa:
18«Shinekw Ɗuduwuna niya apə ayuwa,
təfkənwede a nanɗilhətan Labara Sələmna a talage hay.
Sləninaw a dzaɗitəna a daŋgay hay, gəni à ɗá nje ŋa tan,
a ndaɗinpətəna aray a ŋgulaf hay‑a,
a zluɗitəna ɗa gə ɗa sa zlaɗa a alay de a ɗaha hay,
19a nanəɗil vaɗay gə Ɗuduwuna ǎ gɨtən səlam tsəre ene a ɗaha hay apəna saŋa#Ezayi 61:1-2.»
20Yesu fuɗəkakude wakita ane vərkəna adəɓa a ɗu gə ge sləra a adaw guɓaɗay de sahan, wuran zakakade. Ba cecena ɗa gə akənahan aray ba pəcayya ala apəna. 21Mezlene takənmandar‑a a dzaɗitəna, wa: «Me gə na a wakita de saŋa ga, gaka jire bəkwa ayikuna a aŋəde kwa sənay saŋa.» 22Ba cecena tan ɗa higak ala apəna, ɗa ge ba s'ajipu apə me sələmna ka gə nikede ada me ene ka saŋa, ɗa dzawa, wa: «Ba wuran bəhe kine Zhuzef saŋa?» 23Yesu dzəktəna, wa: «Əŋ səna ɗəma, à kwá dziwa araja gə wa: “Duktar, mbirka ŋa aka ba s'ike. Igə ma sənay kə gəka a Kafarnahum saŋa, gɨka zla akəna a hu aka de kini.”» 24Ɗəfkənhətənaŋade adəɓa, wa: «Na əŋ dzakuna ba jire, ɗu mbəɗɗitənande me s'Askwaf a ɗaha hay gə ɗa təva i higəɗay a hu ene de saŋa, ba ɓile kini niba. 25Ba jire na əŋ dzakuna adəɓa, wudəge hay hər hay ɗa zak duna a Israyila de a zamane s'Eliya de. A ahan de tsaw aveŋ ndəɗak ba aride, ha vaɗay məŋgan i tiɗma, may duwuna naya ala a larde sahan de ba cecena saŋa. 26Amá Askwaf slənka bə Eliya, gha ala adə wiya tan kini a wudəge hay hər hay sahan de. Si tá slənka ala a ma s'aŋa de a hu Sarepta de a higay Sidun de#1 Bay 17:8-16. 27Ɗa dərve kini ɗa zak duna a Israyila de a zamane s'Elisa de ɗu mbəɗɗitənande me s'Askwaf a ɗaha hay, amá ba ɓile kini niba ɗu gə mbəraka laŋŋa ayitənde, si Naaman ɓile, ɗu Siriya#2 Bay 5:1-14.»
28Ba cecena ɗa gə wutə a adaw guɓaɗay de sahan, bembec vəɗəktəna a aŋəde ɗa sənay a me ene sahan. 29Mezlene ɗa slabakakude, ɗa gətskede ala apə dəɓa hu‑a, ɗa dzənkəlede ala apə ŋa tsəɓakw‑a gə hu tan apəna saŋa, gəni ɗa hadzəna alay ala akapa. 30Amá, lakede a duvak tan‑a, bərək ba ciba ene.
Yesu ɓər jini a ɗaha de
(Markus 1:21-28)
31Yesu ane laka a Kafarnahum, a hu s'iŋgeɗe de a higay Galile de. Ba kəla bək həts mbas ga, lilike a tsugəɗilhətan away a ɗaha hay. 32Ɗaha hay ɗa ge ba s'ajipu apə tsugəɗay ene ka sahan, aɗaba hakuma niya a me dzaɗay ene de#Matta 7:28-29. 33Mbatse ɗu gə i jini gə zlasaw kini, niya a adaw guɓaɗay de akənahan. Ŋgulahaka ba dunduna, wa: 34«Hay! Ike Yesu humas ɗa Nazaret saŋa mà, kə gwasa ama a ma man de? Kə naya a shishɗilmene təku? Əŋ shinken ɗəma, ike Ɗu Cuɗiɗɗina s'Askwaf.» 35Yesu ane sləkkənaŋade a jini sahan abi nzəɗa, wa: «Panande a me aka ba səgan, lede ada dagwa saŋa ka!» Mezlene jini sahan zləɓkənŋa a dagwa ane ala agide aba a dagava ɗaha hay de, sləŋa nayede, ba s'ama kini gəkəna ba. 36Ɗaha hay ba cecena ɗa ge ba s'ajipu ene, ghaya ɗa dzawa a duvak tan de, wa: «Aŋa mà, me gəna tete? Dzatənka me i nzəɗa atə i hakuma a jini hay ni, ɗa nikede ada ɗaha ka saŋa!» 37Mezlene ɗa slakəlde labara ene a higay sahan de ba cecena.
Yesu mbure ɗa kuza
(Matta 8:14-17; Markus 1:29-34)
38Mezlene Yesu ane nayede ada adaw guɓaɗay Zhuwif hay‑a sahan ga, huwak ala adə Simuŋ. Məman s'adaw ene a Simuŋ sahan, zhek ene i pəɗəkɗay, hənhan awiba. Ɗa gəkən kəmkam a Yesu, gəni á mbirka. 39Yesu ane kəɓkənaŋade a hər sahan, ghaya sləkkənaŋade a pəɗəkɗay zhek sahan ga, nəŋkəla sakka, ciɗa slabakakude, takənmandar‑a a gəɗitən sləra.
40Apas kini sləŋa niŋke ala a məman de ga, ba cecena ɗa gə ɗagaditan ɗa zak apə kuza hay‑a gərgərgəra saŋa, ɗa tsəmitan ala a ma Yesu de. Wuran hahadzəktənaŋade alay hay ene i ɓili‑ɓiliya, mburəktənakude. 41Duna ba ɗa gə jini hay ɗa nanayede ada a ayitəna, ghaya ɗa ŋgulihke, wa: «Ike ga, ike Kine s'Askwaf!» Amá Yesu sləkəktənaŋade, nəŋkəlhətan bə ciba a dzaɗay, aɗaba ɗa səna gəni Yesu saŋa wuran Kristu.
Yesu nenil Labara Sələmna a higay Zhude de
(Markus 1:35-39)
42I ŋamandaɗay ga, Yesu slabakakude, nayede, huwaka ala apə dəɓa mene ka. Fuɗəɗay ɗaha duna ɗa laka a gusɗiya. A aŋəde ɗa laka a nzəɗiya ga, ɗa zləhka bə huke a ma tan de, gəni á huwa ba ala a meɗe de. 43Amá wuran, wa: «Si əŋ mɨtənka Labara Sələmna s'i gurɗay s'Askwaf saŋa a hu hay s'iŋgeɗe kini, aɗaba Askwaf sləninaw aba a ahan.» 44Mezlene ɗəfkənande a nanɗilhətan Labara Sələmna a ɗaha hay a adaw guɓaɗay hay Zhuwif hay de a higay Zhude de.
Currently Selected:
Luka 4: mlr
Tõsta esile
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.