Kejadian 7
7
Ik ebe waga wene
1Asogo tegeimu, Nenaik ’gain Onuk Logo a’ge en Nuh disogo mo’gulesi,
“O yogodak ya pam, hat homu nak e, an nagai a’ge modok taga legenma hiegi o. Holuk e, hat hugwe heiyagai enemin ik so ogola ’gwi lu o. 2-3Asogo ’gwi lagalat e, wam, tue, ’baik, a’gul onuk lo’bok emin, di a’ge yu a’ge e’gik erlak oruak elit no a’ge a’gul onuk lo’bok emin, ebe sabit pam nak ogun ugwe lo’bokhegeik ’gwelabugulat, asua no puk a’ge re, a’gul onuk lo’bok ebe mesik-mesik ogun ugwe lo’bokhegeik, ’gwelabip o. 4Agauwa sabiren weleiktik e, aphwami enebe emin, di a’ge yu a’ge emin, an en walentegis a’ge eba waronobuagoluk an en moru ’belabu agoam tenak modok oruakhwe agauwa hup erlige 40 hari at nasu modok welema o,” oluk mo’gulesi. 5Asogo mo’gulesimu, at Nuh ano, Allah en e,
“Disogo togu lomup, asogo togu lomup,” oluk mo’gulesi a’geat hegitsogo tegei.
6At Nuh ano ebe umur 600 tahun oruakma en, ik ebe ano ’gwiang sebelu aga. 7#Mat. 24:38,39; Luk. 17:27Asogo wagokhwe, at Nuh ebe emin, ugwe emin, eneiyagai enebe emin, onugwami emin, ik ebe ano en waronobu erlakma en delonobuagoluk ik so ano ogola ’gwigisa. 8-9Asogo ’gogulat, Allah en e,
“Disogo togu lomup, asogo togu lomup,” oluk mo’gulesi ’gela’geat, wam, tue, ’baik, di a’ge yu a’ge a’gul onuk lo’bok we no a’ge emin, asua no puk a’ge emin, ogun mesik-mesik ugwe emin lo’bokhegeik woluk enebe enemin ik so ogola ’gwigisa. 10Asogo ’gwigisarik, agauwa hebarligen welegesarik, agauwa mesik oruakma en e, ik ebe ano arat wagarik o ’gwiang modok arat sebelegei.
11 #
2Pet. 3:6
At Nuh ebe umur 600 tahun dugwi is wenarogu legesa ’gela’ge nomor 2 a’ge tanggal 17 pam ik elaruk ’gwiang o’gwe en ’berlegat husogo lasulat, ’bogorl o’gwe en ’berlegat husogo lasulat, tegei. 12Asogo husogo lagama, moru nasu modok oruakhwe, hup erlige agauwa 40 hari pamat welegesa. 13Eria hegit e, Nuh ugwe e’birek emin, aphwami Sem emin, Yafet emin, Ham emin, onugwami emin, ik so ogola ’gwigisa. 14Is enebe ’gogulat, wam, tue, ’baik, di a’ge yu a’ge logon a’gul onuk lo’bok il ena a’ge emin, il maro a’ge emin, wei a’ge lok a’ge ’berlegat woluk ’gwigisa. 15-16At Nuh ano so ogola ’gwiselat, at Allah en mo’gulesi hegitsogoat wam, tue, ’baik, di a’ge yu a’ge e’gik erlak oruak a’gul onuk lo’bok ai, ogun ugwe emin lo’bokhegeik woluk ’gwegei. Asogo ’berlegat woluk ’gwegeimu, Nenaik ’gain Onuk Logo a’ge en ik so ’goduk lerak pesi.
17Ik ebe ano ye’gelil ligagokhwe agauwa 40 hari pam oruakhwe ik ano yarat ye’gelil ligagalat, so ano ik ogum pam poluk ha’boksogo woluk ligaga. 18Ik ebe ano asogo ye’gel-ye’gel yarat ligagama, so ano ik ogum pam ha’boksogo woluk ligaga. 19Ik ebe ano asogo yarat ligagarik, dom yat ereiya petne a’ge modok sebelegei. 20Ik ebe ano asogoat hettak-hettak modok ’bete egeitik modok dom a’gul sebelholuk hwerli 7 meter modok ’betesogo ye’gelegei. 21-23Asogo hettak til ligagalat, Nenaik ’gain Onuk Logo a’ge en aphwami enebe emin, wam, tue, ’baik, di a’ge yu a’ge e’gik erlak oruak ebe wei lok ’gwiangma welago a’ge ’berlegat warenebegei. Asogo warenebiselat e, we, at Nuh emin so ogola ’gwigisa a’ge nak waronobu erlakma en delenebegei. 24Ik ano ’buom erlak modok oruakhwe agauwa 150 hari pam welegesa.
Currently Selected:
Kejadian 7: Wul
Tõsta esile
Share
Copy
Want to have your highlights saved across all your devices? Sign up or sign in