Juan 7
7
Jesús desade ore chotigase úringai Dupade utocaite
1Cuchade udojo quigade enga Jesús diguiji ore uniri Galiléa údode uje chacate ore iji quedéjnane. Que pota jóroga ujetiga chajniápo aja ore uniri Judéa rĩ. Chiraja uje judíode ore chujérase iji Judéa gu. 2E idógosi judíode ore jnusinamáni dire uje ore pésu daguíjna noñiméone iji. 3Jecute Jesús desade ore chojninga:
–Jé ca ayáji de. Bo ga acáji Judéa. Enga banguresórone iji ta ore chimo bapesudode to. 4Ujetiga gosi ucuei tu ujetiga pirajaque gosi ome dojode ayoréo, a ca uté gosi pógu dapesudode. Jecute bo enga ango bapesútedatéode aja erámi jnese.–
5Jesús desade ore urásu ujetiga ore changureta, mu que ore changureta go. Jecute ore uruode cho piboqueréringane ome Jesús. 6Mu Jesús chojninga:
–Cáma deréjnai u ujetiga yingome yu aja erámi. Mu deréjnane cho ñane ome uaque. 7Mu que togome uaque ujetiga erámone jogosórone ore chetaque uaque. Mu ore chetaque yu. Uyu u gu uje yingopísa ore ate gajnaréngone aja ore. 8Boyo, acayóji yocujnusinamáni dire iji Jerusalén. Chamáñaje a jé ca yijína uaque to jne. Cáma yajnei tu ujetiga yicáji.–
9Chimate daruode udojo enga jé u uje cháji Galiléa.
Jesús chicáji Jerusalén ome judíode ore jnusinamáni dire
10Uje Jesús desade ore jno que enga jé u uje Jesús chajna ore to aja ore jnusinamáni dire. Mu Jesús pógu dacoringai. Gaidi u gu ujetiga ayorérigo ca chiraja. 11Judíode ore chucué Jesús iji ore jnusinamáni dire enga ore chojninga:
–¿Jé dépisi rique jnani uté?–
12Enga ayorébui ore tujua Jesús i aja quedéjnane. Uñane ore chojninga: "Paraguipise jnani uté." Mu uñane ore chojninga: "Que paraque go. Aringácachoquí."
13Mu jecucha ga ore pógu dacatecãraitigade udore. Ore todópisa dangaránone gu.
14Judíode ore jnusinamánone díño cáma chise eruei uje Jesús chise Dupade iguíjna cuchábi. Chacája enga jé u uje chacate ore iji. 15Enga Jesús acajnaquéode chajuque judíode ore agutedie enga ore chojninga:
–Jé go uje chiraja cuchade jnese. Que ayorérique chacate ome irajatigade múñi.–
16Mu Jesús chojningame ore:
–Yacajnaquéode udojo que garani u yu mu garani u yirósõri uje chiroque yu aja jnumi nanique. 17Ujetiga gosi angoninguinone guesája ome Dupade enga a chiraja yacajnaquéode udojo garãtique. Jeoga garani u Dupade, jeoga garani jé u yu. 18Uacarajáyo uje gosi chedu re ome dojñáringo quitígo enga uté gosi ucuei u dáringárique picotaque. Jé basa ga gosi ucuei u darósõri úringárique picotaque enga chedu darósõri ome dojñane. Enga que aringácachoquí uté mu ũrepíso ojñane.
19¿Ja ca ũré yu a? uje Moisés u uje di Dupade iroquéode údi iji uaque nanique. Mu que uacuñeque déji ujetiga doi udore quigode. Uje Dupade iroquéode chojninga: "Ca ajé bojórique ayoré." Mu uhuaque, uacapótayo chui ome yu.–
20Mu uñane ore chojningame:
–A Satanás utocaitique déji bajei enga a ãraque ua ¡jõ! ¿Jé gosi te a ujetiga pota chui ome ua ya?–
21Jesús chojningame ore:
–Ísega yipesútedaté casica chajuque uacagutedie ica uje yiqueta jnani noñai ica iji dire puyai. Enga uaquetei u uté iji yu. 22Uacarajáyo uje Moisés chiroque uágaja ujetiga acáyo uacape diyoquíode iji dire gare iji ti iji ore batigai quigade. Jecute uacabeyoi Moisés iroquéode udore quigode enga uacacáyo uacabode uje dire puyágome uaque múñi. (Mu que gusu Moisés uje chiroque uágaja udore. Mu uacayode jnani bajácho, uje bajac ore ome Moisés, ore jmapié u to nanique.) 23Que apótayo ayóyo Moisés ojningane cucha gáyode jecute uacacáyo uacape parátagabode uje dire puyai ome uaque múñi. Enga que etácho ñane ome uacasocade udore. ¿Ome gotique gu a uje ájningarãque uágome yu? Uje yiqueta jnani uté údode jnese iji dire puyai ica. 24Que toc ujetiga jĩraque gosi chiraja dojórique ayoré áyipie quigode. Jecute ajichopise cuchade aja quigode bajaque ujetiga arajáyopise cucha dacadode udore quigode.–
Jesús chatata darani ome ore
25Udojo quigade enga Jerusalén idaisórone uñane ore catecã́ri ñane ome Jesús úringárique chuque. Enga ore chojninga:
–¿Ja ca Jesús uté u ore ucuei ujetiga ore chujé a? 26Mu déji ti. Enga chacate ayoréode ore iji yoquedominone. Mu que pógu re go. Enga que uñeque cási ujetiga chãraque darai ome. Ísega yocangarádejnane ore changureta úringai yoquijnati Crísto, ¡jõ! 27Mu a ca u, ¡jõ! Uje yirajágo uté idai. Mu ujetiga yoquijnati Crísto di ga a ca uñeque chiraja garãtique.–
28Uje Jesús chudute ore uruode iji Dupade iguíjna cuchábi ajei uje jé déji dacaditigade gai enga chejnapúsu daruode, enga chósi te ome daru uajádode:
–Uacáyipiedie qui u uje uacarajáyo yu enga chiese arajayópo yarani te rĩ. Mu que yise de jnumi ome yáyipie quitique. Mu yise de gu yirósõri uje ũrepise uruode quigode. Mu uhuaque, que arajáyo yirósõri uté go. 29Uyu u uje yiraja. Yarani u uté gu uje uté iroque yu aja jnumi tudé nanique.–
30Jé u uje judíode ore angaránone ore potapísa ujetiga ore chisa enga ore jno údi. Mu que togome uñeque ujetiga chisa. Uje cáma deréjnai u gu ujetiga ore chisa. 31Mu uásejna ore iji ayorébui ujade uje ore changureta Jesús úringai Crísto. Enga ore chojninga:
–A ca toque jne ujetiga uñeque cuse ujetiga sué uté gai ome uté ipesudode cuchadatéo.–
Fariséode ore chiroque Dupade iguíjna cuchábi irodisórone ujetiga ore chisa Jesús
32Uje fariséode ore chudute ayoréode ore uruode uje Jesús u ore ijnati Crísto, enga ore tibágui sacerdóteode ore angaránone ujetiga ore chiroque Dupade iguíjna cuchábi irótigo uñéngo aja Jesús yui ujetiga ore chisa enga ore suru gai. 33Enga jé u uje Jesús qué catecãrápoi ayorébui rĩ enga chojninga:
–A yácarabíji uacari jne iji dire garósirigo. Enga quigade jne enga yajnésaru yirósõri jogadi. 34A acueyoi yu jne mu a ca esópo yu jne rĩ. Chamáña gu uje a ca togome uaque jne ujetiga eso yijogadi.–
35Jé u uje judíode ore catecã́ri ñane enga ore chojninga:
–¿Jé chicapi rique jne uté ujetiga ca yimóngopo jne rĩ? A chicáji ore uniri Grécia jne. Uacamóño uje uásejna judíode ore iji ta. A pota chacate gréciagosode ¡jõ! 36Chimo jóroque re daruode quitique ome yoque uje chojninga: "A yiji jne ome uaque. A acueyoi yu jne mu a ca amóñopo yu jne rĩ. Uje que togome uaque ujetiga acayóji yijogadi."–
Jesús chacãra danguresórone garíjogonóri Espíritu Sánto aja yodi uje chayóji sibíjnai
37Judíode jnusinamánone dire erueminóri u uje ore pésupúsu cuchade aja quigode iji. Diri uté u uje Jesús chague enga catecã́ri ore ome daru uajádode enga chojninga:
–Gosi ujetiga cajnóriji, doi ga tibágui yu enga chóji yerani yote ueca. 38Uje Dupade uruode chósi te: gosi ujetiga changureta yu enga gajnui u sibíjnai uje yodi chayóji enga pésu re enga tié. Uje yodi uté yote ueca.–
39Jesús uruode qui u ujetiga gosi changureta ga jogadi u ujetiga Dupade Ujopié Espíritu Sánto chacája gosi. Mu cáma chacája Jesús anguresórone gu uje Jesús qué déji jnumone enga cáma chicáji gaté gu ome dáringai eduguéjna cuchape.
Ayorébui ore botare ñane
40Uñane iji ayorébui udore ujade ore chudute Jesús uruode udore enga ore chojninga:
–Que potigayaquérique déji jnani uté úringai yoquijnati Dupade angúromei proféta.–
41Uñane ore chojninga:
–Yoquijnati Crísto jé u.–
Mu uñane ore chojninga:
–A ca yoquijnati Crísto u go. ¿Ja yoquijnati Crísto tõrarásiji Galiléa jne a? 42Uacarajáyo uje Dupade uruode qui jé u uje yocai jnani bajai eduguéjna David ape disi ejoi jé u yoquijnati Crísto jne. Enga idai jé u jnani bajai David idai to, uje Belén u.–
43Jecute ayorébui udore ore chajuque uñane ajéode ome Jesús. 44Uñane iji ore, ore ajéode u ujetiga ore chisa enga ore suru Jesús gai. Mu que uñeque pésu.
Judíode ore angaránone que ore changureta Jesús go
45Diga Dupade iguíjna cuchábi irodisórone ore chajnésaru darósorone. Enga ore irósorone fariséo ore, jec aja sacerdóteode ore catecã́ri darógode enga ore chojninga:
–¿Jé gotique gu a uje que ajnáño Jesús aja de?–
46Mu Dupade iguíjna cuchábi irodisórone ore chojninga:
–Que togome yoque. Arecujaidie chajuque yocagutedie. Uje que uñeque déji ujetiga arecujatígui cho uté arecujaidie quigode.–
47Jecute fariséode ore chojninga:
–¿Ome gotique gu a uje uté sué uacabai ome daringaquérigo to? 48Uacamóño uje que yocangarátique, jé aja fariséode uyoque uñeque changureta uté acajnaquéode. 49Uacamóño uje ayorébui udore que ore chiraja Moisés urusarane quigode. Jecute uté doi enga sué ore gai ome daringaquéode. Mu a Dupade cho dajuñame ore jne.–
50Nicodémo déji fariséode ore gari to. Uté u uje tibágui Jesús iji dejai nanique. Enga uté catecã́ri dojode fariséo ore. 51Enga chojninga:
–Uacarajáyo uje Moisés iroquéode uñai u ujetiga ca yoco yocujuñame gosi ujetiga ca yimóngo bárique cucha. Arei u ujetiga yangácoi ojñane quigode bajaque ujetiga yirajágo ipesutique cucha bajaque.–
52Jé u uje ujode fariséo ore chojninga:
–¿Ja Galiléa gose ua ya uje bãrarare uté gai? Ajire Dupade uruode. Jogadi u ujetiga araja uje que Dupade uruode atatasõre proféta uñeque tṍraji Galiléa.–
53Udojo quigade ga fariséode ore chajni aja daguíjnane jnese.
Currently Selected:
Juan 7: Ayore
Tõsta esile
Share
Copy
Want to have your highlights saved across all your devices? Sign up or sign in
© 2021 Ethnos360