ɛMacu 10
10
ɛYɛso gha Kɛ Karase Ninɔn ne Tom Ɛbhɛ
(ɛMar 3.13-19; ɛLuk 6.12-16)
1ɛYɛso gha ne yel-le ninɔn ne icwam ɛbhɛ ɛnduwubɔ nɛ nibhɛ ifaa na, ɛ nang nibhɛ igbɔm nɛ nibhɛ yaa bhɛ tuul ikpabyik ivebhe, nibhɛ ta tes ninaa nishwa na ihywee-ihywee niken gbik.
2Nibhɛ kaa ne so ɛlɛ:
ɛHaa ɛyisɛ yɛ kaa so ɛSimɔn ne ɛYɛso gha kaa nang ɛbhɛ idɛ irywɛɛk ko
ɛ bok ɛbhɛ ɛBiturus,
ne ɛgwaa ɛbhɛ ɛNdarawus,
ne ɛYakub ne ɛ so ɛngɔn ɛZɛbɛdi,
gbik ne ɛgwaa ɛbhɛ ɛYohana.
3Ne ɛFilibus,
ɛBatɔlɔmi,
ɛToma,
ɛMacu ne ɛ so ɛhaa ne saasel ijam ne ivel,
ɛYakub ne ɛ so ɛngɔn ɛnyi ɛLifiyos,
ɛTadiyus,
4ne ɛSimɔn ne ɛ kaa sim ɛgarang ɛbhɛ gbom,
ɛYahuza ne iSikɔrɔti. Ɛbhɛ kaa ne kyii mɔɔng ɛ rɛp ɛYɛso yegha.
ɛYɛso gha kɛ tom Ninɔn ne iCwam ɛbhɛ Na
(ɛMar 6.7-13; ɛLuk 9.1-6)
5Ninyi ɛnduwubɔ nɛ nibhɛ ifaa yɛnaa wo nang, ɛYɛso gha kaa tom nibhɛ ɛ yaak nibhɛ, “Sɔng ɛbhɛ lel ɛn ɛlɔ ninyi na ne hame nibhɛ so niYahodawa na nang, sɔng ne ɛbhɛ lel ɛn ɛgarang ninyi ne iSamariya gha nang. 6Yang cwi ɛn ɛlɔ ninyi niSɛrɛla na nɛ nibhɛ kɛ biisit te ᐩigyol ntsabhak ge. 7Ya sɛ ɛ kɛ phɛ ɛn no, tɛ nɛ ɛbhɛ tɔng ɛn ibol lɛdee bɛ, ɛ yɔngɔ ɛ: ‘iGbɔm ɛdaa ne irywa da yek cɛcɛk.’ 8Tes ɛn ninaa nisha na niken, semese ɛn ninaa nibhɛ kɛ kus so, tes ɛn nikparong wɛwɛy, tuul ɛn ikpabyik ivebhe da ndɔ ninyi na nɛ nibhɛ bok ko. Sɔng ɛ kɛ tal ɛn ɛkɔn kyi nang nyini nang, sɔng aa ne ma say ɛn ɛkɔn ɛ kyi nang ɛn nang. 9Sɔng nɛ boos ɛn ijam mang, sɔng ɛ me yung boos izinariya, ne ɛzurufa gbik ne itugula nang. 10Sɔng ɛ boos ɛn irambak ndɔ ne ihywel mon da nang, sɔng ne ɛ boos ɛn ɛhak ɛtura nang, sɔng ɛ boos ɛn ihwak ikpikpangat nang, sɔng ne ɛ ta boos ɛn ɛnggbong nang daa ɛli ne ɛhaa ɛtomɛ gha kɛ hɔn sɛ tal ɛbhɛ ilong ɛbhɛ.
11“Gbik ɛgarang ɛndiinday ya, ne ɛgarang ɛshɛɛrɛng nga ne ɛ kɛ bhɛ lel ɛn, cwi ɛbhɛ tɔk ɛn ɛlɔ gha ne ɛ bok irway ne say nyini te nɛ ɛ shɛɛ ɛn ne ɛlɔ yɛ ɛ hyep ɛn ɛtuk ka ne ɛ sɛ tek ɛn ɛgarang ngɛ. 12Yaa ne sɛ ɛ kɛ bhɛ lel ɛn ne ijwee wo te ne ɛ kyili ɛn ninaa ne ijwee yɛ ɛ yɔngɔ, ‘Te irway ne laal ɛTaanggbey shɛɛ ndɔ ne ijwee yɛwoo wo.’ 13Wu ninaa ne ijwee yɛ kɛ ne say nyini, irway ne laal ɛTaanggbey da yaa ne shɛɛ nɛ nibhɛ, wu nibhɛ kɛ ne sang say nyini, sɔng ifɛ yaa ne shɛɛ nɛ nibhɛ nang. 14Gbik ɛgarang nga ne ɛ kɛ ne bhɛ mbaray tang say nyini, ɛ ta mbaray tang phok ibol mon de, te ɛn ɛbung ne ita mon kokok nten de ne aa tek ɛn ɛgarang ngɛghaa nggyɛ wo. 15Nzi ne tɔng nyini itin nɛ, sɛ ne san iyɔm ɛgarang ne iSɔdɔm gbik ne iGomora i phyin ɛgarang ngɛghaa nggyɛ wo ɛtuk ɛshara gha.
Nggbang ne Mpɛ Yaaso
(ɛMar 13.9-13; ɛLuk 12.11-12; 21.12-19)
16“Phok ɛn, nggɛ tom nyini te ᐩigyol ntsabhak ne ihywɛ phɛɛs ɛlɔ nibabu ne izaram. Nɛ te ɛn ntsɛntsɛng te izɔ, te ɛn hywɛɛ te ihywihywaa. 17Wɛɛ ɛn nyini yɛnɛng ɛlɔ ninyi na, nibhɛ sɛ nang nyini ɛlɔ ne itɔrɔng nibhɛ, i ji bhɛ hal nyini ndɔ ne idee ne itsɔɔy nibhɛ de. 18Sɛ ne lenɛ ne me wo, ne hɔ nyini i phɛɛs nɛ ɛlɔ nindiinday gbik nɛ nigɔm, ɛ ji bhɛ tɔng nibhɛ ibol iyɛnɛng ngge, ɛ ta tɔng ɛn ninaa ne hame nibhɛ so niYahodawa na. 19Sɛ ne sɛ nibhɛ kɛ wumus nyini wo, sɔng ɛ sap ɛn ibol de ne aa phɛ bol ɛn nang. Nten nɛdee nggyɛ wo, sɛ bhɛ nang nyini ɛkɔn na ne aa bol ɛn. 20Daa ɛli ne sɔng nyinɛn ˆɛ sɛ bhɛ bol ɛn nang, ikabyik ɛKyɛɛ mon de iphɛ, iphɛ sɛ bol ndɔ mon.
21“Ɛgwaa sɛ nang ɛgwaa ɛbhɛ i phoo ɛbhɛ, ɛKyɛɛ ne nang ɛngɔn ɛbhɛ, ninɔn na sɛ ne bɛɛs nikyɛɛ, nibhɛ te phobho nibhɛ. 22Gbik ninyi na sɛ ne yaa mbaray nyini ɛlɔ me wo, ɛhiha ɛnyi ne ɛ kɛ ne kyinak ne ihwet, ɛbhɛ ɛ sɛ ne iphɔrɔt. 23Sɛ ne sɛ i baasek nyini nggbang ngga ɛgarang nga, ne ɛ tel ɛn ɛ phɛ ɛn ɛhak ɛgarang. Nzi ne tɔng nyini itin nɛ, sɔng ɛ sɛ tel ɛn ɛ taal ɛn nigarang niSɛrɛla na gbik nyɛɛn ɛNgɔn ɛNyi gha kyi yɛɛs sang.
24“Sɔng ɛngɔn ne icwam ma phyin ɛkyɛɛ ne icwam ɛbhɛ gha nang, sɔng ɛkpuru gha ne ma ta phyin ɛkyɛɛ ne ijwee ɛbhɛ gha nang. 25iPhɛ kɛ hɔn ɛNgɔn ne icwam ma nɛ ɛ te tɛ ɛkyɛɛ ne icwam ɛbhɛ gha. iPhɛ kɛ ne ma hɔn ɛkpuru gha nɛ ɛ te tɛ ɛkyɛɛ ne ijwee ɛbhɛ. Wu kɛ yɔngɔ wu ɛkyɛɛ ne ijwee gha soye ɛBɛlizɛbul la, yaa ne yel-le ninaa ne ijwee ɛbhɛ na ne irɛɛk ge ne iphɛ phyin idede nggyɛ wo.
Sɔng ɛ Phok ɛNik ko Nang
(ɛLuk 12.2-7)
26“iPhɛ ɛlɛy, sɔng ne ɛ phok ɛn ɛnik nibhɛ wo nang, sɔng ɛkɔn sonɛ ne kɛ rɛɛ ɛbhɛ ne hame sɛ phaal nang, sɔng ɛkɔn ɛgying ne sonɛ ne hame sɛ seng ɛbhɛ nang. 27ɛKɔn na ne nzi tɔng nyini gying, tɔng ɛn ɛbhɛ wɛsɛrɛk. ɛKɔn na ne nggɛ mɔng nyini ne itsoro, cwi ɛbhɛ wara ɛn daa ɛco nihon ɛ tɔng ɛn. 28Sɔng ne ɛ phok ɛn ɛnik ninyi wo nɛ nibhɛ sɛ phoo ibek ge, nibhɛ sang ji yɛɛ ne phoo iken de nang. Yang phok ɛn ɛnik ɛnyi ne aa yɛɛ ne bees ibek ge gbik ne iken de ndɔ ne ijwee ne igboo wo. 29Nzi bo i byinki nininyooron ifaa i rɛp ikobo idaan nang? Gbik ne iphɛ ɛlɛy sɔng ɛbhɛ ɛdaan ne ho ne ivel tang ne yɛɛ ɛKyɛɛ mon da nang. 30Kɛ ne ku tɔng itsotso ne ito mon da gbik. 31iPhɛ ɛlɛy, sɔng ne ɛ phok ɛn ɛnik ko nang, ɛ phyin ɛn nininyooron na igbom.
Tɔɔl ɛn ɛLi ne ɛ So ɛn Ninaa ɛKiriti Na
(ɛLuk 12.8-9)
32“ɛHiha ɛnyi ne ɛ kɛ tɔɔl wu i soye ɛhaa nge gha ɛnu ɛyisɛ ninyi na, nzɛ ne ma bhɛ tɔɔl wu nzo ɛhaa ɛbhɛ ɛnu ɛyisɛ ɛKyɛɛ nge gha daa ne irywa wo. 33ɛHiha ɛnyi ne ɛ kɛ ne re ishamas nge de ɛnu ɛyisɛ ninyi na, nzɛ ne ma bhɛ re ishamas ɛbhɛ ɛnu ɛyisɛ ɛKyɛɛ nge gha daa ne irywa wo.
Sɔng iRway ne Laal Nang iTsom ne Nggɛ Yɛɛs Nɛ
(ɛLuk 12.51-53; 14.26-27)
34“Sɔng ɛ shɛɛ wɛɛ ɛn te nggɛ yɛɛs ne irway ne laal ɛzay ya nang. Sɔng irway ne laal ne nggɛ yɛɛs nɛ nang, itsom ne nggɛ yɛɛs nɛ. 35Nggɛ yɛɛs ne ishisim ndɔ:
‘ɛNyi na ne ɛkyɛɛ ɛbhɛ,
ɛlap ne ɛgyinɛ,
ɛkuk ne ɛkuk ɛngɔn ɛbhɛ.
36Ninaa ne iphup ɛnyi na
sɛ ne soye ninaa ne ijwee ɛbhɛ.’
37“ɛHiha ɛnyi ne ɛ kɛ sim ɛkyɛɛ ne ɛgyinɛ ɛ phyin ɛli ne ɛ sim me wo, sɔng ɛ kɛ ne hɔn ɛ sɛɛ soye ɛhaa nga nang; ɛhiha ɛnyi ne ɛ ne sim ɛngɔn ɛbhɛ ne ɛlap ɛ phyin ɛli ne ɛ sim mo wo, sɔng ɛ kɛ ne hɔn ɛ sɛɛ soye ɛhaa nga nang. 38Gbik ɛnyi gha ne ɛ kɛ ne sang bo itson ne gangat ɛbhɛ de ɛ kungus me nɛ wo, sɔng ɛ kɛ ne hɔn ɛ sɛɛ soye ɛhaa nge nga nang. 39ɛHiha ɛnyi ne ɛ ne sim iken ɛbhɛ de aa ne wɔs iphɛ, ɛhaa ne kɛ ne wɔs iken ɛbhɛ de ɛlɔ me wo aa ne sɛ iphɛ.
iBol ne iLong ɛRɔngɔ
40“ɛNyi gha ne ɛ kɛ say nyini, me ne ɛ kɛ ne say, ɛnyi gha ne ɛ kɛ ne say me wo, ɛ kɛ ne say ɛnyi gha ne ɛbhɛ kɛ tom me wo. 41ɛNyi gha ne ɛ kɛ say ɛnɛbi gha daa ɛli ne ɛ so ɛnɛbi gha, sɛ ne mɔn ɛbhɛ iyɛnɛng ɛli ne yaa ma mɔn ɛnɛbi gha iyɛnɛng gha nɛ wo. ɛNyi gha ne ɛ kɛ ne say ɛnyi ɛcik ka daa ɛli ne ɛ so cik ko, sɛ ne mɔn ɛbhɛ iyɛnɛng ɛli ne yaa ma mɔn ɛnyi ɛcik ka iyɛnɛng ngge. 42ɛNyi gha ne ɛ kɛ ne nang ɛhaa ne ɛ phyin ne ncɛt ndɔ ninyi nge na ɛhyihyangas ne inɛn ntsentseng, daa ɛli ne ɛ soye ɛngɔn ne icwam ma, nzi ne tɔng nyini itin nɛ, sɔng ɛ sɛ́ ne wɔs iyɛnɛng ɛbhɛ de ne yaa mɔn ɛbhɛ nɛ wo nang.”
Currently Selected:
ɛMacu 10: etxNT
Tõsta esile
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project