ɛLuka 20
20
iPhom daa ne iGbɔm ɛYɛso
(ɛMac 21.23-27; ɛMar 11.27-33)
1Kaa ne sɛ ɛdɛ ɛtuk kɛ, ɛYɛso gha so ndɔ ne ɛsaa ne ideng nga ɛ mɛmɛ ninyi na nɛ ɛ ta i tɔng nibhɛ ibol iyɛnɛng ngge, nindiinday nibo ɛTaanggbey ya nɛ ninaa ne Kpɛl ɛShara gha gbik nɛ Ninu niKɔɔn ɛgarang nga ne bhɛ sɛ ɛbhɛ, 2Nibhɛ ne yaak ɛbhɛ, “Mɔng njwii, ne ncwincway ɛhay ne ɛɛ mɔn nɛ nikɔn nɛnaa woo? ɛHay ɛbhɛ kɛ tom mɛɛ?”
3ɛYɛso gha ne kyii nɛ ɛ yɔngɔ, “Naa ne ma phom nyini idɛ ibol de. Mɔng ɛn mɛɛn, 4ibatisima ɛYohana de kaa le daa ne irywa hang ɛlɔ ɛten ɛsii?”
5Nibhɛ ne bol ndɔ nibhɛ, nibhɛ ne yɔngɔ: “Wu njwɛɛn kɛ yɔngɔ, ‘iPhɛ kaa le daa ne irywa,’ aa ne phom njwɛɛn, ɛ yɔngɔ, ‘iKyee iphɛ kaa ne te ɛ sang nang ɛn ne itin nɛ ne ɛbhɛ woo?’ 6Wu njwɛɛn kɛ ne ta yɔngɔ, ‘iPhɛ kaa le ɛlɔ ɛten ɛsii,’ ninyi na yaa ne phengɛ njwɛɛn daa ɛli nɛ nibhɛ kɛ ku nang ne itin nɛ wu ɛYohana gha so ɛnɛbi.”
7iPhɛ ɛlɛy, nibhɛ ne kyii nɛ nibhɛ yɔngɔ, “Sɔng njwii yɛɛ ɛlɔ gha ne iphɛ kaa le nang.”
8ɛYɛso gha ne ma yaak nibhɛ, “Sɔng naa ne ma mɔng nyini ncwincway ɛnyi ba ne nzi mɔn nɛ nikɔn nɛnaa wo nang.”
iBol Ninaa ne Wɛɛ iHwap
(ɛMac 21.33-46; ɛMar 12.1-12)
9ɛYɛso gha ne tɔng ninyi na ibol ne igɔrɔp pɛdee: “ɛDɛ ɛnyi gha kaa hap ihwap ne itson ɛnap ɛ nang nidɛng ninyi na wu tɛ nibhɛ wɛɛ ye nɛ. Ɛ ji hyel ihywel ɛbhɛ phyɔngɔle nɛ. 10Kɛ ne sɛ nten ne bon ikpam ne itson ɛbhɛ ba kɛ tuu, ɛnyi gha ne tom ɛkpuru ɛbhɛ ɛlɔ ninaa ne wɛɛ ɛbhɛ ihwap ba, wu tɛ nibhɛ bhɛ nang ɛbhɛ ikpam ba. Ninaa ne wɛɛ ihwap ba ne bhɛ hal ɛkpuru gha nibhɛ kyii ne ɛbhɛ buu. 11ɛNyi gha ne ta tom ɛhak ɛkpuru dɔng. Ninaa ne wɛɛ ihwap ba ne ta bhɛ hal ɛbhɛ dɔng, nibhɛ bak ɛbhɛ ncwa, nibhɛ ta kyii ne ɛbhɛ buu wo dɔng. 12Ne ɛ ta tom ɛhaa ne itwat tɛ, nibhɛ ne bhɛ phok ɛbhɛ ikpom nibhɛ hana ɛbhɛ gɔɔ.”
13“ɛNyi ne ihwap ne itson na ne ji yɔngɔ, ‘Naa ji mɔn ɛli daa mɛɛ? Naa ne tom ɛngɔn nge ne nzi sim, yaa rɔk nibhɛ ji bhɛ nang ɛbhɛ ne ndiinday.’
14“Kɛ ne sɛ ninaa ne wɛɛ ihwap ba kɛ yaang ɛngɔn ɛnyi gha nang, nibhɛ bol lenɛ nibhɛ yɔngɔ, ‘Yaa! Ji so ɛhaa ne re isha yɛghaa wo, njwɛɛn te phoo ɛbhɛ te ihwap ba ku teye ivaa njwɛɛn.’ 15iPhɛ ɛlɛy yang, nibhɛ ne wum ɛngɔn na, nibhɛ wuru nɛ ndɔ ne ihwap ba, nibhɛ bhɛ phoo ɛbhɛ gɔɔ.”
ɛYɛso gha ne phom nibhɛ ɛ yɔngɔ, “iKyee ne ɛhaa ne ihwap pa yaa ne ji mɔn nibhɛ nɛɛ? 16Aa yɛɛs ɛ phobho ninaa ne wɛɛ ihwap pɛdaa nggyɛ wo ɛ ji nang nihak ninyi ihwap pɛ.”
Kɛ ne sɛ ninyi na kɛ phok ɛlɛ wo, nibhɛ ne yɔngɔ, “Njwii bo wu hang ihywee ɛkɔn nɛdee wo sɛɛ te.”
17ɛYɛso gha ne yɛɛn nibhɛ, ne ɛ ji phom nibhɛ ɛ yɔngɔ, “Ɛ wɛɛ ɛn te ibol lɛdee wo ne kɛ haa ndɔ ne ɛWee ne iBol ɛTaanggbey yo i bo ɛlii? iBol de ne iphɛ bo,
‘iKɛɛ de nɛ ninaa ne lɔl ijwee na kɛ mbaray yo,
iphɛ phɛ kɛ ne kyii teye ɛkangashi yɛwoo.’
18Gbik ɛnyi gha ne ɛ kɛ ho daa ne ikɛɛ yɛdee nggyɛ wo, aa ne tselem me inggbuk-inggbuk. Wu ikɛɛ yɛ kɛ ne ho daa ɛnyi nang, iphɛ yaa ne nzɛɛng ɛbhɛ ɛ teye ntsɛk kɛ.”
iPhom daa ne iJam ne iVel
(ɛMac 22.15-22; ɛMar 12.13-17)
19Ninaa ne Kpɛl ɛShara gha gbik nɛ nindiinday niBo na ne yaa tɔk ɛli nɛ nibhɛ sɛɛ shii wum ɛYɛso yegha daa ɛli nɛ nibhɛ kɛ seng wu ɛYɛso gha kɛ bol ibol ne igɔrɔp ɛbhɛ de daa ne ito nibhɛ, nibhɛ ne kyii phok ɛnik ninyi wo.
20iPhɛ ɛlɛy yang nibhɛ ne i tɔk nkpiinɛ yɛ. Nibhɛ ne ji tal nidɛng ninyi na ijam tɛ nibhɛ luk wu i so ninyi niyɛnɛng. Nibhɛ ne ji tom ninyi yɛnaa nggyɛ ɛlɔ ɛYɛso gha tɛ nibhɛ bhɛ ten ɛbhɛ ndɔ ne iphomos ivol nibhɛ ne wum ɛbhɛ nibhɛ ji nang igbɔm ne iRooma da. 21Ninyi na ne kɛ tom nibhɛ ɛlɔ ɛYɛso gha ne phom ɛbhɛ idɛ ibol de, nibhɛ yaak ɛbhɛ, “ɛKyɛɛ ne iCwam, njwii ku yɛɛ ivol da ne ɛ mɛmɛ nɛ wo ɛ ta i tɔng so itin nɛ. Njwii ne ta yɛɛ sɔng ɛ ta sim ito nang, ɛ tɔng ninyi na ibɔrɔk ne ibol ɛTaanggbey de. 22iPhɛ kɛ ne jam mɛ njwi tal ɛKɛɛsat tegha ijam ne ivel dee hang iphɛ kɛ ma sang jam mɛ?”
23ɛYɛso gha ne seng ntsɛntsɛng nibhɛ de gbik ne ɛ yaak nibhɛ, 24“Yung tɔɔrek ɛn mɛɛn idɛ jam mon de. iZazurum ɛhay, ne irywɛɛk ɛhay ne phɛ sonɛ woo?”
25Nibhɛ ne kyii nɛ, nibhɛ yɔngɔ, “iZazurum ɛKɛɛsat ne, irywɛɛk ɛbhɛ iphɛ sonɛ.”
ɛYɛso gha ne yaak nibhɛ, “Ne ɛ nang ɛn ɛKɛɛsat tegha ɛkɔn na ne ɛ so ɛhaa ɛbhɛ ɛ ma nang ɛn ɛTaanggbey yegha ɛhaa ɛbhɛ ne mang.”
26Sɔng nibhɛ ne yɛɛ ne wum ɛYɛso yegha daa ne ibol de ne ɛ kɛ boote kpas so nang. Nibhɛ ne yaang ɛkɔn ne kparat daa ne ibol de ne ɛ kɛ kyii nibhɛ nɛ wo, nibhɛ ne te nggbyak.
iPhom ɛLi ne sɛ Yiisitsik ne iKpuu
(ɛMac 22.23-33; ɛMar 12.18-27)
27Nidɛng ndɔ niSadukyawa na nɛ nibhɛ bo wu hang ninyi na sɛ kyii ta bhɛ yilitsik ndɔ ne ikpuu ba, ne bhɛ sɛ ɛYɛso yegha, nibhɛ yaak ɛbhɛ,#20.27 Ta yɛɛn: ɛTom 23.8. 28“ɛKyɛɛ ne iCwam, ɛMuusaa gha kaa haa njwii ɛshara gha ɛ yɔngɔ, wu ɛnyi kɛ ku ɛ tek ɛkuk ɛbhɛ tang ɛngɔn te ɛgwaa ɛbhɛ ne bo ɛkuk kɛ ɛ yɛk ɛgwaa ɛbhɛ gha nɛ ninɔn. 29Nidɛng nigwaa na kaa sonɛ nibhɛ ɛniitaa. Ɛkɔɔn nɛ kaa ne tul ɛkuk ne ɛ phyii ku tang ɛngɔn. 30ɛHaa ne ifaa yɛ ne bo ɛkuk ka ne ɛ ma ta ku tang ɛngɔn na. 31ɛLɛy ne ɛhaa ne itwat tɛ. Nigwaa ɛniitaa yɛnaa nggyɛ wo ne shɛɛ ne ɛkuk ka gbik nibhɛ ne phyii kus, sɔng ɛdɛng kɛ yɛk ɛbhɛ ɛngɔn nang. 32ɛTsim mɛ gbik ɛkuk ka ne ma ji ku. 33Sɛ ne sɛ ninyi na kɛ bhɛ yilitsik ne ikpuu ba, ɛkuk ka sɛ ne ji bhɛ soye ɛhaa ɛhay ndɔ nibhɛ ɛniitaa na, nɛ nibhɛ kɛ boos ɛbhɛ gbik koo?”
34ɛYɛso gha ne kyii nɛ ɛ yɔngɔ, “Ndɔ ne izam mɛdee wo, ninyi na tuul nikuk, nibhɛ ne maa naas ninɔn nibhɛ. 35Niras sa nɛ nikuk ka ne i yaang tɛ nɛ nibhɛ kɛ hɔn nibhɛ sɛ bhɛ yilitsik ne ikpuu ba ɛzay ya ne ɛ yaaso wo, sɔng nibhɛ sɛ ne bhɛ tuul nikuk nibhɛ kyi ta naas ninɔn nibhɛ nang. 36Nibhɛ sɛ tes tɛ niMalɛka sɔng iku sɛ ne tang sɛ nibhɛ nang. Nibhɛ sɛ ne tes se ninɔn ɛTaanggbey daa ɛli nɛ nibhɛ kɛ yiisitsik ndɔ ne ikpuu ba. 37ɛMuusaa gha kɛ ku phaal ibol ne yilitsik ne ikpuu de wɛsɛrɛk ndɔ ne ibol ne igboo de ne ifɛ kaa re ihon no, ne ɛ kaa boote daa ne ito ɛDaray de ɛ yɔngɔ ɛbhɛ so ɛTaanggbey ɛBaraying ne ɛhaa ɛShaaku, gbik ne ɛhaa ɛYakub. 38Sɔng ɛTaanggbey ya so ɛTaanggbey ne ikpom nang, ɛ so ɛhaa ne ninyi niken. iPhɛ kɛ tɔɔrek gbik ninyi na sos niken ɛlɔ ɛbhɛ gha.”
39Nidɛng, ndɔ Ninaa ne Kpɛl ɛShara gha ne boote nibhɛ yɔngɔ, “Ɛ kɛ mɔng itin nɛ ɛkyɛɛ ne icwam ɔɔy!” 40Kɛ ne lɛ nɛ ɛnggyɛ wo nang sɔng ɛdɛ ɛnyi ne tang phom ɛYɛso yegha ihak ibol nang.
iPhom daa ɛKiriti
(ɛMac 22.41-46; ɛMar 12.35-37)
41ɛYɛso gha ne phom nibhɛ ɛ yɔngɔ, “Yaa mɔn ɛlii i yɔngɔ ɛKiriti gha so ɛngɔn ɛDoda ghaa?” 42ɛDoda gha ne ito ɛbhɛ, ɛ kaa boote ndɔ ne ɛWee ne iYwel, ɛ yɔngɔ,
“ɛDaray ya kɛ yaak
ɛDaray nge gha,
‘Soos ne iwɔ ne irwye nge,
43te nggyi yɛk ninaa
ne iphup mo na nɛ
kyii ndɔ ɛhyay ne icwa mo.’ ”
44“ɛDoda gha kɛ yel-le ɛKiriti yegha ‘ɛDaray.’ Yaa ne mɔn ɛlii ɛKiriti gha kyii ta so ɛngɔn ɛDoda ghaa?”
ɛYɛso gha kɛ Phaal ɛDuk Nindiinday niYahodawa na
(ɛMac 23.1-36; ɛMar 12.38-40; ɛLuk 11.37-54)
45Kɛ ne sɛ ninyi gbik i tenes ɛYɛso yegha ne ɛ yaak ninɔn ne icwam ɛbhɛ na, 46“Wɛɛ ɛn nyini yɛnɛng ɛlɔ Ninaa ne Kpɛl ɛShara gha. Nibhɛ sɔsɔɔy igbaang ne itsura cɛcɛɛy, nibhɛ ne ji sim te sɛɛ kyiisi nibhɛ, ta naas nibhɛ ne ndiinday ndɔ nitungga. Nibhɛ ne ta i sim tɛ nibhɛ sɛ sooset nilɔ ninu nikɔɔn ndɔ ne itsɔɔy, nibhɛ ta i kasa nilɔ ne igbaang ninyi nibhɛ sooset nɛ ne ijwira. 47Nibhɛ bhɛ i re nikɔn niKusang, nibhɛ ne ji kyangas en nibhɛ roro ne ɛTaanggbey wu te yɔngɔ wu nyin i yɛɛ ɛTaanggbey yegha i shɛs. iHywɛɛ ninyi yɛdee wo sɛ ne bhɛ sɔ ɛgbaang nggbang.”
Currently Selected:
ɛLuka 20: etxNT
Tõsta esile
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project